Daanieeli Doobbiyu Balera Tungi

Wolu Baabiloonete moote Medoonichu Daariyoosiiti. Daariyoosi, Daanieeli dancha mancho ikkinota afino. Daariyoosi iso mannaho roorricha asse shoomino. Kuni manni Daanieeli hinaasse, iso shiishiisha hasidhino. Insa, Daanieeli barrunni sase hige Yihowa huucciꞌrannota affino; konni daafira Daariyoosira togo yitu: ‘Moote, mannu baalu ate agurranna wole huucciꞌrannokki gede seera fushshi. Konne seera agadhannokki mancho doobbiyu balera tunganni.’ Hakkiinni Daariyoosi maahoyye yee hakko seerira furma gani.

Daanieeli konne seera fushshinoonnita macciishshanni heeꞌrenni minisira haꞌri. Isi faꞌnantino maskoote albaanni guluphe Yihowa huucciꞌri. Iso hinaassuri hedeweelcho minisira eꞌe huucciꞌranna laꞌu. Hakkiinni insa Daariyoosiwa doddanni marte togo yitu: ‘Daanieeli atera hajajama giwe barrunni sase hige Maganosi huucciꞌranni no.’ Daariyoosi Daanieeli baxanno daafira iso shaa dihasiꞌrino. Isi barra woꞌma Daanieeli gatisanno gara hedanni hosi. Kayinni moote nafa fushshino seera soorra didandaanno. Konni daafira isi Daanieeli waajjishanno doobbiyi noo balera tunganni gede hajaji.

Hakko hashsha Daariyoosi Daanieeli daafira yaadanni goxikki galino. Soodita, isi dodanni doobbiyu balewa mare, ‘Daanieeli!’ yee woshshe ‘Maganikki gatisihe?’ yee xaꞌmisi.

Daariyoosi Daanieeli huuro macciishshi! Daanieeli Daariyoosira togo yii: ‘Yihowa sokkaasinchi doobbiyu afoo cufino. Doobbiyu kisa nafa dikisinoe.’ Daariyoosi lowo geeshsha hagiidhi! Hakkiinni isi Daanieeli balete giddonni fushshinanni gede hajaji. Bisisi aana hili bicamme nafa dino. Hakkiinni Moote Daariyoosi, ‘Daanieeli kassasi manna doobbiyu balera tugge!’ yee hajaji. Hakkonne manna balete tunganni heeꞌneenna doobiyu biilla biinxa fushshe itino.

Hakkiinni Daariyoosi manna togo yee hajaji: ‘Baalunku manni Daanieeli Magano waajja hasiissannonsa. Isi Daanieeli doobbiyu afiinni gatisino.’

Atino Daanieeli gede Yihowa barru baala huucciꞌratto?