Amanyootinke Baalunkunni Qullaawoota Ikka Hasiissannonke

“Amanyootiꞌne baalunkunni qullaawoota ikke.”—1 PHE. 1:15.

1, 2. (a) Maganu dagasira hiittoo amanyooti heeꞌransara hasiꞌranno? (b) Konni birxichira hiittee xaꞌmuwara dawaro qollanni?

HAWAARIYA PHEEXIROOSI qullaawu ayyaani marraeennasi Kiristaanu qullaawoota ikka hasiissannonsata borreessi wote Zelewaawuyaani giddo borreessinoonnire qummi assino. (1 Pheexiroosi 1:14-16 nabbawi.a) “Qullaawu” Magani Yihowa, buuramino Kiristaaninna “wolu geꞌreewi” mite doogonni calla ikkikkinni amanyootinsa baalunkunni qullaawoota ikkate dandaaminsare baala assitara hasiꞌranno.—Yoh. 10:16.

² Zelewaawuyaani maxaafinni wole ayyaanaamo coye rosanke lowo horo uyitannonke; qoleno ronseemmore loosu aana hosiisa amanyootinke baalunkunni qullaawoota ikkate kaaꞌlitannonke. Konni birxichira aante noo xaꞌmuwara dawaro afiꞌneemmo: Maganu higgenna seerasi lashshi assa ma garinni laꞌꞌa hasiissannonke? Zelewaawuyaani maxaafi Yihowa aliidimma ayirrisate daafira maa rosiisannonke? Biꞌre Isiraeele shiqishshanno kakkalonni maa ronseemmo?

MAGANU HIGGENNA SEERA LASHSHI ASSA QOROPHE

3, 4. (a) Qullaawu Maxaafi higgenna xintu seera lashshi assa qoropha hasiissannonkehu mayiraati? (b) Rabbisiꞌra woy koma amada hasiissannonkekkihu mayiraati?

³ Yihowa hagiirsiisa hasiꞌneemmoha ikkiro, higgesinna xintu seerasi agadha hasiissannonke ikkinnina lashshi assa horonta dihasiissannonke. Muse higge hunda heeꞌnoommore ikka hoongummorono, tini Higge Maganu baxannonna giwanno coyi maatiro wodanchate kaaꞌlitannonke. Lawishshaho Isiraeele togo yine hajanjoonninsa: “Rabbisidhooti, hattono gaꞌrekki ikkino mannira koma amaddooti; qoleno olliichokki umikki gede assite baxi. Ani Yihowati.”—Zel. 19:18.

⁴ Yihowa rabbisiꞌra woy koma amada gimbammora hasiꞌranno. (Rom. 12:19) Maganu higgenna xintu seerasi lashshi assinummoro, Daawuloosi hagiidhanno; qoleno Yihowa suꞌmi mishamanno gede assinammora dandiineemmo. Mittu manchi afanni heeꞌrenni koffi assinkero nafa, giddonke koma diwodhineemmo. Maganu muxxe jiro ikkitino soqqansho amadannoha “doru uduunnicho” ikkineemmo gede qoosso uyinonke. (2 Qor. 4:1, 7) Hadhote gede ikkitinoti koma kayinni togoo uduunnichi giddo heeꞌra dihasiissannose!

5. Aaroonirenna reyitino oososire kultanno xaggenni maa ronseemmo? (Umi misile lai.)

⁵ Zelewaawuyaani 10:1-11 Aarooni maatera iillinoha baasa dadillisanno coye kultannonke. Giira iiminni dirrite xaadooshshu dunkaaniwa Aarooni ooso Nadaabinna Abiyudi ittu yannara, maatensa lowo geeshsha dadillitinoti egennantinote. Aarooninna maatesi reyitu oosora wiꞌlitannokki gede uyinoonninsa hajajo ayirrisa ammanansara fatana ikkitannote! Ati bohaminohu maatekki miilano ikko wolu manniwa aana qorophite qullaambekki agadhite nootto?—1 Qor. 5:11.

6, 7. (a) Beetekiristaanete sarginsanni sarge haꞌra hasiissannonkeronna teꞌee wossaꞌnineemmo wote heda hasiissannonkeri maati? (Lekkaalliidi qaagiishsha lai.) (b) Togoo sarge haꞌra lainohunni wossaꞌninoommore ammaninokki fiixinkera xawisa dandiineemmohu hiittoonniiti?

⁶ Aarooniranna maatesira iillinohu gedeehu buutote fatani iilla hoogankera dandaanno. Ikkollana, miteekke ammaninokki fiixinke beetekiristaanensara sarginsanni sarge haꞌnammoranna hakko mitore assinammora koyisannonkehalla ikki? Togoo base haꞌneemmokki gede badde kultannoti borreessinoonni higge dino. Ikkina tennera wossaꞌnate kaaꞌlannonkehu Qullaawu Maxaafihu xintu seeri no?b

⁷ Togoo yannara Yihowa albaanni qullaawoota ikkine heeꞌrate murciꞌnoommo gari ammaninokki fiixinkera hibbo ikkansara dandaanno. (1 Phe. 4:3, 4) Insa koffi assineemmokki gede qorophineemmo; ikkirono, wossaꞌninoommore shaqqillunni hattono xawinse kula roore woyyate. Dandiinummoro tenne sargete barri iillikki balanxe kullummonsaro danchaho. Sargensawa mitore kaaꞌlinammonsara koyissinonketera hagiidhinoommota kulle galantammonsara dandiineemmo. Hakkiinnino, sarge marre kaꞌne ammaꞌnote ledo xaado afiꞌrino coyira karsama hooganke hagiirrinsa baꞌꞌanno gede assitaranna insano ikko koyinseenna dayino manna saalfachishshara dandiitannota kullammonsara dandiineemmo. Ammananke lashshi assineemmokki gede qorophineemmo doogga giddo mitte tenneeti.

YIHOWA ALIIDIMMA AYIRRISSE

8. Zelewaawuyaani maxaafi giddo Yihowa aliidimma luphi assine kulloonnihu hiittoonniiti?

⁸ Zelewaawuyaani maxaafi Yihowa aliidimma luphi asse kulanno. Zelewaawuyaani maxaafi giddo noo higge Yihowawiinni dagginota ikkitinota konni maxaafi giddo 30 saꞌanno basera kulloonni. Muse tenne afino daafira, Yihowa hajajinosire assino. (Zel. 8:4, 5) Isinte gede ninkeno, ayewoteno Aliidi Mootichinke Yihowa assinammora hasiꞌrannore assa hasiissannonke. Hatto assate Maganu dirijjite kaaꞌlitannonke. Ikkollana, Yesuusira iillinonte gede calla heeꞌnoommo wote ammananke fatanannori tuncu yaankera dandaanno. (Luq. 4:1-13) Maganu aliidimma aana illachinsheemmohanna iso addaxxineemmoha ikkiro, ayino Maganu seera diingeemmo gede asse diafanno; hattono manna waajjate woshshaado diamaddannonke.—Law. 29:25.

9. Gobba baalate mannu Yihowa daga giwannohu mayiraati?

⁹ Kiristoosi harunsaanonna Yihowa Farciꞌraasine ikkinoommo daafira, alamete aana dartu iillannonke. Kuni wosincho coye diꞌꞌikkino; korkaatuno Yesuusi rosaanosira togo yiino: “Mannu qarraho sayise aannoꞌne, hattono shaannoꞌne; ane suꞌminni kainohunni mannu baalu giwannoꞌne.” (Mat. 24:9) Mannu giwinkerono, Mangistenniha dancha duduwo duduwanna Yihowa albaanni qullaawoota ikkinoommota leellisha diagurreemmo. Ammanammoommore, xuru nookki heeshsho heeꞌneemmorenna higge ayirrinseemmore ikkine heeꞌneenna mannu giwannonkehu mayiraatiyya? (Rom. 13:1-7) Korkaatuno Yihowa Aliidi Mootichanke assine adhinoommo daafiraati! Qullaawa soqqansho shiqishiꞌneemmohu “isira callaati”; qoleno isita xalala higguwanna xintu seeruwasi lashshi diassineemmo.—Mat. 4:10.

10. Mittu rodii poletiku coyira ei yannara mayi tuncu yiinosi?

¹⁰ Qoleno ninke “tenne alame wido diꞌꞌikkinoommo.” Konni daafira alamete oliranna poletiku hajora anga diwodhineemmo. (Yohaannisi 15:18-21 nabbawi;c Isa. 2:4) Insaneeto Maganoho sayise uyinohu mitu manni qeelame poletiku hajora eino woti no. Kuri giddo lowo manni maaro eꞌꞌe higino; hattono shaqqadu iimi Anninke ledo noonsa fiixooma haaroonsiꞌrino. (Far. 51:17) Gamu manni kayinni maaro dieino. Lawishshaho, Layinkihu Alamete Oli yannara Hangaari gobbara gashshaano beebba usurantinore 45 diri woro noore 160 roduuwa usuri minna baalantenni mittu katamira gamba assitino. Hakko gamba assitinowa roduuwa wottaaddara ikkitara hajajjunsa. Kuri roduuwi giddo rooru tennera maahoyye diyitino; honsu kayinni wottaaddara ikkate qaale eꞌe, wottaaddaru uddano adhitino. Lamu diri gedensaanni, wottaaddara ikkate maahoyye yituri giddo mitto ammanantino Farciꞌraasine shaara hajanji. Hatte Farciꞌraasine giddo mittu rodoosiiti! Ikkollana kore roduuwa dishinoonni.

YIHOWARA UMO AFIꞌRINOHA UYIYYE

11, 12. Yihowa hunda kakkalo lainohunni Isiraeelete uyino biddishshinni yannankera Kiristaanu maa rosanno?

¹¹ Muse Higgera Isiraeele hiittoo kakkalo shiqisha hasiissannonsaro bande kulloonni. (Zel. 9:1-4, 15-21) Shiqishshannoti addi addi kakkalo guuta ikkinohu Yesuusi kakkalora lawishsha ikkitino daafira mishsho nookkita ikka hasiissanno. Qoleno mitte mittenta kakkalo hiittoonni shiqisha hasiissannonsaro dagate bande kulloonni. Lawishshaho, hakkawaro mitte ilaancho iltuhu gedensaanni maa assa hasiissannosero laꞌno. Zelewaawuyaani 12:6 togo yitanno: “Labbaa woy meyaa qaaqqo iltino mancho keeraaꞌmitanno yanna gumulantanno wote, giirre kakkallanniha mittu diri goconna bukukkaama woy lembooli caacurricho cubboho kakkalo assine shiqinshanni gede xaadooshshu dunkaana massite kakkalaanchoho uyito.” Maganu assa hasiissannore bade kulino; ikkollana, tini Higge isi baxillaanchonna quwa saꞌꞌannokkiha ikkinota leellishshanno. Iltino mancho geꞌrecho shiqishate anga assitannosekkiha ikkiro, lame bukukkaama woy lame lembooli caacurre shiqishshanno gede fajjinoonni. (Zel. 12:8) Tini qixxaawo, hatti mancho buxicho ikkiturono Maganu baxannosetanna lowo waaga afidhino kakkalo abbanno manni ledo taashshe laꞌꞌannoseta leellishshanno. Tennenni ninke maa ronseemmo?

¹² Hawaariya Phaawuloosi ammanate roduuwisi Maganoho “galatu kakkalo” shiqishshanno gede amaalino. (Ibi. 13:15) Suumenkenni Yihowaha qullaawa suꞌma mannaho faajjete duduwa hasiissannonke. Danqootu roduuwinke Magano danqootu afiinni guwisiꞌranni no. Dhiwame mininni fula hoogino Kiristaani dabdaabbetenni, silketenni woy laꞌꞌansara daanno mannira farciꞌranno. Yihowara galatu kakkalo shiqishiꞌneemmohu yaano mannu suꞌmasi afanno gede assinenna dancha duduwo dudumbe iso guwisiꞌneemmohu ordu fayyimmanna dandoonke assitu deerrinniiti. Isira galatu kakkalo shiqishiꞌrate dandiineemmore baala assa hasiissannonke.—Rom. 12:1; 2 Xim. 2:15.

13. Soqqanshote saate rippoorte qola hasiissannonkehu mayiraati?

¹³ Yihowa banxeemmo daafira isira galatu kakkalo shiqishiꞌneemmohu uminkenniiti. (Mat. 22:37, 38) Ikkollana soqqanshote rippoorte qolleemmo gede xaꞌminanninke. Ikkina tenne qixxaawo ma garinni laꞌꞌa hasiissannonke? Aganu kiiro qolleemmo rippoorte Maganoho galloommore ikkinoommota leellishshanno. (2 Phe. 1:7) Lowo saate qolate yine calla seeda saate soqqama hasiissannonke yine heda dihasiissannonke. Geerra towaantanni basera heedhannori woy wolu korkaatinni dhuka hooggino halashshaano, 15 daqiiqa qoltanno gede qixxaawo assinoonnihu iseraati. Yihowa konne daqiiqa doorantino kakkalo gede asse laꞌꞌanno; qoleno tenne kakkalonsa insa iso baxxannota, hattono Farciꞌraasinesi widira kiiramate qoossonsa kaffi assite laꞌannota leellishshannota ikkitino gede asse laꞌꞌanno. Biꞌre lowo waaga afiꞌrinore kakkalo asse shiqishate anga ajjinohu Isiraeelete manni assannonte gede, dhuka hoogginori Yihowari muxxe soqqamaanono soqqanshote rippoorte qola dandiitanno. Ninke mittu mittunkuwiinni gamba assinanni rippoorte gamba yite alame woꞌmate rippoorte ikkitanno daafira, Yihowa dirijjite albillitte soqqanshote hasiisannore heddanno gede kaaꞌlitanno. Ikkina soqqanshote saate rippoorte qola hakkeeshshi geeshsha qarrisannore ikkinoni?

XIINXALLONKE GADENNA GALATU KAKKALONKE

14. Xiinxallote gadenke heeshshi gotti assine heda hasiissannonkehu mayiraati?

¹⁴ Zelewaawuyaani maxaafinni kageeshsha ronsoommota kaajja assaawe heditto gedensaanni, ‘Kuni maxaafi Maganu Qaali wido ikkinohu mayiraatiro xa roore wodanchoommo’ yite hedottooha ikkara dandaanno. (2 Xim. 3:16) Xa albinni roore qullaawa ikkate murcidhe kaoottohu Yihowa qullaawoota ikkinammora hasiꞌrannohura calla ikkikkinni iso hagiirsiisa hasiꞌratto daafiraati. Zelewaawuyaani maxaafa lainohunni konni lamu birxichira rosoottori, Qullaawa Borro gudisse albinni roore seekkite xiinxallatto gede assinoheha ikkara dandaanno. (Law. 2:1-5) Huuccatto assidhe xiinxallote gadekki hiittootero heeshshi gotti assite hedi. Shiqishiꞌrattota galatu kakkalo Yihowa hagiidhe adhara hasiꞌrattoti dihuluullissannote. Ikkina televizhiine, viidiyote godoꞌle, ispoortenna wole togoo coyibba hedokki bebbeehantanno gedenna ayyaanaamittetenni lophattokki gede assitanni nooheha lawannohe? Hatto ikkiro, hawaariya Phaawuloosi Ibiraawuyaani maxaafira borreessinore hiincakki kaaꞌlitahera dandiitanno.

Maatete Magansiꞌra yannara hedonsa billaallite baꞌino—mittu mittunku maatete miili wolurira agure higino — Qullaawa Maxaafa xiinxallanna Maatete Magansiꞌra wolu coyinni balaxisiissinanni heedhinoonni? (Gufo 14 lai)

15, 16. Phaawuloosi Ibiraawuyaani Kiristaanira coye xawise kulinohu mayiraati?

¹⁵ Phaawuloosi Ibiraawuyaani Kiristaana amaala hasiꞌrino coye xawise kulinonsa. (Ibiraawuyaani 5:7, 11-14 nabbawi.d) Isi coye dishaqqishino! Isi maccansa macciishshate “jingilli” yitinota kulinonsa. Phaawuloosi togo kaajjishe coyiꞌrinohu mayiraati? Yihowa baxannonsata leellishatenna kuri Kiristaani ayyaanaamittete adonni calla geꞌꞌe heeꞌranni noohura insa kaaꞌlateeti. Kiristaanunniha xinta ikkino roso afa hasiissannote. Ikkollana, ayyaanaamittetenni gikki yaate “kaajjado sagale” sagaꞌla hasiissanno.

¹⁶ Ibiraawuyaani Kiristaani woloota rosiisa hasiissannonsa bayicho insa uminsara rosiisannohu hasiisinonsa. Mayira? Korkaatuno, insa “kaajjado sagale” sagaꞌla dihasidhino. Ateneeto togo yite xaꞌmi: ‘Kaajjado ayyaanaamitte sagalera gara ikkitino lao nooe? Togoo sagale sagaꞌlanni noommonso, huuccatto assiꞌre Qullaawa Maxaafa seekke xiinxalla qarra ikkitinoe? Hatto ikkiro, qarra kalaqqanni nooti xiinxallote gadeꞌyaatikka?’ Mannaho sabbankeemmo gede calla ikkikkinni, insa rosiinseemmonna rosaano assineemmo gede hajanjoonninke.—Mat. 28:19, 20.

17, 18. (a) Kaajjado ayyaanaamitte sagale ganyine sagaꞌla hasiissannonkehu mayiraati? (b) Gambooshshe haꞌnammora albaanni agatto aga ma garinni laꞌꞌa hasiissannonke?

¹⁷ Hige Qullaawa Maxaafa xiinxalla shota ikka hooggara dandiitanno. Yihowa mannisi Qullaawa Maxaafa xiinxallanno gede kakkayisate gaabbanno gede diassanno. Ikkirono, ninkeneeto Maganoho sayinse uyine lowo yanna soqqammanni keeshshinoommorino, isira soqqama muli yannara jammarroommorino kaajjado ayyaanaamittete sagale sagaꞌla hasiissannonke. Qullaambete doogo haꞌra hasiꞌnummoro togo assa hasiissannonke.

¹⁸ Qullaawoota ikkate Qullaawa Borro yitannore seekkine hiincanna Maganu assinammora hasiꞌrannore assa hasiissannonke. Hanni “fajjinoonnikki giira” shiqishshinori Aarooni ooso Nadaabinna Abiyudire kultanno xagge hedi; insa hakka wote dimbite nooha ikkara dandaanno. (Zel. 10:1, 2) Gedensaanni Maganu Aaroonira mayinoro wodanchi. (Zelewaawuyaani 10:8-11 nabbawi.e) Tenne xiqisera noo assaawe, songote gambooshshe haꞌnammora albaanni agatto horo qamasa dihasiissannonke yaateni? Hanni aante noo coyibba hedi: Ninke Muse higge hunda heeꞌnoommore diꞌꞌikkinoommo. (Rom. 10:4) Mite gobbara roduuwinke songote gambooshshe hadhara albaanni sagale ittanno wote bikkunni agatto agganno. Biꞌre Faasiku ayyaanira woyine shoolu kubbaayyira worre shiqinshoonni. Yesuusi Qaagooshshu Ayyaana xinti wote hawaariyaatesi mundeesi riqibbanno woyine agganno gede assino. (Mat. 26:27) Qullaawu Maxaafi batinse angannitanna dimbinannita hoolanno. (1 Qor. 6:10; 1 Xim. 3:8) Batinye Kiristaana, tiiꞌꞌinsa ayyaanaamittete ledo xaado afiꞌrinoha aye coyeno assitara albaanni agatto horonta aggannokki gede hoolansara dandaanno. Ikkollana, kuni coyi gobba gobbate garinni babbaxxanno; Kiristaanu dea hasiissannonsakki coyi kayinni ‘qullaawa ikkinohanna battaawino coye bande anfe,’ Magano hagiirsiisanno garinni qullaawoota ikkine heeꞌrate.

19. (a) Maatete magansiꞌranna gillete xiinxallonke lainohunni maa heda hasiissannonke? (b) Qullaambetenni heeꞌrate daafira maa assate murcidhe kaootto?

¹⁹ Maganu Qaale seekkitine xiinxallitinanniha ikkiro batinye xintu seera huwattinanni. Maatete Magansiꞌranna gillete xiinxalloꞌne gade woyyeessiꞌrate xiinxallote kaaꞌlitanno borro horoonsidhe. Yihowarenna alaamisire albinni roore afate woꞌnaalle. Isiwa albinni roore shiqqe. (Yaq. 4:8) Faarsaanchu, “Higgekki giddonni dhagge ikkino coye buuxeemmo gede illeꞌya fanie” yee huucciꞌrinonte gede kiꞌneno Magano huuccidhe. (Far. 119:18) Qullaawu Maxaafi higguwanna xintu seera horonta lashshi assitinoonte. Heeshshoꞌne “Qullaawu” Magani Yihowate bayira higge ledo sumuu yitanno gede assidhe; hattono ‘Maganunniha dancha duduwo dudubbine konne qullaawa looso’ diinaggaabbine loosse. (1 Phe. 1:15; Rom. 15:16) Tenne umo lekkicho baꞌinote goofimarchu yanna giddo qullaawoota ikkaꞌne leellishshe. Ninke baalunku amanyootinkenni qullaawoota ikkine, Qullaawu Maganinke Yihowa aliidimma ayirrinso.

a 1 Pheexiroosi 1:14-16: “Hajajantinanni ooso ikkitinoonnihura, egenno nooꞌnekki yannara haꞌrunsitinoonni yorto garinni heeꞌra agurre; hatteentenni woshinoꞌnehu qullaawu Magani qullaawa ikkinonte gede, kiꞌneno amanyootiꞌne baalunkunni qullaawoota ikke; korkaatuno, ‘Ani qullaawa ikkoommo daafira kiꞌneno qullaawoota ikka hasiissannoꞌne’ yine borreessinoonni.”

b Onkoleessa 15, 2002 Agarooshshu Shae (Amaaru Afoo) aana “Nabbawaano Xaꞌmitanno Xaꞌmo” lai.

c Yohaannisi 15:18-21: “Alame gibbuꞌnero kiꞌne gibbara albaanni ane gibbinota affinoonni. Alamete wido ikkitinoommero alame umiseha ikkinoha baxxanno. Xa kayinni alamete giddonni doodhoommoꞌne daafiranna alamete wido ikkitinoonnikki daafira alame gibbannoꞌne. Borojjichu mootichasi dirooranno yee kulummoꞌne qaale qaagge; ane darameemmo gede assitinoeha ikkiro kiꞌneno darantinanni gede assitannoꞌne; qaaleꞌya agadhitinoha ikkiro kiꞌne qaaleno agadhitanno. Ikkollana soyinoeha affinokki daafira ane suꞌminni kainohunni konne baala assitannoꞌne.”

d Ibiraawuyaani 5:7, 11-14: “Kiristoosi maalunni noo yannara reyotenni gatisasira dandaannohuwa lowo geeshsha wiꞌle hattono hindiiddotenni eeggifate huucciꞌrino; Magano waajjannota leellishino daafira huuccattosi macciishshantino. Isi daafira coyiꞌneemmori lowori noonke; ikkollana maccaꞌne jingilli yitino daafira xawise kulate lowo geeshsha qarraho. Tenne yannara wonaatiro rosiisanno ikka hasiissannoꞌnereeti; ikkollana Maganunnita qullaawa sokkaha xintu coye wirro mite yee rosiisannoꞌne manni hasiisannoꞌne. Qoleno hasiissannoꞌneti kaajjado sagale ikkitukkinni adote; korkaatuno ado haqaanqannihu baalu qaaqqo ikkino daafira keeraanchimmate qaali ledo diegennamino. Kaajjado sagale kayinni garanna gara ikkinokki coye bada dandaanno gede wodanchate dandoonsa qajeelsiꞌre gikki yiino manniraati.”

e Zelewaawuyaani 10:8-11: “Maganu Aarooni togo yiisi: Reyitinannikki gede atinna oosokki xaadooshshu dunkaana eꞌinanni yannara woyine woy wole dimbisannore agginoonte; kuni dagganno ilama warono agadhitinanni seeraati. Qullaawinohanna battaawinoha, keeraawinohanna keeraawinokkiha badde; Maganu Muse widoonni uyinonsa seera baala Isiraeelete rosiisse.’”