Boha Baxillu Qixxaawooti Yineemmohu Mayiraati?

JUULIYAANI togo yiino: “Beettiꞌya bohaminota songote kullanna macciishshummota, ragu baalu tunsie. Oosoꞌya giddo bayiru isooti; qoleno isi anewa lowo geeshsha gamba yaanno; lowo loosono mitteenni loonsoommo. Isi alba duuchanka wote dancha beettooti; hedeweelcho kayinni garimale ikka jammari. Minaamaꞌya xaa xaa wiꞌlitannota ikkitu; ise mayyee sheshifachisheemmoro leella giwie. Kuni ikkinohu ninke assineemmori gateennaatikka? yine duucha hinge hendoommo.”

Mitto Kiristaancho boha togo xissiissannoha ikkiro, tenne baxillu qixxaawooti yinannihu mayiraati? Qullaawu Maxaafi kulannohu mitto mancho bonkanni gede assanno korkaati maati? Isi mitto mancho bohamanno gede assannohu maati?

BOHAMMANNI GEDE ASSANNOHA LAME COYE

Mitto Yihowa Farciꞌraasincho songote giddonni bonkanni gede assannohu lame coyeeti. Umihu, mittu cuuamino Farciꞌraasinchi kabbaade cubbo loosasiiti. Layinkihu, kuni manchi cubbisira maaro ea hoogasiiti.

Yihowa guuta ikka hasiissannoꞌne yee murrisannonkekkiha ikkirono, soqqamaanosi qullaawoota ikkitara hasiꞌranno. Lawishshaho, Yihowa foorre, kaphu maganna magansiꞌra, moora, mulqiꞌra, lubbo shaanna agaanintete looso lawinohu kabbaade cubbiwiinni xeertiꞌnammora hasiꞌranno.—1 Qor. 6:9, 10; Aju. 21:8.

Yihowa qullaawoota ikkinammora uyinonke seeri ninke agarate kaaꞌlannohanna gara dilawannohe? Ninke baalunku salaame noohunna amanyoote afiꞌrinohu ammanamino manni mereero heeꞌra banxeemmo. Ninkeneeto Maganoho sayinse uyinummo wote Qaalisi giddo noo seeri garinni heeꞌrate qaale eꞌnoommo daafira, ammanate roduuwinke mereero togoo amanyooti no.

Ikkina mittu cuuamino Kiristaanchi laanfetenni kainohunni kabbaade cubbo loosirona? Hundi waro heedhinori ammanantinori Maganu soqqamaano togoo cubbo loossino; ikkirono, Maganu bayichonko facci asse diagurinonsa. Nugusu Daawiti xagge tennera lawishsha ikkitanno. Daawiti soorrino hattono lubbo shiino; ikkollana masaalaanchu Naataani, “Yihowa . . . cubbokki gatona yaanno” yee kulinosi.—2 Sam. 12:13.

Maganu Daawiti cubbo gatona yiinohu Daawiti giddosinni maaro eino daafiraati. (Far. 32:1-5) Hatteente gede, yannankera mittu Yihowa soqqamaanchi bohamannohu maaro ea hoogiro woy bushare assa agura hoogiro callaati. (Looso 3:19; 26:20) Firdete komite giddo eꞌe loossanno cimeeyye cubbo loosino manchi addinta maaro einota leellishannore assa hoogiro, boha hasiissannonsa.

Hakko iso cubbo loosino manchiwa gamba yineemmore ikkinummoro, konne mancho boha umi qara mararro nookkire woy kaajjille labbankera dandiitanno. Ikkirono, Yihowa Qaali tini baxillu qixxaawooti yineemmo gede assannonke korkaata kulanno.

BOHATE QIXXAAWO MAAHO KAAꞌLITANNO?

Yesuusi “hayyo uyitanno guminni keeraancho ikkase leeltanno.” yiino. (Maatewoosi 11:19, lekkaalliidi qaagiishsha.) Maaro eannokki cubbaataamo boha hayyote; hattono keeraanchimmate guma laaltannote. Kuri giddo hanni sase laꞌno:

Cubbaataamo boha Yihowa suꞌmi ayirranno gede assitanno. Yihowa suꞌminni woshshammeemmore ikkinoommo daafira, amanyootinke suꞌmasi seekkara woy mishiishara dandaanno. (Isa. 43:10) Mittu beetti ikkito annisinna amasi ayirranno woy mishamanno gede assitara dandiitannonte gede, mannuno Yihowa suꞌminni woshshamanno mannita dancha woy busha ikkito lae iso danchu woy bushu garinni laꞌꞌara dandaanno. Maganu suꞌminni woshshantannori Yihowa seeri garinni heedhannoha ikkiro, danchu suꞌmisi ayirranno. Hiziqeeli yannara noo ikkito lawishsha assine kula dandiineemmo; hakkawaro Yihudootu assitinorinni kainohunni qooxeessinsara noo manni Yihowa suꞌma mishino.—Hiz. 36:19-23.

Amanyoote bainore assate rosichi heeꞌrinkero qullaawu Maganu suꞌmi xonamanno gede assineemmo. Hawaariya Pheexiroosi Kiristaana togo yee amaalino: “Hajajantinanni ooso ikkitinoonni daafira, alba egenno nooꞌnekki waro harunsitinanni yorto garinni quxama agurre; woshshinoꞌnehu Qullaawa ikkino daafira, kiꞌneno amanyootiꞌne baalunkunni qullaawoota ikke; korkaatuno, ‘Ani qullaawa ikkoommo daafira, kiꞌneno qullaawoota ikke’ yine borreessinoonni.” (1 Phe. 1:14-16) Xuru nookkihu qullaawu amanyooti Maganu suꞌmi ayirranno gede assanno.

Mittu Yihowa Farciꞌraasinchi bushare assate rosichi noosiha ikkiro kayinni, jaallasi woy wolu egenninosi manni tenne afara dandaanno. Cubbaataamo boha Yihowara Qullaawu Maxaafi seera agadhannohu xuru nookki manni noosita mannu afanno gede assitanno. Suwizerlaandete gobbara mittu manchi Mangistete Addaraashe daye songote miila ikka hasiꞌrannota kulino. Alba konni manchi rodoo amanyoote bainore assitino daafira bohantino. Kuni manchi “busha amanyoote sammi yite laꞌannokki” dirijjite miila ikka hasiꞌrannota coyiꞌrino.

Boha xuru nookkiti Kiristaanu songo agarooshshe afidhanno gede assitanno. Hawaariya Phaawuloosi Qorontoosi Kiristaani affanni heedhenni cubbo loossannore mereeronsa heedhara sammi yaansa abbitanno gawajjo kulinonsa. Isi togoo cubbaataammi abbitanno gawajjo, lixe gudisidhe fultanno gede assitanno irsho ledo heewisiisino. Isi togo yiino: “Shiima irsho lixe gudisidhe fultanno gede assitanno.” Hakkiinni togo yee amaalinonsa: “Busha mancho mereeriꞌnenni fushshitine hoolle.”—1 Qor. 5:6, 11-13.

Phaawuloosi yiihu ‘bushu manchi’ faajjete foorannoha ikkara dandaanno. Qoleno, hakkawaro songote giddo noori wolootuno konni manchi amanyoote gara ikkinori gede assite laꞌꞌa nafa jammartino. (1 Qor. 5:1, 2) Togooha kabbaade cubbo sammi yine agurranniha ikkiro, wolu Kiristaanino hakko katamira rosantinota amanyootu maaeelle harunsate widira higara dandaanno. Affanni heedhenni cubbo loossannore lashshi assine agura, Maganu seera diinganni gede kakkayissanno. (Mek. 8:11) Hakkiinni saeno, maaro eꞌannokki cubbaataammi “wayi giddo maaxamino kinchi” gede ikkite songote giddo wolootu ammana diiggara dandiitanno.—Yihu.  4, 12.

Cubbaataamo boha konni manchira wodanisi raga higanno gede assitara dandiitanno. Yesuusi, annisi qaenni wole gobba haꞌre maafude baꞌino heeshsho heeꞌranni woxesi fince guxxino beettire coyiꞌrino. Kuni beetti annisi qaenni gobbaanni noo heeshsho hagiirru nookkita ikkitinota iillinosi qarrinni huwatino. Gedensaanni konni beettira wodanu raga higeenna gaabbe maatesiwa higino. (Luq. 15:11-24) Yesuusi baxillaanchu anni beettisi qae higeenna hagiidhinota xawisino gari Yihowa simmeete huwatate kaaꞌlannonke. Yihowa togo yiino: “Bushu manchi reyo dihagiirsiissannoe; hatteentenni bushu manchi doogosi biddi assiꞌre lubbote heeꞌrara hasiꞌreemmo.”—Hiz. 33:11.

Hatteente gede, bohante Kiristaanu songonni yaano ayyaanaamitte maatensa giddonni fultinori mageeshshi coye huꞌnitinoro huwattara dandiitanno. Cubbu doogo haꞌransa abbitinonsaha busha guma laꞌꞌansanna alba Yihowanna mannisi ledo danchu jaaloomi noonsata hagiirsiissanno yanna qaagansa, wodaninsa raga higanno gede assitara dandiitanno.

Bohate qixxaawo dancha guma abbitanno gede baxille leellishanna murciꞌne Maganu higgera haꞌla hasiissanno. Faarsaanchu Daawiti togo yiino: “Keeraanchu manchi ganiero, baꞌꞌannokki baxilli gede asse laeemmo; borooriero umoho zayite buurinoehu gede asse kiireemmo.” (Far. 141:5) Lawishshaho, hanni mittu manchi sagale itanna maalchu qalxinosihu gede assite hedi. Kuni manchi foola hoogino. Hattono coyiꞌra nafa hoogino. Rahe kaaꞌlannosi manni hoogiro reyaraati. Hakkiinni mittu jaalisi qalxinosi maalchi fulanno gede badhe gani. Ganinosiwi xissasira dandaanno; lubbosi kayinni gatisinosi. Hatteente gede, Daawiti mittu keeraanchu manchi iso kaaꞌlate yee kaajjado amaale aasira dandaannota huwatino.

Cubbo loosinoha boha duucha wote hakko manchira dancha seejjo ikkitanno. Bitimaho qummi assinihu Juuliyaani beetti mitu tonnu diri gedensaanni heeshshosi biddi assiꞌre songo higino; isi xaa yannara songote cimeessaati. Isi togo yiino: “Songote giddonni bohamaꞌya heeshshoꞌya gari abbino guma mixxeemmo gede assitinoe. Hakkawote hasiissinoeti hattoo seejjooti.”—Ibi. 12:7-11.

BOHANTINORE BAXILLUNNI AMADA DANDIINEEMMO GARA

Songotenni bohama dadillissannoti egennantinote; ikkirono, bohamino manchi higeno dihiganno yaa diꞌꞌikkino. Bohate qixxaawo hendoonni guma abbitanno gede ninke baalunku assineemmori no.

Cimeeyye mitto mancho bohate wossantanno wote Yihowa baxille leellishate sharrantanno. Bohamara wossantinota kultannosi wote, galagale songo higate maa maa assa hasiissannosiro shaqqillunni xawisse kultannosi. Bohantinori Yihowawa higate assa hasiissannonsare qaagiissate, cimeeyye mito geeshsha heeshshonsa biddi assidhanni noore saꞌe saꞌe marte coyishiishshara dandiitanno.a

Maatete miilla cimeeyye murtino muro ayirrisse songonna cubbo loosino mancho baxxannota leellisha dandiitanno. Juuliyaani beettisi bohami yannare togo yee xawisino: “Isi bohamirono beettoꞌyaati; kayinni heeshshosi gari mereeronke boono kalaqino.”

Songote miilla baalanti bohamino manchiwa aananna iso coyishiisha agurte baxille leellisha dandiitanno. (1 Qor. 5:11; 2 Yoh. 10, 11) Konni garinni Yihowa cimeeyyete widoonni uyinosi seejjo hendoonnire wonshitanno gede kaaꞌlitanno. Hakkiinni saeno, songote miilla bohami manchi maatera wolu wotinni roore baxille leellishanna irkisa dandiitanno; qoleno tini maate ammanate roduuwinsa insawiinnino xeertidhannohu gede assite heddanno gede assa dihasiissanno.—Rom. 12:13, 15.

Juuliyaani togo yee gumulino: “Cubbo loossinore boha Yihowa seeri garinni heeꞌneemmo gede kaaꞌlitannonkete hasiissanno qixxaawooti. Xissiissannoha ikkirono, gedenoonni dancha guma abbitanno. Beettiꞌyaha busha amanyoote sammi yee aguroommoro, isi horonta diwoyyaawanno.”