XIINXALLO 19
Macciishshaanote Wodana Kakkayisa
Lawishsha 3:1
ASSA HASIISSANNOHERE: Macciishshaano rossanni noore naaddannonna heeshshonsa giddo harunsitanno gede kaaꞌli.
KONNE ASSA DANDAATTO GARA:
Macciishshaano insaneeto layidhanno gede assi. Macciishshaano wodaninsa hedo hiittootero layidhanno gede kaaꞌlitanno xaꞌmuwa xaꞌmi.
Macciishshaano ammanattota leellishi. Insa dancha looso loossannohu mayiraatiro heddanno gede assi. Togo assitanno gede kakkayisannonsahu Yihowara, mannahonna Qullaawu Maxaafi halaalira noonsa baxille ikka hasiissannota huwattanno gede kaaꞌli. Macciishshaano heeshshi gotti assite heddanno gede kaaꞌli ikkinnina, murrissooti. Saaltanno gede assitooti; hatteentenni lallawotenni jawaante afidhe dandaaminsare baala assate kaꞌanno gede kaaꞌli.
Yihowa aana illachishshanno gede assi. Qullaawu Maxaafi rosi, xintu seerinna hajajo Maganu akattanna ninkera noosi baxille leellishshannohu hiittoonniitiro xawisi. Macciishshaano Yihowa hedo affannonna iso hagiirsiisa hasidhanno gede kaaꞌli.