“Baalunku Mannira Baalankare Ikkoommo”

QULLAAWU MAXAAFI halaale afate lowo hasatto giddoꞌya rumuxxitinohu hakkuyira albaanniiti. Amaꞌya adhitinote Qullaawu Maxaafi aana xintantino borro giddo noo hedo, roorenkanni giddose noo misilla baasa baxeemmo. Anniꞌya amaꞌya rossanni noore anera kultara dihasiꞌrino. Ikkollana, anera afate lowo hasatto nooehura amaꞌya xaꞌmo xaꞌmeemmo; konni daafira ise anniꞌya mine nookki wote xiinxallissannoe. Konni garinni anino heeshshoꞌya Yihowara sayise aate murciꞌrummo. Konnira, tonnu dirihu heeꞌre 1943 Ingilizete, Bilaakipuuli yinanniwa cuuamummo.

YIHOWARA SOQQAMA HANAFUMMO

Amaꞌyanna ani hatte yannanni kayinse soqqanshote ganyine mitteenni fulleemmo. Qullaawu Maxaafi sokka mannaho kulate, fonogiraafete yinanni uduunnicho horoonsiꞌneemmo. Kuni uduunnichi jawahonna ayirrinye 4.5 kiilogiraame ikkannoho. Hakka waro ani anje heeꞌre konne uduunnicho quuxxi yee duheemmo gara hanni hedde!

Tonaa shoole diro ikkieta, suwisaancho ikka hasiꞌrummo. Tennera amaꞌya woradu aliidi laꞌꞌaancho amaale xaꞌmiꞌreemmo gede kultue. Woradu aliidi laꞌꞌaanchi suwisaancho ikkeemmo yannara hasiisannoe woxe afiꞌrate kaaꞌlitannoe ogimma roseemmo gede amaalie. Konnira isi amaalinoente gede ogimma rosummo. Lame diro loosummohu gedensaanni, woradu aliidi laꞌꞌaancho ikke soqqamannoha wole rodoo suwisaancho ikka hasiꞌreemmota kule amaaꞌlummo. Tennera isi “Ikka dandaatto!” yee jawaachishie.

Konni garinni Dotteessa 1949, amaꞌyanna ani woxe baante heeꞌneemmo mine nooha mini uduunnenke mito mannaho uyine, mito hirre Maanchisteri mule Midiliteni yinanniwa haꞌnummo; hakko suwisaano ikkine soqqama hananfummo. Shoolu agani gedensaanni mitto rodoo soqqanshote jaala assiꞌrummo. Sinu biiro Erlaami yinanniwa haarote xintantino songora soqqammeemmo gede koyissunke. Hakka waro amaꞌya wole songora mitte rodoo ledo suwisaancho ikkite soqqantanno.

Hatte yannara anera 17 diro calla ikke nooeha ikkirono, haaro songonkera ikkaddu roduuwi nookki daafira aneranna soqqanshote jaaliꞌyara gambooshshe massagate looso uyininke. Gedensaanni ani shiima halashshaano noote Bekisteni Songo haꞌre soqqameemmo gede koyinsie. Soqqansho hanafummo yannara uyinannie looso, albillittete uyinannie loosira qajeelsha afiꞌrate kaaꞌlannoehu gede asse laeemmo.

Gedensaanni 1951 Giiliyaadi Qullaawu Maxaafi Rosi Mine eꞌꞌe rosate forme wonshummo. Ikkollana, Sadaasa 1952 wottaaddara ikkammora woshshinie. Woꞌma yanna soqqamaancho ikkoommota kule gatate woꞌnaaloommoha ikkirono, yoote mini tenne haara giwinohura yoo yineennae lee agana usuramummo. Hakko usuru mine heeꞌreenna Giiliyaadi rosi mine 22^nki kifile eꞌꞌe roseemmo gede koyinsie. Konni daafira, Maaja 1953 Joorjiki yinanni yowolo gidde Niwu Yorke haꞌrummo.

Hakkiira iillummoti, 1953 assinoonniha Haaro Alame Dagoomi Gambooshshe yinanni gambooshshe ofollummo. Hakkiinni baabura gidde Rosu mini noowa Niwu Yorkete, Saawuzi Laansingi yinanniwa haꞌrummo. Usuru mininni xaalla fuloommohura gari woxi dinoe. Baaburunni dirre Saawuzi Laansingi haꞌrate otobise gidda hasiissinoe; konni daafira ledoꞌya otobise giddino doogaanchiwiinni sumune liqiiꞌrummo.

WOLE GOBBARA HAꞌRE SOQQAMUMMO

Giiliyaadi Rosi Mini misiyoone ikkine soqqammeemmo yannara “baalunku mannira baalankare” ikkate kaajja qajeelsha afiꞌneemmo gede kaaꞌlinonke. (1 Qor. 9:22) Sase roduuwa yaano, Pooli Biruuni, Reyimendi Liichinna Ani, Filippiinsi yinanni gobbara soqqammammora sonkinke. Hatte gobba haꞌrate viiza agadhine haammata aganna keeshsha hasiissinonke; gedensaanni Rooterdami, Mediteraaniyu Baara, Siyuzi Kanaali yinannite wayi doogo, Hindete Wuqiyanoose, Maleezhiyunna Hongi Kongi giddoonni hinge hakkira haꞌnummo; baaru aana haꞌnanni hakkira iillate 47 barra adhinonke! Jeefote Bocaasa 19, 1954 hatte gobbaha qara katama Manila iillinummo.

Hakko marroommowa anfoommokki manna, egenninoommokki gobbanna haaru afoo rosa hasiissinonke. Ikkollana, umo sasenka batinyu Ingilizete Afoo coyiꞌranno manni heeꞌranno qooxeessira noote Kesooni Sitii yinanni songora soqqammammora sonkinke. Konni daafira lewu agani saihu gedensaanni nafa Tagaloogi Afiita boode qaalla calla anfoommo. Gedensaanni uyinoonninke loosi konne qarra tirate kaaꞌlinonke.

Onkoleessa 1955 Roduu Liichinna Ani soqqansho fulloommowiinni hingeemmo wote minenke borrote sokka no. Tenne sokka nabbambummoti woradu aliidi laꞌꞌaano ikkine soqqammammora shoommoonninketa anfummo. Hakka waro anera 22 diro calla ikke nooeha ikkirono, tini soqqansho “baalunku mannira baalankare” ikkate haaro faro fantinoe.

Lawishshaho, woradu aliidi laꞌꞌaancho ikke mite yee manna baalaho shiqinshanni lallawo shiqishoommohu mittu qachira noo suuqera albaanni noote fano baseraati. Hakko shiima yanna keeshshanni heeꞌrenni, hatte yannara Filippiinsi gobbara manna baalaho shiqqanno lallawo hattoo basera shiqisha rosantinota wodanchummo! Woradu giddo noo songuwa towaateemmo yannara, lallawo mannu boohaarannowa, dikko uurritanno bayicho, dagoomu addaraashe nafara, qircaatete kaase meedira, paarketenna duuchu wote katamu doogo qaccera shiqisheemmo. Mitte hige Sani Paabilo Sitii yinanniwa dikkote bayicho lallawo shiqishanni heeꞌreenna, biite xeena ganeenna lallawo shiqisheemmo gara hoogummo; hakko daafira Mangistete Addaraashe mare shiqishummoro woyya ikka yee looso qeechi noonsa roduuwira hedo shiqishummo. Gedensaanni roduuwu, gambooshshe assiꞌnoommohu dagate bayicho ikkinokki daafira, rippoorte qollanni wote konne gambooshshe dagate gambooshshe yine qollanninso mayinanni yite xaꞌmitue!

Hatte yannara galeemmohu roduuwu mineeti. Mininsa bikkunniha ikkirono, ayewoteno diꞌꞌishinanno. Roore wote goxeemmohu xaawula karroonni mine dado aanaho karreennaeeti. Biso hayishshiꞌnannihu teeꞌlinokkiwaati; hakko daafira biso xawoho hayishshiꞌra rosa hasiissinoe. Basetenni base haꞌreemmohu otobise giddeeti; mito wote mitte giddichonni wole giddicho haꞌreemmohu yowolotenniiti. Soqqamanni keeshshummo diro baala, umiꞌya makeeni heeꞌre diegenninoe.

Qanchu soqqanshora soqqamanna songuwa towaata Tagaloogi (Filippiinsi gobbara coyiꞌnanni afoo) rosate kaaꞌlitinoe. Konne afoo rosoommohu rosu mine eꞌꞌe ikkikkinni roduuwu soqqanshonniwanna gambooshshunniwa coyidhanna macciishshanniiti. Roduuwu konne afoo roseemmo gede kaaꞌlitinoe; insa ceeꞌmitukkinni hattono hedonsa xawisse kultanni rosiissinoetera lowo geeshsha galateemmonsa.

Yannate gedensaanni addi addiha haaro looso uyinoonnie daafira mitore biddi assiꞌreemmo gede assinoe. Roduu Naataani Noori 1956 towaanyote dayenna jawa gambooshshe assini yannara addi addi dirijjitta ledo hasaawate looso uyinie. Hattoo looso loose egennoommokki daafira, wolootu uminsa fajjonni konne looso looseemmo gara rosiissue. Diro woꞌmitinokki yanna giddo, qara biironni Roduu Ferediriki Firaanzi towaatankera dayenna wole jawa gambooshshe assini. Ani hakko gambooshshira aliidi laꞌꞌaancho ikke soqqamoommo; hatte yannara qooxeessu manna lawe heeꞌrate daafira Roduu Firaanziwiinni lowore rosoommo. Roduu Firaanzi lallawo shiqishi yannara beerongi Tagaloogi yinanniha Filippiinsi manni uddiꞌrannoha budu uduunne uddiꞌre shiqishino; tini qooxeessu roduuwi lowo geeshsha hagiidhanno gede assitino.

Awuraajju aliidi laꞌꞌaancho ikke soqqamummo yannarano mitore biddi assiꞌra hasiissinoe. Hatte yannara Haaro Alame Dagoomi Afiꞌranno Hagiirre (Ingilizete Afoo) yitanno filme leellinsheemmo; tenne filme mannu batiꞌrannowa xawoho duucha wote leellinsheemmo yaa dandiinanni. Mito wote shiimmaadda lubbuwa qarrissannonke. Tini lubbuwa pirojekiterete (filme leellinshanni uduunnicho) giddonni fulanno xawaabba baxxannohura konni uduunnichi giddora eꞌanno. Filme leellinshummohu gedensaanni pirojekitere feya lowo loosooti! Togoo qixxaawo qineessa shota looso ikka hooggurono, mannu Yihowa dirijjite alame woꞌmate noota ikkitinota afanno gede kaaꞌlitino; tini abbitino guma laꞌꞌa lowo geeshsha hagiirsiissannote.

Kaatoolikete ammaꞌno qeesooti qooxeessaho heeꞌrannohu silxaane afiꞌrinohu mitu manni gambooshshe assiꞌneemmota hoolanno gede kakkayissanno. Hattono, lallawo shiqinsheemmohu beetekiristaannansa mule ikkiro, dowwola gantanni lallawo shiqishannohu yaannori macciishshamannokki gede assate woꞌnaaltanno. Ikkollana, tini mannu halaale macciishshannokki gede diassitino; xaa yannara hakko qooxeessira Yihowa magansiꞌrannohu lowo manni no.

MITORE BIDDI ASSIꞌREEMMO GEDE ASSANNOHA WOLE LOOSO UYINIE

Gedensaanni 1959 sinu biirora soqqameemmo gede koyinsie. Tini lowore roseemmo gede assitinoe. Yannate gedensaanni, zoonete aliidi laꞌꞌaancho ikke addi addi gobbuwa towaateemmo gede sonkie. Mitte hige towaatate haꞌroommowa Tayilaandete misiyoone ikkite soqqantannote Jaaneeti Diyumendi yinanni rodoo ledo egennamummo. Lamunku boode yanna mimmitoho sokka borreessinanni keeshshinummohu gedensaanni adhammummo. Ise ledo Yihowara hagiirrunni soqqammanna xa 51 diro ikkinonke.

Xaphoomunni, 33 gobbara heeꞌrannoha Yihowa manna towaatate qoosso afiꞌroommo. Albaanni soqqamummo yannara afiꞌroommo woꞌnaalshi addi addi bude afiꞌrino manna towaateemmo wote tuncu yaannoe fonqolo dandee saeemmo gede kaaꞌlinoe. Addi addi gobbara heeꞌranno manna towaataꞌya, halashshe hedeemmonna Yihowa baalanka manna baxannota afeemmo gede assitinoe.—Soq. 10:34, 35.

MITORE BIDDI ASSIꞌRA DIAGURROOMMO

Filippiinsi gobbara heeꞌranno roduuwinke ledo soqqama lowo geeshsha hagiirsiissinonke! Xaa yannara Filippiinsi noo halashshaano ani hatte gobbara soqqama hanafummo warinni tonne ero roortanno. Xa Jaaneetinna Ani Filippiinsi gobbara Kesooni Sitii yinanni katamira noote sinu biirora soqqamanni heeꞌnoommo. Wole gobbara soqqamanna 60 diro sainoha ikkirono, xaano Yihowa aannoe loosira mitore biddi assiꞌra hasiissannoe. Lawishshaho muli yannara Yihowa dirijjite mite coyibba biddi assitinohura Isira soqqammanni heeꞌratenna roduuwanke kaaꞌlate mitore biddi assiꞌra hasiissinonke.

Yihowa fajjo assate dandaaminkere baala assinoommo; tini hagiirsiissanno heeshsho heeꞌneemmo gede kaaꞌlitinonke. Qoleno, roduuwanke kaaꞌlate assa hasiissannonkere baala assate woꞌnaalloommo. Yihowa fajji geeshsha “baalunku mannira baalankare” ikkate murciꞌnoommo.