Nabbawaano Xaꞌmitanno Xaꞌmo

Hiziqeeli ajuujatenni lainohu borreessinanniricho amadino manchinna olu uduunne amadinohu lewu manni maa riqiwanno?

Kuni manni hunda Yerusaalamete katama huntutanna albillitte Armagedooni olinni Sheexaanunnita busha alame huntannota iimi olanto riqiwanno. Kuni biddi assinoonni xawishshi garaho yineemmohu mayiraati?

Hiziqeeli 607 K.A. kaadaancho Yerusaalame baꞌara albaanni katamu giddo mannu bushare assanna laihu gedensaanni Yerusaalamete katama baonniwa qolte massitanno ikkito leellishshanno ajuuja laino. Isi lewu manni olu uduunne amade heeꞌreenna laino. Qoleno, insa ledo “shaalado uddano” uddiriꞌnohanna “borreessinanniricho” adhe noo mancho laino. (Hiz. 8:6-12; 9:2, 3) Konni manchira togo yinoonnisi: “Yerusaalamete katami baalaho kawanna kaꞌa higge haꞌrami. Katamaho assinoonnihu tiyyiꞌnanni coyinni kainohunni, lowo geeshsha yaade dadillanni noo manni albi aana malaate wori.” Hakkiinni, olu uduunne amade noohu lewu mannira, katamu giddo nooha albinsara malaate worroonnikki manna shitanno gede kulloonninsa. (Hiz. 9:4-7) Tini ajuuja maa rosiissannonke? Borreessinanniricho adhe noo manchi aye riqiwanno?

Tenne masaalo masaalloonnihu 612 K.A.; tini masaalo umo woꞌmitinohu ontu diri gedensaanni Baabiloonete wottaaddari Yerusaalamete katama huni yannaraati. Yihowa iso magansiꞌrannokkihu Baabiloonete manni Yerusaalamete katama hunara fajjinonsaha ikkirono, insa hatte yannara isi murinoti reyote yoo woꞌmitanno gede assitanni no. (Erm. 25:9, 15-18) Kuni ikkinohu Yihowa kaadaasine manna qorichisha hasiꞌrinohuraati. Ikkollana, isi manna gari garimmo laikkinni digudino. Keeraano bushuullu ledo dihunino. Yihowa baxillunni kae, katamu giddo loonsannihu tiyyiꞌnanni coyiꞌra karsantinokki Yihudooti gattanno qixxaawo qixxeessino.

Hiziqeeli mannu albira malaate worate woy Yerusaalamete katama hunate dikarsamino. Reyote yoo woꞌmitanno gede assitannori sokkaanote. Konnira, tini masaalo iima ikkannore illete leellannokkiricho afate kaaꞌlitannonke. Yihowa, sokkaano bushuullu baꞌanno gede assitara calla ikkikkinni, keeraano gato afidhanno gede insa baddara hajajinonsa.a

Bashsho tini ajuuja yannankera woꞌmitanno gara lainohunni, borreessinanniricho angasira adhe noo manchi uullate aana gate nooha buuramino Kiristaana riqiwanno yine hendanni keeshshinoommo. Qoleno, kullanninsa halaale macciishshanno manni gatote malaate adhinohu gede assine hendanni keeshshinoommo. Ikkollana, muli diri kawa konne xawishsha biddi assa hasiissannota huwantoommo. Maatewoosi 25:31-33 yitanno garinni, manna geꞌreewoho woy meꞌꞌeho yee yoo yaannohu Yesuusaati. Isi jeefote yoo yaannohu bayiru qarri yannaraati; tenne yannara gato afiꞌrannoha geꞌreewu gedee manna, baꞌꞌannohu meu gedee manniwiinni badanno.

Tenne biddi assinoonni hedo garinni Hiziqeeli ajuujanni maa ronseemmo? Ajayi ajeenna onte coye ronseemmo; insano:

1.  Hiziqeeli Ermiyaasi ledo, Isayaasi gede Yerusaalame baꞌara albaanni agaraancho ikke soqqamino. Yannankera, Yihowa mannasi itisatenna bayiru qarri daara albanni manna qorowisiisate shiima isita buurantinota soqqamaanote gaamo horoonsiꞌranni no. Qoleno, Kiristoosi mini wido ikkitinori baalu konni loosira kaaꞌlantanni no.—Mat. 24:45-47.

2.  Hiziqeeli gato afiꞌranno manna malaatisate dikarsamino; xaa yannara Maganu soqqamaasineno tenne diassitanno.Hatteentenni, insa Yihowa sokka dudubbanno; tenne sabbakate loosi wido ikkitino sokka dudubbannohu sokkaanote ledo kaaꞌlanteeti.—Aju. 14:6.

3.  Hiziqeeli yannara, albisira illete leellanno malaate worroonni manchi dino. Xaa yannarano albisira illete leellanno malaate worranni manchi diheeꞌranno. Ikkina, mannu gato afiꞌranno gede lawishshu yaattonni malaate worranninsa gede maa assa hasiissannonsa? Sabbankanni heeꞌnoonniha dancha duduwo macciishsha, Kiristaanu akatta lossiꞌra, insaneeto Yihowara sayise aanna ammaname Yesuusi roduuwa irkisa hasiissannonsa. (Mat. 25:35-40) Tenne assitannori bayiru qarri yannara gatote malaate adhitanno.

4.  Borreessinanniricho angasira adhe noo manchi, gato afiꞌranno manna malaatisannoha Yesuusi Kiristoosi riqiwanno. Lowo manni wido ikkitinori, bayiru qarri yannara geꞌreewu gede assine yoo yinanninsa wote gatote malaate adhitanno. Kuni malaati uullate aana hegere heeshsho afidhanno gede assannonsa.—Mat. 25:34, 46.b

5.  Yannankera, tenne ajuuja giddo kulloonnihu olu uduunne adhinohu lewu manni Yesuusi massagannota iimi olanto riqiwanno. Insa muli yanna giddo mannanna bunshe baala huntanno.—Hiz. 9:2, 6, 7; Aju. 19:11-21.

Konne kaajja roso huwatanke Yihowa keeraano bushuullu ledo hunannokkita huluullammeemmokki gede kaaꞌlitannonke. (2 Phe. 2:9; 3:9) Qoleno kuni rosi sabbakate loosi lowo geeshsha hasiisannoha ikkinota huwatate kaaꞌlannonke. Mittu mittunku manchi goofimarchu daara albaanni qorowishsha macciishsha hasiissannosi!—Mat. 24:14.