Kiristaanu Madaarsha Kawajjaamo, Quwa Sainokkihanna Magano Hagiirsiisannoha

XISSIISIꞌRE wiꞌlanno manni huuro xeertote nafa macciishshantanno. Dadillino manni baxxinoha kolidda xiddu uduunne uddiꞌre, garri-garimmo laikki uulla uwanni no. Muuziiqu huuro harunse sirbanno mannino no. Wolootu qolte ittanninna agganni hattono hikikkisse osoꞌlitanni no. Hakkonni boodu manni woyinenna biira quwa sae age dimbe uwe no. Kuri baalunku gamba yitinohu maahooti? Mite gobbuwara, mannootu reyino fiixansa geegiissineemmo yite gamba yitannowa wiꞌlate mine togoo coyibba rosantinote.

Alamete aana batinyu qooxeessira mannu haafa coye ammane kuttuwamino, hattono reyitinore lowo geeshsha waajjanno. Lowohu Yihowa Farciꞌraasine fiixinna olliinsa mannino togoore ammananno. Lowo miliyoone ikkanno manni, mittu manchi reyanno wote lubbote noore kaaꞌlanno woy gawajjanno ayyaana ikkanno yee ammananno. Madaarshu yannara wonshinannihu lowo seeri tenne ammana ledo xaado afiꞌrinoho. Mannu reyanno wote wiꞌlanna xissiisiꞌra hige nooreentilla. Yesuusinna rosaanosi xissiisidhinonna wiꞌlitino yanna no. (Yoh. 11:33-35, 38; Looso 8:2; 9:39) Ikkollana, insa yannansa manni ikkanno garinni quwa saꞌe dixissiisidhino. (Luq. 23:27, 28; 1 Tes. 4:13) Mayira? Mittu korkaati, reyote daafira halaale affinohuraati.

Qullaawu Maxaafi xawise togo yaanno: “Heeshshote noori reyitannota affino; reyitinori kayinni mittoreno diaffanno . . . Qoleno, xaate baxanna giwa hattono hinaasa didandiitanno . . . Ati haꞌrattowa Waammate giddo, loosu woy iqqide woy egenno woy hayyo dino.” (Mek. 9:5, 6, 10) Tini Qullaawu Maxaafi xiqise, mittu manchi reyi kaꞌa mittoreno afannokkita xawisse kultanno. Reyino manchi diassaawanno, macciishshamannosiri dino, dicoyiꞌranno, woy huwatannori dino. Konne Qullaawu Maxaafi halaale afa Kiristaanu madaarshi hiittooha ikkanno gede assitanno?

“BATTE IKKINORE KISA AGURRE”

Yihowa Farciꞌraasine albi budinsanna lophitino qooxeessi baxihano ikkiro, reyino manchi lubbote noore kaaꞌlanno woy gawajjanno yitanno ammana ledo xaado afiꞌrino budi baalunkuwiinni xeertidhanno. Reeshsha dukkinse agarre gala, madaarshu gedensaanni jila jille gamba yaa, yannate kiiro wiꞌla kayisa, reyinohura xorshiꞌra, galte shiidhinori galtensa fiixi ledo siimu xaado assitanno gede woy biso hayishshidhukki lowo agana keeshshitanno gede assa lawino budi baalunku battetenna Magano dadillisannoho; korkaatuno kuni baalunku budi lubbo woy foolu direyanno yaannohu agaanintete rosi ledo xaado afiꞌrinoho. (Hiz. 18:4) Addu Kiristaani “‘Yihowa sagaleno’ ‘agaanintete sagaleno’ sagaꞌla didandaanno”; hakko daafira togoo budira dikarsamanno. (1 Qor. 10:21) Togo yitanno hajajo harunsanno: “Baxxitine fulle, . . . hattono batte ikkinore kisa agurre.” (2 Qor. 6:17) Ikkirono, togoo budiwiinni xeertiꞌra shota ikkitannokki woti no.

Afirikahono ikko wolu qooxeessira, mito seera wonshinikki agurriro reyino manni ekera hanqitanno yee ammananno manni no. Togoo seera wonsha hooga, dagoomu giddo rumo woy dano abbitanno yine hendanni. Yihowa daga Qullaawa Borro rosi ledo sumuu yaannokkihu togoohu madaarshu budira karsama gibbino daafira, olluu manninna fiixu qacifatinonsa, xoninosa, hattono bohinonsa. Mito roduuwa isinni mannunni digaltannoreeti hattono reyitinore diayirrissannoreeti yinoonninsa. Yihowa Farciꞌraasine ikkinokki manni Kiristaanu madaarshira giddete eꞌꞌe annatino yannano no. Hakko daafira, madaarshu yannara Magano dadillisanno seera wonshinara murciꞌre kaꞌꞌanno manni ledo gaance gata dandiineemmohu hiittoonniiti? Hakkiinni saeno, Yihowa ledo noonke fiixooma daafara dandaannohu battaawino budinna seerinni umonke agadha dandiineemmohu ma garinniiti?

WOSSAꞌNITINOONNIRE XAWISSINE KULLE

Mitu qooxeessira, olluu murrootinna xeertote fiixi madaarshu hajora eansa rosantinote. Konni daafira mittu ammanamino Kiristaanchi, albillitte madaarshasi Qullaawu Maxaafihu xintu seeri garinni biddi assitannori Yihowa Farciꞌraasine ikkitinota xawise kula hasiissannosi. (2 Qor. 6:14-16) Kiristaanu madaarshiwa ikkannori ammanate roduuwanke koffi assannokki gede woy reyino manni daafira rosiinseemmo rosonna noonke ammana afinohura wolu mannira guficho ikkannokki gede qoropha hasiissanno.

Kiristaanu songo madaarsha biddi assitara xaꞌminiro, madaarshu seeri gudisire Qullaawa Borro biddishshi ledo sumuu yaanno gede songote cimeeyye kaaꞌlitanno assaawe kultara dandiitanno; hattono shiirinohu ammanino ayiddi Qullaawu Maxaafiha xintu seera huwatanno gede kaaꞌlitanno. Yihowa Farciꞌraasincho ikkinokkihu mittu manchi batte ikkino seera karsa hasiꞌrannoha ikkiro, kaajjine uurranna wossaꞌninoommore awu afiinninna ayirrinyunni xawinse kula hasiissannonke. (1 Phe. 3:15) Ammaninokki manchi togo awinseennano giwe batte ikkino seera wonshate kairona? Hatto ikkiro, ammantino maate madaarsha agurte haꞌrate wossaꞌnitara dandiitanno. (1 Qor. 10:20) Togoori ikkanno yannara, qooxeessaho Mangistete Addaraashera woy wole injiitanno basera harancho madaarshu nigiggire shiqqanno gede assine, shiidhe xissiisidhanni noore ‘Qullaawa Borronni sheshifachisha’ dandiinanni. (Rom. 15:4) Togoo qixxaawo, bayichoho reeshshu hoogirono ayirradotenna qarra afidhinokkite. (Marro 34:5, 6, 8) Ammaninokki manni gariweelo mereero eansa, qarranna dadille leddara dandiitannota ikkiturono, gara ikkinore assate murciꞌne kaꞌnoommo gara Yihowa laꞌꞌannota afanke sheshifachishshannonke; isi qole “bayira wolqa” aankera dandaanno.—2 Qor. 4:7.

ASSAAWEꞌNE BORREESSITINE WODHE

Mittu manchi madaarshisi yannara assinannire balaxe borreesse wodhiro, Yihowa Farciꞌraasine ikkitinokkire maatete miilla hasaawisa diqarrissanno; korkaatuno insa roore wote isi hedo ayirrissanno. Madaarshu yannara maa maa assinanniro, madaarshu hiikko ikkannoro, hattono madaarshu seera illaallisate silxaane afiꞌrannohu ayetiro borreesse wodha lowore kaaꞌlitanno. (Kal. 50:5) Togoo borro roore kaaꞌlitannohu naqaashete albaanni furma ganne wodhinirooti. Seedise assaawannohunna Qullaawu Maxaafite xintu seerubba aana xintantino hayyo noosi manchi, togoore borreesse wodhate geedha geeshsha woy buuto xiwama geeshsha diagaranno.—Law. 22:3; Mek. 9:12.

Mitootu togoore balaxe borreesse wodha makkidhanno. Ikkirono, togoo biddishsha borreesse wodha ayyaanaamittetenni gikki yinoommotanna wolootaho assaambeemmota leellishshanno. (Fil. 2:4) Tenne hajo ganaanni shiidhe xissiisidhanno maatera wore agurantenni umonni meessa guxxa woyyitanno; hakkuyi kaꞌa shiidhino maate reyino manchi ammanannokkire woy hasiꞌrannokkire asse yine qarrinsansara dandiinanni.

MADAARSHU QUWA SAOONKE

Duucha Afiriku gobbuwara, reyino manchi ekera hanqitannokki gede madaarshu hoola yinoonniha ikkanno gede assa hasiissanno yine hendanni. Wolootu qolte noonsa silxaanenna jiro madaarshu yannara ‘leellishidhanno.’ (1 Yoh. 2:16) Reyino manchira hasiisanno yine hendanni madaarsha qixxeessate lowo yanna, wolqanna woxe fushshinanni. Batinyu manni madaarsha fulanno gede egensiisate, reyino manchi foto bowirsine kayinse basete baalira worranni. Reyino manchi foto noo kanateerra qixxeessine wiꞌlaanchu uddiꞌranno gede tuqinsanni. Laꞌꞌanno manni hoola yaanno gede assate, quwa saꞌinota reeshshu saaxine hirranni. Mitte Afiriku gobbara isinni, mitootu jironsa, ayirrinyensanna qawaaxxonsa leellishiꞌrate makeenna, horophillanna wole togoore labbannota reeshshu saaxine seekkidhanno. Reeshsha saaxinetenni fushshine baxxino garinni seesiinsoonni daallasira worre mannu laꞌꞌanno gede assinanni. Reyitinoti meyata ikkituro, waajjo idayichote uduunne uddisiinsanni, lowoha seesu uduunne worrannise, hattono diigga dirrannise. Ikkina togoo assooti Maganu mannira hasiisannoho?

Ayyaanaamittetenni gikki yiino Kiristaani, Maganu seera afinokki woy ayirrisannokki manni gede madaarshu yannara quwa sainore diassanno. Deerra sainohunna Qullaawa Borro rosi ledo sumuu yaannokki budinna assooti, ‘Maganuwiinni ikkikkinni tenne saꞌanni noo alamenni dayinoha’ ikkinota anfoommo. (1 Yoh. 2:15-17) Ninkeneeto wolootu ledo heewisiinse mannu hoola yaanno gede assate kaꞌneemmokki gede qoropha hasiissannonke. (Gal. 5:26) Temokkiro leellishshannonte gede, reyitinore waajja dagoomu giddo rosantinota ikkitino qooxeessira duucha wote madaarshu quwa saꞌꞌanno; hakko daafira madaarshu biddi assanna illaallisa dandiinannikki deerra iillanno. Reyino mancho quwa saꞌne ayirrisa, ammaninokki manni garri-garimmo laikki batte ikkinore assate kaꞌꞌanno gede assitara dandiitanno. Togoo yannara mannu oo yee wiꞌlanni akkimale ikkara, reeshsha hanqafiꞌrara, hattono lubbote noo manchi gede asse coyishiishara woy woxenna wole uduunne reeshshu aana worara dandaanno. Kiristaanu wiꞌlawa togoore assiniha ikkiro, Yihowa suꞌminna mannisi lowo geeshsha mishamanno.—1 Phe. 1:14-16.

Reyino manni noo gara halaale afanke madaarshinke alamete xuri hilihu nafa nookkiha ikkanno gede assiꞌrate jawaante uyitannonke. (Efe. 4:17-19) Yesuusi uullate aana heeꞌrino manni baalunkunni roorinoha bayira mancho ikkirono, iso madaarri wote quwa sainore diassinoonni. (Yoh. 19:40-42) “Kiristoosi hedo” noonsarira likkanyunna kawajjaamu madaarshi difokkisiisannonsa. (1 Qor. 2:16) Addaho, Kiristaanu madaarshansa quwa saꞌꞌannokki gede assansa Qullaawu Maxaafi ledo sumuu yaannokkire hooꞌlate kaaꞌlitannonsa; qoleno Magano baxanno mannira hasiisannohu kawajjaamu, hattono deerra afiꞌrino seeri heeꞌranno gede assitanno.

QEEXAAꞌLA HASIISSANNO?

Mitu budira ayiddu, olliichunna wolu manni madaarshu gedensaanni gamba yee muuziiqa luushshinanna itanninna aganni qeexaaꞌlanno. Togoo yannara duucha wote mannu age dimbanno, hattono fooranno. Mitu manni, togoo jili shiiro abbitino dadille hoolanno yee hedanno. Mitootu qolte, kuni bashshonni budenkeeti yitanno. Ikkollana batinyu manni, reyino manchira ayirrinye aatenna guwisiꞌrate hattono lubbosi marte albi annuwa noo alame eꞌanno gede assate togoo qeexaali lowonta hasiisannoho yee ammananno.

Addu Kiristaani togo yitannoti Qullaawa Borro assaawe hayyo noota ikkitinota huwatanno: “Osolunkunni dadillu woyyanno; korkaatuno dadillaawino albi wodanaho danchaho.” (Mek. 7:3) Hakkiinni saeno, addu Kiristaani tenne alamera heeshsho harancho ikkitino garanna kaote hexxo daafira luulu nookkiha hiinca kaaꞌlo afidhinota huwatanno. Ee, Yihowa ledo danchu fiixoomi noonsarira ‘ilantino barrinni reyitanno barri woyyanno.’ (Mek. 7:1) Konni daafira, addu Kiristaani madaarshu gedensiidi jilinna qeexaali agaanintete rosinna amanyootu maaeelle ledo xaado afiꞌrinoha ikkinota huwatinohura, togoore diqixxeessanno woy togoo qeexaali noowa dimaranno. Togoo qeexaali noowa mara, Maganonna iso magansiꞌranno manni tiia ayirrisa hooga ikkitanno.

BADOOSHSHU LEELLANNO GEDE ASSE

Ayyaanaamittete tunsichi giddo noo manni gede reyino manna waajjine qece yaatenni keere fulloommo daafira tashshi yaannonke! (Yoh. 8:32) “Xawaabbu ooso” ikkinoommo daafira, shiiꞌne xissiisiꞌneemmo wote halaalu ledo sumuu yaannokkire diassineemmo, quwa disaꞌneemmo, hattono huluullissannokkiti kaote hexxo noonketa dideꞌneemmo. (Efe. 5:8; Yoh. 5:28, 29) Togoo hexxo, duucha wote “hexxo noonsakkiri” assitanno gede xissiisiꞌnoommota leellishate quwa sainore assate kaꞌneemmokki gede agartannonke. (1 Tes. 4:13) Qoleno, manna waajjine anga aa agurre halaalu magansiꞌrara kaajjine uurrineemmo gede kaaꞌlitannonke.—1 Phe. 3:13, 14.

Ammanamme Qullaawu Maxaafita xintu seerubba harunsineemmoha ikkiro, mannu ‘Maganoho soqqantannorinna soqqantannokkiri mereero noo badooshshe’ laꞌꞌa dandaanno. (Mil. 3:18) Albillitte, reyo diheedhanno. (Aju. 21:4) Tini kaajja hexxo woꞌmitanno yanna agadhinanni, Yihowa albaanni xurunna mishsho nookkire ikkino, hattono tenne alamenninna Maganu ayirrannokki gede assanno budisewiinni horonta baxxine heeꞌno.—2 Phe. 3:14.