ROSO 10
Yihowa Farciꞌraasine Gambooshshe Haꞌra Kaaꞌlitannohehu Hiittoonniiti?
Yihowa Farciꞌraasine gambooshshe hadhe egennootto? Hadhe egennoottokkiha ikkiro, mite yite haꞌrate hedatto woyite mito geeshsha waajjattoha ikkara dandaanno. Togo yite hedattohano ikkara dandaanno: ‘Yihowa Farciꞌraasine gambooshshiwa maa maa assinanni? Kuni gambooshshi hasiisannohu mayiraati? Konne gambooshshe haꞌra hasiissannoehu mayiraati?’ Konni rosira, gambooshshu Maganunniwa albinni roore shiqatto gedenna heeshshokkira kaaꞌlannohehu hiittoonniitiro rosatto.
1. Yihowa Farciꞌraasine mitteenni gamba yitannohu mayiraati?
Mittu Qullaawu Maxaafi borreessaanchi mitteenni gamba yineemmo gede assannonkeha qara korkaata kulanni togo yiino: “Kaaliiqa ate, songote mereero galaxxeemmohe.” (Faarso 26:12) Xaa yannarano Yihowa Farciꞌraasine mitteenni gamba yaansa lowo geeshsha hagiirsiissannonsa. Alamete doyichora, insa Magano guwisiꞌrate, faarso faarsiꞌratenna huuccatto assiꞌrate mitteenni gamba yitanno. Qoleno diru dirunku jajjabbu gambooshshiwa Magano magansidhanno.
2. Gambooshshenke dayittoro maa rosatto?
Gambooshshinkewa Maganu Qaale ronseemmo; qoleno ‘buunxeemmo gede Qaale tittirre kullanninke.’ (Nehimiya 8:8 nabbawi.) Gambooshshenke dayittoro, Yihowarenna dhagge ikkitanno akattasi daafira rosatto. Isi mageeshshi geeshsha baxannohero huwatitto kiiro, isiwa albinni roore shiqatto. Qoleno Maganu hagiirru noo heeshsho heeꞌratto gede kaaꞌlannohe gara rosatto.—Isayaasi 48:17, 18.
3. Gambooshshinkewa xaadatto manni kaaꞌlahera dandaannohu hiittoonniiti?
Yihowa ‘baxille afiꞌratenna dancha looso loosate mimmitonke kakkayinseemmo gede, hattono xaadonke agurreemmokki gede’ hajajinonke. (Ibiraawoota 10:24, 25) Gambooshshinkewa mimmito addinta baxannonna atente gede Maganu daafira lede rosa hasiꞌranno manninni xaadatto. Qoleno insa Qullaawu Maxaafi giddonni jawaachishshanno hedo coyiꞌranna macciishshatto. (Roomu Sokka 1:11, 12 nabbawi.) Addi addi qarri iillinsarono hagiirru noo heeshsho heeꞌranni noo manni ledono egennamatto. Addanko Yihowa ganyine gamba yinammora hasiꞌrinohu gambooshshu duucha doogonni kaaꞌlannonketa afinohuraati!
LEDDE XIINXALLI
Yihowa Farciꞌraasine gambooshshiwa maa maa assinannironna konne gambooshshe haꞌrate sharramanke gaabbissannota diꞌꞌikkitino yineemmohu mayiraatiro ledde rosi.
4. Yihowa Farciꞌraasine gambooshshe
Umi xibbi diro, Kiristaanu Yihowa magansiꞌrate ganye gamba yaanno. (Roomu Sokka 16:3-5) Qolasiyaasi Sokka 3:16 nabbabbe; hakkiinni aante noo xaꞌmo hasaabbe:
Hundi Kiristaani Yihowa magansiꞌrannohu hiittoonniiti?
Yannankera Yihowa Farciꞌraasine Magano magansidhanno bayicho ganyite gamba yitanno. Gambooshshinsawa maa maa assinanniro afate, VIIDIYO laꞌe. Hakkiinni songote gambooshshe leellishshanno misile laꞌinanni, aante noo xaꞌmuwa hasaabbe.
Gambooshshu Addaraashenkera assinannirinna Qolasiyaasi Sokka 3:16 kultannori mitto garaati yineemmohu mayiraati?
Viidiyote giddo woy misilete aana gambooshshenke lainohunni baxoottohu wolu coyi no?
Layinki Qorontoosi 9:7 nabbabbe; hakkiinni aante noo xaꞌmo hasaabbe:
Yihowa Farciꞌraasine gambooshshira woxe baaxxa hasiissannokkihu mayiraati?
Xiinxallisannohe manchi ledo, tenne lamalara heeꞌranno gambooshshiwa shiqqanno kifilla mitteenni laꞌe.
Shiqanno rosi giddo macciishshate roore quqquxinohehu woy roore kaaꞌlannoeho yite hedoottohu hiikkoyeti?
Ati tenne afootto?
jw.org aana, alamete doyichora gambooshshu heeꞌranno bayichonna saate laꞌꞌa dandaatto.
Gambooshshinkewa lallawo, loonse leellinshanni ikkitonna viidiyo heedhanno. Gambooshshe hananfannihunna jeefinsannihu faarsotenninna huuccattotenniiti
Mite kifilla shiqqanno woyite, macciishshaano dawaro qoltanno gede koyinsanni
Gambooshshenke wedelluno jajjabbuno, meentuno labballuno daa dandaanno
Yihowa Farciꞌraasine, gambooshshensa daanno manna woxe baaxxe diyitanno
5. Gambooshshe haꞌrate sharrama hasiissanno
Hanni Yesuusi maate lawishsha laꞌno. Insa diru dirunku Naaziretetenni Yerusaalame haꞌre qullaawa mine Yihowa magansiꞌrate, ilaalaame doogo sase barra lekkatenni haꞌranno. Luqaasi 2:39-42 nabbabbe; hakkiinni aante noo xaꞌmuwa hasaabbe:
Yerusaalame haꞌre higa insara shota ikkitinonsaha lawannohe?
Gambooshshe haꞌrate injaannohekki gede assara dandaannori maa maati?
Kayinni ikkittota ikkite gambooshshe haꞌrakki kaaꞌlitannoheha dilawannohe? Mayira?
Qullaawu Maxaafi, Yihowa magansiꞌrate gamba yaa lowo geeshsha hasiissannota kulanno. Ibiraawoota 10:24, 25 nabbabbe; hakkiinni, aante noo xaꞌmo hasaabbe:
Ganyine gamba yaa hasiissannonkehu mayiraati?
MITU MANNI TOGO YAANNO: “Wolu manni ledo gamba yaa dihasiissanno. Mine Qullaawa Maxaafa nabbambiro hakkeeshshi ikkanno.”
Tennera Yihowa hedo maatiro afate kaaꞌlannonke qummeeshshi woy Qullaawu Maxaafi lawishshi hiikkoyeti?
XAPHISHSHA
Gambooshshe haꞌra Yihowa albinni roore afatto gede, isi ledo noohe jaaloomi lexxanno gedenna wolootu ledo mitteenni iso magansiꞌratto gede kaaꞌlitannohe.
Kageeshsha Rosoottore
Yihowa gambooshshe haꞌneemmo gede amaalinonkehu mayiraati?
Yihowa Farciꞌraasine gambooshshiwa maa rosatto?
Gambooshshe haꞌra wole maaho kaaꞌlitannoheha lawannohe?
EGENNO LEXXI
Miteekkite gambooshshe haꞌra waajjattoha ikkirona? Alba gambooshshe haꞌra waajjanno manchi xa haꞌra baxannoha ikkinohu hiittoonniitiro lai.
Mittu wedellichi gambooshshe baxino garanna woꞌmanka woyite gambooshshe haꞌrate maa assinoro huwati.
Mitu manni songote gambooshshe haꞌrate daafira mayinoro nabbawi.
“Gambooshshu Addaraashera Gamba Yaa Hasiissannoehu Mayiraati?” (Webisayitenkera fultino borro)
Mittu alba finqilunna durriiyyete miili Yihowa Farciꞌraasine gambooshshe haꞌreenna heeshshosi woyyaabbino gara nabbawi.
“Qawweꞌya Adhummokki Mittowano Haꞌre Diegennoommo” (Agarooshshu Shaera fulino birxicho)