Yihowa Samisoni Wolqaataamo Assino

Lowohu Israeelete manni xaano Yihowa agure kaphu maganna magansiꞌrate higi; konni daafira Yihowa Filisxeemete dagara sayise uyinsa. Ikkollana Israeelete mereero Yihowa baxanno manni no. Yihowa baxanno manni giddo mittu Maanuheeti. Isinna galtesi ooso diꞌꞌilino. Mitto barra Yihowa Maanuhe galtewa sokkaasincho soyi. Sokkaasinchu togo yiise: ‘Labbaa beetto ilatta. Isi Israeele Filisxeemete anganni gatisanno. Isi Naaziricha ikkanno.’ Naazirichu maatiro afootto? Naazirichu Yihowara baxxino soqqamaanchooti. Naazirichu umo meexxa dihasiissannosi.

Yannate gedensaanni Maanuhe labbaa qaaqqo ili; isira suꞌma Samisoni yee fushshi. Samisoni lophita, Yihowa wolqaataamo assisi. Isi anga callatenni doobbiicho shiino. Mitte hige callichisi 30 Filisxeemete manna shiino. Filisxeemete manni iso giwino daafira, shaasira hasiꞌri. Mitto hashsha Samisoni Gaaza yinanni katami giddo goxe heeꞌreenna Filisxeemete manni soodiro shaasira katamu xullichira agarisi. Kayinni Samisoni hashshu taalo goxinowiinni kae katamu xullichiwa mari; xullichu cufana buqqi asse kayise haaꞌre haꞌri. Hakkiinni cufana qoteho duhe Kebirooni yinanni ilaali mule masse hunino!

Samisoni Daliila yinanni beetto adhara layiꞌri; yannate gedensaanni Filisxeemete manni isewa mare togo yii: ‘Samisoni wolqaataamo assinosiri maatiro xaꞌmite afittaro, lowo birra uyineemmohe. Ninke iso amande usuru minira eessa hasiꞌnoommo.’ Daliila woxe afiꞌra hasidhino daafira maahoyye yitu. Umi qara Samisoni wolqaataamo assinosiri maatiro kula giwise. Ikkollana, Daliila fojosi xawo fushshitara kulie yite uurranna ofolla hoꞌlitusi. Hakkiinni Samisoni togo yiise: ‘Naaziricha ikkoommo daafira umo meende diegenninoonnie. Umoꞌya meendiro wolqaꞌya baꞌanno.’ Samisoni isera hatto yee kulasi soꞌrote; dihattooti?

Daliila bayichonko Filisxeemete mannira ‘Wolqaataamo assinosiri maatiro afoomma!’ yitu. Ise Samisoni giwoodise aana goxisse mittu manchi umosi meedanno gede assitu. Hakkiinni ‘Samisoni, Filisxeeme dagguhe!’ yitusi. Samisoni goxichunni baqqi yaanno woyite, wolqasi baꞌino. Filisxeeme amadde illesi fushshite usuru minira eessitusi.

Mitto barra lowo Filisxeeme Daagooni yinanni maganinsa mine gamba yite heedhe togo yitu: ‘Maganinke Samisoni angankera sayise uyinonke! Albankeenni godoꞌlanni ososhshiishonkena fushshitine abbe!’ Hakkiinni iso tuuqqate mereero uurrise osoꞌlitusi. Samisoni, ‘Yihowa, eeggatena mitte higge calla wolqa uyie’ yee huucciꞌri. Hatte yannara Samisoni dananchi galagale lophe no. Isi noosi wolqa baalatenni tuuqqa xiiwi. Hakkiinni minu aanansa toeenna hakko noo manni baalu reyi; Samisonino ledonsa reyino.