Yihowa Maganinke Mitto Yihowaati

1, 2. (a) Marro 6:4 aana noo qaalla egennantinota ikkitinohu hiittoonniiti? (b) Muse tenne qaalla coyiꞌrinohu mayiraati?

YIHUDU ammaꞌno harunsanno manni lowo diro, Marro 6:4 aana noota Ibirayisxete Afiinni borreessinoonnita lee qaalla, baxxitino huuccatto huucciꞌranno yannara horoonsiꞌranno. Insa tenne huuccatto barru baala soodonna hawarro assiꞌranno. Tenne huuccatto Shima yinanni; Shima yaanno qaali konni qummeeshshi giddo hanafote noo qaaleeti. Ammanaminohu Yihudu manni Maganoho gala hasiꞌrannota leellishate tenne huuccatto assiꞌranno.

² Tini, Muse 1473 K.A. Moaabi xawira gamba yiinohu Israeelete mannira coyiꞌrinote jeefote qaallaati. Hatte yannara, Israeelete daga Hexxote Gobba ragiꞌrate Yordaanosi laga tayisse saꞌara rakke no. (Mar. 6:1) Insa 40 diro massaganni keeshshinohu Muse tuncu yaannonsa qarra tayisse saꞌꞌate jawaata ikkitara hasiꞌrino. Insa Yihowa addaxxanna Maganonsa ikkinohura isira ammanama hasiissinonsa. Muse jeefote coyiꞌrinoti tini qaalla Israeelete manni tenne assanno gede kaaꞌlitinonsati dihuluullissannote. Muse, Yihowa mannisira uyinota Tonne Hajajonna wole biddishshuwa qummi assihu gedensaanni, Marro 6:4, 5 aana noota tenne lowo sokka amaddino qaalla coyiꞌrino. (Qummeeshsha nabbawi.)

3. Konni birxichira hiikkuri xaꞌmuwara dawaro afiꞌneemmo?

³ Muse ledo hakko gamba yiinohu Israeelete manni Maganinsa Kaaliiqi “mitto Kaaliiqa” ikkinota diafino? Afinoti egennantinote. Ammanantino Israeele mitto Magano yaanno annuwansa Abirihaami, Yisihaaqinna Yaiqoobi Magano egentino; qoleno iso calla magansidhanno. Hatto ikkina, Muse insara Maganinsa Kaaliiqi “mitto Kaaliiqa” ikkinota kulinonsahu mayiraatiyya? Yihowa mitto ikkasi kiiro 5te aana qummi assinoonninte gede iso woꞌmu wodaninni, woꞌma lubbonninna woꞌma wolqanni baxate ledo xaado afidhinoni? Marro 6:4, 5 aana qummi assinoonni qaalla xaa yannara ninkera mayi tiro afidhino?

MAGANINKE MITTO YIHOWAATI

4, 5. (a) Kaaꞌliiqi ‘mitto Kaaliiqaati’ yaa mayyaate? (b) Yihowa wole daga magannawiinni baxxinohu hiittoonniiti?

⁴ Isi Baxxinoho. “Mitto” yaanno qaali Ibirayisxetenna wolu batinyu afiinni kiiro kulatenni saꞌino tiro afiꞌrino. Kuni qaali baxxinoha, mittonna callicho yitanno tirono afiꞌrino. Muse konne qaale horoonsiꞌrinohu sillaase rosi gara ikkinokkita kulate diꞌꞌikkino. Yihowa iimanna uulla Kalaqinoho, hattono kalqete alame baalantera Aliidiho. Iso agurranna wolu halaalaanchu Magani dino; qoleno isi gedeehu wolu magani dino. (2 Sam. 7:22) Konnira, Muse Isiraeelete manni Yihowa calla magansiꞌra hasiissannonsata qaagiissinonsa. Insa qooxeessinsara heeꞌrannohu babbaxxitinota labbaahanna meya maganna magansiꞌranno manni faale haꞌra dihasiissannonsa. Kuri maganna giddo gama, mitu kalaqami wolqa illaallisa dandiitannohu gede assine laꞌnanni. Qoleno tenne maganna wido ikkitinokkiti wole magannano no.

⁵ Lawishshaho, Gibitsete manni alba, Ra yinanniha arrishshote magano, Naati yinannita gordu magancho, Geebi yinanniha uullate magano, Hapi yinanniha Nayili magano, hattono batinye saada qullaawa asse magansiꞌranno. Yihowa kuri kaphu maganna giddo batinye tonnu qoomaminni irraabbanno gede assino. Kanaani manni magansiꞌrannohu qaru magani sirote magano ikkinoho Baaliiti; qoleno isi gordu, xeenunna hambabalattete magano ikkinohu gede assine laꞌnanni. Baali, mannu batinye bayicho kaaꞌlannonke yee addaxxanno maganooti. (Kir. 25:3) Israeele halaalaanchu Maganinsa mitto Yihowa ikkinota qaaga hasiissinonsa.—Mar. 4:35, 39.

6, 7. “Mitto” yaanno qaali wole mayi tiro afiꞌrino? Yihowa “mitto” ikkinota leellishinohu hiittoonniiti?

⁶ Isi Soorramannokkihonna Ammanaminoho. “Mitto” yaanno qaali hedotenna assinannirinni mitto ikkano xawisanno. Maganu Yihowa babbaxxinoha woy soorramannoha diꞌꞌikkino. Hatteentenni, isi ayewoteno ammanaminoho, soorramannokkihonna halaalaanchoho. Isi Abirihaamira sirchisi Hexxote Gobba ragiꞌrannota kule qaale eino; qoleno isi konne eino qaale wonshate bayira coye assino. Yihowa konne qaale coyiꞌrihunni 430 diri saihu gedensaanni nafa hedosi disoorrino.—Kal. 12:1, 2, 7; Ful. 12:40, 41.

⁷ Yannate gedensaanni, Yihowa Israeele farciꞌraasinesi asse doodhi yannara togo yiino: “Ane agurranna kunni albaanni wolu magani dino; kunni kaꞌano diheeꞌranno. Yihowa hedosi soorrannokkita kulanni lede togo yiino: “Ani biꞌre hundanni Maganoho.” (Isa. 43:10, 13; 44:6; 48:12) Israeeleteno ninkerano horo soorramannokkinna ayewoteno ammanamino Magani Yihowa soqqamaasine ikkanke kaajja qoossooti!—Mil. 3:6; Yai. 1:17.

8, 9. (a) Yihowa iso magansiꞌranno manni maa assara hasiꞌranno? (b) Yesuusi Muse coyiꞌrinori lowo geeshsha hasiisannoha ikkinota luphi assinohu hiittoonniiti?

⁸ Muse Israeelete dagara, Yihowa ayewoteno baxannonsatanna towaatannonsata qaagiissinonsa. Hakko daafira, Yihowa insa iso calla magansidhara, umonsa qooffattukkinni iso woꞌmu wodaninsanni, woꞌma lubbonsanninna woꞌma wolqansanni baxxara hasiꞌrasi garaho. Hatte yannara annuwunna amuuwu oosonsa afiꞌri faro baalantenni rosiisanno gede kulloonninsa; hakko daafira oosonsa Yihowa calla magansidhannore ikkitanno.—Mar. 6:6-9.

⁹ Yihowa hedonna fajjo soorrantannokkita ikkitinohura, isi xaa yannara noohu halaalaancho Magano magansiꞌranno mannino assara hasiꞌranno coyi disoorramino. Yihowa hagiirsiisanno garinni magansiꞌrate, iso calla magansiꞌranna iso woꞌmu wodaninkenni, woꞌma lubbonkenninna woꞌma wolqankenni baxa hasiissannonke. Yesuusino tenne assa hasiissannota kulino. (Maarqoosi 12:28-31 nabbawi.) Hanni assineemmo assootinni ‘Maganinke Kaaliiqi mitto Kaaliiqa’ ikkinota addinta huwantoommota leellisha dandiineemmo gara laꞌno.

YIHOWA CALLA MAGANSIDHE

10, 11. (a) Yihowa calla magansiꞌneemmota leellisha dandiineemmohu hiittoonniiti? (b) Baabiloonete heeꞌrinohu Ibiraawete wedelli Yihowa calla magansiꞌrannota leellishinohu hiittoonniiti?

¹⁰ Yihowa mittonna callicho Maganonke ikkinota leellishate iso calla magansiꞌra hasiissannonke. Wole maganna magansiꞌra woy magansiꞌranke lase kaphu rosi woy assooti daara wodha dihasiissannonke. Qoleno, Yihowa wole maganna giddo mittu gede assine hedanna wole maganna ledo taashshine isi rooriidiho woy wolqaataamoho yaa nafa dihasiissannonke. Magansiꞌra hasiissannohu Yihowa callaati.—Yohaannis Ajuuja 4:11 nabbawi.

¹¹ Daanieeli maxaafi giddo Ibiraawootu wedelli yaano Daanieeli, Hanaaniya, Mishaeelinna Azaariyaasi daafira kultanno dhagge no. Insa Yihowa calla magansidhannota leellishshinohu battaabbino sagale ita gibbe calla ikkikkinni, Naabukadanatsoori culkunni seekkino misilera kumbuula gibbeeti. Insa Yihowa balaxisiissino; qoleno iso calla magansidhannota leellishshino.—Dan. 1:1–3:30.

12. Yihowa calla magansiꞌrate qoropha hasiissannonkeri maati?

¹² Yihowa calla magansiꞌrate, heeshshonke giddo mittu coyino isira calla aa hasiissannonkere wolurira uyineemmo woy beenkeemmo gede assankera wodha dihasiissannonke. Hakku coyi maa ikkara dandaanno? Yihowa, Tonne Hajajo giddo mannisira iso agurranna wole maganna heedhannonsakkinna kaphu maganna magansidhannokki gede xawise kulinonsa. (Mar. 5:6-10) Xaa yannara, addi addi coyi kaphu maganna ikkara dandaanno; kuri giddo mitu xawe leella hoogara dandaanno. Yihowa ninke assinammora hasiꞌranno coyi kayinni disoorramino; isi xaano mitto Yihowaati. Hanni Yihowa mitto ikkasi ninkera maa rosiissannonkero laꞌno.

13. Yihowa calla magansiꞌneemokki gede assara dandaannori maati?

¹³ Qolasiyaasi Sokka 3:5, aana Kiristaanu Yihowa calla magansiꞌrannokki gede assara dandaannore kulle kaajjinshe amaalloonni. (Qummeeshsha nabbawi.) Konni qummeeshshi giddo busha halcho kaphu maganna magansiꞌrate ledo taashshinoonni. Korkaatuno, dureessa ikkate woy qawaaxxote uduunne woy wolere afiꞌra quwa saꞌne hasiꞌneemmoha ikkiro, tini heeshshonke giddo magano ikkitankera dandiitanno. Konne qummeeshsha gudinse nabbambummoro, hakkiicho qummi assinoonnihu wolu cubbu assooti, busha halchonna kaphu maganna magansiꞌrate ledo xaado afiꞌrinota huwanteemmo. Aleenni qummi assini coyibba afiꞌrate noonke halcho, Magano agurre insa banxeemmo gede assitankera dandiitanno. Tini coyibba saarte amaddenke Maganinke Yihowa mitto Yihowa ikkannonkekki gede assitankera wodha hasiꞌneemmoni? Horo dihasiꞌneemmo.

14. Soqqamaasinchu Yohaannisi mayyee qorowisiisino?

¹⁴ Soqqamaasinchu Yohaannisino mittu manchi alamete aana noore lawishshaho, ‘maalu yorto, illete halchishannorenna jiro’ kule naaxxa baxannoha ikkiro “Annu baxilli giddosi dino” yee qorowisiisino. (1 Yoh. 2:15, 16) Konnira, wodaninke alamete boohaarshinni, hoshshanni, hattono alame uddidhannonna seessanno garinni doogamanni nooronna teꞌee afate ganyine layiꞌra hasiissannonke. Alamete noonke baxilli “bayira coye” afiꞌrate yine kaffi yiino roso ronseemmonna wolere assineemmo gede assankera dandaanno. (Erm. 45:4, 5, NW) Qaale eꞌnoonninketa haaro alame eate shinqe heeꞌnoommo. Konnira, Muse coyiꞌrinota lowo sokka amaddino qaalla qaaganke lowo geeshsha hasiissannote! Maganinke ‘Kaaliiqi mitto Kaaliiqa’ ikkinota seekkine anfummoronna ammannummoro iso calla magansiꞌratenna iso hagiirsiisanno garinni soqqamate dandiinummore baala assineemmo.—Ibi. 12:28, 29.

KIRISTAANU MITTIMMAꞌNE BAꞌUKKINNI HEEDHE

15. Phaawuloosi Kiristaanaho Yihowa mitto Yihowa ikkinota qaagiissinohu mayiraati?

¹⁵ Yihowa mitto ikkasi hedotenninna akatunni mittoho yitanno tirono afidhino; ninkeno isira soqqammeemmo yannara tenne assa hasiissannonke. Umi xibbi dirite Kiristaanu songo giddo Yihudu, Girikete, Roomunna wole gobbanni dayino manni no. Insa alba addi addi ammaꞌno, budinna lao noonsareeti. Hakko daafira, insa giddo mitootaho haaro magansiꞌra ledo sumuu yee heeꞌranna alba assitannore facci asse agura qarra ikkitinonsa. Konnira, soqqaamaasinchu Phaawuloosi Kiristaanu Yihowa mitto Maganonsa assiꞌra hasiissannonsata qaagiissasi garaho.—1 Qorontoosi 8:5, 6 nabbawi.

16, 17. (a) Xaa yannara hiitti masaalo woꞌmitanni no? Tini maa abbitinoyya? (b) Mittimmanke hunara dandaanno coyi maati?

¹⁶ Xaa yannara nooti Kiristaanu songona? Himanaanchu Isayaasi “goofimarchu yannara” gosa baala gotti yitinote Yihowa magansiꞌrawa lolakkannota himanino. Insa togo yitannota himanino: “Kaaliiqi . . . hedinore kulannonke; ninkeno isi doogo hinge haꞌneemmo.” (Isa. 2:2, 3) Xaa yannara tini masaalo woꞌmitanna illenkenni laꞌꞌanke lowo geeshsha hagiirsiissannote! Songote giddo addi addi gosanninna budinni dayinohu, hattono addi addi afoo coyiꞌranno manni Yihowa guwisiꞌranni no. Ikkirono, qoropha hasiissanno coyi no.

¹⁷ Lawishshaho, ate budinni lowo geeshsha baxxino bude afiꞌrinohu ayyaanaamittete roduuwikki daafira mayi macciishshamannohe? Insa coyiꞌranno afii, uddiꞌranno gari, akatinsanna sagalensa ati rosoottota ikka hooggara dandiitanno. Insawa gambo gibbe ate bude afiꞌrinohu woy ati coyiꞌratto afoo coyiꞌranno manniwa calla aanatto? Woy songote, woradaho, woy sinu biirora alee higge laꞌara shoomantinori dirunni ate ajjannore woy budinsa woy gosansa atetewiinni baxxitinotalla ikkitu? Tini Yihowa manni mereero heeꞌra hasiissannose mittimma huntara wodhatto?

18, 19. (a) Efesooni Sokka 4:1-3 aana mayine amaalloonni? (b) Songote mittimma baꞌannokki gede maa assa dandiineemmo?

¹⁸ Mittimmanke hunanno coye hooꞌla dandiineemmohu hiittoonniiti? Dureessunna babbaxxino gari manni heeꞌranno Katama ikkinohu Efesooni noo Kiristaanira Phaawuloosi lowo geeshsha hasiissanno amaale uyino. (Efesooni Sokka 4:1-3 nabbawi.) Phaawuloosi balaxe mite akatta lawishshaho joongille, shaqqille, cincanna baxille qummi assinota deꞌooti. Kuri akatta minu toannokki gede irkisse amaddanno tuuqqa gedeeti. Mineho kaajjado tuuqqa heedhusirono gatamara hasiissanno; hatto assa hoongiro minu toara dandaanno. Phaawuloosi Efesooni Kiristaana ‘Maganu ayyaani mittimma’ baꞌannokki gede sharramara jawaachishinonsa.

¹⁹ Mitti mittinke songote mittimma baꞌukkinni heedhanno gede dandiinummore baala assate sharrama hasiissannonke. Tennera maa assa dandiineemmo? Umihunni, Phaawuloosi qummi assino akatta yaano joongille, shaqqille, cincanna baxille leellisha dandiineemmo. Qoleno, ‘Maganu keeri’ heeꞌranno gede assate sharrama hasiissannonke. Songote mittimma hunannori kalaqamanno yannara ranke kaꞌne hakkonne qarra hunate sharrama hasiissannonke. Tenne assineemmoha ikkiro, salaamenkenna mittimmanke baꞌannokki gede assineemmo.

20. Maganinke Yihowa mitto Yihowa ikkinota huwantoommota leellisha dandiineemmohu hiittoonniiti?

²⁰ Yihowa Maganinke Mitto Yihowaati. Tini kaajja yaattooti! Israeele Yihowa Maganinsa mitto Yihowa ikkinota qaagansa Hexxote Gobba eꞌe ragidhu yannara tuncu yiinonsa qarra dandee heeꞌrate kaaꞌlitinonsa. Ninkeno tenne qaalla qaaganke albillitte bayiru qarri yannara jawaante afiꞌneemmonna Gannatete giddo heeꞌneemmo heeshshora kaaꞌlitannonke. Yihowa woꞌma lubbonkenni banxenna soqqamme iso calla magansiꞌranna Kiristaanu mittimmanke baꞌannokki gede sharrama agurroonke. Tenne assanke agura hoongummoro, Yesuusi albillitte geꞌreewoho yine yoo yinanninsari daafira coyiꞌrinori woꞌmanna laꞌneemmo; isi togo yiino: “ Kiꞌne Anniꞌya maassiꞌrinoꞌneri! Amme! Alame kalaqantuhunni kayise qixxaawinoꞌneha Gordu Gashshoote ragidhe!”—Mat. 25:34.