Gedewooni Midiyaami Daga Qeeli

Israeelete manni Yihowa agure kaphu maganna magansiꞌra hanafi. Midiyaami daga lamala diro woꞌma Israeelete saada moortino, hattono wixidhino wixa coꞌo assite huntino. Israeelete manni Midiyaami daga shitannonsakki gede goddate giddonna ilaallate aana maaxamanno. Insa Yihowa gatisinke yite huuccidhu. Konni daafira, Yihowa Gedewooni yinanni manchiwa sokkaasincho soyi. Sokkaasinchu Gedewooni, ‘Yihowa worba olamaancho asse doorinohe’ yiisi. Hakkiinni Gedewooni, ‘Ani woꞌmunkura woriidiha ikkoommo daafira, Isiraeele gatisa didandeemmo’ yii.

Gedewooni Yihowa doorinosita ma garinni afino? Gedewooni geꞌreewu orda ayiddummete wore Yihowa togo yii: ‘Gaꞌa soodo baatto baala moola ikkiteenna orda callate aana loju heeꞌrannoha ikkiro, Israeele gatisate ane dooroottoeta afeemmo.’ Layinki soodo orda gudisante shantino; baatto kayinni moolte no! Layinki barra Gedewooni Yihowa, ‘Hanni tenne baatto loja ikkiteenna orda moola ikkitanno gede assi’ yii. Gedewooni yiinori xaano ikki; konnira isi Yihowa doorinosita ammani. Isi Midiyaami daga ledo olamara olanto gamba assi.

Yihowa Gedewooni togo yii: ‘Israeele Midiyaami daga qeeltanno gede asseemmo. Kayinni olanto batidhino daafira, umiꞌne wolqanni qeeltinoonniha lawaꞌnera dandaanno. Waajjinohu nooro agure higanno gede kuli.’ Konni daafira, 22,000 olanto qaera agurte higgeenna 10,000 gattu. Hakkiinni Yihowa togo yii: ‘Xaano olanto batidhe noona, insa wayi laga haadhe massite waa agganno gede kulinsa. Waa agganno woyite diinnansa layidhanni aggannore calla haadhe haꞌri.’ Insa giddo waa aggu woyite diinnansa layidhanni agginori 300 manna callaho. Yihowa kuni shiimu manni 135,000 ikkitannota Midiyaami olanto qeelanno gede asseemmo yii.

Hakko hashsha Yihowa Gedewooni, ‘Xa Midiyaami manna angaꞌnera sayise eemmoꞌne!’ yii. Gedewooni olantosira xurumbanna kiffala giddo worroonni maaqqe uyinsa. Gedewooni olantosi ‘Asseemmore seekkitine laꞌine, ani assummo gede asse’ yii. Gedewooni xurumba ufuufi, maaqqichosino hiiqqi, hattono kiffalchosi kayise ‘Yihowanna Gedewooni bise!’ yee cance coyiꞌri. Hakkiinni 300 olantosi baalu isi assinore assitu. Midiyaami daga bararraaqqe addi addi raga higge xooqqu. Insa mimmito bagadunni qassu. Konni garinni Yihowa Israeele diinnansa qeeltanno gede kaaꞌlinsa.