Wolqaataammu Wolqiweeloota Gadadissanna Maganu Sammi Yiinohu Mayiraati?

Qullaawu Maxaafi giddo nooti mite xagge, wolqaataammu wolqa hoogginore coqqontinota kultanno. Tennera Naabute xagge heda dandiinanni. Tonnikki xibbi diro K.A. Isiraeelete nugusa ikkinohu Akiaabi, Naabuteta woyinete qarme adha hasiꞌre, galtesi Elzaabeeli Naabutenna oososi shiishiishshanna sammi yee wori. (1 Negesti 21:1-16; 2 Negesti 9:26) Wolqaataammu silxaanensa horoonsidhe togoore assitanna Maganu sammi yiinohu mayiraati?

Hanni tennera korkaata ikkinoha mitto coye laꞌno: Maganu kapha didandaanno. (Tito 1:2) Bushuullu beebbaataamma gadadissannote ledo tini mayi xaado afidhino? Maganu isira hajajama giwa buutote coye qaltannota yaano reyo abbitannota umonni kule qorophe yiino. Maganu yiinori gatannokki daafira, Edenete kaashshu basera finqille jammartuhunni kayisse reyo mannuwiinni baxxite diegentino. Isinni uullate aana umo reyi manchi reyinohu, roorrohu goddaaseennaati; kuni ikkinohu Qaaeeli rodoosi Abeeli shii woteeti.—Kalaqo 2:16, 17; 4:8.

Hakkuyinku jammarte mannu ooso xagge hiittootero Maganu Qaali togo yee xaphi asse kulanno: “Mannu manna gashshinohu gawajjaraati.” (Mekibibi 8:9) Kuni qaali halaale ikkinota leellishannori no? Yihowa mannasi Isiraeele, mookkanno nugussansa gadadissannonsatanna isiwa raartanno gede assitannonsata kule qorophe yiinonsa. (1 Saamueeli 8:11-18) Hayyichu Nugusi Salamooni nafa mannu wolqansara aleenni qaraxo kaffalara gadadisino. (1 Negesti 11:43; 12:3, 4) Akiaabi gedeeri busha nugussa isinni hakkiinni roore kaajjaddaho. Hanni konne coye hedi: Maganu mereero eꞌꞌe togoo gadado baala hooloommero, isi umisi coyiꞌrino qaali kapho ikkanno gede assa diꞌꞌikkitanno?

Qoleno, Sheexaanu mannu Maganoho soqqamannohu uminsa xiqimera yeetilla yee hettisinota deꞌooti. (Iyyoobi 1:9, 10; 2:4) Maganu soqqamaanosi baalanta hili gadadi nafa iillannonsakki gede agarannoha ikkiro, tini Sheexaanu yiinotera kaaꞌla diꞌꞌikkitanno? Qoleno Maganu qarrunna gadadu mittu manchirano iillannokki gede assannoha ikkiro, tini hakkiinni roorino kaphira kaaꞌla diꞌꞌikkitanno? Korkaatuno Maganu qarru iillannota hooliro, duuchu manni mannu ooso Maganiweelo umonsa danchu garinni gashsha dandiitanno yee hedara dandaanno. Maganu Qaali kayinni mannu ooso umonsa gashsha horonta dandiitannokkita kulanno. (Ermiyaasi 10:23) Maganu Mangiste hasiissannonke; taashshote xeꞌne baꞌannohu tini Mangiste dagguro callaati.

Ikkina, Maganu mittoreno assikki gadado sammi yeella laꞌꞌanno yaate? Deeꞌni. Hanni isi assannoha lame coye laꞌno: Umihunni, gadadissannori assitannore xawo fushshanno. Lawishshaho Qaalisi, Elzaabeeli Naabute shiishiishate gantino gano baalanta xawise kulanno. Hakkiinni saeno Qullaawu Maxaafi, ayimmasi maaxe togooha busha assoote halashshannohu wolqaataamu gashshaanchi noota xawisanno. (Yohaannisi 14:30; 2 Qorontoosi 11:14) Qullaawu Maxaafi kuni gashshaanchi Sheexaane Daawuloosiiti yee xawo fushshanno. Maganu bunshenna gadado hattono togoorira xaꞌmamannohu ayetiro xawo fushshe kule, bunshetewiinni xeertiꞌneemmo gede kaaꞌlannonke. Konni garinni hegere heeshsho hexxonke baꞌannokki gede agaranno.

Layinkihunni, Maganu gadadu heeꞌrannokki yanna daggannota kule huluullissannokki hexxo uyinonke. Isi Akiaabinna Elzaabeeli hattono insa gedeeri wolootu assitinore xawo fushshinonna insa qaxxaasino gari, albillitte bushuulle baalanka qaxxaasannota huluullammeemmokki gede assannonke. (Faarso 52:1-5) Qoleno Maganu baxxannosirira iillino qarri abbino gawajjo muli yanna giddo dhaawannota kule hexxo uyino.a Konni daafira, ammanamino manchi Naabutenna oososi taashshote xeꞌne nookkiha gannate ikkitino uullara hegerera heedhanno yanna dagganno.—Faarso 37:34.