Woloota Qajeelsa Hasiissannohu Mayiraati?

1, 2. Wolootu tiokiraasete looso loosa dandiitanno gede qajeelsa hasiissannonkehu mayiraati?

YESUUSI uullate aana noo waro loosinohu qaru loosi dancha duduwo duduwate loosooti. Ikkirono, isi Maganu hoshsha towaattannore, hattono rosaano assitannore qajeelsino. (Mat. 10:5-7) Filiphoosi wongeelu loosira diinaggaawannoha ikkirono, shoole seenne oososi Qullaawa Borro dancha gede asse rosiisanno gede asse qajeelsinoti dihuluullissannote. (Soq. 21:8, 9) Yannankerano woloota qajeelsa hasiissannohu mayiraati?

² Alame woꞌmate dancha duduwo macciishshanno manni kiiro lexxitanni no. Cuuaminokkihu haaruuddu manni Qullaawa Maxaafa uminsanni xiinxalla kaaꞌlitannonsa gara afa hasiissannonsa. Qoleno, dancha duduwo dudumbanninna halaale rosiinsanni gara rosa hasiissannonsa. Songonkera labballu roduuwi songote soqqamaanonna cimeeyye ikkitanno gede kaaꞌla hasiissanno. Gikki yiino Kiristaani ‘danchu rosinni’ haaruuddu ayyaanaamittetenni lophitanno gede kaaꞌla dandaanno.—Law. 4:2.

HAARUUDDU MAGANU QAALE XIINXALLITANNO GEDE KAAꞌLE

3, 4. (a) Phaawuloosi Qullaawa Borro xiinxalla soqqanshotenni dancha guma afiꞌrate ledo xaado afidhinota xawisinohu hiittoonniiti? (b) Qullaawu Maxaafi rosaanonke uminsanni Qullaawa Borro xiinxallitanno gede jawaachinshammora albaanni ninke uminke balanxe maa assa hasiissannonke?

³ Qullaawa Borro uminkenni xiinxalla lowo geeshsha hasiissannota ikkitinohu mayiraati? Soqqamaasinchu Phaawuloosi Qolasiyaasi heeꞌranno Kiristaanira coyiꞌrinorinni tenne xaꞌmora dawaro afiꞌneemmo. Isi togo yee sokka borreessinonsa: “Konne coye macciishshinummo barrinni kayinse, kiꞌnera ayyaanaame egennonninna buuxa baalatenni Maganu hedo afate egenno wonshannoꞌne gede huuccanna Magano xaꞌma diagurroommo. Qolleno, Mootichaho maltino heeshsho heedhinanni, baalunku coyinni dancha guma laaltinanninna Maganu egennonni lophitinanni woꞌmante doogonni hagiirsiissinannisi gede huuccatto assineemmoꞌne.” (Qol. 1:9, 10) Tini Maganu egenno Qolasiyaasi songora heeꞌranno Kiristaani Yihowa hagiirsiisate Isira “maltino heeshsho” heeꞌranno gede assitannonsa. Tenne assansa qolte “baalunku coyinni” hakko iso sabbakate loosinni ‘guma laaltanno’ gede kaaꞌlitannonsa. Yihowa soqqamaano soqqanshonsanni dancha guma afiꞌrate, Qullaawa Maxaafa ganyite xiinxalla hasiissannonsa. Qullaawa Maxaafa xiinxallinseemmo mannino tenne huwatanno gede kaaꞌla hasiissannonke.

⁴ Wolootu Qullaawa Maxaafa xiinxallite horo afidhanno gede kaaꞌlinammora albaanni, ninke uminke balanxe Qullaawa Maxaafa xiinxalla mayi horo afidhinoro huwata hasiissannonke. Isinni, ninke uminke Qullaawa Maxaafa xiinxalla rosicho assiꞌra hasiissannonke. Konnira ateneeto togo yite xaꞌma dandaatto: ‘Soqqansho fule heeꞌreenna mittu manchi Qullaawa Borro rosi ledo sumuu yaannokkire kule hedosi xawisiero woy kaajjado xaꞌmo xaꞌmiero, Qullaawa Maxaafa horoonsiꞌre dawaro qola dandeemmo? Yesuusi, Phaawuloosinna wolootu jawaatte soqqantino gara nabbaweemmo wote, tini Yihowara soqqameemmo soqqanshora kaaꞌlitannoe gara hiinceemmo? Ninke baalunku Maganu Qaalinni egennonna amaale afiꞌra hasiissannonke. Wolootaho Qullaawa Maxaafa uminkenni xiinxalline horo afiꞌnoommota kulleemmonsaha ikkiro, insano Qullaawa Borro jawaatte xiinxallite horo afidhanno gede jawaachinshanni heeꞌnoommo.

5. Haaruuddu Qullaawa Maxaafa uminsanni xiinxallitanno gede kaaꞌla dandaattohu hiittoonniitiro xawisi.

⁵ Ateneeto togo yite xaꞌma dandaatto: ‘Qullaawu Maxaafi rosaanoꞌya Qullaawa Borro ganyite xiinxallitanno gede qajeelsa dandeemmohu hiittoonniiti? Tenne assa dandaattoti mitte doogo, ate ledo xiinxallanno wotira qixxaawa dandaanno gara leellishsheeti. Qullaawu Maxaafi Addinta Mayyee Rosiisanno? yinanni maxaafi giddo noo guwuurshanna qummeeshshuwa nabbawanno gede kula dandaatto. Dancha gede qixxaawe gambooshshunniwa dawaro qola dandaanno gede kaaꞌlisi. Agarooshshu Shaenna Baqqi Yiiyye! yinanni metseettata mitte mittenta ittime nabbawanno gede jawaachishisi. Wochitawori Layibirerii, Agarooshshu Shaeti INTERNEETETE LAYIBIRERE woy Yihowa Farciꞌraasine Borro Xiinxallate Kaaꞌlitanno Biroshere isi coyiꞌranno afiinni qixxaabbinoha ikkiro, konne uduunnicho horoonsiꞌre Qullaawu Maxaafi xaꞌmora dawaro afiꞌranno gara leellishattosira dandaatto. Qullaawu Maxaafi rosaanchokki konni garinni kaaꞌlattosiha ikkiro, Maganu Qaale xiinxalle lowo geeshsha hagiidhannoti dihuluullissannote.

6. (a) Qullaawu Maxaafi rosaanchikki Maganu Qaalira noosi baxilli lexxanno gede kaaꞌla dandaattohu hiittoonniiti? (b) Mittu Qullaawu Maxaafi rosaanchi Maganu Qaalira noosi baxilli lexxiro maa assara dandaanno?

⁶ Mitto manchono Qullaawa Maxaafa nabbawannonna xiinxallanno gede giddeessa hasiissannonkekkiti egennantinote. Hatteentenni, Yihowa dirijjite qixxeessitino uduunnicho horoonsiꞌne Qullaawu Maxaafi rosaanonke Maganu Qaalira noonsa baxilli lexxanno gede assa hasiissannonke. Hatto ikkiro, suwashshu wodani noosihu Qullaawu Maxaafi rosaanchikkira faarsaanchu gedee hedo heedhannosi; isi togo yee faarsino: “Anera kayinni Maganunniwa gamba yaa woyyitannoe; . . . Mooticha Magano goloꞌya assiꞌroommo. (Far. 73:28) Qullaawu Maxaafi rosaanchinke jawaatanna rosanno roso naadannoha ikkiro, Yihowa ayyaani kaaꞌlannosi.

HAARUUDDU SABBAKANNA ROSIISA DANDIITANNO GEDE QAJEELSE

7. Yesuusi dancha duduwo duduwanno manna qajeelsinohu hiittoonniiti? (Hanafote noo misile lai.)

⁷ Maatewoosi fooliishsho 10 aana Yesuusi 12 soqqamaasinesira biddishsha uyinonsa. Isi baalankare mitteenni xaphi asse kula agure mitto mittonka coye bade kulinonsa.^[1] Soqqamaasinesi danchu garinni soqqama dandiinanni gara rosiisinsa yannara seekkite macciishshituhu gedensaanni soqqantara hadhino. Insa Yesuusi sabbakanno yannara horoonsiꞌranno hayyo laꞌꞌansa shiima yanna giddo Qullaawa Borro halaale dancha gede assite rosiissannore ikkitanno gede kaaꞌlitinonsa. (Mat. 11:1) Ninkeno Qullaawu Maxaafi rosaanonke worba Maganu Mangiste halashshaano ikkitanno gede qajeelsa dandiineemmo. Xa hanni insa kaaꞌla dandiineemmota lame doogga laꞌno.

8, 9. (a) Yesuusi soqqami yannara mannunniwa magarinni shiqino? (b) Haaruuddu halashshaano manna Yesuusi gede ikkite shiqqe hasaawisanno gede kaaꞌla dandiineemmohu hiittoonniiti?

⁸ Manna hasaawisa. Yesuusi duucha wote mannaho Maganu Mangiste daafira kulanno. Lawishshaho, Sikaari katami mule noote Yaiqoobi buicho qooxeessira mitte mancho ledo dancha hasaawa hasaawino. (Yoh. 4:5-30) Isi Leewi yinanniha qaraxaasincho Maatewoosi hasaawisino. Wongeelluwate giddo hakkonni hasaawi daafira garire borreessinoonnikkiha ikkirono, Maatewoosi koyinsoonnisi koyishsha adhe Yesuusi harunsaancho ikkino. Maatewoosinna wolu manni Maatewoosi minesi jila qixxeessi yannara Yesuusi coyiꞌranna macciishshitino.—Mat. 9:9; Luq. 5:27-39.

⁹ Wole yannarano, Yesuusi jaalu gede ikke shiqe Naatinaeeli hasaawisino; Naatinaeeli alba Naazireetete manni daafira gara ikkitinokki lao noosiho. Naatinaeeli kayinni gedensaanni hige hedosi biddi assiꞌrino. Isi Naaziretete Yesuusi rosiisannore lede rosate murciꞌre kaino. (Yoh. 1:46-51) Ninkeno haaruuddu halashshaano wolu manniwa jaalu gede ikkite shiqqe hasaawisa dandiitanno gede qajeelsa hasiissannonke.^[2] Suwashshu wodani noonsa manna awu afiinninna insara hendeemmota leellishanno garinni hasaawinseemmoha ikkiro halaale macciishshara dandaanno; haaruuddu tenne afansa lowo geeshsha hagiidhitanno gede assitansara dandiitanno.

10-12. (a) Yesuusi danchu duduwira hasatto noonsare hasattonsa lexxitanno gede assinohu hiittoonniiti? (b) Haaruuddu halashshaano Qullaawu Maxaafi halaale rosiisate dandoonsa woyyeessidhanno gede kaaꞌla dandiineemmohu hiittoonniiti?

¹⁰ Hasattonsa lexxitanno gede assa. Yesuusi uullate aana noo waro loosannohu lowo loosi noosi. Ikkirono, danchu duduwira hasatto noonsa mannira hasattonsa lexxitanno gede assino. Lawishshaho, isi baaru qaccera nooha lowo manna rosiisino. Hatte yannara, soqqamaasinchu Pheexiroosi maalaletenni lowo qulxuꞌme woshshaaxxanno gede assihu gedensaanni, “Kunni kaꞌa manna woshshaadattoha ikkatto” yiinosi. Yesuusi coyiꞌrinorinna assinori mayi guma abbiyya? Pheexiroosinna ledosi noori, “yowolonsa baaru qacce fushshituhu gedensaanni, woꞌmanka coye agurte Yesuusi hoode hadhu.”—Luq. 5:1-11.

¹¹ Sanihediriini shongo miila ikkinoha Niqoodimoosi Yesuusi rosiisanno rosi baasa baxisinosi. Isi roore rosara hasiꞌrinoha ikkirono, mannu Yesuusi ledo hasaawanna afiero mayyaannoe yee waajjino. Yesuusi mannaho injiitannonsa yannara hasaawisannohanna yannasi mararannokkiha ikkinohura, Niqoodimoosi hashsha mare rosiisinosi. (Yoh. 3:1, 2) Tenne xaggenni maa ronseemmo? Maganu Beetti wolootu ammana jawaachishate yanna gaaꞌmino. Ikkina, ninkeno hasatto noonsa manna galagalle marre xaꞌmatenna Qullaawa Maxaafa xiinxallisate sharrama dihasiissannonke?

¹² Haaruuddu halashshaano ledo soqqansho fulleemmoha ikkiro, Qullaawu Maxaafi halaale rosiisate dandoonsa woyyeessidhannoti dihuluullissannote. Shiima hasatto noonsare nafa, galagalte marte hasaawissanno gede kaaꞌla dandiineemmo. Haaruuddu halashshaano manna galagalle marre hasaawinseemmo yannara ledonke hadhanno gede assinammora, hattono Qullaawa Maxaafa xiinxallinseemmo wote ledonke xiinxallissara koyinsammonsara dandiineemmo. Haaruudde halashshaano konni garinni qajeelsineemmonsahanna jawaachinsheemmonsaha ikkiro, hasatto noonsare kaaꞌlitaranna uminsanni Qullaawa Maxaafa xiinxallissara dandiitanno. Qoleno, rakke hexxo mudhitannokki gedenna cincite soqqanshonsara jawaattanno gede qajeelsinammonsara dandiineemmo.—Gal. 5:22; “Hexxo Dimudhino” yitanno saaxine lai.

HAARUUDDU AYYAANAAMITTETE RODUUWINSARA SOQQANTANNO GEDE QAJEELSE

13, 14. (a) Qullaawu Maxaafi giddo wolootaho yee lowore assino manni lawishsha kuli. (b) Haaruuddu halashshaanonna wedellu, roduuwinsara baxille leellishshanno gede qajeelsa dandaattohu hiittoonniiti?

¹³ Qullaawu Maxaafi roduuwu gede ikke ‘baxamatenna’ mimmitinkera soqqamate qoosso noonketa kulannonke. (1 Pheexiroosi 1:22; Luqaasi 22:24-27 nabbawi.) Maganu Beetti manna kaaꞌlate yee baalankare wole agurina heeshshosi nafa sayise uyino. (Mat. 20:28) Dorqa “woꞌmanka woyite dancha looso loossanni buxane kaaꞌlitanno.” (Soq. 9:36, 39) Roomaho heedhino rodoo Maariyaami songote noorira yite ‘lowo geeshsha daafurtino.’ (Rom. 16:6) Haaruuddu roduuwansa kaaꞌla afidhino horo huwattanno gede assa dandiineemmohu hiittoonniiti?

¹⁴ Gikki yiino Kiristaani haaruuddu ledonsa hadhe dhiwantinorenna geedhitinore laꞌanno gede assa dandaanno. Hasiisannoha ikkiro, annuwunna amuuwu togoo yannara oosonsa ledo haꞌre laꞌꞌara dandaanno. Songote cimeeyye wolu roduuwi ledo geedhino roduuwira sagale massanna minensa gatamara dandiitanno. Hatto ikkiro, wedellunna haaruuddu wolootaho danchare assa rossanno. Lawishshaho, mittu cimeessi soqqansho fulino widoonni xeertote heeꞌranno roduuwa keere haꞌra dandaanno. Mittu wedellichu rodii hakkonni cimeessi ledo haꞌre keere haꞌrannoha ikkiro, songote giddo noo roduuwa baala baxa hasiissannota huwatanno.—Rom. 12:10.

15. Songote Cimeeyye songote giddo wolootu dandoonsa woyyeessidhanno gede kaaꞌla hasiissannonsahu mayiraati?

¹⁵ Yihowa songote giddo rosiisate labballo roduuwa horoonsiꞌranno; konni daafira labballu roduuwi rosiisate dandoonsa woyyeessiꞌra hasiissannonsa. Ati songote cimeessaatiro, songote soqqamaanchi lallawo shiqishate rosiisiꞌranna macciishsha dandaatto. Konni garinni kaaꞌlattosiha ikkiro, isi Maganu Qaale rosiisate dandoosi woyyeessiꞌranno.—Neh. 8:8.^[3]

16, 17. (a) Phaawuloosi Ximootewoosi dandoosi woyyeessiꞌranno gede maa assino? (b) Cimeeyye albillitte Maganu hoshsha allaaltannore danchu garinni qajeelsa dandiitannohu hiittoonniiti?

¹⁶ Kiristaanu songo giddo Maganu hoshsha towattannori lowo geeshsha hasiissano; konni daafira konne looso loosanno manna duuchanka wote qajeelsa hasiissanno. Phaawuloosi Ximootewoosira borreessino sokka giddo tenne assa dandiinanni gara kulino; togo yiino: “Xaate ati beettoꞌya! Kiristoosi Yesuusinni afiꞌnanni eltonni jawaati. Lowo naqaashshe albaanni ani rosiisoommohere woloota rosiisa dandiitannoriranna ammanantinorira eeggo uyi.” (2 Xim. 2:1, 2) Ximootewoosi dirunni iso roorannohu Soqqamaasinchu Phaawuloosi ledo soqqamanni lowore rosino. Yannate gedensaanni, Ximootewosi sabbakate looso loosinna wole qullaawa soqqansho soqqami yannara Phaawuloosi kulinosi doogga horoonsiꞌrino.—2 Xim. 3:10-12.

¹⁷ Phaawuloosi Ximootewoosi umisini qajeelona yee tuge diagurino. Isi wedellichu Ximootewosi ledosi loosanno gede assino. (Soq. 16:1-5) Songote cimeeyye roduuwa towaattanno yannara hasiisannoha ikkiro songote soqqamaano ledonsa hadhanno gede assite Phaawuloosi lawishsha harunsa dandiitanno. Cimeeyye tenne assitannoha ikkiro songote soqqamaano aliidi laꞌꞌaano ikkitannori rosiisa dandiitannore, ammana noonsare, cincitannorenna baxillaano ikka hasiissannonsata huwattanno faro afidhanno. Tini hayyo “Maganu hoshsha” allaaltannore ikkitannore qajeelsate kaaꞌlitanno.—1 Phe. 5:2.

WOLOOTA QAJEELSA HASIISSANNOHU MAYIRAATI?

18. Wolootu Yihowara soqqantanno gede qajeelsate sharrama hasiissannohu mayiraati?

¹⁸ Yannankera woloota qajeelsa lowo geeshsha hasiissanno; korkaatuno songote giddo loonsannihu lowo loosi no; hattono Yihowara soqqammanni tunceenyi lexxanni no. Yesuusinna Phaawuloosi qajeelsitino qajeelshi lowore kaaꞌlino. Yihowa yannankera noo soqqamaanosino uyinanninsaha tiokiraasete looso loosate qaajeltinore ikkitara hasiꞌranno. Maganu, gari dandoo noonsakkire songote hasiisanno looso loossara qajeelsate qoosso uyinonke. Alame bushshanni hadhanni no; qoleno haaru farciꞌrate tunceenyi lexxanni no; konnira woloota qajeelsa hasiissannotenna wiinamme assinannireeti.

19. Wolootu Yihowara soqqantanno gede kaaꞌlittoro dancha guma afiꞌrattota huluullama hasiissannohekkihu mayiraati?

¹⁹ Woloota qajeelsate lowo yannanna wolqa hasiissannoti egennantinote. Ikkirono, Yihowanna muxxe Beettisi woloota qajeelsatto yannara kaaꞌlitaheranna hayyo uyitahera dandiitanno. Konni garinni kaaꞌlinoommo manni jawaate loosannanna ‘sharramanna’ laꞌneemmo wote lowo geeshsha hagiidhineemmo. (1 Xim. 4:10) Konnira, ninke uminke Yihowara qullaawa soqqansho soqqamate ayyaanaamittetenni lopha agurroonke.