Insaneeto Uminsa Fajjonni Shiqishshino Turkete

UMI XIBBI DIRI Kiristaani, Maganu Mangisteha ‘Dancha Duduwo’ dandaaminsa deerrinni batinyu mannira duduwate baasa sharramino. (Mat. 24:14) Mitu isinni wole gobbuwa nafa haꞌrino. Lawishshaho soqqamaasinchu Phaawuloosi misiyoone ikke soqqami yannara, xa Turke yinanni gobbara noo qooxeessuwa haꞌre soqqamino.a Mitu 2,000 diri gedensaanni, 2014nni Turkete baxxinoha soqqanshote zamacha assinoonni. Konne zamacha qixxeessinoonnihu mayiraati? Konni zamachi yannara ayeoo soqqantino?

“KOYE MAA AFIDHINOONNI?”

Turkete gobbara noo halashshaano 2,800 saꞌanno; hatte gobbara heeꞌranno manni kayinni 79 miliyooneeti. Togo yaa mittu halashshaanchira 28,000 manni iillanno yaate. Tini kiiro tenne gobbara heedhanno halashshaano shiima manna calla hasaawisa dandiitannota leellishshanno. Baxxino zamacha qixxeessinoonnihu shiima yanna giddo dandaami deerrinni lowo mannira sabbakateeti. Konni zamachira 550 ikkitannoti Turkete Afoo coyidhanno halashshaano addi addi gobbanni dagge, hatte gobbara heedhanno halashshaano ledo soqqantino. Tini mayi guma abbituyya?

Lowo mannira farciꞌnoonni. Istaambuli yinanniwa nooti mitte songo togo yite borreessitino: “Mannu ninke laꞌꞌanno wote togo yee xaꞌmannonke: ‘Koye gambooshshu nooꞌne? Marriwa baalawa Yihowa Farciꞌraasine no!’” Izmiri katamira noo songono togo yite borreessitino: “Kaameelu uurrannowa loosanno manchi, mittu songote cimeessiwa shiqqi yee togo yee xaꞌmino: ‘Koye maa afidhinoonni? Looso albinni roorsitine loosa hanaffinooni?’” Ee, kuni zamachi diteeꞌlinoho.

Wole gobbanni konni zamachira soqqamate hadhinori hagiidhite sabbakkino. Denimaarketenni haꞌrinohu Isteefeni togo yiino: “Yihoware macciishshe egenninokki mannira barru baala farciꞌroommo. Tini, mannu Yihowa suꞌma afanno gede assanni noommo yee hedeemmo gede assitinoe.” Faransayetenni haꞌrinohu Jiini-Deevidi togo yee borreessino: “Mitte doogora calla haammata saate soqqammoommo. Tini hagiirsiissannote! Rooru manni Yihowa Farciꞌraasine diegennino. Haꞌne sabbankoommote mitte mittente qaera heeꞌranno manna hasaawinse hattono viidiyubbanke giddo mitte fanne leellinshe borro elloommo yaa dandiineemmo.”

Zamachunni soqqaminohu 550 manni, lame lamala giddo 60,000 borro elino! Ee, konni zamachi yannara lowo mannira farciꞌnoonni.

Roduuwu diinaggaabbe soqqantanno gede assino. Zamachu hatte gobba roduuwi albinni roore soqqamate kakkaꞌanno gede assino. Insa giddo batinyu woꞌma yanna soqqansho eate heddino. Turkete baxxino zamacha assinihunni aane noohu 12 aganni giddo woꞌma yanna suwisaano kiiro xibbunni 24 anga lexxitino.

Hakko zamachira hadhe soqqantinori, gobbuwansa higgu gedensaanni nafa albinni roore diinaggaabbe soqqama hanaffinota coyidhino. Jarmanetenni hadhinoti Shereni togo yitino: “Turkete heedhanno roduuwi sabbakate fultinokki wote farciꞌra diwaajjitanno. Ani kayinni sabbakate fuloommakki wote farciꞌra waajjeemma. Ikkollana zamachu, hatte gobbara heedhanno roduuwinna lowo huuccatto kaaꞌlonni albaanni assa waajjeemma coye assa dandoomma. Baaburunni bushshu giddoonni hige haꞌreemma wote nafa, manna hasaawisanninna tiraaktuwa elanni haꞌreemma! Xa albi gede diwaajjishannoe.”

Jarmanetenni haꞌrinohu Yohaanesi togo yiino: “Soqqanshoꞌyanni danchare rosoommo. Turkete roduuwi dandaaminsa deerrinni lowo mannira sabbaka baasa hasidhanno. Insa afidhu faro baalantenni sabbakkanno. Anino Jarmane higeemmo wote hatto assate murciꞌrummo. Xa albinni rooru mannira farciꞌreemmo.”

Faransayetenni hadhinoti Zeyinepi togo yitino: “Kuni zamachi soqqameemma gara woyyeessiꞌrate kaaꞌlinoe. Hattono, albinni roore waajjeemmakki gedenna Yihowa addaxxeemma gede kaaꞌlinoe.”

Halashshaano mimmitinsawa shiqqanno gede assino. Babbaxxitino gobbanni dayino roduuwi mereero noo baxillinna mittimma hambannikkite. Aleenni qummi assinihu Jiini-Deevidi ‘roduuwu wosina adhitannore ikkitinota laꞌinota’ coyiꞌrino. Isi lede togo yiino: “Insa ninke jaallansanna maatensa miilla gede assite haadhinonke. Insa mininsara anga fante haadhe wosinsitinonke. Ninke alamete doyichora noohu roduuwu maamara ikkinoommota afoommo; qoleno borruwanke giddo tenne daafira duucha hige nabbawoommo. Xa kayinni umiꞌya heeshshonni laoommo. Tini Yihowa manni wido ikkaꞌya albinni roore naadeemmo gede assitinoe; tenne dancha qoosso uyinoehura [Yihowa] galaxxeemmosi.”

Faransayetenni hadhinoti Kileeri yinanni rodoo togo yitino: “Ninke Denimaarkete, Faransayete, Jarmanete woy Turkete gobbare ikkinummorono mitte maate gede ikkinoommo. Maganu gobbuwate danna baala jawu feyaanchinni fee huninohu gedeeti.”

Faransayetenni hadhinoti Isteefanino togo yitino: “Hakku zamachi, mittimma afiꞌneemmo gede assannohu bude woy coyiꞌneemmo afoo ikkikkinni, baalunku Yihowa banxeemmore ikkanke ikkitinota huwanteemmo gede assino.”

GEEDDANNO HORO UYINO

Zamachu yannara wole gobbanni daye soqqamihu batinyu manni, Turkete noohu lowo loosira kaaꞌlamate hatte gobba galagale daye soqqamate heda hanafino. Insa giddo kiiro ajinokki manni hatte gobba higino. Sabbakanno manni roore hasiisannowa hadhinori kuri roduuwi galantannireeti.

Hanni mittu gaxarete qooxeessiꞌra heedhannota 25 halashshaano noo gaamo lawishsha assine adhino. Lowo diro tenne gaamo giddo mittu cimeessi callu soqqamanni keeshshino. Ikkollana, 2015nni lewu roduuwi Jarmanetenninna Neezerilaandetenni insawa daggu yannara, halashshaano mageeshshi geeshsha hagiidhitinoro heda dandiitinanni!

SABBAKKANNORI ROORE HASIISSANNOWA HAꞌRE SOQQAMA

Sabbakkannori roore hasiissannowa hadhe soqqamate yite, mite yanna geeshsha Turke hadhino roduuwi hakko hiittoo heeshsho heedhino? Sabbakkannori roore hasiissannowa haꞌne soqqammanni wote coyi ayirranno woti heeꞌrannoha ikkirono, togoo soqqansho lowo geeshsha kiissanno. Hanni mitu roduuwi yiinore laꞌno:

Ispeenetenni haꞌrinohu 40 diri balla ikkannosihu Federiko yinannihu adhino rodii togo yiino: “Agura marareemmo gede assannoha lowoha maalaamittete coye afiꞌra hoogaꞌya hobbi ruxxi yeemmokki gede kaaꞌlitino; hakko daafira roore hasiissanno coyi aana illachisha dandeemmo.” Isi togoo soqqansho daafira mayyiino? Togo yiino: “Lowo geeshsha danchate! Mannaho Yihoware rosiisate yitine wole gobba hadhinanni wote, kiꞌneneeto Yihowa angara sayissine uyitinanni heedhinoonni yaate. Qoleno, Yihowa towaatannoꞌneta albinni roore huwattinanni.”

Neezerilaandetenni haꞌrinohu 50 diri balla ikkannosihu Radii yinannihu adhino rodiino, sabbakkannori lowo geeshsha hasiissannowa haꞌre Yihowa daafira macciishshe egenninokki mannira rosiisa baasa hagiirsiissannosita coyiꞌrino. Isi lede togo yiino: “Mannu halaale macciishshanno wote hagiidhanno gara laꞌꞌa lowo geeshsha hagiirsiissanno.”

Jarmanetenni haꞌrinohu 40 diri balla ikkannosihu Saasha yinannihu adhino rodii togo yiino: “Soqqansho fuleemmo kiiro, halaale macciishshe egenninokki manna xaadeemmo. Togoo manni Yihowa egennanno gede kaaꞌla lowo geeshsha hagiirsiissanno.”

Jappaanetenni hadhinoti Astuuko yinanniti 30 diro saꞌꞌannoseti mine assidhino rodoo togo yitino: “Biꞌre Armagedooni rahe daara halcheemmo. Turke haꞌrumma kawa kayinni, Yihowa cince sammi yiinotera galaxxeemmasi. Yihowa alamete qooxeessiꞌra loonsanniha wongeelu looso loosiisanno gara laumma kiiro, isiwa albinni roore shiqa hasiꞌreemma.”

Ruusiyunni hadhinoti 30 diri balla ikkannoseti Aliisa yinanni rodoo togo yitino: “Konni garinni Yihowara soqqamaꞌya danchummasi baala qamase laeemma gede kaaꞌlitinoe.” (Far. 34:8) Ise ledde togo yitino: “Yihowa Annaꞌya calla ikkikkinni, addi addi fonqoli iillie yannara albinni roore egennoomma Jaalaꞌyaati. Heeshshoꞌya hagiirru, danchu woꞌnaalshinna lowo atooti woꞌminota ikkitino!”

IRSHA “ILLEꞌNENNI LAꞌE”

Turkete assinoonnihu baxxino zamachi, hatte gobbara heeꞌrannohu lowo manni dancha duduwo macciishshanno faro fanino. Ikkirono, sabbanke egenninoonnikkihu lowo qooxeessi xaano noolla. Sabbakate looso kaaꞌlate yee Turke haꞌranno manni Yihoware macciishshe egenninokki manninni barru baala xaadanno. Ati hattoo qooxeessiꞌra soqqama hasiꞌratto? Hatto ikkiro, irsha ‘illekkinni laꞌꞌatto’ gede, hattono ‘gidu laalinotanna gamba assate iillinota’ buuxatto gede koyinseemmohe. (Yoh. 4:35) ‘Gidu gamba assate iille’ noowa wolewa kaaꞌla dandaatto ikka? Hatto ikkiro, tennera kaaꞌlannohere assate mitore biddi assiꞌra hanafa dandaatto. Togo assatto wote tenne deꞌooti: Albinni roore soqqamatenna dancha duduwo “gobbate qacce geeshsha” duduwate assattori taalle nookki atoote afiꞌratto gede assannohe!—Soq. 1:8.