Yihowa Dirijjite Ledo Albaagge Hadhanni Nootto?

1. Kaadaasine Isiraeelete daga riqibbinoti doorantino dirijjite hiitteeti? (Umi misile lai.)

UMI xibbi diro Kiristaanu songo xintantanno gedenna yannankera halaalu magansiꞌra galagalte higganno gede assinohu Yihowa ikkino daafira tennera galatu hasiisannohu isooti. Sai birxichira laꞌnummonte gede, hundita Kiristoosi harunsaano amaddino dirijjite kaadaasine Isiraeelete daga riqibbino; konni garinni Maganunnita doorantino dirijjite ikkitino. Tini haaro dirijjite Yerusaalame 70 M.D. baꞌu wote gatte saꞌino. (Luq. 21:20, 21) Umi xibbi diro ikkitinoti tini ikkituwa, yannankera Yihowa soqqamaanora tuncu yaannore qummi assitanno. Sheexaanu alame muli yanna giddo baꞌanno; Maganu dirijjite kayinni goofimarchu barruwara jeefote dagganno baonni gattanno. (2 Xim. 3:1) Tenne huluullammeemmokkihu mayiraati?

2. Yesuusi “bayiru qarri” daafira mayino? Kuni “qarri” jammarannohu hiittoonniiti?

² Yesuusi isi illete leellikki dayinotanna alamete goofimarchi shiqe dayinota leellishanno malaate kulanni togo yiino: “Alamete hanafonni kayise xaa geeshsha ikke egenninokkihu hattono layinkita ikkannokkihu bayiru qarri daanno.” (Mat. 24:3, 21) Yihowa poletiku maroota horoonsiꞌre, kaphu ammaꞌno dirijjitta baalantera yaano ‘Bayira Baabiloonera’ bao abbanno wote kuni taalle nookki qarri jammaranno. (Aju. 17:3-5, 16) Hakkiinni aane mayi ikkannoyya?

SHEEXAANU ASSOOTI ARMAGEDOONI JAMMARANNO GEDE ASSANNO

3. Kaphu ammaꞌno baꞌu gedensaanni, Yihowa daga siantannohu hiittoonniiti?

³ Kaphu ammaꞌno baꞌu gedensaanni, Sheexaanunna alamesi Yihowa soqqamaano siꞌanno. Qullaawa Borro “Magoogi gobba Googi” daafira togo yitanno: “Atinna saraawitekki baalanti hattono ledokki nooti lowo daga insa aana dambalu gede ikkitine dagginanni, qoleno gomichu gede uulla dibbine amaddinanni.” Yihowa Farciꞌraasine olu saraawite noonsakkirenna uullate aana noo daga baalantenni roore salaame baxxannore ikkitino daafira, mitturino gatisannonsari nookkire labbe leeltanno. Ikkollana insa siannohu lowo geeshsha soꞌrino!—Hiz. 38:1, 2, 9-12.

4, 5. Yihowa, Sheexaanu mannasi gudate kaꞌꞌanno wote ma assanno?

⁴ Maganu, Sheexaanu mannasi gudate kaꞌꞌanno wote ma assanno? Yihowa aliidimmate silxaanesi horoonsiꞌre insa daafira olamanno. Isi soqqamaanosi gawajjate assinannire iso gawajjate assinoonniri gede asse kiiranno. (Zekkaariyaasi 2:8 nabbawi.a) Konni daafira iimi Anninke ninke gatisate hakkawontenni kaꞌꞌanno. Sheexaanu alame “Duuchanka Dandaanno Maganihu bayira barra kaꞌꞌanno olinni” yaano Armagedooni olinni baꞌanno wote tenne gato afiꞌneemmo.—Aju. 16:14, 16.

⁵ Qullaawu Maxaafi Armagedooni ola lainohunni togo yee masaalino: “‘Yihowa dagate ledo yekkeeramanno. Isi umisi mannu baalunkura yoo yaanno. Qoleno, bushuulle bisete sayise aanno,’ yaanno Yihowa. Saraawitete Magani Yihowa togo yaanno: ‘Kuneeti! Bao dagatenni daganniwa taraabbanni no; bayira hambabalatteno uullate qaccenni kaꞌe dagganno. Hakko barra Yihowa shiinori uullate qaccenni uullate qacce geeshsha woꞌmitanno. Insara diwiꞌlinanninsa, hattono reeshshansa gamba diassinanni woy dimadaarranni. Insa kosete gede baattote aana tunge agurranni.’” (Erm. 25:31-33) Armagedooni oli tenne busha Sheexaanu alame qocci assanno. Yihowa dirijjiteti uullayidi kifile kayinni gatte saꞌanno.

YANNANKERA YIHOWA DIRIJJITE LOPHITANNI NOOHU MAYIRAATI?

6, 7. (a) “Lowo daga” wido ikkino manni gamba yaanni noohu hiittoonniiti? (b) Muli dirra giddo leeltino lopho kuli.

⁶ Maganu dirijjite uullate aana lophitanni noohu tenne dirijjite giddo noo manni iso hagiirsiisannoha ikkino daafiraati. Qullaawu Maxaafi togo yaanno: “Yihowa ille keeraano laꞌanno; maccasino insa eeggifatte huuccidhanno huuccatto macciishshitanno.” (1 Phe. 3:12) ‘Bayira qarra lulluqqite saꞌannoti’ ‘lowo dagano’ tenne keeraano widira gaamantanno. (Aju. 7:9, 14) Kuri gatte saꞌannori “daga” calla diꞌꞌikkitino. Insa “lowo daga” yaamantino; tini qolte kiironsa lowo geeshsha lowota ikkitinota leellishshanno. Konni manni ledo ati “bayira qarra” lulluqqite saꞌanna leellannohe?

⁷ Tenne lowo daga wido ikkino manni gamba yiinohu hiittoonniiti? Tini daga gamba yitanni noohu Yesuusi daasi daafira coyiꞌri wote yiinori woꞌmanni noo daafiraati. Togo yiino: “Daga baalantera naqaashe ikkanno gede, kuni Mangistennihu danchu duduwi uulla woꞌmate sabbakamanno; hakkiinnino goofimarchu daanno.” (Mat. 24:14) Tenne goofimarchu barruwara, Maganu dirijjitehu waannu loosi konneeti. Yihowa Farciꞌraasine alame woꞌmate sabbakkanninna rosiissanni noo daafira, lowo miliyoone ikkanno manni Magano “ayyaanunninna halaalunni” magansiꞌranno gara rosino. (Yoh. 4:23, 24) Lawishshaho, muli yannara tonnu diri giddo calla yaano 2003nni kayise 2012 soqqanshote diri geeshsha calla, 2,707,000 saꞌꞌanno manni insaneeto Maganoho sayise oye cuuamino. Xaa yannara Yihowa Farciꞌraasine alamete deerrinni 7,900,000 saꞌanno; qoleno diru dirunku Qaagooshshu Ayyaani yannara lowo miliyoone ikkannohu wolu manni ledonsa gamba yaanno. ‘Lossannohu Magano ikkino’ daafira tennera dinaadammeemmo. (1 Qor. 3:5-7) Ikkirono, diru dirunku lowo daga wido ikkino manni lexxanninna batiꞌranni haꞌranni noota huwata dandiinanni.

8. Yannankera Yihowa dirijjite baasa lophitanni noohu mayiraati?

⁸ Yihowa umisi Farciꞌraasinesi irkisanni noo daafira soqqamaasinesi kiiro dhagge ikkanno garinni lexxitino. (Isayyaasi 43:10-12 nabbawi.b) Tini lopho heedhannota biꞌrenni togo yine masaalloonni: “Shiimiidihu kume ikkanno, hooffayidihu qole bayira daga ikkanno. Ani Yihowa umiꞌya, kuni yannasira rahe ikkanno gede asseemmo.” (Isa. 60:22) Uullate aana gatte noo buuramaasine kiiro ‘shiima’ ikkitino yanna no; Maganu Isiraeele wido ikkinohu wolu manni Maganu dirijjitewa dayita kayinni kiironsa lexxitino. (Gal. 6:16) Diru lexxanni haꞌrita, lowo daga wido ikkino mannino gamba yiino daafira lopho lexxitanni hadhino.

YIHOWA MA ASSINAMMORA HASIꞌRANNO?

9. Maganu Qaali giddo kulloonnita dhaggete heeshsho afiꞌrate ma assa hasiissannonke?

⁹ Buuramino Kiristaani wido ikkitinorino ikko lowo daga wido ikkitinori, albillitte Maganu Qaali giddo kulloonnita dhaggete heeshsho ragidhanno. Ikkollana, hattee heeshsho afiꞌrate Yihowa seeri ledo sumuu yine heeꞌra hasiissannonke. (Isa. 48:17, 18) Hanni Isiraeelete uyinoonnita Muse Higge hedi. Tini Higge Isiraeelete daga maatete mereero hagiirraamma ikka dandiitanno garanna dancha jaalla afidhanno gara, woxu ledo xaado afiꞌrino coye amaddanno garanna wole manna amaddanno gara rosiissannonsa. (Wol. 20:14; Zel. 19:18, 35-37; Marro 6:6-9) Ninkeno Maganu seeri ledo sumuu yine heeꞌranke lowore kaaꞌlitannonke; qoleno Maganu fajjo assa qarrissannota diꞌꞌikkitino. (1 Yoh. 5:3) Isiraeele Maganu Higge ayirrisse agarooshshe afidhinonte gede, ninkeno Maganu Yihowa higguwanna xintu seerasi ayirrinse heeꞌranke agartannonke, hakkiinnino saꞌe “ammanatenni fayyuulle” ikkine heeꞌneemmo gede kaaꞌlitannonke.—Tit. 1:13.

10. Qullaawa Maxaafa xiinxallatenna Maatete Magansiꞌrara yanna gaaꞌma hasiissannonkehu mayiraati?

¹⁰ Yihowa dirijjiteti uullayidi kifile duuchu garinni albaagge hadhanni no. Lawishshaho Qullaawu Maxaafi halaalira noonke wodancha yannate kiiro lexxitanni hadhanni no. Qullaawu Maxaafi kuni ikkannota balaxe togo yee masaalino: “Keeraanote doogo woꞌma xawaabba ikka geeshsha roore xawanni haꞌrannohu soodo bakkalchi gedeeti.” (Law. 4:18) Ninkeneeto togo yine xaꞌma hasiissannonke: ‘Mite Qullaawa Borro xiqisubba muli yannara xawinsoonni gara huwatoommo? Qullaawa Maxaafa barru baala nabbawate rosichi nooe? Borronke nabbawate quqquxameemmo? Aneranna miniꞌya mannira lamalate giddo Yihowa magansiꞌneemmoti Maatete Magansiꞌra noonke?’ Rooru roduuwi kuri coyibba assa kabbaade ikkitinokkita affino. Tennera hasiisannohu qaru coyi yanna gaaꞌmate. Hakko iso bayiru qarri lowonta gambise daye noote tenne yannara, gara ikkitinota Qullaawa Borro egenno afiꞌra, hattee egenno loosu aana hosiisanna ayyaanaamittetenni lopha lowo geeshsha hasiissannote!

11. Hundi waro ayirrinsanni ayyaannanna yannankera noo gambooshshuwa hiittoo kaaꞌlo uyitanno?

¹¹ Yihowa dirijjite hawaariya Phaawuloosi uyinota aante noo amaale harunsineemmo gede duudhe kultannonkehu uminke xiqimeraati. Isi togo yiino: “Baxillehonna danchu loosira kakkaꞌꞌa dandiineemmo gede mimmito towaaxxino; qoleno mitootu roso assidhino gede mitteenni gamba yaanke agurroonke; hatteentenni barru shiqe dayinota laꞌinanni albinni roore mimmito jawaachinsho.” (Ibi. 10:24, 25) Isiraeele diru dirunku ayirrissanno ayyaannanna Yihowa magansiꞌrate xaaddannohu wolu gambooshshi ayyaanaamittetenni jawaachishannonsaho. Qoleno, Nehimiya diro ayirrinsihu gedeehu Daasu Ayyaani qole hagiirru yannaati. (Wol. 23:15, 16; Neh. 8:9-18) Ninkeno songote gambooshshinninna jajjabba gambooshshuwanni hattoo horo afiꞌneemmo. Ayyaanaamittete fayyimmankeranna hagiirreho yine qixxeessinoonnita tenne qixxaawo seekkine horoonsiꞌno.—Tit. 2:2.

12. Dancha duduwo sabbakate looso ma garinni laꞌꞌa hasiissannonke?

¹² Maganu dirijjite miilla ikkinoommo daafira, “Maganunniha dancha duduwo” duduwate qoosso noonke; kuni “qullaawa loosooti.” (Rom. 15:16) Kuni loosi “Qullaawa Magano” ikkinohu ‘Yihowa ledo loonseemmo’ faro fanannonke. (1 Qor. 3:9; 1 Phe. 1:15) Dancha duduwo sabbakanke qullaawu Yihowa suꞌmi ayirranno gede assitanno. Ee, “hagiirraamu Maganiha ayirrado dancha duduwo” duduwanke ninkera lowo ayirrinyeeti.—1 Xim. 1:11.

13. Ayyaanaamittetenni fayyuulle ikkineemmohunna heeshshote heeꞌneemmohu ma assinummorooti?

¹³ Maganu isi ledo quraanyamme hattono dirijjitesi loossannohu addi addi loosira karsamme ayyaanaamittetenni fayyuulle ikkine heeꞌnammora hasiꞌranno. Muse Isiraeele togo yiino: “Heeshshonna reyo, hattono atootenna rumo albakkiinni woroommotera techo iiminna uulla naqaashete; atinna sirchikki heeshshote heedhinanni gede heeshsho doodhi; tenne assate Maganokki Yihowa baxi, huurosi macciishshi, hattono isi ledo quraanyami; korkaatuno isi heeshshokkiiti, qoleno Yihowa annuwakkira Abirahaamira, Yisaaqiranna Yaaqoobira eemmoꞌne yee xaarino gobbara seeda diro heeꞌrattohu isinniiti.” (Marro 30:19, 20) Heeshshote heeꞌneemmohu Yihowa fajjo assinummoro, iso banxummoro, hajajamme huurosi macciishshinummoronna isi ledo quraanyammummorooti.

14. Mittu rodiira Maganu dirijjite daafira mayi macciishshaminosi?

¹⁴ Maganu ledo quraanyame heeꞌrinohunna Yihowa dirijjite giddo ammaname keeshshinohu Roduu Pirayis Hiyuzi togo yee borreessino: “1914 albaanni noo yannanni hanafe Yihowa alaami daafira halaale afaꞌyanni lowo geeshsha tashshi yaannoe . . . Illete leeltannote Yihowa dirijjitewa gamba yee heeꞌra, heeshshoꞌya giddo wolu baalunkurinni kaffi asse laeemmo coyeeti. Afiꞌroommo temokkiro, mannu hedo irkiꞌra soꞌro ikkitinota rosiissinoe. Tenne huwatummo gedensaanni, tenne ammanantino dirijjite giddo heeꞌrate murciꞌre kaummo. Yihowa hagiirsiisanna isi atoote afiꞌra dandiinanniti wole doogo mama no?”

YIHOWA DIRIJJITE LEDO ALBAAGGINE HAꞌRAꞌNE AGURTINOONTE

15. Maganu Qaale huwantoommo gara taashshinanni wote ma assa hasiissannonkero kulannoha Qullaawu Maxaafi lawishsha kuli.

¹⁵ Yihowa hagiirsiisanna isi atoote afiꞌra hasiꞌneemmoha ikkiro, dirijjitesi ledo buusamanna mite xiqisubba bashsho huwantoommohunni baxxino garinni xawinsanni wote maahoyye yine adha hasiissannonke. Yesuusi reyi gedensaanni, Muse Higgera diinaggaawannohunna ise harunsa agura hasiꞌrannokkihu lowo kume ikkannohu Yihudootu wido ikkino Kiristaani no. (Looso 21:17-20) Ikkollana, Phaawuloosi Ibiraawuyaani songora soyino dabdaabbe kaaꞌlonni, kuni Kiristaani keeraaꞌminohu “Higgete garinni shiqqanno kakkalonni” ikkikkinni “mitte hige duuchunku wotira kakkalo ikke shiqinohu Yesuusi Kiristoosi bisi widoonni” ikkinota ammane adhino. (Ibi. 10:5-10) Yihudootu wido ikkinohu konni Kiristaani giddo rooriidi hedonsa biddi assidhe ayyaanaamittetenni albaagge hadhino yine heda dandiineemmo. Ninkeno ceeꞌminummokki xiinxallanna Maganu Qaale huwantoommo gara woy sabbankeemmo gara taashshinanni wote maahoyye yine adha hasiissannonke.

16. (a) Haaro alamera heeshsho hagiirraame assanno atooti hiikkonneeti? (b) Haaro alame giddo afiꞌrate quqquxamattori maati?

¹⁶ Yihowaranna dirijjitesira ammanante heedhannorira atootisi dibaxxannonsa. Ammanantino buuramaasine Kiristoosi ledo iima gashshaano ikkite taalle nookki qoosso afidhanno. (Rom. 8:16, 17) Uullate aana heeꞌrate hexxo noonkeri kayinni, Gannatete heeꞌra mageeshshi geeshsha hagiirsiissannoro hedate woꞌnaallo. Yihowa dirijjite miilla ikkinoommo daafira, Maganu abbeemmo yiinote haaro alame daafira mannaho kula lowo geeshsha hagiirsiissannonke! (2 Phe. 3:13) Faarso 37:11, “Jooguullu kayinni uulla ragidhanno; keeru woꞌmanno daafira lowo geeshsha tashshi yaannonsa” yitanno. Mannu “mine miꞌne heeꞌranno”; qoleno “angansa loosinni” tashshi yaannonsa. (Isa. 65:21, 22) Gadadu, buximanna hude diheedhanno. (Far. 72:13-16) Bayira Baabiloone heedhannokki daafira layinkita manna disoꞌrisiissanno. (Aju. 18:8, 21) Reyino manni kae hegerera heeꞌrate faro afiꞌranno. (Isa. 25:8; Looso 24:15) Insaneeto Yihowara sayise uyinohu lowo miliyoone ikkanno manni afiꞌrannohu hagiirsiisanno atooti baete! Ninke mittu mittunku konne atoote afiꞌrate, ayyaanaamittetenni lophinanni haꞌra, Maganu dirijjite ledo albaange haꞌranna ise ledo taalo qaafa hasiissannonke.

17. Yihowanna dirijjitesi ma garinni laꞌꞌa hasiissannonke?

¹⁷ Tenne alame goofimarchi lowo geeshsha gambise dayino daafira, ammanatenni kaajjine uurrino, hattono Magano dirijjitesi ledo ammanamme magansiꞌno. Faarsaanchu Daawiti togoo hedo noosi daafira togo yee faarsino: “Yihowa mitto coye huucciꞌroommo; qoleno konni coyira quqquxameemmo; hakkuno, heeshshoꞌya diro woꞌma Yihowa mine heeꞌreemmo gede, Yihowa danchumma laeemmo gedeetinna beetemeqidesesi dhagge assiꞌreemmo gedeeti.” (Far. 27:4) Ninke baalunku Maganu ledo quraanyammo, mannisi ledo taalo qaanfo, hattono Yihowa dirijjite ledo albaange haꞌranke agurroonke.