Afa Hasiissannota Mitte Xagge

Qullaawu Maxaafi tana daannohu wolu ammaꞌnote maxaafi dino. Qoleno, konni maxaafi geeshsha batinyu manni xaa geeshsha ammanansara xinta asse horoonsiꞌrinohu wolu maxaafi dino. Qoleno, Qullaawu Maxaafi geeshsha xiinxallinoonnihunna woffi assate woꞌnaalloonnihu wolu maxaafi dino.

Lawishshaho, mite fullahaasine yannankera noota addi addita Qullaawu Maxaafi tiro, hundi borruwa aaninni garunni ditirroonni yite huluullantanno. Mittu ammaꞌnote daafira xiinxallanno fullahaanchi togo yiino: “Hundi borro garunni tirroonni yine ammana didandiineemmo. Hundi borro aaninni galchinoonniti angankera noo borro soꞌro woꞌmitinotenna taje leellishshanno garinni tenne borro giddo roore hunda angatenni borreessinihunni lowo sani sai gedensaanni qixxaabbinotenna babbaxxitinote.”

Wolu manni kayinni albi ammaꞌnonsanni kainohunni Qullaawu Maxaafi gara ikkasi huluullamanno. Lawishshaho, alba Fayizaalira Kiristaana ikkitinokki maatesi Qullaawu Maxaafi qullaawa ikkirono soorramino yite rosiissinosi. Isi togo yiino: “Konni daafira mannu ane ledo Qullaawu Maxaafire kayise hasaawa hasiꞌranno wote, insa yaannori didirrannoe.” Isi hakka waro, “Insa uminsara hundihu Qullaawu Maxaafi dinonsa; hattono, Qullaawu Maxaafi soorramino!” yee hedannota coyiꞌrino.

Ikkina, Qullaawu Maxaafi soorramasi woy soorrama hoogasi ate heeshsho ledo xaado afidhinoyya? Hanni aante noo xaꞌmuwa hedi: Qullaawu Maxaafi giddo nooti albillittete yannare kultannoti sheshifachishshanno hexxo, hundite Qullaawa Borro giddo nooronna teꞌee afittokki, tini hexxo woꞌmitanno yite hedattoni? (Roomu Sokka 15:4) Qoleno, yannankera noohu Qullaawu Maxaafi mannu loosino soꞌrore calla kulannoha ikkoommero, giddosi noo seera looso, maatenna ammanakki lainohunni mitto doorsha doodhatto yannara harunsattoni?

Mite hunditi qullaawa borro maxaaffa baꞌinoha ikkirono, heewisiise laꞌꞌate kaaꞌlitannoti hundite aaninni galchine qixxeessinoonni borruwanna lowo kume ikkitannoti angatenni borreessinoonniti Qullaawa Borro noonke. Tini angatenni borreessinoonniti Qullaawa Borro tattaꞌe baꞌukkinni gattinohu, hattono mannu hunatenna giddose noo sokka soorrate woꞌnaalanni heeꞌreenna baꞌukkinni gattinohu hiittoonniiti? Tini borro baꞌukkinni gatase, yannankera noohu Qullaawu Maxaafi garaho yite ammanatto gede assitannohehu hiittoonniiti? Kuriuu xaꞌmuwa dawaro afiꞌrate aante noota Qullaawu Maxaafi baikkinni gatino gara kultanno xagge nabbawi.