Yihowa Gede Marartinannire Ikke

1. Yihowa Musera isonooto egensiisinohu ma garinniiti? Isi hatto assinohu mayiraati?

MITTE yannara, Maganu Musera suꞌmasinna akattasi kule isonooto egensiisino. Hatte yannara Yihowa balaxe kulinohu isi maarannohanna mararannoha ikkinotaati. (Fulo 34:5-7 nabbawi.) Yihowa hasiꞌroommero wolqaataamonna hayyicha ikkinota kulasira dandaanno. Hatte yannara, Muse Maganu irkisanni noosita buuxa hasiꞌre no; konni daafira Yihowa soqqamaasinesi kaaꞌla hasiꞌrannota leellishshanno akatta kulinosi. (Ful. 33:13) Maganu kuri akatta balaxe qummi assasi jawaachishshannota diꞌꞌikkitino? Mararrote yaa wolootaho iillanni noo qarra huwatatenna insa kaaꞌla hasiꞌneemmota leellishate; konni birxichira konni akatire ronseemmo.

2, 3. (a) Maganu mannu ooso kalaqinohu marartannore ikkitanno gede asse ikkinota leellishannori maati? (b) Qullaawu Maxaafi mararrote daafira kulannore xiinxalla hasiissannonkehu mayiraati?

² Mannu ooso kalaqantinohu Maganu daninniiti. Yihowa mararannoha ikkino daafira, mannu oosono mararro leellishate dandoo noonsa. Yihowa magansiꞌrannokki manni nafa wolu mannira mararanno. (Kal. 1:27) Qullaawu Maxaafi giddo, mararro leellishshino mannire kultannoti batinye xagge no. Lawishshaho hanni Selemooni diro heeꞌrinori lame fooru meenti xagge laꞌno; insa, lamente giddo qaaqqu ama hiitteetiro afate qaaqqo Selemooniwa haaꞌre massino. Hakkiinni Selemooni qaaqqo lamewa darre beenkanni gede hajajino; hatte yannara qaaqqu amara godowu shafaminose. Konni daafira ise umise qaaqqo wole manchora uyinanni gede huuccidhino. (1 Mot. 3:23-27) Muse danqu qaaqqi heeꞌreenna lubbosi gatissinota Feriooni beettono heda dandiineemmo. Ise hatte yannara kuni Ibiraawete wido ikkino qaaqqi shinanniha ikkinota affino; ikkirono ise qaaqqo “lowo geeshsha mararte” umisehu gede assite lossidhino.—Ful. 2:5, 6.

³ Mararrote daafira xiinxalla hasiissannonkehu mayiraati? Korkaatuno Qullaawu Maxaafi Yihowa faale haꞌneemmo gede kulannonke. (Efe. 5:1) Yihowa mannu ooso kalaqinohu marartannore ikkitanno gede asse ikkirono, Addaamiwiinni ragiꞌnoommo cubbinni kainohunni duucha wote uminkera roorsiꞌra rakkannonke. Mito wote manna kaaꞌlate hobbi ruxxi yinammora dandiineemmo. Mitootu mararro leellishate agurtukki sharrama hasiissinonsa. Mannaho mararro leellishatto gede kaaꞌlannoheri maati? Umihunni, yanna gaaꞌmite Yihowanna wolootu mararro leellishshino gara xiinxalli. Layinkihunni, Maganu gede mararattoha ikka dandaattohu hiittoonniitironna tenne assakki mayi horo afidhinoro hedi.

YIHOWA MARARANNO MAGANOOTI

4. (a) Yihowa sokkaasinesi Soddoomu katama soyinohu mayiraati? (b) Looxinna seennisi daafira kultanno xaggenni maa ronseemmo?

⁴ Qullaawu Maxaafi giddo Yihowa mararro leellishinota kultannoti batinye xagge no. Hanni Maganu Looxira assinore hedi. Kuni keeraanchu manchi Soddoomunna Gomooru katamira heeꞌranno manni assannohu maaeelu coyinni kainohunni ‘ikkannori bainosi.’ Maganu konne maaeela coye assannoha busha manna hunate kaino. (2 Phe. 2:7, 8) Maganu Looxi gatissanno gede sokkaasine soyino. Sokkaasine Looxinna maatesi baꞌꞌara kae noo kataminni fulte xooqqanno gede kultinonsa. Qullaawu Maxaafi togo yaanno: “Isi [Looxi] kayinni keeshsheenna, Kaaliiqi mararinosi daafira sokkaasine iso, galtesinna lamenta seennesi anga amadde katamu gobbaanni fushshitanno gede assi.” (Kal. 19:16) Kuni lawishshi Yihowa ammanantino soqqamaasinera iillannonsa fonqolo seekke afannota dileellishanno?—Isa. 63:7-9; Yai. 5:11; 2 Phe. 2:9.

5. Maganu Qaali mararro leellinsheemmo gede kaaꞌlannonkehu hiittoonniiti?

⁵ Yihowa mararanno Magano calla ikkikkinni, mannisino mararannoha ikkanno gede rosiisannonsa. Hanni Yihowa Israeelete uyino seeri giddo mitto laꞌno. Hakkawaro mittu manchi woluwiinni woxe liqiiriro imaana woy uddano amadisiisanno. (Fulo 22:26, 27 nabbawi.) Liqiissi manchi godowa kaajjado ikkiro, liqiirino manchi imaana adhe hoꞌlara dandaanno; hatto ikkiro liqiiri manchi diphaare hooge qiidiranni galanno. Yihowa mannisi konni garinni godowa kaajjadda ikkannokki gede rosiisino. Mannisi woleho mararannoha ikka hasiissannonsa. Tenne hajajo giddo noohu xintu seeri mannaho mitore assine kaaꞌlineemmo gede dikakkayisannonke? Roduuwinke qarrante heedheenna mitore assine kaaꞌla dandiinanni heeꞌne, sammi yine laꞌꞌa hasiissannonkeni?—Qol. 3:12; Yai. 2:15, 16; 1 Yohaannisi 3:17 nabbawi.

6. Yihowa Israeelete daga cubbo loossu yannara assinorinni maa ronseemmo?

⁶ Yihowa dagasi Israeele cubbo loossu wote nafa mararinonsa. Qullaawu Maxaafi togo yaanno: “Akaakkansa Magani Kaaliiqi mannanna Qullaawa Mine mararino daafira, himanaano soye marro marro hige qorophisiisa diagurino.” (2 Dud. 36:15) Ninkeno bushu loosinsanni agurte higge Magano hagiirsiisa hasidhannorira mararro leellisha dihasiissannonke? Yihowa yoo yaanno barra mittu manchino baꞌꞌara dihasiꞌranno. (2 Phe. 3:9) Hakko daafira, Yihowa bushuulle hunanno barri daa geeshsha mannaho qorowishshu sokka duduwanke agurroonke; tini sokka Isi mararanno Magano ikkinota leellishshannote.

7, 8. Mitte maate Yihowa mararro leellishinonsata ammantinohu mayiraati?

⁷ Maganu mararannoha ikkinota leellishannohu batinyu woꞌnaalshi no. Hanni Miilaani yinannihu 12 diri beetti noonsa maatera tuncu yiinonsare laꞌno. Boosiniyu gobbara 1990 balla hatte gobbara noo gosa insa insanaawa olantino. Miilaani, rodiisi, annisi, amasinna wole Yihowa Farciꞌraasine otobise giddite Boosiniyu gobbanni Serbiya hadhanni no. Insa jawa gambooshshe hadhanni no; hakko gambooshshiwa Miilaani anninna ama cuuamaraati. Ikkollana dannunniwa iillituta wottaaddaru Miilaani maate baxxitino sircho ikkitino daafira otobisete giddonni tuttuganni fushshinonsa; wolu roduuwi kayinni hadhanno gede fajjinonsa. Mittu wottaaddaru sooreessi Miilaani maate lame barra usure keeshshiishi gedensaanni, halaqichisira silke bilbile ‘Konne manna hiisso?’ yee xaꞌmi. Hakkiinni halaqichu, “Massite waxaaxo gani!” yiino; halaqichu hatto yii wote Miilaani maate tenne macciishshitanni no.

⁸ Wottaaddaru mimmitu ledo hasaawanni heeꞌreenna lamu anfoonnikki mannooti daggu; hakkiinni insa Miilaani maatewa shiqqi yite sununni assite insa Yihowa Farciꞌraasine ikkitinota kultunsa. Insara otobisete giddo noohu wolu manni hakkiicho ikkinore kulinonsa. Hatte yannara qaaqquullu fajjote woraqata leellishanno gede xaꞌminannikki daafira, kuni lamunku manni Miilaaninna rodoosi makeena eessite keella sayisse haadhe hadhu. Kuni manni Miilaani anninna amano keellu badhee hige danna tayisse saꞌe agartannonsa gede kultunsa. Hatte yannara Miilaani wiꞌlarano osoꞌlarano gadado hoogino. Miilaani anninna ama “Insa ninke haꞌnanna sammi yite laꞌannoha lawannoꞌne?” yee xaꞌmino. Ikkollana insa haꞌri wote, wottaaddaru lainonsaha nafa dilawanno. Miilaninna rodiisi keella saꞌe anninsanna amansa ledo xaaddino. Insa Yihowa kaaꞌlannonsa gede huuccidhino huuccatto macciishshinota huwattino; hakkiinni baalunku gambooshshe assinanni katama hadhino. Qullaawu Maxaafi Yihowa soqqamaasinesi konni garinni agarinokki yanna noota kulanno. (Soq. 7:58-60) Ikkirono, Miilaani hatte yannara macciishshaminosire coyiranni togo yiino: “Hakkawote sokkaasine wottaaddaru ille amaddinohanna Yihowa gatisinokeha lawannoe.”—Far. 97:10.

9. Yesuusi allaalaanchu nookki geꞌreewi gede ikkino manna afiti maa assino? (Hanafote noo misile lai.)

⁹ Yesuusino dancha lawishsha ikkinonke. Isi “allaalaanchu nookki geꞌreewi gede ikke qarramenna gara hawe” nooha batinye manna afe mararinonsa. Hatte yannara isi maa assiyya? ‘Lowo coye rosiisinonsa.’ (Mat. 9:36; Maarqoosi 6:34 nabbawi.) Yesuusi Farisootu gedeeha diꞌꞌikkino; insa manna kaaꞌla dibaxxanno. (Mat. 12:9-14; 23:4; Yoh. 7:49) Atino Yesuusi gede ayyaanaamittetenni gattaawino manna itisa dihasiꞌratto?

10, 11. Kaꞌnirira baalaho mararro leellisha garaho? Xawisi.

¹⁰ Aleenni laꞌnummoti Qullaawu Maxaafi lawishshuwa leellishshanno garinni, Maganu hatte yannara mararro leellishasi garankolla. Hatto yaa kayinni ninke kaꞌnummorira baalaho mararro leellinsheemmo yaa diꞌꞌikkino. Lawishshaho, Moote Saaooli mararro leellisheemmo yee Maganu hajajo diigino. Isi Maganu daga diina ikkinoha moote Agaaginna bifa afidhino saada shiikkinni gatise abbino. Konninni kainohunni Yihowa Saaooli Israeelete moote ikkannota giwino. (1 Sam. 15:3, 9, 15) Yihowa taashshote yoo yaanno Maganooti. Isi mannu wodanira noore afa dandaanno; qoleno isi mararro leellisha hasiissannonna hasiissannokki yanna afino. (Erq. 2:17; Hiz. 5:11) Yihowa isira hajajantannokkire baala hunanno yanna muleeti. (2 Tes. 1:6-10) Hatti yanna isi bushuulleho mararro leellishannota diꞌꞌikkitino. Isinni, Yihowa togoo manna hunasi, hatte yannara gatannoha keeraano manna mararannota leellishshannote.

¹¹ Hige mannu baꞌꞌa woy gata hasiissannonsa yine yoo yineemmori ninke diꞌꞌikkinoommo. Hatteentenni xa manna kaaꞌlate dandiinummore baala assa hasiissannonke. Ikkina, hasiissanno yannara, mannaho mitore assine mararro leellisha dandiineemmohu hiittoonniiti? Hanni tenne assa dandiineemmota mite doogga laꞌno.

GARA IKKITINO MARARRO LEELLISHA DANDIINANNIHU HIITTOONNIITI?

12. Wolootaho mararro leellisha dandiineemmohu hiittoonniiti?

¹² Barru baala woloota kaaꞌlitinanni faro hasidhe. Maganu olliichinkeranna ammanate roduuwinkera mararro leellinshammora hasiꞌranno. (Yoh. 13:34, 35; 1 Phe. 3:8) Mararro yaanno qaali afiꞌrino tiro giddo mitte “ledo qarrama” yitannote. Mararanno manchi wole manna qarru giddonni fushshate kaꞌꞌanno. Konni daafira, manna kaaꞌlitinanni faro hasidhe! Lawishshaho, wolu mannira hasiisannonsare assitine, woy insara soqqantine kaaꞌlitinansara dandiitinanni.—Mat. 7:12.

13. Maganu daga mannaho dano iillitanno wote maa assitanno?

¹³ Dano iillitinonsare kaaꞌle. Batinyu manni dano iillitinonsa amanna laꞌꞌanno wote mararannonsa. Yihowa manni kaaꞌlo hasiissinonsahu togoo mannira dode iillanno. (1 Phe. 2:17) Lawishshaho hanni Jaappaanete gobbara heedhanno rodoo woꞌnaalsha laꞌno. Ise heedhanno qooxeessiꞌra 2011nni baattote huxanonna hambabalatte kaꞌino. Ise roduuwu uminsa fajjonni wolewiinni dagge kaaꞌlitannansanna bushinore biddi assitanna laꞌꞌase “lowo geeshsha jawaachishshinosetanna sheshifachishshinoseta” coyidhino. Ise togo yite borreessitino: “Roduuwu kaaꞌlitinonke kaaꞌlo, Yihowa ninke daafira hedannota wodancheemma gede assitinoe. Qoleno, Yihowa Farciꞌraasine mimmitoho mararro leellishshannoreeti. Alame woꞌmate noohu batinyu roduuwi huuccatto assannonke.”

14. Dhiwantinorenna geedhitinore kaaꞌlate maa assa dandiineemmo?

¹⁴ Dhiwantinorenna geedhitinore kaaꞌle. Dhiwaminonna geedhino manna laꞌneemmo wote mararreemmonsa. Dhiwanunna geedhimma heedhannokki yanna quqquxamme agadhineemmo. Konni daafira, Maganu Mangiste dagganno gede huucciꞌneemmo. Hakka geeshsha kayinni, kaaꞌlo hasiissannonsare kaaꞌlate dandiinummore baala assa hasiissannonke. Hanni mittu borreessaanchi geercho amasi daafira borreessino xagge laꞌno; amasi Alzayimersi yinanni dhibbi waadannose. Mitto barra ise shuma fuqqa hoogge uddano huꞌnitu. Ise uddanose fiirate woꞌnaaltanni heedheenna lame Yihowa Farciꞌraasine minise dowwola dowwoltu. Insa hakkuyira albaanni manchote minira duucha hige dayino. Roduuwu ‘Kaaꞌlinanniheri nooni?’ yee xaꞌminose. Mancho “saalsiisannore ikkirono ee” yite qoltino. Hatte yannara roduuwu uddanose fiinose. Hakkiinni insa isera shae gafe hasaawisinose. Tennera manchote beetti insa lowo geeshsha galatinonsa. Isi togo yee borreessino: “Kuri [Yihowa] Farciꞌraasine lowo geeshsha ayirriseemmonsa. Insa rosiissannore loosunni leellishshannoreeti.” Dhiwatinorenna geedhitinore marartinanniha ikkiro, insa kaaꞌlate dandiitinannire baala diassitinanni?—Fil. 2:3, 4.

15. Sabbakate loosinke wole manna kaaꞌlannohu hiittoonniiti?

¹⁵ Mannu Yihoware rosanno gede kaaꞌle. Mannu qarramenna yaade heeꞌreenna laꞌneemmo wote, insara ayyaanaamittete coye kulate kaꞌneemmo. Tenne assa dandiineemmoti qara doogo, insara Maganunnirenna Mangistesi mannu oosora abbitanno atootire rosiisate. Maganu fushshino biddishshi garinni heeꞌra hayyo ikkitinota affanno gedeno kaaꞌla dandiineemmo. (Isa. 48:17, 18) Sabbakate loosi Yihowa ayirranno gede assanno; qoleno konne looso loossinanniha ikkiro wolootaho marartinannita leellishshinanni; ikkina konne looso albinni roore loosa dandiitinanni?—1 Xim. 2:3, 4.

MARARRO LEELLISHA ATENO KAAꞌLITANNOHE!

16. Mararreemmore ikkanke ninkeneeto kaaꞌlitannonkehu hiittoonniiti?

¹⁶ Surrete fayyimma daafira xiinxallitannori mararro leellisha fayyimmankeranna mannu ledo noonke aantera kaaꞌlitannonketa coyidhino. Wolootu qarra duqqattoha ikkiro, albinni roore hagiirraamonna albillittete daafira danchare hedattoha ikkatto, qoleno hakkeeshsha dicallatatto, hattono gara ikkitinokki hedo batidhannohekki gede kaaꞌlitannohe. Ee, mararattoha ikkakki lowo geeshsha kaaꞌlitannohe. (Efe. 4:31, 32) Baxillunni kae woloota kaaꞌla hasiꞌranno Kiristaanira danchu tiiꞌꞌi heeꞌrannonsa; korkaatuno insa Maganu fushshino biddishshi ledo sumuu yaannore assanni no. Mararreemmore ikkanke dancha anna woy ama, dancha minaanna woy minaanna, hattono dancha jaala ikkineemmo gede kaaꞌlitannonke. Mannaho mararro leellishshannori, insarano kaaꞌlo hasiissannonsa yannara kaaꞌlannonsaha afidhara dandiitanno.—Maatewoosi 5:7; Luqaasi 6:38 nabbawi.

17. Mararreemmore ikka hasiissannonkehu mayiraati?

¹⁷ Mararreemmore ikka hasiissannonkehu, togo assanke ninkeneeto kaaꞌlitannonke daafira calla diꞌꞌikkino. Mararro leellinsheemmo gede kakkayisannonkehu qaru korkaati, mararrotenna baxillu Buicho ikkinohu Maganu Yihowa faale haꞌranna iso guwisiꞌra hasiꞌneemmo daafiraati. (Law. 14:31) Isi ninkera kaajja lawishsha ikkinonke. Konni daafira, baalunku Yihowa gede mararreemmore ikkanke agurroonke; hatto assineemmoha ikkiro ammanate roduuwinke mereero baxillu heeꞌranno, hattono wolu manni ledo dancha aante heedhannonke.—Gal. 6:10; 1 Yoh. 4:16.