QULLAAWU MAXAAFI XAꞌMONNA DAWARO

Qullaawu Maxaafi Isi Addinta Maganu Qaaleeti?

Maganu Qaali baxxinoha ikkanno yee heda garaho; ee, Qullaawu Maxaafi baxxinoho. Konne Maxaafa lowo xibbe ikkanno afiinni lowo biliyoone ikkannoha attammoonni. Giddosi noo hayyo mannu heeshsho soorrite woyyeessate wolqa afidhinote.—1 Teselonqe 2:13; 2 Ximootewosi 3:16 nabbawi.

Qullaawu Maxaafi hiliri gatikki woꞌmitanno masaalo amadino daafira, Maganu Qaaleeti. Aye manchino umisinni albillitte ikkannore kule diafanno. Hanni Isayyaasi maxaafa lawishshu gede assine laꞌno. Yesuusi ilamara xibbuu diri albaanni konni maxaafinni galchine qixxeessinoonni xaaxo, Reyote Baari mule mittu godi giddo anfoonni. Tini xaaxo Baabiloonete katami onannota kultanno. Kuni qaali Yesuusi uullate aana soqqamihunni lowo diri gedensaanni woꞌmino.—Isayyaasi 13:19, 20; 2 Pheexiroosi 1:20, 21 nabbawi.

Qullaawu Maxaafi borreessaminohu ma garinniiti?

Qullaawu Maxaafi borreessame goofinohu 1,600 diro meddi yitanno yanna giddooti. Mito 40 ikkitannori Qullaawu Maxaafi borreessaano, borreessitino sokka ise iseneewa sumuu yitannotenna mitte qara hajo xawissannote. Kuni ikkinohu hiitto ikkeeti? Borreessituri Maganu marraꞌꞌannansa borreessitino daafiraati.—2 Saamueeli 23:2 nabbawi.

Maganu Qullaawu Maxaafi borreessaano sokkaanote widoonni, ajuujatenni woy haaqetenni coyishiishino woti no. Roore anga kayinni assaawesi surrensara wore sokkasi kulate horoonsidhanno qaalla insa doortanno gede assino.—Ajuuja 1:1; 21:3-5 nabbawi.