‘Maganokki Yihowa Baxi’

1. Maganunna Beettisi mereero noo baxilli lophinohu mayiraati?

YIHOWA Beetti Yesuusi Kiristoosi, “Ani Annaꞌya baxeemmo” yiino. (Yoh. 14:31) Qoleno togo yiino: “Annu Beetto baxanno.” (Yoh. 5:20) Tini dhagge assiꞌnannita diꞌꞌikkitino. Korkaatuno Yesuusi uullara daara albaanni kiirre tunqannikki diro Maganoho “waanna loosaasincho” ikke soqqamino. (Law. 8:30) Yihowanna Yesuusi mitteenni loosansa, Yesuusi Annisi akatta daafira lowore afanno gede assitinosi; konni daafira iso baxanno gede assannosihu lowo korkaati no. Ee, mimmitunniwa gamba yaansa mereeronsa noo baxilli lophanno gede assitino.

2. (a) Mitto mancho baxate yaa mayyaate? (b) Konni birxichira hiittee xaꞌmuwara dawaro afiꞌneemmo?

² Mitto mancho banxummoro giddonke baxxannosi yaate. Faarsaanchu Daawiti togo yee faarsino: “Jawaanteꞌya Yihowa, giddoꞌya baxxannohe.” (Far. 18:1) Ninkeno Magano konni garinni baxa hasiissannonke; korkaatuno isi baxannonke. Yihowara hajajammeemmoha ikkiro, isi baxillesi leellishannonke. (Marro 7:12, 13) Kayinni laꞌne anfeemmokki Magano addinta baxa dandiineemmo? Yihowa baxate yaa mayyaate? Iso baxa hasiissannonkehu mayiraati? Magano banxeemmota leellisha dandiineemmohu hiittoonniiti?

MAGANO BAXA DANDIINEEMMO YINEEMMOHU MAYIRAATI?

3, 4. Yihowa baxa dandiineemmo yineemmohu mayiraati?

³ “Maganu Ayyaanaho”; hakko daafira iso laꞌꞌa didandiineemmo. (Yoh. 4:24) Ikkirono, Yihowa baxa dandiineemmo; Qullaawa Borrono iso banxeemmo gede kultannonke. Lawishshaho, Muse Isiraeele togo yiino: “Maganokki Yihowa woꞌmu wodanikkinni, woꞌma lubbokkinninna woꞌma wolqakkinni baxi.”—Marro 6:5.

⁴ Magano lubbora baxa dandiineemmo yineemmohu mayiraati? Korkaatuno isi ayyaanaamittete coyira hasatto heedhannonke gede assenna baxate dandoo oye kalaqinonke. Ayyaanaamittete hasattonke garunni wonshiꞌneemmoha ikkiro, Yihowara noonke baxilli lophanno hattono hagiirraamma ikkineemmo. Yesuusi togo yiino: “Ayyaanaamittete hasattonsa deꞌannokkiri hagiirraammaho; iimi Mangiste insatena.” (Mat. 5:3) Mannu ooso adhite ilantinota Magano magansiꞌrate hasatto daafira mittu maxaafi togo yaanno: “Manchi beetti xaphoomunni isira aliidiha ikkino [Magano] hasiꞌrannohanna ammana hasiꞌrannoha ikkasi dhagge assiꞌra, hoola yaanna maalaꞌla hasiissannonke.”—Manchi Beetti Umisinni Heeꞌre Diafanno, Abirahaami Mooriseni qixxeessinoho.

5. Magano hasiꞌra mulla daafuro ikkitinokkita mayinni anfeemmo?

⁵ Magano hasiꞌra mulla daafurooti? Deeꞌni, korkaatuno isi hasiꞌne afiꞌnammosira hasiꞌranno. Hawaariya Phaawuloosi Partenooni qooxeessira Aariyosifaagosi yinanni basera gamba yiino mannira farciꞌri wote tenne xawise coyiꞌrino. Partenooni hakkawaro Ateensi katama agartanno maganchooti yinannite Ateena beetemeqideseeti. Phaawuloosi hakko mannira, “alamenna giddose noore baalankare kalaqino Magani” daafira kulinna Maganu ‘mannu minino beetemeqidesera heeꞌrannokkita’ xawisi wote hanni ledo noottohu gede assite hedi. Isi lede togo yiino: “[Maganu] uulla woꞌmate aana heedhanno gede mannu gaꞌre baalanta mittu manchiwiinni kalaqino; gaamantino yannanna mannu ooso heedhanno danna likke worino; tenne assinohu Magano hasidhanno gedeetinna seekkite hasidhe afidhanno gedeeti; hatto yaa kayinni, isi mitti mittinkewiinni xeertiꞌre no yaa diꞌꞌikkitino.” (Looso 17:24-27) Ee, Magano hasiꞌne afiꞌra dandiinanni. Lamala miliyoonenna darate saꞌannori Yihowa Farciꞌraasine ‘iso afiꞌra’ dandiitino; qolteno iso baxxanno.

MAGANO BAXATE YAA MAYYAATE?

6. Yesuusi “baalanta roortannotinna umi hajajo” hiitteeti yiino?

⁶ Yihowara noonke baxilli wodaninke giddonni burqannoha ikka hasiissannosi. Yesuusi mittu Ferisaawichi “Rosiisaancho, Higgete giddo baalanta roortanno hajajo hiitteeti?” yee xaꞌmisi wote tenne xawise coyiꞌrino. Isi togo yee qolino: “‘Maganokki Yihowa woꞌmu wodanikkinni, woꞌma lubbokkinninna woꞌma surrekkinni baxi.’ Baalanta roortannotinna umi hajajo tenneeti.”—Mat. 22:34-38.

7. Magano (a) ‘woꞌmu wodaninkenni’ (b) ‘woꞌma lubbonkenni’ (c) ‘woꞌma surrenkenni’ baxate yaa mayyaate?

⁷ Yesuusi Magano ‘woꞌmu wodaniꞌnenni’ baxxe yaasi mayyaate? Yihowa hasattonke, simmeetenkenna giddiidinke hedo baalantenni baxa hasiissannonke yaate. Qoleno iso ‘woꞌma lubbonni’ baxate yaa heeshshonke woꞌmatennino ikko assootinke baalunkunni iso banxeemmota leellinsheemmo yaate. Hakkiinni saeno, Magano ‘woꞌma surrenkenni’ yaano assaawate dandoonke woꞌmatenni baxa hasiissannonke. Addaho, Yihowa mittoreno gatisiꞌnummokki baxa hasiissannonke.

8. Magano banxeemmota leellisha dandiineemmohu hiittoonniiti?

⁸ Magano woꞌmu wodaninkenni, woꞌma lubbonkenninna woꞌma surrenkenni banxeemmoha ikkiro, Qaalesi ceeꞌminummokki xiinxallineemmo, woꞌmu wodaninkenni fajjosi assineemmo, hattono Mangistesiha dancha duduwo diinaggaambe dudumbeemmo. (Mat. 24:14; Rom. 12:1,  2) Yihowara addu baxilli heeꞌrinkero albinni roore isiwa shinqeemmo gede assannonke. (Yaq. 4:8) Hige Yihowa baxa hasiissannonke yineemmo gede assannonke coye baalanka kulle guda didandiineemmo. Ikkirono, hanni kuri giddo gama laꞌno.

YIHOWA BAXA HASIISSANNONKEHU MAYIRAATI?

9. Kalaqaanchonkenna towaatannonke Magano Yihowa baxatto gede assannoheri maati?

⁹ Yihowa Kalaqaanchonkeetinna Towaataanchonkeeti. Phaawuloosi, “heeshsho afiꞌnoommohu, milli yineemmohunna heeꞌnoommohu isinniiti” yiino. (Looso 17:28) Yihowa uulla biifado qae asse uyinonke. (Far. 115:16) Qoleno heeshshote heeꞌrate hasiisannonkere sagaleno ikko wolere baalankare aannonke. Phaawuloosi kaphu maganna magansiꞌrannohu Lisxiraho heeꞌranno mannira togo yiino: “Heeshshote Magani . . . danchare asse isiniitira naqaashe ikkannore wodhino; iiminni xeena dirrise, hattono laalchu laalanno wogga qixxeesse falakkino sagale aannoꞌne, qoleno wodaniꞌne hagiidhanno gede assanno.” (Looso 14:15-17) Tini Bayira Kalaqaanchonkenna shaqqado Maganonke Yihowa banxeemmo gede assitannota diꞌꞌikkitino?—Mek. 12:1.

10. Wodote kakkalo daafira mayi macciishshamannohe?

¹⁰ Maganu Addaamiwiinni ragiꞌnoommo cubbinna reyonni ganteemmo doogo qixxeessinonke. (Rom. 5:12) Ee, “Maganu cubbaataamma ikkine heeꞌneenna Kiristoosi ninkera yee reyanno gede asse baxannonketa leellishino.” (Rom. 5:8) Yihowa maaro eꞌnummoronna Yesuusita wodote kakkalo ammanneemmota leellinshummoro cubbinkera gatona afiꞌneemmo doogo qixxeessinonke daafira giddonke lubbora baxxannositi dihuluullissannote.—Yoh. 3:16.

11, 12. Yihowa uyinonke hexxo hiikkuriiti?

¹¹ Yihowa ‘hagiirrunna salaame woꞌmitannonke gede assitanno hexxo’ uyinonke. (Rom. 15:13) Maganu uyinonke hexxo ammanate fatana dandiine saꞌneemmo gede kaaꞌlitannonke. ‘Reyote geeshsha ammanantinore ikkitanno’ buuramaasine ‘iimi heeshsho zawude adhitanno.’ (Aju. 2:10) Ammanantinori uullayidi hexxo noonsari qolte Gannate ikkitanno uulla aana hegerera hagiidhitanni heedhanno. (Luq. 23:43) Togoo hexxo hendeemmo wote mayi macciishshamannonke? Hagiirrunna salaame diwoꞌmitannonke? Qoleno, “dancha eltonna guutu atooti baalunku” Buicho ikkino Magano lubbora banxeemmo gede diassitannonke?—Yaq. 1:17.

¹² Maganu sheshifachishshannota kaote hexxo uyinonke. (Looso 24:15) Shiiꞌneemmo wote lowo geeshsha xissiisiꞌneemmoti egennantinote; ikkirono, kao noo daafira ‘hexxo noonsakkiri dadillitanno garinni didadillineemmo.’ (1 Tes. 4:13) Maganu Yihowa baxillaancho ikkino daafira, reyitinore kayisate roorenkanni keeraanchu Iyyoobi gedeeha ammanamino manna kayisate quqquxamanno. (Iyo. 14:15) Banxeemmo manni reyotenni kaeenna koye uullate aana xaandeemmo wote mageeshshi geeshsha hagiidhineemmoro hanni hedi. Dhagge ikkitannota kaote hexxo uyinonke daafira iimi Annanke lubbora banxeemmosi!

13. Maganu ninke daafira lowo geeshsha assaawannota leellishannori maati?

¹³ Yihowa ninke daafira lowo geeshsha assaawanno. (Far. 34:6, 18, 19; 1 Pheexiroosi 5:6, 7 nabbawi.a) Baxillaanchu Maganinke ammanantino soqqamaanosi kaaꞌlate ayewoteno qixxaawinoha ikkinota anfoommo daafira, ‘qolchisi hoshsha’ miilla ikkine teense heeꞌneemmo. (Far. 79:13) Hakkiinni saeno, Maganu albillitte Mesihichu Mangiste horoonsiꞌre assannonkeri baxannonketa leellishannoho. Isi shoomino Nugusi Yesuusi Kiristoosi uullate aaninni finqille, gadadonna bunshe huni gedensaanni hajajamanno manni geeddanno salaame afiꞌranno hattono qawaaxxiꞌranno. (Far. 72:7, 12-14, 16) Kuni baalunku atooti shaqqado Maganonke woꞌmu wodaninkenni, woꞌma lubbonkenni, woꞌma wolqankenninna surrenkenni banxeemmosi gede assannonke yaa gara dilabbannohe?—Luq. 10:27.

14. Maganu uyinonketi taalle nookki qoosso hiitteeti?

¹⁴ Yihowa, Farciꞌraasinesi ikkine soqqammeemmo gede taalle nookki qoosso uyinonke. (Isa. 43:10-12) Maganu aliidimmasira kaaꞌlineemmo gedenna qarru woꞌminote tenne alamera noo mannira isi uyinonke hexxo kulleemmo gede tenne faro faninonke daafira banxeemmosi. Qoleno, halaalaanchu Magani Qaali giddo noo hexxo dudumbanni heeꞌnoommo daafira mittoreno huluullammummokki ammanatenni coyiꞌneemmo; Maganu uyino hexxo horonta woꞌmitukki digattanno. (Iyyaasu 21:45 nabbawi;b Iya. 23:14) Addaho, Yihowa banxeemmo gede assannonke atootenna coye kiirre guda didandiineemmo. Ikkina iso banxeemmota leellisha dandiineemmohu hiittoonniiti?

MAGANO BANXEEMMOTA LEELLINSHEEMMOHU HIITTOONNIITI?

15. Maganu Qaale xiinxallankenna yaannore assanke kaaꞌlitannonkehu hiittoonniiti?

¹⁵ Maganu Qaale ceeꞌmitinikki xiinxalle, hattono yaannore asse. Tenne assanke Yihowa addinta banxeemmotanna qaalisi ‘doogonkera xawaabba’ ikkara hasiꞌneemmota leellishshanno. (Far. 119:105) Yaachishe mitiinsannori tuncu yee noonkeha ikkiro, aane noohu gedee qaali sheshifachishankera dandaanno: “Magano, ati xissiisiꞌrino wodana dimishatto.” “Yihowa, baꞌꞌannokki baxillikki irkisinoe. Yaaddo fugge amaddue yannara, ati sheshifachishoottoe qolteno giddoꞌya gaꞌlabbi assoottoe.” (Far. 51:17; 94:18, 19) Yihowa buutote qarri giddo noore mararanno; Yesuusino manna hattonni mararanno. (Isa. 49:13; Mat. 15:32) Qullaawa Maxaafa xiinxallanke Yihowa ninke baxanno gara seekkine huwanteemmo gede kaaꞌlitannonke daafira ninkeno iso lubbora baxate kaꞌneemmo.

16. Ganyine huuccatto assiꞌranke Maganoho noonke baxilli lexxanno gede assitannohu hiittoonniiti?

¹⁶ Ganyitine huuccatto assidhe. Huuccatto assiꞌranke ‘huuccatto macciishshanno Maganiwa’ albinni roore shinqeemmo gede kaaꞌlitannonke. (Far. 65:2) Maganu huuccattonke macciishshe qolinonketa wodanchineemmo wote, iso lubbora banxeemmo. Lawishshaho, wolqankera aleenni ikkino fonqoli iillankera wore agurannokkita heeshshonkenni huwantoommoha ikkara dandaanno. (1 Qor. 10:13) Yaachishe qarrisannori tuncu yaannonke wote Yihowa eeggifante huucciꞌneemmoha ikkiro, mannu hedora aleenni ikkitinota “Maganu salaame” afiꞌra dandiineemmo. (Fil. 4:6, 7) Mito wote Nehimiya gede wodaninkenni calla huucciꞌneenna Yihowa huuccattonkera dawaro qolanna laꞌnammora dandiineemmo. (Neh. 2:1-6) ‘Agurrummokki huucciꞌneemmohanna’ Yihowa huuccattonke macciishshe qolanni noota wodanchineemmoha ikkiro, isira noonke baxilli lexxanno; qoleno wolu ammanate fonqoli iillannonke woteno kaaꞌlannonketa albinni roore addaxxineemmo.—Rom. 12:12.

17. Yihowa banxeemmoha ikkiro, gambooshshe haꞌrate daafira hiittoo lao heedhannonke?

¹⁷ Songote gambooshshenna jajjabba gambooshshe haꞌra roso assidhe. (Ibi. 10:24, 25) Hundi Isiraeele Yihowa waajjitanno gedenna Higgesi ayirrissanno gede gamba yite macciishshitanno hattono isi daafira rossanno. (Marro 31:12) Magano addinta banxeemmoha ikkiro, fajjosi assa duha diꞌꞌikkitannonke. (1 Yoh. 5:3) Konni daafira, aye coyino gambooshshe haꞌra lashshi assineemmo gede assankera horonta wodhinoonke. Mitturino Yihowara umo noonke baxilli baꞌꞌanno gede assara hasiꞌneemmokkiti egennantinote.—Aju. 2:4.

18. Maganoho noonke baxilli ma assineemmo gede kakkayisannonke?

¹⁸ “Danchu duduwi halaale” mannaho diinaggaabbine kulle. (Gal. 2:5) Maganoho noonke baxilli, Beettisi anga noo Mangistesi daafira mannaho kulleemmo gede assannonke; kuni kaajju Beettisi Armagedooni oli yannara “halaalu daafira olamanno.” (Far. 45:4; Aju. 16:14, 16) Mannu Maganu baxilli daafiranna isi abbannote haaro alame daafira afanno gede kaaꞌline rosaano assa lowo geeshsha hagiirsiissannote!—Mat. 28:19, 20.

19. Yihowa hoshshasi allaalate qixxeessino qixxaawo kaffi assine laꞌꞌa hasiissannonkehu mayiraati?

¹⁹ Maganu hoshshasi allaalate qixxeessino qixxaawo kaffi assitine laꞌinannita leellishshe. (Looso 20:28) Songote cimeeyye, ayewoteno ninkera woyyannore assanno Magani Yihowa uyinonke eltooti. Cimeeyye “bubbetewiinni gaaꞌlinanni base, hambabalatte goꞌlinanni bayichi, moola gobbara burqino wayi, hattono arrishshaame uullara lowo kinchi caali gedeeti.” (Isa. 32:1, 2) Lowo bubbe woy waajjishshanno hambabalatte dagganno wote gaaꞌlinanni mine afiꞌra loworeeti! Sammo dadhite eꞌanno arrishsho fultino barra lowo kincho afiꞌne caaꞌla lowo geeshsha hagiirsiissanno. Hatteente gede, songote cimeeyye hasiissannonketa ayyaanaamittete kaaꞌlo uyitannonke hattono jawaachishshannonke. Mereeronke sooreeyye ikkite soqqantannorira hajajamanke, ‘elto ikkitinore kore labballo’ kaffi assine laꞌneemmotanna Maganonna songote Umo ikkinoha Kiristoosi banxeemmota leellishshanno.—Efe. 4:8; 5:23; Ibi. 13:17.

MAGANOHO NOOꞌNE BAXILLI LEXXANNI HAꞌRO

20. Magano banxeemmoha ikkiro, Yaaqoobi 1:22-25 yitanno garinni maa assineemmo?

²⁰ Yihowara baxillu heeꞌrinkero, ‘macciishshineemmore calla ikka agurre qaalu yaannore assineemmo.’ (Yaq. 1:22-25) ‘Qaalu yaannore assanno’ manchi ammana noosiha ikkino daafira, sabbakate looso diinaggaawe loosanno hattono Kiristaanu gambooshshi yannara assaawe coyiꞌre beeqqanno. Maganoho addu baxilli noonke daafira, Yihowata “guuta higge” ayirrinseemmo; tini higge isi ninke assinammora hasiꞌrannore baalankare amaddinote.—Far. 19:7-11.

21. Giddokkinni huucciꞌratto huuccatto mayi gedeeti yaa dandiinanni?

²¹ Yihowara noohe baxilli ganyite iso huucciꞌratto gede assannohe. Faarsaanchu Daawiti togo yee faarsino: “[Yihowa,] huuccattoꞌya albakkiinni dancha gede qixxeessine shiqinshoonni hixaani gede ikkito; iima qole kayisoommo angaꞌyano hawarrinse shiqinshanni kakkalo gede ikkito.” (Far. 141:2; Wol. 30:7, 8) Isi hatto yee faarsinohu Muse Higge yitanno garinni barru barrunku shilqinshe shiqinshanni hixaana hede ikkikki digatino. Shooshanqetenni, hattono giddonkenni eeggifante huucciꞌneemmohanna galatunna guweenyu huuccatto shiqishiꞌneemmoha ikkiro, huuccattonke suꞌnaanno hixaani gede Magano baxissannota ikkitanno.—Aju. 5:8.

22. Aananno birxichira hiikkuyi baxillire ronseemmo?

²² Yesuusi Maganonna olliichonke baxa hasiissannonketa coyiꞌrino. (Mat. 22:37-39) Yihowaranna seerisira noonke baxilli mannu ledo dancha gede heeꞌratenna olliichonke baxate kaaꞌlannonke. Aananno birxichira olliichonke baxate yaa mayyaatero ronseemmo.