“Nugussanna Kakkalaano” Ikkitinanni
“Nugussanna kakkalaano hattono qullaawa daga ikkitinannie.”—WOL. 19:6.
1, 2. Manchote sirchira agarooshshu hasiisinohu mayiraati?
QULLAAWU MAXAAFITI umi masaalo Yihowa alaami woꞌmanno gara huwatate lowo geeshsha kaaꞌlitannote. Halaalaanchu Magani Edenete hexxo coyiꞌri yannara togo yiino: “Atenna [Sheexaanu] manchote mereero, hattono sirchikkinna sirchise mereero baarigaarre woreemmo.” Tini baarigaarre mageeshsha martanno? Yihowa togo yiino: “Isi [manchote sirchi] ateha [Sheexaaneho] umokki cancananno, ati kayinni gindesi cancanatto.” (Kal. 3:15) Hamashshunna manchote mereero noo baarigaarre shoonna reyote geeshsha massitannota ikkitino daafira, Sheexaanu manchote sircho shaate qodhe kaino.
2 Konni daafira faarsaanchu Maganunnite doorantino daga daafira togo yee huucciꞌrasi garankolla: “Kuneeti! diinnakki kooccanni no; gibbannoherino insaneeto gotti gotti assitino. Insa mannakki gawajjate xagarrotenni mala maꞌlitino; muxxe ikkitino gosakkirano aduma gantino. ‘Amme tenne daga gundona’ yitino.” (Far. 83:2-4) Sheexaanu manchote sirchi ilamanno rumushsho hunatenna daafate mixiꞌrino daafira konni sirchira agarooshshu hasiisino. Konne assate, Yihowa alaamisira guficho ikkannore hoolannoha wole sheemaate woy gondooro eino.
MANCHOTE SIRCHO AGARANNO GONDOORO
3, 4. (a) Higgete gondoori woꞌma jammarinohu mamarooti? Isiraeelete daga maa assate sumuu yitino? (b) Higgete gondoori maa agarino?
3 Abirahaami, Yisaaqinna Yaaqoobi ooso batidhe haammata miliyoone ikkituta, Yihowa insa giddonni umonsa dandiitino daga yaano hundi Isiraeele daga xintino. Yihowa Muse widoonni Higgesi oye insa ledo baxxino gondooro eino; Isiraeelete dagano hakko gondooro agadhate sumuu yitino. Konne gondooro Higgete gondooro yinanni. Qullaawu Maxaafi tenne kulanni togo yaanno: “[Muse] gondooru maxaafa haare qoonqosi gotti asse dagate nabbawi. Hakkiinnino insa, ‘Yihowa yiinore baalankare assineemmo, hajajammeemmo’ yitu. Konnira Muse [kakkalloonni bootta] mundee haare dagate aanaho wixi gedensaanni togo yii: ‘Tini Yihowa konni qaali garinni kiꞌne ledo eino gondoori mundeeti.’”—Wol. 24:3-8.
4 Higgete gondoori woꞌma jammarinohu 1513 K.A. Siina Ilaaliraati. Konni gondoorinni kainohunni hunditi Isiraeelete gosa Maganoho doorantino daga ikkitino. Hakkawote Yihowa ‘Daanyansa, Higge aannonsahanna Nugusansa’ ikkino. (Isa. 33:22) Isiraeele Maganunniha xalala seera agadhitanno wotenna lashshi assitanno wote mayi iillannonsaro xaggensa badde kultanno. Muse Higge wole daga ledo adhamanna kaphu magansiꞌrara karsama hooltanno daafira, Abirahaami sirchi daafamannota agartino.—Wol. 20:4-6; 34:12-16.
5. (a) Higgete gondoori Isiraeelete dagara mayi faro fanino? (b) Maganu Isiraeele facci asse agurinohu mayiraati?
5 Higgete gondoori, Isiraeelete daga mereero kakkalaano heedhanno gedeno assino; tini kakkalaano albillitte mannu oosora woyyitino kakkalaano heedhannota leellishshanno. (Ibi. 7:11; 10:1) Isinni, Higgete gondoori Isiraeele “nugussanna kakkalaano” ikkitanno faro afidhanno gede assino; tenne qoosso afiꞌrate Yihowa higge ayirrisa hasiissinonsa. (Wol. 19:5, 6) Isiraeele kayinni dihajajantino. Insa qaru Abirahaami sirchi yaano Mesihichu Yesuusi dayita maahoyye yite diadhitino. Konni daafira Maganu insa facci asse agurino.
Isiraeele hajajama hoogginohura Higgete gondoori hendoonnire wonshikki gatino yaa diꞌꞌikkino (Gufo 3-6 lai)
6. Muse Higge alaami maati?
6 Isiraeele Yihowara ammanama hoogginohuranna nugussanna kakkalaano ikkate qoosso afidhukki gattinohura calla Muse Higge hendoonnire wonshitukki gattino yaa diꞌꞌikkino. Higge uyinoonnihu manchote sircho agarateetinna mannu Mesihicha bade afanno gede kaaꞌlateeti. Kiristoosi dayitanna mannu iso bade afita Higgete alaami woꞌmino. Qullaawu Maxaafi yaannonte gede, “Kiristoosi Higgete gumulooti.” (Rom. 10:4) Ikkina, nugussanna kakkalaano ikkate faro afidhannori ayeootiyya? Yihowa haaro daga kalaqate wole gondooro eino.
HAARO DAGA KALAQANTU
7. Yihowa haaro gondooro lainohunni Ermiyaasi widoonni mayino?
7 Higgete gondoori gatara lowo diri albaanni, Yihowa Isiraeelete daga ledo “haaro gondooro” eannota masaalaanchu Ermiyaasi widoonni balaxe coyiꞌrino. (Ermiyaasi 31:31, 33 nabbawi;a Erm. 31:32, 33) Kuni gondoori saadate mundee shiqinshikki cubboho gatona afiꞌnanni gede assanno daafira, Higgete gondoorinni baxxinoho. Kuni ikkannohu hiittoonniiti?
8, 9. (a) Duꞌnantinoti Yesuusi mundee maa qineessitanno? (b) Haaru gondoori giddo karsantinori mayi faro afidhanno? (Umi misile lai.)
8 Lowo xibbi diri sai gedensaanni, Yesuusi Nisaani 14, 33 M.D. Mootichu Hurbaati Ayyaana qixxeessino. Isi woyinete daafira 11 ammanantino hawaariyaatesira kulanni togo yiino: “Kuni finiinchi kiꞌne daafira duꞌnantanno mundeeꞌyanni eꞌnanniho haaro gondoorooti yaate.” (Luq. 22:20) Maatewoosi Yesuusi woyinete daafira togo yiinota borreessino: “Tini lowo manni cubboho gatona afiꞌranno gede duꞌnantannote ‘gondooru mundeeꞌyaati’ yaate.”—Mat. 26:27, 28.
9 Duꞌnantinoti Yesuusi mundee haaru gondoorira kaajjadu xinti heeꞌranno gede assitino. Qolteno, tini mundee hegerera cubboho maaro afiꞌnanni faro fantino. Yesuusi haaru gondoorira dikarsamino. Isira cubbu noosikki daafira, maaro dihasiissannosi. Kayinni duꞌnantino mundeesi waaga Maganu Addaami ooso kaaꞌlate horoonsiꞌranno. Qoleno, mito ammanamino manna qullaawu ayyaaninni buure ‘oososi’ assiꞌranno. (Rom. 8:14-17) Insa Maganu illera cubbu noonsakkire ikkitanno daafira, keeraanchu Maganu Beetti Yesuusi gedeere ikkitanno yaate. Tini buuramaasine ‘Kiristoosi ledo mitteenni ragidhanno’; hattono “nugussanna kakkalaano” ikkitanno faro afidhanno. Tini qoosso wonaatiro Muse Higge hunda nooti Isiraeelete daga afidhannote. Hawaariya Pheexiroosi Kiristoosi ledo ragidhannori daafira togo yiino: “Kiꞌne kayinni tunsichu giddonni maalaꞌlinanni xawaabbiwa woshshinoꞌne Maganita ‘dhaggete akatta halashshitine dudubbinanni gede dooramino sircho, nugussanna kakkalaano, qullaawa daga, baxxino miinja ikkate doorantinoonni dagaati.’” (1 Phe. 2:9) Addaho, haaru gondoori lowonta hasiisinoho! Kuni gondoori Yesuusi rosaano Abirahaami sirchira layinki kifile ikkitanno gede assanno.
HAARU GONDOORI KAAJJADU XINTI NOOHA IKKI
10. Haaru gondoori kaajjadu xinti nooha ikkinohu mamarooti? Hakka geeshsha keeshshinohu mayiraati?
10 Haaru gondoori kaajjadu xinti nooha ikkinohu mamarooti? Kuni ikkinohu Yesuusi uullate aana galinohu jeefote hashsha konni gondoorire coyiꞌri wote diꞌꞌikkino. Kuni gondoori woꞌmanno gede, Yesuusi mundee duꞌnamanna waagise iima Yihowa albaanni shiqa hasiissannosi. Hakkiinni saeno, ‘Kiristoosi ledo ragidhannorira’ qullaawu ayyaani dirra hasiissanno. Konni daafira, haaru gondoori kaajjadu xinti nooha ikkinohu 33 M.D. Phenxeqosxete barra, ammanantinori Yesuusi rosaano qullaawu ayyaaninni buurantu woteeti.
11. Haaru gondoori Yihudootuno barcintinokki dagano ayyaanaame Isiraeele wido ikkitanno gede faro faninohu hiittoonniiti? Haaru gondoori giddo karsantinori meꞌꞌe ikkitanno?
11 Yihowa Isiraeelete daga ledo haaro gondooro eannota Ermiyaasi widoonni coyiꞌri yannara Higgete gondoori “akkala” ikkinoha ikkirono, kuni gondoori haaru gondoori kaajjadu xinti nooha ikka geeshsha kayinni diaguramino. (Ibi. 8:13) Kuni ikkita kayinni, Maganu Yihudootano ikko barcintinokki daga mittu garinni laꞌꞌa jammarino; korkaatuno “[barciminsa] borreessantino higge garinni ikkikkinni ayyaanunni wodanu barcimaati.” (Rom. 2:29) Maganu insa ledo haaro gondooro eꞌꞌe, ‘higgesi surrensara woranno, hattono wodaninsara borreessanno.’ (Ibi. 8:10) Haaru gondoori giddo karsantinori xaphoomunni 144,000 mannaati; insa haaro daga yaano “Maganu Isiraeele” woy ayyaanaame Isiraeele ikkitino.—Gal. 6:16; Aju. 14:1, 4.
12. Higgete gondoorinna haaru gondoori mereero noo badooshshe xawisi.
12 Haaru gondoori Higgete gondoorinni baxxannohu mayinniiti? Higgete gondoori Yihowa maalu Isiraeele ledo einoho; haaru gondoori kayinni Yihowa ayyaanaame Isiraeele ledo einoho. Higgete gondoorira araarsaancho ikkinohu Museeti; haaru gondoorira kayinni Araarsaanchu Yesuusaati. Higgete gondoorira xinta ikkitinoti saadate mundeeti; haaru gondoorira xinta ikkitinoti kayinni duꞌnantinote Yesuusi mundeeti. Qoleno, Higgete gondoori giddo noorira Isiraeelete sooreessu Museeti; haaru gondoori giddo noorira Sooreessu kayinni songote Umo ikkinoho Yesuusaati.—Efe. 1:22.
13, 14. (a) Haaru gondoori Maganu Mangiste ledo mayi xaado afiꞌrino? (b) Ayyaanaame Isiraeele iima Kiristoosi ledo mookkanno gede mayi hasiisanno?
13 Haaru gondoori Maganu Mangiste ledo mayi xaado afiꞌrino? Kuni gondoori tenne Mangistera nugussanna kakkalaano ikkate qoosso afidhannoti qullaawa daga kalaqantanno gede assanno. Tini qullaawa daga Abirahaami sirchita layinki kifile ikkitanno. (Gal. 3:29) Konni daafira, haaru gondoori Abirahaami ledo gondoori woꞌmannota buuxisanno.
14 Maganu Mangiste ledo xaado afiꞌrinohu woluno hasiisanno coyi no. Haaru gondoori ayyaanaame Isiraeele kalaqantanno gedenna insa wido ikkitinori ‘Kiristoosi ledo ragidhanno’ faro afidhanno gede assino. Ikkina insa iima Kiristoosi ledo nugussanna kakkalaano ikka dandiitannohu hiittoonniiti? Tenne qineessannohu wolu gondoori no.
WOLOOTU KIRISTOOSI LEDO MOOKKANNO GEDE ASSANNO GONDOORO
15. Yesuusi ammanantino hawaariyaatesi ledo eino gondoori hiikkonneeti?
15 Yesuusi Mootichu Hurbaati Ayyaana xinti gedensaanni, ammanantino rosaanosi ledo gondooro eino; konne gondooro duucha wote Mangistete gondooro yinanni. (Luqaasi 22:29 nabbawi;b Luq. 22:28, 30) Konne gondooro wolu gondooriwiinni baxxanno gede assannori maati? Wole gondooro einohu Yihowaati; konne gondooro kayinni Yesuusi buurantino harunsaanosi ledo addinni eino. Yesuusi, “Anniꞌya ane ledo gondooro einonte gede” yii wote, Yihowa iso “Melketsedeqi ikki garinni hegerera kakkalaancho” assate eino gondooro hedinoha ikkara dandaanno.—Ibi. 5:5, 6.
16. Mangistete gondoori buuramino Kiristaanira maaho kaaꞌlanno?
16 Tonaa mite ammanantino hawaariyaate ‘qarrisi yannara Yesuusi ledo quraanyantino.’ Mangistete gondoori tini hawaariyaate nugussanna kakkalaano ikkite iima Yesuusi ledo mookkanno gede xinta ikkanno. Ikkollana, tenne qoosso afidhannori 11 hawaariyaate calla diꞌꞌikkitino. Ayirrinye adhinohu Yesuusi hawaariya Yohaannisira ajuujatenni leelle togo yiino: “Ani qeelle adhe Anniꞌya qiniiteenni zuufaanesira ofolloommonte gede, qeelle adhannohu ane ledo zuufaaneꞌyara ofollanno gede asseemmo.” (Aju. 3:21) Konni daafira, Yesuusi Mangistete gondooro einohu 144,000 buuramino Kiristaani ledooti. (Aju. 5:9, 10; 7:4) Kuni insa iima Yesuusi ledo mookkanno gede assannonsa gondoorooti. Buuramino Kiristaani gari, nugusaho assidhe silxaanesira gutantino beetto gedeeti. Isinni Qullaawu Maxaafi buuramino Kiristaani Kiristoosira huuccantinota “keeraancho seemo” ikkinota kulanno.—Aju. 19:7, 8; 21:9; 2 Qor. 11:2.
MAGANU MANGISTERA KAAJJADO AMMANA HEEDHOꞌNE
17, 18. (a) Kageeshsha laꞌnummoha Maganu Mangiste ledo xaado afiꞌrino gondooro xawisi. (b) Maganu Mangistera kaajjado ammana heedhannonke gede assannohu maati?
17 Lamente birxichuwara laꞌnummohu addi addi gondoori, Maganu Mangiste ledo xaado afiꞌrinoha lowonta hasiisanno coye kulanno. (“Maganu Alaamasi Wonshanno Gara” yitanno chaarte lai.) Tini qolte Maganu Mangiste sheemaatu woy gondooru aana xintantinota leellishshanno. Konni daafira Maganu uullatenna mannu oosora noosiha hundi alaama wonshate Kiristoosi anga noo Mangiste horoonsiꞌranni noota seekkine ammanneemmo gede assannonkehu gari korkaati no.—Aju. 11:15.
Yihowa Kiristoosi anga noo Mangiste horoonsiꞌre uullate noosi alaama wonshanno (Gufo 15-18 lai)
18 Maganu Mangiste mannu oosora hegere atoote abbitannota horonta dihuluullammeemmo. Mitte huluullo nookkiha, mannu ooso qarra baalanka tirtannoti Maganu Mangiste calla ikkitinota dudumbeemmo. Konne halaale mannaho diinaggaambe dudumbo!—Mat. 24:14.
a Ermiyaasi 31:31, 33: “Yihowa togo yaanno: ‘Kuneeti! Isiraeelete mininna Yihudu mini ledo haaro gondooro eꞌꞌeemmo barri daanni no . . . Higgeꞌya giddonsa woreemmo; wodaninsarano borreesseemmo. Ani Maganonsa ikkeemmo, insa kayinni dagaꞌya ikkitanno.’”
b Luqaasi 22:29: “Anniꞌya ane ledo gondooro einonte gede, anino kiꞌne ledo mangistete gondooro eꞌꞌeemmo.”