Elto Baalanta Roore Elto

JOORDAANI anga noohu yowolo lawannohu irsaase quxiꞌnanni uduunnichi mullare lawanno. Joordaani kayinni konne uduunnicho lowori gede asse laꞌꞌanno. Isi togo yiino: “Kuni uduunnichi qaaqqu heeꞌreenna ninketa aanannohu Raasili yinannihu jawu manchi uyinoeho.” Raasili, Joordaani ahaahira, annisiranna amasira qarru iillinsa yannara jawaachishinonsa; Joordaani tenne huwatinohu Raasili reyi gedensaanniiti. Joordaani togo yiino: “Xa Raasili daafira seekke afoommo daafira, konne shiima aamamooshshe albinni roore lowori gede asse laeemmo.”

Joordaani xagge leellishshannonte gede, mannu elannonkeri woleho garire lawa hoogara dandaanno. Adhanno manchi naadannoha ikkiro kayinni, hakkurichi isira muxxete. Qullaawu Maxaafi mitte taalle nookki eltore kulanni togo yaanno: “Maganu baattote aana noo manna baala baxino daafira, iso ammaꞌninohu baalu hegere heeshsho afiꞌranno gede ikkinnina baꞌꞌannokki gede, Maganu mitto Beettosi uyino.”—Yohaannisi 3:16.

Tenne elto adhanno manchi hegere heeshsho afiꞌranno! Tenne roortannoti wole elto nooni? Mitu manni tenne elto garire asse laꞌꞌa hoogara dandaanno; addu Kiristaanira kayinni tini elto ‘ayirradoreeti.’ (Faarso 49:8, 9; 1 Pheexiroosi 1:18, 19) Ikkina, Maganu Beettosi alamete woy mannu oosora elto asse uyinohu mayiraati?

Soqqamaasinchu Phaawuloosi Maganu tenne assinohu mayiraatiro togo yee kulino: “Mittu manchinni kainohunni cubbu tenne alame eino; reyo cubbu widoonni higge daggino.” (Roomu Sokka 5:12) Umi manchi Addaami afanni heeꞌre Maganoho hajajama giwe cubbo loosino daafira reyote yoo yinoonnisi. Addaaminni kainohunni sirchisi baalu, yaano mannu ooso baala reyitannore ikkitino.

“Cubbu laalchi reyote; Maganuwiinni afiꞌnanni baꞌraaꞌri kayinni, Mootichinke Kiristoosi Yesuusi widoonni hegere heeshshooti.” (Roomu Sokka 6:23) Maganu mannu ooso cubbu borojjimma giddonni fushshate, guutu Beettisi Yesuusi Kiristoosi mannu oosora kakkalo ikke reyanno gede uullara soyino. “Wodo” yinanniti tini kakkalo, Yesuusa ammanannota leellishannohu baalu hegere heeshsho afiꞌranno gede assitanno.—1 Ximootewoosi 2:6.

Phaawuloosi Maganu Iso magansidhannorira Yesuusi Kiristoosi widoonni aanno atooti daafira coyiꞌranni togo yiino: “Kulle gundannikki eltosi daafira Maganoho galatu galosi!” (2 Qorontoosi 9:15) Ee, wodo dhagge ikkitino daafira ninke kulle guda didandiineemmo. Wodo Maganu uyinonke elto baalantenni roore dhaggennitenna baxxitinote yineemmohu mayiraati? Wodo Maganu uyinonkete wole elto baalantenni roortannohu hiittoonniiti?a Wodo naandeemmota leellisha dandiineemmohu ma garinniiti? Aante noote lame birxichuwara, Qullaawu Maxaafi kuri xaꞌmuwara qolanno dawaro nabbawatto gede koyinsoommohe.