Jeefote Diini Reyo Baꞌanno

1, 2. Addaaminna Heewani umi qara heedhino heeshsho hiittoote? Hiittee xaꞌmuwara dawaro afiꞌra hasiissannonke?

ADDAAMINNA Heewani kalaqami yannara mittu diinino dinonsa. Insa hakkawaro guuta ikke gannatete heeꞌranno. Maganoho labbaa beettonna meya beetto ikkino daafira Kalaqaanchinsa ledo muli fiixoomi noonsa. (Kal. 2:7-9; Luq. 3:38) Maganu uyinonsa loosi umisi insa albillitte hiittoo heeshsho heedhannoro leellishannoho. (Kal. 1:28) ‘Uulla woꞌmanna ise gashsha’ mito geeshshi yanna saꞌu gedensaanni woꞌmannoreeti. Ikkollana, ‘uullate aana milli yitannore heeshsho noonsa kalaqama baalanka gashshite’ heeꞌrate Addaaminna Heewani hegerera heeꞌra hasiissannonsa; Addaami reyiro kayinni konne halaafinatesi wonshe diafanno.

² Ikkina xa noo heeshsho baxxitinota ikkitinohu mayiraati? Waanna diinanke ikkitinota reyono agurranna mannu oosora diinna togo batidhinohu hiitto ikkiteeti? Tenne diinna buko buluulo assate Maganu ma assanno? Tennenna wole togoo xaꞌmuwara Qullaawu Maxaafi dawaro qolanno. Hanni Qullaawu Maxaafiha mito gafa laꞌno.

MAGANU BAXILLE LEELLISHANNO QOROWISHSHA

3, 4. (a) Maganu Addaamiranna Heewanira mayitanno hajajo uyino? (b) Tenne hajajo ayirrisa mageeshshi geeshsha hasiissinote?

³ Addaaminna Heewani hegerera heeꞌrate faro faꞌnantinonsaha ikkirono, reya didandiitanno yaa diꞌꞌikkino. Reyitannokki gede foola, aga, goxanna ita hasiissannonsa. Kuri baalunkunni roore kayinni, lubbote heeꞌrate heeshsho uyinonsa Magani ledo noonsa fiixooma agadhite heeꞌra hasiissannonsa. (Marro 8:3) Heeshshonsanni hagiidhitanni heedhannohu Maganu biddishsha harunsiturooti. Yihowa, Heewani nafa kalaqantara albaanni Addaamira tenne xawise kulino. Mayyee? “Maganu Yihowa manchoho tenne hajajo uyi: ‘Kaashshu basera noote baalante haqqe guma duuwatto geeshsha ita dandaatto. Danchanna busha afisiissanno haqqicho guma kayinni ittooti; korkaatuno ise guma itootto barra mitte huluullono nookkiha reyatto.’”—Kal. 2:16, 17.

⁴ “Danchanna busha afisiissanno haqqicho” Maganoho danchanna busha ikkinore wossanate noosi silxaane riqibbannote. Addaami Maganu daninni kalaqamino daafiranna tiiu noosihura bushunna danchu maatiro huwata dandaanno. Tini haqqicho Addaaminna Heewani ayewoteno Yihowa biddishshi hasiisannonsare ikkitinota qaagganno gede assitannonsa. Insa tenne haqqicho guma ittu yaa, uminsanni marraꞌꞌama hasidhino yaate; tini qolte insarano ikko iltanno oosora buutote qarra abbitannote. Maganu uyinonsa hajajo diiga abbitino qorichi tini kabbaade hajo ikkitinota leellishanno.

REYO MANNU OOSO MEREERIRA EꞌINO GARA

5. Addaaminna Heewani Yihowara finqiltinohu hiittoonniiti?

⁵ Heewani kalaqantuta Addaami Maganu hajajo kulinose. Ise tenne hajajo seekkite affino daafira mittoreno mommodditukki woleho kula dandiitino. (Kal. 3:1-3) Ise tenne hajajo kultinohu, hamashsho lawe shiqino kalaqamiraati. Kuni hamashsho lawe shiqinohu Sheexaane Daawuloosiiti; isi ayyaanaamo Maganu beettooti; gedenaanni hige kayinni umisinni marraꞌꞌamatenna silxaane afiꞌrate yorto giddosi lophitara wodhino. (Yaaqoobi 1:14, 15 ledo heewisiisi.) Sheexaanu busha yortosi wonshiꞌrate yee, Magano kaphino yiino. Isi Heewanira umisenni marraꞌꞌama reyo abbitannoha ikkikkinni Maganu gedeeta assitannoseta kulinose. (Kal. 3:4, 5) Heewani isi yiinore ammantino daafira, hoolloonni guma itte umisenni marraꞌꞌama hasidhannota leellishshino; qolteno Addaamino hatto assara dogisiissino. (Kal. 3:6, 17) Daawuloosi yiinori kaphoho. (1 Ximootewosi 2:14 nabbawi.a) Ikkirono, Addaami ‘galtesi qaale macciishshino.’ Hamashshu Heewani coyishiishinohu jaalu gede ikkeeti; ikkirono Sheexaanu, coyiꞌrinori buutote qarra abbannota afinoho kaajjado diinaati.

6, 7. Yihowa Addaaminna Heewanira hiittoo firde faradino?

⁶ Addaaminna Heewani uminsa yortora yite heeshshonna noonsaha wole coye baalanka uyinonsa Maganira finqiltino. Hige Yihowa ikkino coye baalanka laino. (1 Zee. 28:9; Lawishsha 15:3 nabbawi.b) Ikkirono Yihowa Addaami, Heewaninna Sheexaanu iso ma garinni laꞌannoro coyidhanno faro uyinonsa. Isi Anna ikkino daafira, assootinsa lowo geeshsha dadillisinositi egennantinote. (Kalaqo 6:6 ledo heewisiisi.) Hakkiinnino isi, hajajosi diiga qoricha abbitannota balaxe kulino garinni Daanyu gede ikke farada hasiissinosi.

⁷ Maganu Addaamira, “[Danchanna busha afisiissanno haqqicho] guma itootto barra mitte huluullono nookkiha reyatto” yee umonni kule kainosi. Addaamira hakku ‘barri’ 24 saate afiꞌrino barra lawinosiha ikkanno. Isi Maganu hajajo diigi gedensaanni, Yihowa hakko barranni shaannoe yee agadhinoha ikkara dandaanno. “Barru hawarre dayita” Yihowa Addaaminna Heewani coyishiishi. (Kal. 3:8) Isi xalala Daanya ikkino daafira, balaxe Addaaminna Heewani mayitannoro macciishshino. (Kal. 3:9-13) Hakkuyi gedensaanni cubbo loossinorira reyote firde faradino. (Kal. 3:14-19) Yihowa insa hakkawontenni shoommero, insaranna sirchinsara noosi alaami woꞌmikki gatanno. (Isa. 55:11) Isi insara reyansa gattannokkita kulinonsahanna cubbu gumi bayichonko leella jammarinoha ikkirono, Addaaminna Heewani ooso iltara fajjino; hatti ooso qolte isi qixxeessanno qixxaawonni horo afidhanno. Addaaminna Heewani cubbo loossu barrinni jammarte Maganu hedo garinni reyitinoreeti; qoleno 1,000 diri isira mittu “barri” gede ikkino daafira mittu barrinni reyitino yaate.—2 Phe. 3:8.

8, 9. Addaami cubbi oososi ma assino? (Umi misile lai.)

⁸ Addaaminna Heewani assinori oosonsa gawajjanno? Ee gawajjanno. Roomu Sokka 5:12 togo yitanno: “Cubbu mittu manchi widoonni alame ei, reyo qolte cubbu widoonni eꞌino; baalunku cubbo loossino daafira reyo manna baalaho iillitino.” Umo reyinohu ammanamino manchi Abeeliiti. (Kal. 4:8) Hakkuyi gedensaanni wole Addaami oosono geedhite reyitino. Mannu ooso cubbo calla ikkikkinni reyono ragidhino. Hawaariya Phaawuloosi togo yiino: “Mittu manchi hajajama giwino daafira lowo manni cubbaataamo ikkino.” (Rom. 5:19) Konni daafira Addaami widoonni dayino cubbinna reyo guuntete xeꞌne noonsa manni gate saꞌꞌannokkiha kaajjado diina ikkitino. Addaami cubbi sirchisira saino gara bande afa hoongummorono, abbino qarra kayinni huwata dandiineemmo.

⁹ Qullaawu Maxaafi ragiꞌnoommo cubbonna reyo “manna baala fuge amadino hocconna daga baala diwino hocco” yee xawisasi garankolla. (Isa. 25:7) Cubbunna reyo mannu ooso fuge foola hoꞌlanno hocci gede assite amaddino. Hakko daafira “Addaaminni kainohunni baalunku reyitanno.” (1 Qor. 15:22) Hatto ikkiro Phaawuloosi yiinonte gede, “Reyote widira massitannote tenne mannimmanni ayi gatisannoe?” yee xaꞌma hasiissinote. Gatisankera dandaannohu heeꞌranno?c—Rom. 7:24.

RAGIꞌNOOMMO CUBBINNA REYO BAꞌANNO

10. (a) Yihowa Addaamiwiinni ragiꞌnoommo reyo hunannota kultannoti mite Qullaawu Maxaafi xiqisubba hiikkuriiti? (b) Tini xiqisubba Yihowanna Beettisi daafira maa huwachishshannonke?

¹⁰ Ee, Yihowa Phaawuloosi gatisara dandaanno. Isayyaasi fuge amadanno hoccire kuli gedensaanni togo yiino: “Isi reyo hegerera egemmanno; Aliidi Mootichi Yihowa mannu baalunku albinni hindiiddo feyanno.” (Isa. 25:8) Oososi shetisinore hoole hindiiddonsa feyannohu baxillaanchu anni gede, Yihowa Addaamiwiinni ragiꞌnoommo reyo huna lowonta hasiꞌranno! Isi tenne assanno wote Yesuusi isi ledo buusamanno. Umi Qorontoosi 15:22 togo yitanno: “Baalunku Addaaminni kainohunni reyitannonte gede, baalunku Kiristoosinni kainohunni heeshsho afidhanno.” Phaawuloosino “Ayi gatisannoe?” yee xaꞌmi gedensaanni aanche togo yiino: “Mootichinke Yesuusi Kiristoosi widoonni gatisannoehu Maganu galatamo!” (Rom. 7:25) Addaho, Yihowa mannu ooso kalaqanno gede kakkayisinosi baxilli Addaaminna Heewani finqillenni kainohunni dibaino. Qoleno, Yihowa umi minaannanna minaama kalaqi yannara ledosi loosino Beettisi xaano ikkiro mannu ooso lubbora baxanno. (Law. 8:30, 31) Ikkina cubbunninna reyotenni ganteemmohu hiittoonniiti?

11. Yihowa mannu ooso kaaꞌlate mayi qixxaawo assino?

¹¹ Addaami cubbo loosita Yihowa isira reyote firde faradino; konninni kainohunni mannu ooso guuntete xeꞌnenna reyo ragidhino. (Rom. 5:12, 16) Tennera Roomu Sokka 5:18 togo yitanno: “Mitte baddalonni kainohunni duuchunku gari manni cubbaataamo ikkino.” Yihowa wodhosi lashshi asse agurikki konne cubbo hunannohu hiittoonniiti? Yesuusi togo yee coyiꞌrino qaali tennera dawaro ikkanno: “Manchu beetti dayinohu . . . heeshshosi lowo mannira wodo asse aaraati.” (Mat. 20:28) Yihowahu bayiru beetti Yesuusi uullate aana guuta mancho ikke ilame wodo ikkannota xawise coyiꞌrino. Tini wodo taashsho woꞌmitanno gede assitannohu hiittoonniiti?—1 Xim. 2:5, 6.

12. Taashsho woꞌmitanno gede assitino wodo hiitteeti?

¹² Hakkawaro Yesuusi guuta mancho ikkinohura, Addaamira cubbo loosara albaanni noosi qoosso afiꞌrino. Yihowa alaami Addaamiti guuta ooso uulla woꞌmitanno gedeeti. Konnira Yesuusi Annasinna Addaami ooso lubbora baxanno daafira maalaamitte heeshshosi wodo asse uyino. Ee Yesuusi, Addaami hunino heeshsho ledo taaltannota guuta maalaamitte heeshsho sayise uyino. Hakkuyi gedensaanni Yihowa Beettisira ayyaanaamitte heeshsho uyinosi. (1 Phe. 3:18) Yihowa mittu guutu manchi Yesuusi shiqishino kakkalo Addaami ooso wodate woy insa daafira kaffalate baqe ikkitino gede asse adhino; konni garinni insa Addaami hoogino heeshsho afiꞌra dandiitanno. Wole yaattonni, Yesuusi Addaami bayicho riqiwino. Phaawuloosi togo yiino: “Konni daafira, ‘Umi manchi Addaami heeshsho noo mancho ikkino’ yine borreessinoonni. Gedensiidi Addaami kayinni heeshsho aanno ayyaana ikkino.”—1 Qor. 15:45.

13. “Gedensiidi Addaami” reyino manna kaaꞌlate ma assanno?

¹³ “Gedensiidi Addaami” mannu oosora xaphoomunni “heeshsho aanno ayyaana” ikkanno yanna mulenni dagganno. Reyitinori Addaami ooso giddo rooriidi wirro heeshsho afidhanno. Insa kao afidhe uullate aana heedhanno.—Yoh. 5:28, 29.

14. Yihowa Addaami oososira sayisinota guuntete xeꞌne hunate mayi qixxaawo assino?

¹⁴ Mannu ooso xaxxabbe amaddinonsate guuntete xeꞌnenni keere fultannohu hiittoonniiti? Yihowa ‘gedensiidi Addaaminna’ mannu ooso mereerinni doorantinori gashshitanno Mangiste qixxeessino. (Ajuuja 5:9, 10 nabbawi.d) Yesuusi ledo iima mookkannori guuntete xeꞌne maatiro affinoreeti. Insa Yesuusi ledo kume diro mookkanno wote, uullate aana noori uminsanni hooꞌlite affannokkita guuntete xeꞌne qeeltanno gede kaaꞌlitannonsa.—Aju. 20:6.

15, 16. (a) Qullaawu Maxaafi ‘jeefote diina ikkitino reyo’ yaannoti hiitteeti? Tini reyo baꞌannohu mamarooti? (b) Umi Qorontoosi 15:28 yitanno garinni Yesuusi ma assanno?

¹⁵ Kumu Diri Gashshooti jeefora, owaata mannu ooso Addaami finqillenni kalaqantino diinna baalante anganni keere fultanno. Qullaawu Maxaafi togo yaanno: “Addaaminni kainohunni baalunku reyitannonte gede, Kiristoosinni kainohunni baalunku heeshsho afidhanno. Kayinni mittu mittunku tarisinni ikkanno: Kiristoosi umiho; hakkiinnino isi bayicho amadanno wote Kiristoosire ikkitinori [ledosi mookkannori] heeshsho afidhanno. Hakkuyi gedensaanni, isi gashshoote baalanka hattono silxaane baalantanna wolqa buko-buluulo asse Mangiste Maganisiranna Annisira qolanno wote gumulamanno. Maganu diinna baalanta lekkasira woroo qolasi geeshsha nugusa ikke gashsha hasiissannosi. Jeefote diina ikkitinoti reyo baꞌanno.” (1 Qor. 15:22-26) Ee, goofimarchoho Addaamiwiinni ragiꞌnoommo reyo baꞌanno. Hakkawote mannu ooso baalanta “fuge amadino hocci” hegerera hoꞌlanno.—Isa. 25:7, 8.

¹⁶ Hawaariya Phaawuloosi ayyaanunni coyiꞌranni noore togo yee xaphi assino: “Baalunkuri maahoyye yee galisi gedensaanni, Maganu duuchunkura duuchare ikkanno gede Beettu umisi baalunkuri maahoyye yee galannosi gede assinohura maahoyye yee galanno.” (1 Qor. 15:28) Hatte yannara Beettu gashshooti alaami woꞌmanno. Hakkiinnino isi silxaanesi Yihowara hagiirrunni qolanno; hattono guuta mannu ooso isira aanno.

17. Sheexaanu jeefote ma ikkanno?

¹⁷ Mannu oosora iillinohu buutote qarri jammaranno gede assinohu Sheexaanu hiikkannoyya? Ajuuja 20:7-15 tennera dawaro qoltanno. Sheexaanu guuta ikkino manni baalunkura jeefote fatana abbe insa soꞌrisiisate woꞌnaalanno gede fajjinanni. Daawuloosinna iso harunsitannori ‘layinkimeeshshu reyonni’ hegerera buko-buluulo ikkitanno. (Aju. 21:8) “Layinkimeeshshu reyo” reyitannori galagalte heeshsho afidhannokki daafira, baꞌannoti tenne reyo diꞌꞌikkitino. Ikkollana, Kalaqaanchonsa baxxannorenna isira soqqantannore “layinkimeeshshu reyo” diyaachishshannonsa.

18. Maganu Addaamira uyino halaafinati woꞌmannohu hiittoonniiti?

¹⁸ Hakkiinnino Yihowa guuta ikkitinota mannu ooso hegerera heeꞌrate woꞌmunni woꞌma ikkadda ikkitino gede asse laꞌꞌanno; hakkawote mittu diinino diheeꞌrannonsa. Addaamira uyinoonni halaafinati isi nookkiha woꞌmanno. Oososi uulla woꞌmitanno, hattono isenna saada towaattanni hagiidhitanno. Yihowa jeefote diina ikkitinota reyo hunate baxillunni assino qixxaawora ayewoteno diniqo heedhonke!