AANIIDI QOOLIHA COYI UMO | IIMIRE XAWISSANNO AJUUJA
Ayyaanaame Alamera Heedhannori Ayeooti?
Ati ayyaanaame alamerenna hakko heedhannori daafira hedde egennootto? Hatto ikkiro, togo yite hedattohu ate calla diꞌꞌikkootto. Lowo diro, mannu tenne hajo daafira babbaxxinore yaanni keeshshino. Mitu manni ayyaanaame alame, ayirrisa hasiissannohu biꞌree manni heeꞌrannowaati yaanno. Wolu manni kayinni ayyaanaame alame, sokkaanonna reyinohu danchu manni haꞌre heeꞌrannote hagiirru woꞌmino baseeti woy iimaati yaanno. Ayyaanaame alame lowo miliyoone ikkitanno maganna qae assidhe heedhanno base lawannonsa mannino no.
Hakkiinni saeno, batinyu manni ayyaanaame alamere kulannonkehu iimira haꞌre dayinohu nookkihura, tenne hajo daafira tenne teꞌe yaa didandiinanni yee heewisamanno. Ikkollana, togo yee heda digaraho. Korkaatuno, Yesuusi Kiristoosi uullara daara albaanni iima ayyaanaame alamera heeꞌrino. Isi umi xibbi dirite ammaꞌnote sooreeyyera tenne xawise coyiꞌrino; togo yiino: “Ani gordunni dayoommohu, soyinoehu hedinore wonshammoraati ikkinnina, umiꞌya hedo wonshate diꞌꞌikkino.” Konni daafira, Yesuusi soqqamaasinesira, “Anniꞌya mine lowo dargi no” yii wote, isi hakko laꞌe dayinore coyiꞌranni no.—Yohaannisi 6:38; 14:2.
Yesuusi Anni Maganoho; suꞌmisi Yihowaati; Yihowa ‘mini’ woy heeꞌranno bayichi iimaati. (Faarso 83:18, NW) Konni daafira, Maganu Yihowanna Yesuusi Kiristoosi geeshsha ayyaanaame alamere xawisa dandaannohu horo dino. Insa ammanamino mannira leellishshinote dhagge ikkitanno ajuuja widoonni, ayyaanaame alamere lowore kultinonke.
Aananno birxichira, babbaxxitino ajuuja kulannoha mito Qullaawu Maxaafi gafa laꞌneemmo. Tenne ajuuja nabbawatto wote, ayyaanaame alame kisa woy laꞌꞌa dandiinannirichi heeꞌranno base ikkitinokkita deꞌooti. Maganu ayyaanaame alamenna hakko heedhannore ayyaanu kalaqo calla huwattanno garinni kula agure, ninkera huwatate kaaꞌlannonke garinni addi addi ajuujanni xawisino. Tini babbaxxitino ajuuja, ‘lowo darga’ yinite ayyaanaame alamera heedhannori ayeootiro huwanteemmo gede kaaꞌlitannonke.