Haaro Massagaanchonna Lame Worbuulle Meento

Iyyaasu Maganu manna lowo diro massagi gedensaanni, 110 dirihu heeꞌre reyino. Isi lubbote noo geeshsha Israeele Yihowa magansidhino. Kayinni Iyyaasu reyi gedensaanni, insa Kanaani manni gede kaphu maganna magansiꞌra hanaffu. Yihowa Israeele Isira hajajama gibbino daafira, Yaabiini yinannihu Kanaani moote qarrisansara wore aguri. Hakkiinni Israeelete manni Yihowa kaaꞌlannonsa gede huucciꞌri. Konni daafira Isi Baarqi yinanniha haaro massagaancho doorinsa. Baarqi Israeelete manni Yihowawa higanno gede kaaꞌlino.

Yihowa coyiꞌrinore Baarqira kultannoti Diboora yinanni masaalaancho no. Mitto barra ise Baarqira marte togo yitu: ‘Yihowa togo yiinohe: “Yaabiini olanto Qishooni Lagiwa daggannona, 10,000 manna haadhe hakkira haꞌri. Hakkiicho Yaabiini olanto hajajaancho Sisaara qeelatto.”’ Baarqi Diboora ‘Ati ledoꞌya haꞌrattaha ikkiro haꞌreemmo’ yiise. Ise togo yitusi: ‘Maahoyye, haꞌra ledokki haꞌreemma. Kayinni Sisaara shaattohu diateeti. Yihowa Sisaara meyati shitanno yiino.’

Diboora olaho qixxaawate Baarqinna olantosi ledo Taaboori Ilaali geeshsha hadhu. Sisaara tenne macciishshanni heeꞌrenni, olu faradi-gaaresinna olantosi gamba assiꞌre xeicho dirri. Diboora Baarqi ‘Yihowa Sisaara angakkira sayise aannohe barri konneeti’ yitusi. Baarqinna ledosi noohu 10,000 manni Sisaaranna wolqaataame olantosi ledo olantara ilaalunni dirritu.

Hakkiinni Yihowa Qishooni Lagi woꞌmanno gede assi. Sisaarata olu faradi-gaare lixu amadi. Isi faradi-gaaresi hune xooqi. Baarqinna olantosi Sisaara olanto qeeltu; Sisaara kayinni xooqe bai! Isi xooqanni mare Iyaeeli yinanni mancho dunkaana eꞌꞌe maaxami. Hakkiinni ise ado uyiteennasi agihu gedensaanni uddano dibbe maaxxusi. Sisaara daafurino daafira goxe bai. Hakkiinni Iyaeeli sununni ikkite marte qontichisira bila qasse meenchunni gantu. Hakkiinni Sisaara reyi.

Baarqi Sisaara shorranni Iyaeeli dunkaaniwa mari. Iyaeeli dunkaanu xullichira uurrite Baarqira, “Amo hasiꞌrootto mancho leellisheemmahena” yitusi. Baarqi dunkaanu giddora eanno woyite Sisaara reye fetekerri yee no. Baarqinna Diboora, Yihowa Israeele diinnansa qeeltanno gede assino daafira Iso faarsotenni guwisidhu. Hakkuyi gedensaanni Israeelete manni 40 diro salaametenni heeꞌri.