‘Hadhine Gosa Baala Rosaanoꞌya Asse’

1, 2. Yesuusi Maatewoosi 24:14 aana coyiꞌrinori hiikkuri xaꞌmuwa xaꞌminanni gede assanno?

AMMAꞌNONKE ledo sumuu yaanno manni woy effire giwannonke manni Yihowa Farciꞌraasine gaamote deerrinni sabbakate loosinsanni egennantinota ammananno. Soqqamatto yannara xaadatto manni ammaꞌnonke ledo sumuu yaannokkiha ikkiro nafa loonseemmo loosinni kainohunni ayirrisannonketa coyiꞌranna macciishshoottoha ikkara dandaanno. Yesuusi Maganu Gashshootiha dancha duduwo uulla woꞌmate sabbankannita balaxe coyiꞌrino. (Mat. 24:14) Ikkina loonsanni heeꞌnoommo loosi Yesuusi masaalo woꞌmitanno gede assannoho yineemmohu mayiraati? Konne looso loonsanni heeꞌnoommori ninkeeti yine hendummoro tini umonke jajateni?

² Batinye ammaꞌnote gaamo Wongeela woy dancha duduwo dudubbanni nooha lawannonsa. Ikkollana, sabbakate loosinsa uminsa dhagge kulatenni, beetekiristaanete rosiisatenni, televizhiinete, interneetete woy wolu xaadooshshu buusi widoonni pirogiraame sayisatenni sainoha diꞌꞌikkino. Wolootu qolte irdaata aa woy manna akkama woy roso rosiisa sabbakate loosi gede assite laꞌanno. Yesuusi rosaanosi loossara uyino loosi konneetini?

3. Maatewoosi 28:19, 20 aana noo hedo garinni Yesuusi harunsaano hiittenne shoole coyibba assa hasiissannonsa?

³ Yesuusi rosaano mannu insawa daara sammi yite agadhitinoni? Deeꞌni! Yesuusi reyotenni kaihu gedensaanni lowo xibbe ikkitanno rosaanosi togo yee hajajino: “Hadhine gosa baala . . . cuuꞌinanni rosaanoꞌya assensa; hajajoommoꞌnere baala assitanno gede rosiissensa.” (Mat. 28:19, 20) Konnira shoole coye assa hasiissanno. Insano, rosaano assa, cuuanna rosiisate; kayinni umo maa assa hasiissanno? Yesuusi ‘hadhe!’ yiino. Tenne hajajo lainohunni mittu Qullaawu Maxaafi fullahaanchi togo yiino: “‘Haꞌra’ mittu mittunku ammaꞌnino manchi loosanno loosooti; tenne assannohu doogo haꞌre woy wuqiyanoose tayise sae ikkara dandaanno.—Mat. 10:7; Luq. 10:3.

4. ‘Manna woshshaandannire’ ikkate maa assa hasiissanno?

⁴ Yesuusi tenne hajajo uyinohu harunsaanosi callootinsa anna anna sabbakkanno gedeetinso, dancha duduwo mitteenni buusante dudubbanno gedeeti? Mittu manchi callisi ‘gosa baalate’ sabbake dandaannokkihura kuni loosi batinyu manni buusame qinaawino garinni loosannoho. Yesuusi rosaanosi ‘manna woshshaaddannore’ ikkitara koyisasi tenne leellishshanno. (Maatewoosi 4:18-22 nabbawi.) Isi kowiicho qummi assinoti qulxuꞌme woshshaadate hayyo mittu manchi qulxuꞌme amaxxate manxaqqote aana sagale wore qulxuꞌme dagge itta geeshsha sammi yee agadhannota diꞌꞌikkitino. Hatteentenni, Yesuusi qummi assinoti lowo manni mitteenni buusame marawe horoonsiꞌre woshshaadanno hayyooti; qoleno konne looso loosate lowo wolqa hasiissanno.—Luq. 5:1-11.

5. Hiittenne shoole xaꞌmora dawaro afiꞌra hasiissannonke? Mayira?

⁵ Yesuusi masaalino masaalo garinni xaa yannara dancha duduwo dudubbanni noori ayeootiro afate aante noote shoole xaꞌmora dawaro afiꞌra hasiissannonke.

• Hiittenne sokka sabbaka hasiissanno?

• Sabbankanni gede kakkayisannori maa ikka hasiissanno?

• Sabbakate hiikkuri doogga horoonsiꞌra hasiissanno?

• Konni loosi halaꞌlinyinna loonsanni yanna mageeshshita ikka hasiissannose?

Kuri xaꞌmuwa dawaro, konne heeshsho gatisanno looso loossanni noori ayeootiro afate kaaꞌlitannonke; hattono konne looso agurrummokkinni loonseemmo gede assitannonke.—1 Xim. 4:16.

HIITTENNE SOKKA SABBAKA HASIISSANNO?

6. Yihowa Farciꞌraasine Yesuusi sabbakke yiino sokka sabbakkanni no yineemmohu mayiraati?

⁶ Luqaasi 4:43 nabbawi. Yesuusi ‘Maganu Gashshootiha dancha duduwo’ duduwino; rosaanosino tenne assitara hasiꞌranno. Xaa yannara tenne sokka “gosa baalate” sabbakkanni noori ayeooti? Dawaro teeꞌlitinota diꞌꞌikkitino; tenne assitanni noori Yihowa Farciꞌraasine callate. Mitu giwannonke manni nafa tenne huwatino. Lawishshaho, misiyoone ikke soqqamanno qeesichi, mittu Yihowa Farciꞌraasinchira isi babbaxxitino gobbara heeꞌrinotanna heeꞌrino gobba baalantera noore Yihowa Farciꞌraasine sabbakkanno sokka maatiro xaꞌminota coyiꞌrino. Insa qoltino dawaro maatiyya? Kuni qeesichi togo yiino: “Insa baalu gowwoota ikkitinohura ‘Maganu Gashshootiha dancha duduwo’ yite mitu gari dawaro qoltino.” Ikkollana tini Yihowa Farciꞌraasine “gowwoota” ikkitukkinni mittimmatenni sabbakkanni noore ikkitinota leellishshannote; qoleno addu Kiristaani tenne assa hasiissannonsa. (1 Qor. 1:10) Yihowa Mangiste Egensiissannota Agarooshshu Shae yinanni metseeteti qara sokka Maganu Gashshooteeti; insa tenne sokka dudubbanni no. Tenne metseete 254 afiinni qixxeessine mitte mittenta ittime mereerimunni 59 miliyoone meddi yitannota attammanni; alamete aana tenne metseete geeshsha halashshine attammanniti wole metseete dino.

7. Suꞌmu Kiristinni marooti Yesuusi sabbakke yiino sokka sabbakkanni nookkita mayinni anfeemmo?

⁷ Xaa yannara suꞌmu Kiristinni marooti Maganu Gashshooti daafira disabbakkanno. Tenne assituro nafa, Maganu Gashshooti mittu Kiristaanchi wodani giddo noo hedooti yite rosiissanno. (Luq. 17:21) Qoleno insa mannu Maganu Gashshooti Yesuusi Kiristoosi Moohinoha iimi gashshoote ikkinota, mannu ooso qarra baala tirannotanna muli yanna giddo uullate aaninni bunshe baala feye hoolannota huwatanno gede dikaaꞌlitanno. (Aju. 19:11-21) Hatteentenni, Yesuusa qaaga baxxannohu Gannunna Faasiku ayyaaniraati. Insa Yesuusi uullate aana Moote ikke assannore affinoha dilawanno. Hiittenne sokka sabbaka hasiissannoro affinokkihura, sabbankanni gede assannori maa ikka hasiissannoro afa hoogansa dhagge assiꞌnannita diꞌꞌikkitino.

SABBANKANNI GEDE KAKKAYISANNORI MAA IKKA HASIISSANNOSI?

8. Sabbakate looso loonsanni yannara hiittenne gara ikkitinokki hedo hooꞌla hasiissanno?

⁸ Sabbakate looso loonsanni gede kakkayisannori maa ikka hasiissannosi? Tenne assinannihu woxe gamba assiꞌrate woy hoola yinoonni mine miꞌnate hende ikka dihasiissanno. Yesuusi rosaanosira “calla adhitinoonnire calla uuyye” yiino. (Mat. 10:8) Maganu Qaale daddaꞌla dihasiissanno. (2 Qor. 2:17) Maganu Gashshooti sokka sabbakkannori assitannorira mitore baantansara agadha dihasiissannonsa. (Soqqamaasinete Looso 20:33-35 nabbawi.) Roore beetekiristaanna tenne xabbe leeltanno hajajo affanni heedhe woxe gamba assate uffi qocci yitanni konne looso habbino. Qoleno qeesootinsaranna wole loosaasinensara woxe baaxxa hasiissannonsa. Roore wote suꞌmu Kiristinni marooti hoqqino dureeyyeeti.—Aju. 17:4, 5.

9. Yihowa Farciꞌraasine sabbakate looso loossannohu gara ikkitino hedonni ikkinota leellishshinohu hiittoonniiti?

⁹ Yihowa Farciꞌraasine woxe gamba assidhannoni? Insa loossanno loosira woxe afidhannohu meessi fajjonni fushshinanni fushshonniiti. (2 Qor. 9:7) Mangistete Addaraashewa woy jajjabba gambooshshuwawa mutsuwaate gamba diassidhanno. Ikkirono, Yihowa Farciꞌraasine sai diro calla dancha duduwo dudubbanni 2 biliyoone meddi yitanno saate sayissino; hattono aganu kiiro honse miliyoone saꞌannota Qullaawu Maxaafi xiinxallo woxe baantinsakkinni xiinxallissino. Insa konne looso loossannohu woxe baantinsakkinni calla ikkikkinni hagiirrunni uminsa woce dandiiteeti; tini dhagge ikkitannote. Mittu xiinxallaanchi Yihowa Farciꞌraasine loosi daafira coyiꞌranni togo yiino: “Qara mixonsa sabbakatenna rosiisate. . . . Insara qeesootu dino; tini qolte fulanno woxi ajanno gede assitanno.” Ikkina, konne looso loonseemmo gede kakkayisannonkeri maati? Haranchunni konne looso uminke fajjonni loonseemmohu Yihowanna manna baala banxeemmohuraati. Konni garinni uminke fajjonni loosa Faarso 110:3 aana noo masaalo woꞌmitanno gede assitanno. (Qummeeshsha nabbawi.)

SABBAKATE HIIKKURI DOOGGA HOROONSIꞌRA HASIISSANNO?

10. Yesuusinna rosaanosi sabbakate hiikkuri doogga horoonsidhino?

¹⁰ Yesuusinna rosaanosi dancha duduwo duduwate hiikkuri doogga horoonsidhino? Insa mannu noowa baalawa lawishshaho gudumaalenna minunni mine hadhino. Sabbakate looso loonsanni yannara, minunni mine haꞌne sokka hasiissannonsa manna hasa hasiissanno. (Mat. 10:11; Luq. 8:1; Soq. 5:42; 20:20) Insa tenne hayyo horoonsidhe sabbakansa mallaaddukkinni sabbakkanno gede assitinonsa.

11, 12. Yihowa daga dancha duduwo dudubbanno doogo suꞌmu Kiristinni tenne assate sharrantanno sharro ledo heewisiisa dandiinannihu hiittoonniiti?

¹¹ Tenne lainohunni suꞌmu Kiristinni beetekiristaanna maa assitanno? Roore anga beetekiristaanete miilla sabbakate looso woxe baantanninsa qeesootira mulaagissanno. Suꞌmu Kiristinni qeesooti ‘manna woshshaaddannore’ ikka agurte woshshaade amaxxino “qulxuꞌmicho” calla agadhanno mancho labbanno. Mitu qeesooti sabbakate woꞌnaaltannoha ikkara dandaanno. Lawishshaho Phaaphaasichu Jooni Pooli Layinkihu 2001 M.D. balla borreessino sokka aana togo yiino: “Lowo diro haaro wongeelu looso loonsanni gede hige hige coyiꞌranni keeshshoommo. Xaano ledo coyiꞌreemmo. . . . Biꞌrenke gede ‘dancha duduwo kula hoogummoro anera bayisibao’ yee laalaate coyiꞌrinohu Phaawuloosite gedee hedo heedhannonke gede assiꞌra hasiissannonke.” Kuni phaaphaasichi lede kuni loosi “‘baxxino qajeelsha qajeeltinorira’ calla tunge agurranniha ikkikkinni Maganu Manni baalu konne looso loosa hasiissannonsa” yiino. Ikkollana tenne gari manni dimacciishshino.

¹² Tenne lainohunni Yihowa Farciꞌraasine maa assitinoyya? Yesuusi 1914nni kayise Moote ikke gashshanni noota dudubbanni noori insa callaati. Yesuusi hajajinonte gede insa sabbakate looso shotu coyi gede assite dilaꞌanno. (Maq. 13:10) Mittu maxaafi togo yiino: “Yihowa Farciꞌraasine baalunkurinni roorsite sabbakate loosi aana illachishshanno.” Konni maxaafi borreessaanchi mittu Yihowa Farciꞌraasinchi coyiꞌrinore kulanni lede togo yiino: “Insa hudiꞌrino, qarraminonna dhiwamino manna kaaꞌlitannoha ikkirono, . . . qaru loosinsa daa rahinohu alamete goofimarchi daafiranna gato afiꞌrate maa assa hasiissannoro ayyaanaamittete sokka kula ikkinota dideꞌanno.” Yihowa Farciꞌraasine Yesuusinna rosaanosi horoonsidhino doogga harunsite tenne sokka duduwansa diagurtanno.

KONNI LOOSI HALAꞌLINYINNA LOONSANNI YANNA MAGEESHSHITA IKKA HASIISSANNOSE?

13. Sabbakate loosi mageeshsha halaꞌla hasiissannosi?

¹³ Yesuusi danchu duduwi mageeshshi geeshsha halaꞌlannoro kulanni “gobba baalate” sabbakamannota coyiꞌrino. (Mat. 24:14) Qoleno ‘gosa baala rosaano assa’ hasiissanno. (Mat. 28:19, 20) Kuni alame woꞌmate loonsanni loosooti.

14, 15. Yihowa Farciꞌraasine Yesuusi sabbakate loosi halaꞌlinyi daafira masaalino masaalo woꞌmitanno gede assitanni noota leellishannori maati? (Hanafote noo misilla lai.)

¹⁴ Yihowa Farciꞌraasine sabbakate loosi halaꞌlinyi daafira Yesuusi masaalino masaalo woꞌmitanno gede assitinohu hiittoonniitiro afate hanni mito coye laꞌno. Ameerikaho, babbaxxitinote Kiristinnu ammaꞌno giddo 600,000 meddi yitannori qeesete goowa ikkitinori no; hatte gobbankura mite 1,200,000 ikkitannoti Yihowa Farciꞌraasine no. Alamete doyichora Roomunnite Kaatolikete Beetekiristaanera 400,000 saꞌe yitannokki qeesooti no. Hanni Qullaawu Maxaafi aana xintantino sokka sabbakkannote Yihowa Farciꞌraasine kiiro hedi. Alamete doyichora mite sette miliyoone ikkitanno soqqamaano uminsa fajjonni 240 gobbuwara soqqantanni no. Insa dhagge ikkanno looso loossanni no; kuni loosi Yihowara guweenyanna ayirrinye abbanno!—Far. 34:1; 51:15.

¹⁵ Yihowa Farciꞌraasine ikkinoommohura goofimarchu daara albaanni dandaaminke deerrinni dancha duduwo batinyu mannira kula hasiꞌneemmo. Konnira, Qullaawu Maxaafi aana xintantino borro tiratenna qixxeessate baxxino looso loonsanni heeꞌnoonni. Lowo miliyoone ikkitanno metseetta, tiraaktuwa, jajjabbu gambooshshinna Qaagooshshu Ayyaanita koyishshu woraqatta mulla tuqinsanni keeshshinoonni. Babbaxxitino borruwa 700 saꞌꞌanno afiinni qixxeessinanni heeꞌnoonni. Qullaawa Borrota Haaro Alame Tiro 200 miliyoone saꞌannota 130 saꞌꞌanno afiinni qixxeessinoonni. Sai diro calla, 4.5 biliyoone meddi yitannota Qullaawu Maxaafi aana xintantino borruwa qixxeessinoonni. Higge affino webisayitenke 750 saꞌꞌanno afiinni qixxaabbino. Togoo looso loossanni nooti wole ammaꞌnote gaamo mama no?

16. Yihowa Farciꞌraasinera Maganu ayyaani noonsata mayinni anfeemmo?

¹⁶ Masaalotenni kulloonniha sabbakate looso mamooti geeshsha loosa hasiissanno? Yesuusi kuni alamete doyichora loosamanno loosi goofimarchu barruwa geeshsha sabbakamannotanna hakkiinnino ‘goofimarchu daannota’ coyiꞌrino. Tenne goofimarchu barruwara dancha duduwo dudubbanni nooti wole ammaꞌnote gaamo nooni? Soqqammeemmo yannara xaandeemmo manni giddo mitu “qullaawu ayyaani noonkeri ninkeeti; looso loossinanni heedhinoonniri kayinni kiꞌneeti” yaara dandaanno. Kayinni konne looso agurrummokkinni loonsanni keeshshanke Maganu ayyaani noonketa leellishshannota diꞌꞌikkitino? (Soq. 1:8; 1 Phe. 4:14) Mite ammaꞌnote gaamo Yihowa Farciꞌraasine ganyite loossannoha sabbakate looso loosate woꞌnaaltino; ikkollana duucha wote coyi heddino gede diꞌꞌikkinonsa. Wolootu qolte boode yanna misiyoone ikkite sabbakate woꞌnaaltannoha ikkirono agurte albinsa heeshshowa higganno. Mitootu wole agurina minunni mine hadhe sabbakate woꞌnaaltino; kayinni mayi daafira sabbakkanno? Tenne xaꞌmo dawaro insa Kiristoosi hanafino looso loossanni nookkita buuxissanno.

XAA YANNARA ADDINTA DANCHA DUDUWO DUDUBBANNI NOORI AYEOOTI?

17, 18. (a) Xaa yannara Maganu Gashshootiha dancha duduwo dudubbanni noori Yihowa Farciꞌraasineeti yineemmohu mayiraati? (b) Konne looso agurrummokki loosa dandiinoommohu hiittoonniiti?

¹⁷ Ikkina xaa yannara addinta Maganu Gashshootiha dancha duduwo dudubbanni noori ayeooti? Hilireno huluullammummokkinni “Yihowa Farciꞌraasineeti!” yine coyiꞌra dandiineemmo. Togo yineemmohu mayiraati? Korkaatuno, Yesuusi sabbakke yiino sokka yaano Maganu Gashshootiha dancha duduwo dudumbanni heeꞌnoommo. Mannunniwa haꞌne gara ikkitino doogga horoonsiꞌne sabbankanni heeꞌnoommo. Sabbankeemmo gede kakkayisannonkehu baxilleho ikkinnina woxe afiꞌrate yine diꞌꞌikkino. Sabbakate loosonke lowo geeshsha halashshine gobba gosatenna addi addi afoo coyiꞌranno mannira sabbankanni heeꞌnoommo. Qoleno konne looso goofimarchu daa geeshsha diinaggaambe loonseemmo.

¹⁸ Tenne heeꞌnoommote goofimarchu barruwara Maganu manni dhagge ikkanno looso loosanni no. Ikkina konne baala coye assa dandiinohu hiittoonniiti? Hawaariya Phaawuloosi Filiphisiyusi mannira borreessino sokka aana tenne xaꞌmora dawaro ikkannore coyiꞌranni togo yiino: “Hatto assitinannihu, dancha hedosi daafira, heddinannireno ikko assitinannire kiꞌne giddo loosannohu Magano ikkinohuraati.” (Fil. 2:13) Konnira baxillaanchu Anninke aannonke wolqanni dandiinummore baala assine soqqanshonke woꞌmunni woꞌma soqqama agurroonke.—2 Xim. 4:5.