Maganu Seejjannonkehu Baxannonke Daafiraati

1. Qullaawu Maxaafi giddo seejjo ma garinni xawinsoonni?

“SEEJJO” yaanno qaale macciishshatto wote maa hedatto? Batinyu manni konne qaale macciishshanno wote bayichonko qorichu daafira hedanno; ikkollana seejjinannihu qorichishate calla diꞌꞌikkino. Qullaawu Maxaafi giddo seejjo kaaꞌlitannonketa kulloonni; isinni seejjo egennote, hayyotenna heeshshote ledo xaadinse qummi assinoonni. (Law. 1:2-7; 4:11-13) Maganu seejjannonkehu baxannonke daafiraatinna hegere heeshsho afiꞌnammora hasiꞌranno daafiraati. (Ibi. 12:6) Maganu qorichishate seejjanno woti nooha ikkiro, qorichishannohu gawajjanno garinni diꞌꞌikkino. Isinni “seejjo” yaanno qaali rosiisate yitanno tiro afiꞌrinoho; lawishshaho seejjo mittu anni woy ama baxanno qaaqqonsa rosiisanno roso leellishshanno.

2, 3. Seejjinannihu rosiisatenna qorichishateeti yineemmohu mayiraati? (Hanafote noo misile lai.)

² Hanni konne lawishsha hedi: Jooni yinanni qaaqqi kaase mine gaꞌnanni no. Amasi “Uduunne hiiqqattona mine kaase gaꞌnitooti!” yitusi. Jooni kayinni amasi yitinosire macciishsha giwi; hakkiinni hedikkinni xarapheezzu aana nooha awawa wodhinanni uduunnicho hiiqqi. Amasi iso ma garinni seejjitanno? Ise qorichishshenna rosiisse seejjitasira dandiitanno. Assinori gara ikkinokkita xawisse kultannosi. Togo assitannohu annisinna amasi fushshino seera ayirrisa hasiissannosita wodanchanno gedeeti. Hakkiinni ise coyidhinore kaajjishate, hasiisanno qoricha qorichishshasira dandiitanno. Lawishshaho, kaase angasinni haadhe hoolte shiimu barri geeshsha godoꞌlannokki gede assitara dandiitanno. Togo assase, qaaqqise hajajama hooga gawajjitannota huwatanno gede kaaꞌlitannosi.

³ Ninke Kiristaana ikkinoommo daafira, Maganu maate miillaati. (1 Xim. 3:15) Konni daafira, Yihowa ninke harunsineemmo biddishsha aatenna konne biddishsha diingeemmo wote baxillunni ninke seejjate qoosso noosita ammana hasiissannonke. Qoleno loonsoommo soꞌro gawajjitinonkeha ikkiro, Yihowa seejjo iimi Anninkera hajajama lowo geeshsha hasiissannota ikkitinota qaangeemmo gede assitannonke. (Gal. 6:7) Maganu ninke daafira hedannohura gawajjannonke coyi iillankera dihasiꞌranno.—1 Phe. 5:6, 7.

4. (a) Seejjo qajeelsate kaaꞌlitannohu hiittoonniiti? (b) Konni birxichira maa ronseemmo?

⁴ Qullaawu Maxaafinni seejjinanni seejjo woloota qajeelsatenna seejjinanni manchi mixosi wonshiꞌranno gede kaaꞌlitannosi; lawishshaho togoo seejjo oosonke woy Qullaawa Maxaafa xiinxallinseemmo manni Kiristoosi harunsaano ikkanno gede kaaꞌlitannonsa. Woloota qajeelsate horoonsiꞌneemmohu qaru uduunnichi Maganu Qaaleeti; kuni Qaali “sodhinore seejjate kaaꞌlanno.” Konni garinni oosonke woy Qullaawa Maxaafa xiinxallinseemmo manni ‘Yesuusi hajajo baala’ huwatannonna hajajosi agadhanno gede kaaꞌla dandiineemmo. (2 Xim. 3:16; Mat. 28:19, 20) Yihowa togoo qajeelsa maassiꞌranno; korkaatuno konni garinni qajeelino manni wolootu Kiristoosi harunsaano ikkitanno gede kaaꞌla dandaanno. (Tiito 2:11-14 nabbawi.) Konni birxichira sase xaꞌmora dawaro afiꞌneemmo; (1) Maganu seejjannonke seejjo isi baxannonketa leellishshannohu hiittoonniiti? (2) Hunda Maganu seejjino manni lawishshinni maa ronseemmo? (3) Woloota seejjineemmo wote Yihowanna Beettisi lawishsha harunsa dandiineemmohu hiittoonniiti?

MAGANU SEEJJANNOHU BAXILLUNNIITI

5. Yihowa seejjo isi baxannonketa leellishshannohu hiittoonniiti?

⁵ Yihowa soqqamaanosi baxillisi giddonni fultukki heedhanno gede baxillunni kae seejjannonsa, rosiisannonsa hattono qajeelsannonsa. (1 Yoh. 4:16) Isi insa dimishannonsa, woy tidhitinori nookkihu gede assite heddanno gede diassannonsa. (Law. 12:18) Hatteentenni giddonke noote dancha akattanni kaꞌne soqqammammosiranna doodhate qoossonke horoonsiꞌneemmo gede asse ayirrisannonke. Maganu Qaalisi, Qullaawu Maxaafi aana xintantino borro, Kiristaana ikkino anninkenna amanke woy cimeeyyete widoonni seejjankera dandaanno; ikkina ati seejjo Maganu baxille leellishshannohu gede assite hedatto? Anfummokkinni ‘soꞌro loonsummoro’ cimeeyye ninke baxillunninna shaqqillunni kaaꞌlitannonke; togoo cimeeyye Yihowa baxannonketa leellishshanno.—Gal. 6:1.

6. Seejjinoonninke seejjo qoossonke hoongeemmo gede assitannonketa ikkiturono, tini Yihowa baxille leellishshanno yineemmohu mayiraati?

⁶ Ikkollana mito wote seejjinanninkehu afuunni amaalle calla ikka hoogara dandaanno. Mittu manchi shota ikkinokki cubbo loosiro songote giddo noosi qoosso hoogara dandaanno. Togoo seejjono Maganu baxannonketa leellishshanno. Lawishshaho, mittu manchi qoossosi hoogasi, Qullaawa Maxaafa xiinxalla, hiincanna huuccatto assiꞌra lowo geeshsha hasiissannosita huwatanno gede kaaꞌlitasira dandiitanno. Kuni manchi hatto assannoha ikkiro ayyaanaamittetenni kaajjara dandaanno. (Far. 19:7) Yannate gedensaanni qole qoossosi wirro afiꞌrara dandaanno. Cubbo loosino manchi songotenni bohamanno gede assano, Yihowa baxille leellishshanno; korkaatuno togo assa songo keeraaꞌmitanno gede assitanno. (1 Qor. 5:6, 7, 11) Qoleno Maganu seejjannohu garunni ikkino daafira, bohamino manchi loosino cubbi shota ikkinokkita huwatanno gedenna maaro eanno gede assasira dandaanno.—Soq. 3:19.

YIHOWA SEEJJINOSI SEEJJO KAAꞌLITINOSI

7. Shebina ayeti? Isira hiitti busha akatta noosi?

⁷ Seejjo kaaꞌlitanno gara huwatate konninni aanchine Yihowa seejjinonsahu lamu manni lawishsha laꞌneemmo. Umihu Moote Hiziqiyaasi diro heeꞌrinoho Shebinaati; wolu yannankera nooho Rodoo Girehaamiiti. Shebina ‘mootete mini gashshaancho’ ikkino daafira lowo silxaane noosiho. (Isa. 22:15) Ikkollana isi naaxxe umisira ayirrinye afiꞌra hasiꞌrino. Wole agurina Shebina isiniitira biifado waamma seekkiꞌrino, hattono ‘faradi gaaretenni’ haꞌranno.—Isa. 22:16-18.

8. Yihowa Shebina seejjinohu hiittoonniiti? Tini iso kaaꞌlitinosihu ma garinniiti?

⁸ Shebina umisira ayirrinye hasiꞌrino daafira, Maganu ‘mootimmate aaninni dirrise,’ isi bayicho Eeliyaaqeemi worino. (Isa. 22:19-21) Kuni ikkinohu Sooriyu Moote Senaakireemi Yerusaalame qasate hedanni no yannaraati. Shiima yanna gedensaanni Senaakireemi Hiziqiyaasinna Yihudu manni waajje anga aanno gede assitara roorrootasi lowo olanto ledo soyino. (2 Mot. 18:17-25) Hatte yannara kuri roorroota hasaawisanno gede Eeliyaaqeemi sonkoonni; kayinni isi callisi dihaꞌrino. Isi lamu manni ledo haꞌrino; insa giddo mittu Shebinaati; hatte yannara isi borreessaancho ikke no. Tini Shebina seejjinoonnisi daafira hanqinokkitanna umosi heeshshi asse uyinoonnisita albitenni ajjanno qoosso adhinota leellishshanno. Ikkina, isi xaggenni maa ronseemmo? Hanni tenne xaggenni ronseemmoha sase coye laꞌno.

9-11. (a) Shebina xaggenni maa ronseemmo? (b) Yihowa Shebinara assinori jawaachishinohehu hiittoonniiti?

⁹ Umihunni Shebina qoossosi hoogino. Isi lawishshi “booꞌna baote widira haadhe hadhanno; boollaqiꞌrano uwate widira qolte massitanno” yaanno qorowishsha qaangeemmo gede assannonke. (Law. 16:18) Songote giddo qoosso noonkeha ikkara dandaanno; tenne qoossonni kainohunni ayirrinsanninkeha ikkara dandaanno; tenne yannara umonke heeshshi assineemmo? Noonke dandoora woy loonsoommohu danchu loosira galatu hasiisannosihu Yihowa ikkinota ammanneemmo? (1 Qor. 4:7) Soqqamaasinchu Phaawuloosi togo yee borreessino: “Mitti mittiꞌne Maganu uyinoꞌne ammaꞌna bikkinni umoꞌne heeshshi assitine laꞌe ikkinnina, hasiisannohura aleenni heddinanni [booꞌnitinoonte].”—Rom. 12:3.

¹⁰ Layinkihunni Yihowa Shebina seejjasi ‘Xaate isi biddi diyaannoho’ yee hedinokkita leellishshanno. (Law. 3:11, 12) Kuni yannankera songote giddo noonsa qoosso hoogginorira dancha lawishshaati! Insa qoossonsa hooggino daafira hanqa woy koffi yaa agurte seejjinoonninsa seejjo Maganu baxannonsata leellishshannohu gede assite laꞌꞌanna dandiitu deerrinni Yihowara woꞌmu wodaninni soqqamate sharrama dandiitanno. Anninke Yihowa umonke heeshshi assinummoro, ‘Horonta soorrante biddi diyitanno’ yee hedannokkita qaagi. (1 Pheexiroosi 5:6, 7 nabbawi.) Maganu baxillunni kae aannonke seejjo soorramme biddi yineemmo gede kaaꞌlitannonke; konnira Maganu angara shaqqadu dori gede ikka hasiissannonke.

¹¹ Sayikkihunni, Yihowa Shebinara assinori seejjo seejjate qoosso noonsarira lawishshaho annahonna amate, hattono songote cimeeyyera dancha lawishsha ikkannonsa. Insa maa rosa dandiitanno? Yihowa seejjanno seejjo isi cubbo giwannota calla ikkikkinni cubbo loosino manchira hedannota leellishshanno. Ati ooso iloottoha ikkiro, woy songote cimeessaatiro seejja hasiissannohe yanna heedhara dandiitanno; tenne yannara busha coye giwattota calla ikkikkinni soꞌro loosino manchira hedattota leellishshe Yihowa faale haꞌratto?—Yih. 22, 23.

12-14. (a) Mitootu seejjo uyinanninsa wote maa assitanno? (b) Maganu Qaali mittu rodii hedosi biddi assiꞌranno gede kaaꞌlinosihu hiittoonniiti? Tini mayi guma abbituyya?

¹² Mitootu seejjinoonninsa seejjonni kainohunni koffi yite Yihowawiinninna dagasiwiinni xeertidhino. (Ibi. 3:12, 13) Ikkollana hattoo manni xaate biddi diyaannoho yaateni? Hanni Girehaami lawishsha laꞌno. Isi songotenni bohame yannate gedensaanni higinoha ikkirono gambooshshe haꞌranna soqqama agurino. Shiimu diri gedensaanni, iso shiqe kaaꞌlate woꞌnaalino cimeessa Qullaawa Maxaafa xiinxallisannosi gede xaꞌmirino.

¹³ Girehaami kaaꞌli cimeessi hakkawarita qaage togo yiino: “Hatte yannara Girehaami naaxxaleessaho. Isi bohamanno gede assitino cimeeyye mishanno. Konni daafira isi ledo naaxxate daafiranna naaxxa gawajjitanno gara xawissanno qummeeshshuwa hasaambummo. Girehaami Maganu Qaali hincilaallonni isonooto layiꞌra hanafino; isi hincilaallote giddo lainota umisi misile dibaxino! Hakkiinni isi woyyaawino. ‘Heellichote’ geeshshi naaxxa illesi ballissinota huwatenna woloota mishannohu umisi qarrinni ikkinota wodanche biddi yiino. Isi Kiristaanu gambooshshe ganye haꞌra, Maganu Qaale seekke xiinxallanna barru baala huuccatto assiꞌra hanafino. Qoleno maatete umo ikkino daafira, Yihowa uyinosiha konne loosu qeecha seekke loosa hanafino; tini qolte minaamasinna oososi baasa hagiirsiissino.”—Luq. 6:41, 42; Yai. 1:23-25.

¹⁴ Cimeessu lede togo yiino: “Mitto barra Girehaami kulinoeri dhagge ikkinoe. Isi togo yiinoe: ‘Halaale macciishshummonku lowo diro ikkino; suwisaancho ikkeno soqqamoommo. Yihowa baxeemmo yee coyiꞌra dandeemmohu kayinni xaati.’ Shiima yanna gedensaanni songote giddo mayikirafoone doyissanno gede xaꞌminoonnisi; qoleno isi tenne qoosso lowo geeshsha naadino. Isi lawishshi mittu manchi umosi Yihowa albaanni heeshshi asse seejjinoonnisi seejjo adhiro bae atoote afiꞌrannota huwateemmo gede kaaꞌlinoe!”

SEEJJITINANNI WOYITE YIHOWANNA BEETTISI LAWISHSHA HARUNSE

15. Woloota danchu garinni seejjate maa assa hasiissannonke?

¹⁵ Dancha rosiisaano ikkate balanxe seekkine rosa hasiissannonke. (1 Xim. 4:15, 16) Konni daafira, Maganu woloota seejjate qoosso uyinonsari, insa uminsa balaxxe Yihowa biddishshi garinni heeꞌra hasiissannonsa. Konni garinni umonsa heeshshi assite Maganoho galansa, wolootu ayirrissannonsa gedenna woloota qajeelsitanno woy amaaltanno woyite waajjitannokki gede kaaꞌlitannonsa. Hanni Yesuusi lawishsha laꞌno.

16. Gara ikkitino seejjo seejjanna danchu garinni rosiisa lainohunni Yesuusi lawishshinni maa ronseemmo?

¹⁶ Yesuusi woꞌmanka wote, wole agurina qarru yannara nafa Annisira hajajamino. (Mat. 26:39) Qoleno hayyo uyinosihuno ikko rosiisino rosi Buicho Yihowa ikkinota coyiꞌrino. (Yoh. 5:19, 30) Yesuusi umosi heeshshi assasinna Maganoho hajajamasi suwashshu wodani noonsari isi harunsaano ikkitanno gedenna isi shaqqadonna mararanno rosiisaancho ikkanno gede kaaꞌlitinosi. (Maatewoosi 11:29 nabbawi.) Isi coyiꞌrinori hexxo mudhite hiiqqantara kaꞌino shomboqqo woy baꞌꞌara rahino caabbichi gede ikkitinore jawaachishino. (Mat. 12:20) Yesuusi cincannokki gede guficho ikkannori iillisi yannara nafa, shaqqadonna baxillaancho ikkinota leellishino. Soqqamaasinesi umonsa baxxannorenna lowo silxaane afiꞌra hasidhannota leellishannore assitu yannara amaalinonsa gari tenne leellishanno.—Maq. 9:33-37; Luq. 22:24-27.

17. Cimeeyye Maganu hoshsha danchu garinni allaaltanno gede kaaꞌlitannonsa akatta hiikkuriiti?

¹⁷ Songote cimeeyye woloota seejjitanno yannara Kiristoosi lawishsha harunsa hasiissannonsa. Togo assansa Yihowanna Yesuusi massagansara hasidhannota leellishshanno. Soqqamaasinchu Pheexiroosi togo yee borreessino: “Eeggo uyinoonniꞌneta Maganu hoshsha allaalle; allaaltinanni woyiteno Maganu hedo garinni baxxine allaalle; woxeho hagaagatenni ikkikkinni soqqamate nooꞌne halchonni allaalle. Hoshshate dancha lawishsha ikke ikkinnina, eeggo uyinoonniꞌnere gadadissine wolqatenni gashshitinoonte.” (1 Phe. 5:2-4) Maganohonna songote umo ikkinohu Yesuusira hagiirrunni galtanno cimeeyye, insaneetono ikko wole roduuwa kaaꞌla dandiitanno.—Isa. 32:1, 2, 17, 18.

18. (a) Yihowa annuwunna amuuwu maa assitara hasiꞌranno? (b) Yihowa annunna ama oosonsa qajeelsitanno gede kaaꞌlannonsahu hiittoonniiti?

¹⁸ Kuni xintu seeri maateno kaaꞌlanno. Qullaawu Maxaafi maatete umo ikkitinore togo yaanno: “Kiꞌne annuwa! Oosoꞌne Mootichu amaalenni seejjitinanni lossensa ikkinnina, caacceessitinoontensa.” (Efe. 6:4) Tini shotinse laꞌnanni hajajootini? Lawishsha 19:18 “Beettokki higa dandaanno yannara seejjisi; baꞌꞌara worte agurtootisi” yitanno. Ee, Yihowa Kiristaana ikkino anninna ama oosonsa hasiisanno garinni seejjitannokkiha ikkiro xaꞌmannonsa. (1 Sam. 3:12-14) Ikkollana, annunna ama umonsa heeshshi assite Yihowa hayyo aannonsa gede huuccidhannohanna Qaalisinninna ayyaanisinni massagantannoha ikkiro isi kaaꞌlannonsa.—Yaiqoobi 1:5 nabbawi.

HEGERE GEESHSHA SALAAMETENNI HEEꞌRA DANDIINANNI GARA ROSA

19, 20. (a) Maganu seejjannonke seejjo adhinummoro mayi atoote afiꞌneemmo? (b) Aanano birxichira maa ronseemmo?

¹⁹ Maganu seejjannonke seejjo adhineemmohanna woloota seejjineemmo wote Yihowanna Yesuusi lawishsha harunsineemmoha ikkiro lowo atoote afiꞌneemmo. Lawishshaho maateno ikko songo salaame afidhanno. Qoleno mittu mittunku manchi banxannisita huwatanno, hattono teese heeꞌranno; kuni afiꞌneemmo atooti giddo gamaholla. (Far. 72:7) Ee, Yihowa seejjannonke seejjo isi towaanyo afiꞌnenna mitte maate gede ikkine hagiirrunninna salaametenni heeꞌneemmo gara rosiissannonke. (Isayaasi 11:9 nabbawi.) Tenne hendeemmoha ikkiro, Yihowa aannonke seejjora gara ikkitino lao heedhannonke; Ee, seejjo Yihowa baxannonketa leellishshanno.

²⁰ Aananno birxichira mini giddono ikko songote giddo seejjinanninke gara ronseemmo. Qoleno ninkeneeto seejja dandiineemmo garanna seejjinanninke wote macciishshantannonke xissonni roore gawajjannori maatiro xiinxallineemmo.