Yihowata Giirate Olanto

Sooriyu moote Benihadaadi Israeele qasa diagurino. Ikkollana masaalaanchu Elsai, Israeelete moote maaxamanno gede duucha hige kulinosi. Konni daafira Benihadaadi Elsai qafade haaꞌre haꞌrara hedino. Benihadaadi Elsai Dootaani yinanni katamira noota afi; hakkiinni Sooriyu olanto iso amadde abbitara soyi.

Sooriyu olanto hashsha Dootaani katama iillitu. Layinki soodo, Elsai soqqamaanchi gobbara fulanno woyite katama olanto doyissite no. Isi lowo geeshsha waajjino daafira Elsaira togo yii: ‘Elsai, ma assinummoro woyyanno?’ Elsai qole, ‘Ninke ledo noo olanto insa ledo noota roortanno’ yiisi. Hakkiinni Yihowa, Elsai soqqamaanchi ilaalu aana lowo faradinna giirate faradi-gaare noota laꞌꞌanno gede assi.

Sooriyu olanto Elsai amaddara dagguta isi togo yee huucciꞌri: ‘Yihowa, ballo konne manna ille ballisi.’ Hakkawoyintenni, insa laꞌꞌa dandiitannoha ikkirono, noowi bainsa. Elsai togo yiinsa: ‘Doogo sodhinoonni. Hasidhinoonni katami konne diꞌꞌikkino. Hasidhinoonni manchiwa haaꞌre masseemmoꞌnena hoodeꞌya amme.’ Hakkiinni olanto Elsai hoode hadhe, Samaariyu katama iillitu; Israeelete moote heeꞌrannohu Samaariyu katamiraati.

Gedensaanni Sooriyu olanto mama nooro affu. Israeelete moote, ‘Tenne olanto shooni?’ yee Elsai xaꞌmi. Elsai tenne faro horoonsiꞌre iso shaara hasiꞌrino manna rabbisiꞌrate hedinoni? Dihedino. Isi togo yiino: ‘Shitootinsa. Ittannorenna aggannore uyite gobbansa haꞌrisi.’ Konni daafira, Israeelete moote lowo jila jile itisinsa gedensaanni gobbansa haꞌrisino.