Wole Afoo Coyidhanno Songora Soqqantinanni Wote Ayyaanaamitteꞌne Agadhe

1-3. (a) Heeꞌnoommo gari ikkihano ikkiro baalunku maa assate sharrama hasiissannonke? (b) Wole afoo coyidhanno songora soqqantannorira hiikku baxxino coyi qarra ikkannonsa? Tini mayine hendeemmo gede assitannonke? (Hanafote noo misile lai.)

YANNANKERA lowo kume ikkitannori Yihowa Farciꞌraasine, ‘baattote aana noo gosa, gaꞌrenna addi addi afiinni coyiꞌranno manni baalu’ dancha duduwo macciishshannota kultanno masaalo woꞌmitanno gede assitanni no. (Aju. 14:6) Miteekkite ati wole afoo rossanni noottoha ikkara dandaanno. Woy misiyoone ikkite, woy sabbakkannori roore hasiissannowa hadhe soqqantanni noottoha, woy qooxeessikkira wole afoo coyidhanno songora soqqama hanafoottoha ikkara dandaanno.

² Baalanti Maganu soqqamaano uminsatanna maatensa ayyaanaamitte agadhate sharrama hasiissannonsa. (Mat. 4:4) Dilgo batidhannonkehura hojju xiinxallo danchu garinni xiinxalla mito wote qarra ikkitankera dandiitanno. Wole afoo coyidhanno songora soqqantannorira kayinni woluno qarra ikkannonsari no.

³ Wole afoo coyidhanno songora soqqantannori hakkonne afoo rosa calla ikkikkinni, kaajjado ayyaanaamittete sagale ganyite sagaꞌla hasiissannonsa. (1 Qor. 2:10) Insa noo songora coyidhanno afoo woꞌmunni woꞌma huwattannokkiha ikkiro tenne assa dandiitannohu hiittoonniiti? Wole afoo coyidhanno songora soqqantannori oosonsa wodanira Maganu Qaali qaꞌmiꞌranno gede assa hasiissannonsahu mayiraati?

AYYAANAAMITTENKE GAWAJJARA DANDAANNO COYE

4. Ayyaanaamittenke gawajjannori maa ikkara dandaanno? Lawishsha kuli.

⁴ Manni afiinni Maganu Qaale huwata dandiineemmokkiha ikkiro, ayyaanaamittenke gawajjantara dandiitanno. Nehimiya ontikki sani K.A. Baabiloonetenni higinohu Yihudu manni ooso giddo mite Ibiraawootu Afoo dandiitannokkita afiti yaadino. (Nehimiya 13:23, 24 nabbawi.) Tini ooso Maganu Qaale woꞌmunni woꞌma huwata dandiitannokkihura, Maganoho kaajjado ammana diheedhannonsa.—Neh. 8:2, 8.

5, 6. Mitu wole afoo coyidhanno songora soqqamanno anninna ama maa huwatino? Mayira?

⁵ Mitu wole afoo coyidhanno songora soqqamanno anninna ama oosonsara halaaleho noonsa baxilli ajanni dayinota huwatino. Oosonsa gambooshshunniwa yinannire woꞌmunni woꞌma huwata dandiitannokkiha ikkiro, Mangistete Addaraashera rosiinsanni rosi loosoho kakkayisa hoogansara dandaanno. Maatesi ledo Wodiidi Ameerikinni Awustiraaliya haꞌrinohu Pediro^[1] yinanni rodii togo yiino: “Ronseemmohu ayyaanaamittete coyi wodaninkera coa hasiissannosi.”—Luq. 24:32.

⁶ Manni afiinni nabbamboommori meessi afiinni nabbamboommori geeshsha wodaninkera coa hoogara dandaanno. Qoleno, wolu afiinni hedonke seekkine xawisa hooga, surrenke daafursitaranna ayyaanaamittenke gawajjitara dandiitanno. Konnira, wole afoo coyidhanno songora soqqamate hasiꞌranke dancha ikkiturono, ayyaanaamittenke gawajjantannokki gedeno qoropha hasiissannonke.—Mat. 4:4.

AYYAANAAMITTENSA AGADHINO MANNA

7. Baabiloonete manni Daanieeli, budensanna ammaꞌnonsa harunsanno gede assate woꞌnaalinohu hiittoonniiti?

⁷ Daanieelinna miillasi qafadante Baabiloone hadhu yannara, hatte gobba manni insara “Baabiloonootu afoo” rosiise budensa harunsanno gede assate woꞌnaalino. Qoleno, insa qajeelsitara shoommoonniri Baabiloonete suꞌma fushshitinonsa. (Dan. 1:3-7) Daanieelira fushshinoonni suꞌmi Beeli yinannihu Baabiloonennihu kaphu magani ledo xaado afiꞌrinoho. Moote Nabukedenetsoori, Daanieeli Baabiloonete magani Yihowanni roore wolqaataamoho yee hedanno gede assa hasiꞌrinoha ikkara dandaanno.—Dan. 4:8.

8. Daanieeli manni gobbara noo yannara, ayyaanaamittesi gawajjantannokki gede mayi kaaꞌlinosi?

⁸ Daanieeli Moote Nabukedenetsoori itanno sagale itannoha ikkirono, isi ‘battaawannokki gede agadhino’ woy qorophino. (Dan. 1:8) Isi “qullaawa maxaaffa” afoo dadhino afiinni ganye xiinxallannohura manni gobbara noo yannara ayyaanaamittesi gawajjantukkinni heeꞌrino. (Dan. 9:2) Hakko daafira, isi Baabiloone haꞌrihunni 70 diri gedensaannino, mannu woshshannosihu Ibiraawootu Afiinni fushshinoonnisi suꞌminniiti.—Dan. 5:13.

9. Faarso 119 kultannonke garinni Maganu Qaali tenne faarso borreessaancho kaaꞌlinosihu hiittoonniiti?

⁹ Faarso 119te borreessaancho Maganu Qaali wolootuwiinni baxxinoha ikkanno gede kaaꞌlinosi. Mite gashshaano iso qacifattusi yannara cinca hasiissinosi. (Far. 119:23, 61) Ikkirono, isi Maganu Qaali massagannosi gede assiꞌrino.—Faarso 119:11, 46 nabbawi.

AYYAANAAMITTEꞌNE AGADHE

10, 11. (a) Maganu Qaale xiinxallineemmo yannara dea hasiissannonkekki coyi maati? (b) Uminketa ayyaanaamittete hasatto wonshiꞌra dandiineemmohu hiittoonniiti? Lawishsha kuli.

¹⁰ Ayyaanaamittete loosinna uminke loosi batiꞌrinonkeha ikkiro nafa, baalunku hojju xiinxallonna maatete magansiꞌra assiꞌrate yanna gaaꞌma hasiissannonke. (Efe. 5:15, 16) Kayinni haammata qoola nabbawate woy gambooshshu yannara dawaro qolate geeshshira calla nabbawa dancha diꞌꞌikkitino. Maganu Qaali wodaninkera coannonna ammananke jawaachishanno gede assiꞌra hasiissannonke.

¹¹ Tenne assate, xiinxallineemmo wote wolu mannita ayyaanaamittete hasatto wonshineemmo gara calla ikkikkinni, ninketano wonshiꞌneemmo gara heda hasiissannonke. (Fil. 1: 9, 10) Soqqanshonniwa, gambooshshunniwa, woy lallawo shiqinsheemmo wote wolu mannira kulleemmore ninke uminke assa deꞌneemmoha ikkara dandaanno. Lawishshaho, sagale qishannohu, sagale mannu albira shiqishara albaanni maxine laꞌꞌate qamasannoha ikkirono, qamasinohunni calla heeꞌra didandaanno. Isi fayyaaleessa ikke heeꞌrate, unto ikkitanno sagale qishiꞌra hasiissannosi. Hatteente gede, ninkeno uminke hasatto wonshitannota ayyaanaamittete sagale itate sharrama hasiissannonke.

12, 13. Wole afoo coyidhanno songora soqqantannori afoo dadhinoonni afiinni ayyaanaamittete coye ganyine xiinxalla horo afidhinota huwattinohu hiittoonniiti?

¹² Wole afoo coyidhanno songora soqqamannohu batinyu roduuwi, Qullaawa Maxaafa afoo dadhinoonni afiinni xiinxalla lowo geeshsha kaaꞌlitannota huwatino. (Soq. 2:8) Misiyoone ikkitinori nafa ammanansa shoshshoggitukki wole gobbara soqqamate, gambooshshunniwa rossannohu ayyaanaamittete rosinni calla heeꞌra dandiitannokkita huwattino.

¹³ Aleni yinannihu mito sette diro Pershiyani afoo rosino rodii togo yee noore coyiꞌrino: “Pershiyani afiinni gambooshsheho qixxaaweemmo wote, hakko qaale rosate widira dooeemmo. Qixxaaweemmo yannara surreꞌya hakko afoo rosate daafira heddanno daafira, nabbaweemmohu ayyaanaamittete coyi woꞌmunni woꞌma wodaniꞌyara dicoanno. Qullaawa Maxaafanna wole borruwanke afoo dadhoommo afiinni xiinxallate yanna gaaꞌmeemmohu iseraati.”

MAGANU QAALI OOSOꞌNE WODANIRA QAꞌMIꞌRANNO GEDE ASSE

14. Ooso noonsa Kiristaani dea hasiissannonsakki coyi maati? Mayira?

¹⁴ Ooso noonsa Kiristaani Maganu Qaali oosonsa wodanira rumuxxanni haꞌranno gede assa hasiissannonsa. Serjinna Mureeli yinanni minaanninna minaama, wole afoo coyidhanno songora sase saꞌꞌanno diro soqqamihu gedensaanni, 17 diri qaaqqinsa ayyaanaamittete coye assa ceeꞌma hanafinota huwatino. Mureeli qaaqqinke “Albaanni afoo dadhinohu Faransayete Afiinni sabbaka baxannoha ikkirono, xa wolu afiinni soqqama ceeꞌma hanafino” yitino. Serji togo yiino: “Tini qaaqqinke ayyaanaamittetenni lophannokki gede guficho ikkitinosita huwantummoti, albinke songo higate kaꞌnummo.”

15. (a) Annunna ama oosonsa seekkite huwata dandiitanno afoo coyidhanno songo higa woyyitannoronna teꞌee murate maa heda hasiissannonsa? (b) Marro 6:5-7 annunna ama maa assanno gede kultanno?

¹⁵ Ooso noonsa Kiristaani, oosonsa dancha gede huwattanno afoo coyidhanno songo higa woyyitannonsaronna teꞌee murate heda hasiissannonsari maati? Umihunni, insa oosonsa Yihowa baxxanno gede assanni heeꞌrenni, oosonsara wole afoo rosiisannoti ikkado yannanna wolqa noonsaronna teꞌee buuxa hasiissannonsa. Layinkihunni, insa oosonsa ayyaanaamittete coye assa, woy wole afoo coyidhanno songora soqqama hasidhannokkita huwattara dandiitanno. Annunna ama tenne huwatiro oosonsa wodanira halaalu woꞌmunni woꞌma qaꞌma geeshsha insa seekkite huwata dandiitanno afoo coyidhanno songo higate hedara dandaanno.—Marro 6:5-7 nabbawi.

16, 17. Mitu anninna ama wole afoo coyidhanno songora soqqamanno yannara, oosonsa qajeelsannohu hiittoonniiti?

¹⁶ Mitu anninna ama wole afoo coyidhanno songora woy gaamora soqqamanni heeꞌrenni, oosonsara Yihowa daafira afoo dadhitino afiinni rosiisanno. Charlesi yinannihu 9, 12 nna 13 diro ikkannonsa seenne afiꞌrinohu Lingaala Afoo coyidhanno gaamo haꞌrino. Isi togo yiino: “Qaaqquullenke xiinxallinseemmonna maatete magansiꞌra assiꞌneemmo yannara uminke afoo horoonsiꞌrate murciꞌnoommo. Ikkollana, tenne assineemmo yannara insa hagiidhitanni Lingaala Afoo rosa dandiitanno gede konni afiinni mite coyibba rosiisiꞌneemmo, hattono mite godoꞌle godoꞌlineemmo.”

¹⁷ Ontenna sette diro ikkannonsari meya qaaqquulli noosihu Keveni yinanni rodii, wole afoo coyidhanno songora soqqamanno yannara oososi songote rosiinsanni wote seekkite huwata dandiitannokkihura isi mine rosiisannonsa. Isi togo yiino: “Minaamaꞌyanna Ani qaaqquullenke, afoo dadhinohu Faransayete Afiinni xiinxallinseemmo. Qoleno aganunni mitte hinge Faransayete Afoo coyidhanno songo haꞌratenna fooliishshonke yannanni uminke afiinni assinanniha qoqqowu gambooshshe beeqqate mixo fushshiꞌnoommo.”

18. (a) Annunna ama qaaqquullensa kaaꞌlate hedanno yannara Roomu Sokka 15:1, 2 noohu hiikku xintu seeri kaaꞌlansara dandaanno? (b) Mitu anninna ama mayino? (Jeefote hedo lai.)

¹⁸ Mitte mittenti maate oosonsa ayyaanaamitte gawajjantannokki gede agadha hasiissannonsati egennantinote.^[2] (Gal. 6:5) Aleenni qummi assiniti Mureeli isenna minaannise wole afoo coyidhanno songora soqqama hasiꞌrannoha ikkirono, qaaqqinsara ayyaanaamitte gawajjantannokki gede isi seekke huwata dandaanno afoo coyidhanno songo higinota coyidhino. (Roomu Sokka 15:1, 2 nabbawi.) Minaannise Serjino hakka warita qaage insa dancha doorsha doodhinota coyiꞌrino. Isi togo yiino: “Faransayete Afoo coyidhanno songo hingummota qaaqqinke ayyaanaamittetenni lophino, hattono gedensaanni cuuamino. Xa isi woꞌma yanna suwisaancho ikke soqqamanni no. Wole agurina isi wirro wole afoo coyidhanno gaamo hige soqqamate hedanni no!”

MAGANU QAALI LOOSOHO KAKKAYISANNOꞌNE GEDE ASSIDHE

19, 20. Maganu Qaale banxeemmota leellisha dandiineemmohu hiittoonniiti?

¹⁹ Yihowa baxillunni kakkae “mannu baalunku gatannonna halaale” afanno gede, Qaalisi Qullaawu Maxaafi lowo xibbe ikkanno afiinni qixxaawanno gede assino. (1 Xim. 2:4) Isi ayyaanaamittenke roore jawaattannohu afoo dadhinoommo qaalinni nabbambummoro ikkinota afino.

²⁰ Heeꞌnoommo gari ikkihano ikkiro, kaajjado ayyaanaamittete sagale sagaꞌla hasiissannonke. Afoo dadhinoommo qaalinni Qullaawa Maxaafa ganyine xiinxallineemmoha ikkiro, ninketinna maatenke ayyaanaamitte gawajjantannokki gede agadhineemmo; hattono Maganu Qaale wodaninkera wodha hasiꞌneemmota leellinsheemmo.—Far. 119:11.