Ati Tenne Afootto?

Yerusaalamete Maganu mine saada massite hirtu daddalaasine manna ‘mulqidhino’ yaa garaho?

MAATEWOOSI Wongeelira togo yine borreessinoonni: “Yesuusi Qullaawu Minira eꞌꞌe, hakkiicho hirtanninna hidhitanni noore fushshe shorri. Woxe [soorritannori] xarapheeyyenna lemboola hirtannori barcimma galchi. [Hakkiinnino], ‘“Mineꞌya huuccattote mineeti yinanni” yine borreessinoonni. Kiꞌne kayinni mulqidhannori maaxantanno goda assitinoonni’ yiinsa.”—Mat. 21:12, 13.

Yihudu manni borreessinoti xaggete borro, daddalaano hidhinanni coye waaga iibbishshe mannuwiinni woxe haqaqqaalte adhitannota leellishshanno. Lawishshaho Mishinahi (Keritooti 1:7) yinanni maxaafi, umi xibbi diro kakkalote shiqishiꞌnannihu lamu lemboolchi waagi lexxe mitte worqete diinaare ikkinota kulanno. Hatte yannara kuni waagi gari ogimma afiꞌrinokki manchi 25 barra loose afiꞌranno damoozi ledo taaloho. Anga ajino manni lemboola woy bukukkaama kakkalote shiqishiꞌranno gede fajjinoonniha ikkirono, hattee cea waagi nafa baasa iibbino. (Lew. 1:14; 5:7; 12:6-8) Yihudu ammaꞌno rosiisaanchi Sayimeni Beni Gamaaliyali tennera lowo geeshsha hanqe shiqqanno kakkalo jilba ajishinohura, lamu lembooli waagi albi waagiwiinni xibbe anga dirrino.

Aleenni kulli garinni, Maganu mine daddiꞌlitu mannooti manni woxe haqaqqaalte adhitinohuranna hafuuraamma ikkitinohura Yesuusi insa manna ‘mulqidhinohu’ gede asse coyiꞌrasi garaho.