Elsaabeexi Qaaqqo Iltu

Yerusaalamete huxxa galagalle huxxininku 400 diro saino. Yerusaalamete katamira Zakkaariyaasi yinanni kakkalaanchi no; isira Elsaabeexi yinanni galte noosi. Lamunku adhaminku lowo diro ikkirono ooso diꞌꞌilino. Mitto barra Zakkaariyaasi qullaawu mini giddo hixaana giiranni heeꞌreenna, Gebirieeli yinanni sokkaasinchi isiwa dayi. Zakkaariyaasi lowo geeshsha waajji; sokkaasinchu kayinni togo yiisi: ‘Waajjitooti. Yihowawiinni dancha duduwo haaꞌre dayoommohe. Galtekki Elsaabeexi labbaa qaaqqo iltanno; suꞌmasino Yohaannisi yine fushshinanni. Yihowa Yohaannisi baxxino looso loosanno gede doorino.’ Zakkaariyaasi togo yee xaꞌmi: ‘Konne coye hiitto ikke ammaneemmo? Aninna galteꞌya geedhinoommo daafira ooso ila didandiineemmo.’ Gebirieeli togo yiisi: ‘Konne duduwo kuleemmohe gede soyinoehu Maganoho. Ati kayinni kuloommohere ammana giwootto daafira, qaaqqu ilama geeshsha danqicha ikkatto.’

Zakkaariyaasi hakko barra qullaawu mini giddo albinni roore keeshshino. Gedensaanni Zakkaariyaasi qullaawu mininni fulanno woyite, mannu ikkinore xaꞌmasira gobbaanni agare no. Zakkaariyaasi kayinni coyiꞌra didandiino. Isi angatenni calla malaatisi. Hakkiinni mannu iso Maganu hasaawisinosita wodanchino.

Yannate gedensaanni sokkaasinchu yiinonte gede, Elsaabeexi godobbe labbaa qaaqqo iltu; jaallasenna fiixise ise hobbaate haaꞌrara dayi. Insa Elsaabeexi qaaqqo iltino daafira lowo geeshsha hagiidhino. Elsaabeexi, ‘Suꞌmisi Yohaannisiiti’ yitu. Insa kayinni togo yiise: ‘Fiixikki giddo Yohaannisi yinannihu dino. Konni daafira qaaqqoho annu suꞌminni Zakkaariyaasi yite fushshi.’ Zakkaariyaasi kayinni, “Suꞌmisi Yohaannisiiti” yee borreessi. Hatte yannara, Zakkaariyaasi galagale coyiꞌra hanafi! Yihudaho heeꞌranno manni baalu hakko qaaqqi duduwo macciishshi; qoleno ‘Kuni qaaqqi lophiro hiittooha ikkanno ikka?’ yee hedino.

Hakkiinni Zakkaariyaasira qullaawu ayyaani dirrisi. Isi togo yee masaalo coyiꞌri: ‘Yihowa maassamo! Isi Abirihaamira “Gatisaanchonna Mesihicha soyeemmo” yee qaale eino. Yohaannisi masaalaancho ikkanno; hattono isi Mesihichaho doogo qixxeessanno.’

Elsaabeexi fiixa ikkitinote Maariyaamirano dhagge ikkannori iillinose. Aante noo xaggera tenne daafira ronseemmo.