Yesuusi Rosaanora Qullaawu Ayyaani Dirri

Yesuusi iimira haꞌrihunni tonnu barri gedensaanni rosaanosira qullaawu ayyaani dirrinsa. Kuni ikkinohu 33 M.D., Phenxeqosxete barraati; hakko barra ayyaana ayirrisara batinye gobbanni dayino manni Yerusaalamete no. Hakkiicho 120 ikkitannori Yesuusi rosaano fooqete mine gamba yite no. Hedeweelcho mittu dhagge ikkanno coyi ikki. Mitte mittente rosaano umira giirate buwano lawannori dirrinsa; hakkiinni baalunku babbaxxino qaalinni coyiꞌra hanaffu. Hombobalattete gede luulu mine woꞌmi.

Wole gobbanni Yerusaalame dayino manni luulo macciishshe ikkinore laꞌꞌara dodanni hakkira mari. Mannu, rosaano babbaxxino qaalinni coyidhanna macciishshe dhagge assiꞌrino. Togo yiino: ‘Kuni Galiilu mannaati. Kayinni ninke afoo coyiꞌra dandiinohu hiittoonniiti?’

Hakkiinni Pheexiroosinna wole soqqamaasine mannu baalunku albaanni uurritu. Pheexiroosi Yesuusi shinoonni garanna Yihowa reyotenni kayisinosi gara mannaho kuli. Togo yiino: ‘Xa Yesuusi iima Maganu qiniiteenni no; qoleno dirriseemmo yee qaale eino ayyaanano dirrisino. Tenne maalale laꞌinoonnihunna macciishshitinoonnihu iseraati.’

Mannu Pheexiroosi coyiꞌrinore macciishshe lowo geeshsha dhagge assiꞌre, “Xa ma assino?” yii. Isi togo yiinsa: ‘Cubbiꞌnera maaro eꞌine Yesuusi suꞌminni cuuamme. Hakkiinni qullaawu ayyaani elto adhitinanni.’ Hakko barra 3,000 meddi yaanno manni cuuamino. Hatte yannanni kayise, Yerusaalamete katamira rosaanote kiiro rakke lexxitanni hadhino. Soqqamaasine, Yesuusi hajajinonsare baala rosaanote rosiisa dandiitanno gede, qullaawu ayyaani kaaꞌlonni duucha songuwa xintitino.