Qullaawu Maxaafi Xaꞌmonna Dawaro

Ooso Magano baxxanno gede rosiisa dandiinannihu hiittoonniiti?

Oosoꞌne Magano baxa dandiitannohu isi nootanna insa baxannoha ikkinota huwattanno gede kaaꞌlininsaro callaati. Insa Magano baxxanno gede iso afa hasiissannonsa. (1 Yohaannisi 4:8) Lawishshaho, aante noo coyibba afa hasiissannonsa: Maganu manna kalaqino alaami maati? Maganu qarrunna shetto heedhara sammi yiinohu mayiraati? Maganu albillitte mannu oosora maa assanno?—Filiphisiyusi 1:9 nabbawi.

Oosoꞌne Magano baxxanno gede kaaꞌlate, kiꞌne umiꞌne iso baxxinannita affanno gede assa hasiissannoꞌne. Kiꞌne iso baxxinannita laꞌuro, insano kiꞌne faale hadhara dandiitanno.—Marro 6:5-7; Lawishsha 22:6 nabbawi.

Oosoꞌne wodana kakkayisa dandiitinannihu hiittoonniiti?

Maganu Qaali wolqa afiꞌrinoho. (Ibiraawuyaani 4:12) Hakko daafira, oosoꞌne Maganu Qaaliha xinta ikkino roso affanno gede kaaꞌlensa. Yesuusi mannu wodana kakkayisate xaꞌmo xaꞌmino, yitannore macciishshino hattono Qullaawa Borro tiro xawisanni rosiisino. Kiꞌneno oosoꞌne wodana kakkayisate Yesuusi rosiisino gara harunsa dandiitinanni.—Luqaasi 24:15-19, 27, 32 nabbawi.

Qoleno, alba Maganu manna ma garinni amadinoro kultannoti Qullaawu Maxaafi xagge, ooso Magano affannonna baxxanno gede kaaꞌlitara dandiitanno. Tennera kaaꞌlitara hende qixxeessinoonni borro www.jw.org/sid aaninni afiꞌra dandiinanni.—2 Ximootewosi 3:16 nabbawi.