Baxillunni Uyitannori Hagiirraammaho

1. Kalaqamu Yihowa shaqqado Magano ikkinota leellishannohu hiittoonniiti?

YIHOWA kalaqa hanafara albaanni callisi heeꞌrinoha ikkirono, isi wolootaho heeshsho aa hasiꞌrino daafira iimanna uulla hedate dandoo noonsare kalaqino. “Hagiirraamu Magani” Yihowa, wolootaho dancha coye aa baxanno. (1 Xim. 1:11, NW; Yai. 1:17) Qoleno isi hagiirraamma ikkinammora hasiꞌranno daafira, wolootaho shaqqille leellinsheemmo gede rosiisannonke—Rom. 1:20.

2, 3. (a) Aa hagiirraamma assitannonkehu mayiraati? (b) Konni birxichira maa ronseemmo?

² Maganu manna danisinni kalaqino. (Kal. 1:27) Hatto yaa, kalaqammoommohu isi akatta leellisha dandiineemmo garinniiti yaate. Konni daafira, hagiirrunna harshammo noo heeshsho heeꞌrate, Yihowa gede wolootaho danchummanna shaqqille leellisha hasiissannonke. (Fil. 2:3, 4; Yai. 1:5) Hatto yineemmohu mayiraati? Korkaatuno, baxillaanchu Magani Yihowa mannu ooso kalaqinohu hakko garinniiti. Guuntete xeꞌne noonkere ikkinummorono, wolootaho shaqqille leellinshe isi lawishsha harunsa dandiineemmo.

³ Qullaawu Maxaafi wolootaho shaqqillunni aa dandiineemmo gara kulannonke. Konninni aanchine Qullaawu Maxaafi tenne haja daafira rosiisannore laꞌneemmo. Qoleno wolootaho shaqqille leellisha Magano hagiirsiinseemmo gede assitannonke garanna togoo akata lossiꞌra Maganu uyinonke looso umo fushshate kaaꞌlitannonke gara ronseemmo. Hattono, shaqqille leellisha hagiirraamma ikkate ledo mayi xaadooshshe afidhinoronna konne akata lossiꞌra dandiineemmohu hiittoonniitiro xiinxallineemmo.

MAGANO HAGIIRSIISA DANDIINEEMMO GARA

4, 5. Yihowanna Yesuusi shaqqadda ikkitinota leellishshinohu hiittoonniiti? Ninke insa lawishsha harunsa dandiineemmohu ma garinniiti?

⁴ Yihowa mannu ooso isi lawishsha harunsitara hasiꞌranno; konni daafira ninke wolootaho shaqqille leellinsheemmo woyite isi hagiidhanno. (Efe. 5:1) Mannu ooso kalaqantino gari, hattono Yihowa kiirre tunqannikki kalaqama biifise kalaqasi, isi mannu ooso hagiirraamma ikkitara hasiꞌrannota leellishshanno. (Far. 104:24; 139:13-16) Konni daafira, woloota hagiirsiisate sharrammeemmoha ikkiro Yihowa ayirranno.

⁵ Addu Kiristaani Yesuusi lawishsha harunsanno; isi wolootaho shaqqille leellisha dandiineemmo gara dancha gede asse leellishinonke. Yesuusi isiniiti daafira togo yee coyiꞌrino: “Manchi Beettino soqqamaranna lowo manna wode gatisate lubbosi sayise aara dayino ikkinnina soqqammasira didayino.” (Mat. 20:28) Konni daafira Phaawuloosi Kiristaanaho togo yiino: “Kiristoosi Yesuusira nooti tini hedo kiꞌnerano heedhoꞌne. . . . [Isi] umosi mullicho asse borojjichu daniha ikke manna lawe ilamino.” (Fil. 2:5, 7) Mitti mittinke ninkeneeto, ‘Albinni roore Yesuusi lawishsha harunsa dandeemmo?’ yine xaꞌma hasiissannonke.—1 Pheexiroosi 2:21 nabbawi.

6. Yesuusi shaqqadu Samaarichi daafira coyiꞌrino lawishshinni maa ronseemmo? (Hanafote noo misile lai.)

⁶ Yihowanna Kiristoosi gede wolootaho hendeemmohanna kaaꞌlo hasiissannonsare towaanteemmoha ikkiro, Magano hagiirsiisa dandiineemmo. Yesuusi shaqqadu Samaarichi daafira coyiꞌrino lawishshi, harunsaanosi baalunku gari manna kaaꞌlitara hasiꞌrannota leellishanno. (Luqaasi 10:29-37 nabbawi.) Yesuusi hakkonne lawishsha coyiꞌrinohu mayiraatiro huwatootto? Mittu Yihudichi “Eliꞌya ayeti?” yee xaꞌmino daafiraati. Yesuusi qolino dawaro, Magano hagiirsiisa hasiꞌnummoro ninkeno Samaarichu manchi gede woloota shaqqillunni kaaꞌla hasiissannonketa leellishshanno.

7. Yihowa assannori gara ikkinota ammanneemmota leellisha dandiineemmohu hiittoonniiti? Xawisi.

⁷ Kiristaanu shaqqille leellishanno gede assannonsahu batinyu korkaati no. Lawishshaho, kuni akati Sheexaanu Edeni Gannatete kayisino xaꞌmo ledo xaadooshshe afiꞌrino. Hiittoonni? Sheexaanu, Addaaminna Heewanino ikko mannu ooso baalanti Maganoho hajajamantenni uminsa hasatto balaxisiissuro hagiirraamma ikkitanno yee coyiꞌrino. Heewani umose baxxanno daafira, Maganu gedeeta ikka hasidhino. Addaamino Maganunni roore Heewani hagiirsiisa hasiꞌrasi, umosi baxannoha ikkinota leellishshanno. (Kal. 3:4-6) Insa hatto assansa lowo qarra abbitino! Umosi baxanno manchi hagiirraamo ikka didandaanno; isinni togoo manchi dadillaamo ikkanno. Umonke calla baxa agurre wolootaho shaqqille leellinsheemmoha ikkiro, Yihowa assannori gara ikkinota ammanneemmota leellinsheemmo.

MAGANU MANNISIRA UYINO LOOSO UMO FUSHSHA

8. Umi minaanninna minaama wolootaho heda hasiissinonsahu mayiraati?

⁸ Maganu, Addaaminna Heewani wolootu daafira heda hasiissannonsata leellishanno biddishsha uyinonsahu insa Edenete kaashshu basera callootinsa heeꞌreennaati. Yihowa Addaaminna Heewani maassiꞌrinonsa; hattono ilte ilante uulla woꞌmitanno gedenna gashshitanno gede kulinonsa. (Kal. 1:28) Kalaqaanchinke kalaqamisi daafira hedannonte gede, Addaaminna Heewanino sirchinsa hagiirraamma ikkanno gede kaaꞌlannore assa hasiissannonsa. Maganu Addaaminna Heewani maate woꞌma uulla gannate assate buusante loossara hasiꞌranno. Kuni shaaꞌꞌa looso diꞌꞌikkino.

9. Gannate halashsha hagiirraamma ikkinanni gede assitanno yineemmohu mayiraati?

⁹ Guuta ikkino manni uulla woꞌma Gannate assatenna Yihowa hedo wonshate isi ledo loosa hasiissannonsa; hatto assituro Maganu fooliishshowa ea dandiitanno. (Ibi. 4:11) Hanni kuni loosi mageeshshi geeshsha hagiirsiisannoha ikkinoro hedi! Uminsa horo agurte wolootaho hedansa, Maganu atoote afidhannonna hagiirraamma ikkitanno gede assitannonsa.

10, 11. Sabbakatenna manna rosaano assate loosonke umo fushsha dandiineemmohu hiittoonniiti?

¹⁰ Yannankera Yihowa soqqamaanosira sabbakatenna manna rosaano assate looso uyinonsa. Konne looso umo fushshate, wolootu daafira wodaninni heda hasiissannonke. Konne looso cincine loosa dandiineemmohu Maganohonna mannaho noonke baxillinni kaꞌne loonseemmoha ikkiro callaati.

¹¹ Umi xibbi diro heeꞌrinohu Phaawuloosi, isiniitinna ammanate roduuwisi daafira coyiꞌranni “Ninke Maganu ledo loonseemmoreeti” yiino; hatto yiinohu insa Maganu Mangiste halaali wixa wixxannonna waa hayikkissanno daafiraati. (1 Qor. 3:6, 9) Ninkeno sabbakate loosira yannanke, woxenkenna wolqanke uyineemmoha ikkiro, ‘Maganu ledo loonsanni’ heeꞌnoommo. Tini kaajja qoossooti!

12, 13. Manna rosaano assate looso loosa mayi atoote abbitannoha lawannohe?

¹² Sabbakatenna manna rosano assate loosira yannankenna wolqanke aa lowo hagiirre afiꞌneemmo gede assitannonke. Mitu roduuwi, Qullaawa Maxaafa xiinxallisanno manni ayyaanaamittetenni lophanna laꞌꞌanno woyite lowo geeshsha hagiidhanno. Qullaawa Maxaafa xiinxallinseemmo manni ayyaanaamittete halaale huwatannonna ammanansa kaajjitanno woyite, hattono heeshshonsa biddi assiꞌrannonna rosino halaale wolootaho kulanno woyite tashshi yaannonke. Yesuusi sabbakkara soyinori 70 rosaano dancha guma afidhe ‘hagiidhitanni higgu’ yannara, isino lowo geeshsha hagiidhino.—Luq. 10:17-21.

¹³ Alamete doyichora nooti Maganu soqqamaano Maganu Mangiste halaali mannu heeshsho woyyeessanna laꞌanno woyite lowo geeshsha hagiidhitanno. Hanni sabbakkannori roore hasiissannowa hadhe soqqamate Soojjaati Awuroppa hadhinote Aana yinannite wedellitte rodoo woꞌnaalsha laꞌno.a Ise togo yitino: “Kowiicho manna Qullaawa Maxaafa xiinxallinsannihu batinyu tunceenyi no; tini qolte lowo geeshsha hagiirsiissannoe. Qoleno soqqansho lowo geeshsha baxissannoe. Miniꞌyara higeemma woyite, qarriꞌya daafira hedeemma yanna nafa dinoe. Hedeemmahu Qullaawa Maxaafa xiinxalliseemma mannira iillannonsa fonqolinna qarri daafiraati. Hakkiinni insa jawaachishanna mitore asse kaaꞌla dandeemma gara hedeemma. Qoleno ‘adhantenni roore aa hagiirsiissannota’ dihuluullameemma.”—Soq. 20:35.

14. Mannu sokkanke macciishsha giwiro nafa, sabbakate loosinkenni hagiirraamma ikka dandiineemmohu hiittoonniiti?

¹⁴ Sokkanke macciishshitannokkirino ikko baalunku manni dancha duduwo macciishshanno faro fananke umise tashshi assitannonke. Ninke loonseemmohu masaalaanchu Hiziqeelira uyinoonni loosi gedeeho; Yihowa iso togo yiinosi: “Macciishshituherono macciishsha gibbuherono, ani yeemmohere kulattonsa.” (Hiz. 2:7; Isa. 43:10) Mannu sokkanke macciishsha giwiro nafa, uminke horo agurre Maganu sokka duduwanke tashshi assitannonke. Yihowa isi looso loosate sharrammeemmo sharro naadannota anfoommo. (Ibiraawoota 6:10 nabbawi.) Tenne huwatinohu mittu halashshaanchi soqqanshosi daafira togo yee borreessino: “Kayinseemmohu, waa hayikkinseemohuno ikko huucciꞌneemmohu Yihowa hasaawinsoommo manchira halaaleho noosi hasatto lexxitanno gede assanno yine hexxineeti.”—1 Qor. 3:6.

HAGIIRRAAMMA IKKA DANDIINEEMMO GARA

15. Shaqqille leellisha hasiissannonkehu mannu galatannonkeha ikkiro callaatini? Xawisi.

¹⁵ Yesuusi wolootaho shaqqille leellinshe hagiirraamma ikkinammora hasiꞌranno. Batinyu manni shaqqille leellinsheemmonsa woyite galatankera dandaanno. Konni daafira, Yesuusi togo yee jawaachishinonke: “Woleho safartine uyitinanni safaraanchinni safarranniꞌne. Hakkiinni roorsine xiimbenna qanse, woꞌme duꞌnamanna safarre uyinanniꞌne.” (Luq. 6:38) Shaqqille leellinsheemmo woyite galatannonkehu baalanka manna ikka hoogara dandaanno; ikkirono mittu manchi assinoommosire naadannoha ikkiro, isino wolootaho hatto assara dandaanno. Konnira mannu naadirono naada hoogirono, shaqqillunni aa agurtinoonte. Leellishshinanni shaqqilli woloota mageeshshi geeshsha kaaꞌlannoro diaffinoonni.

16. Shaqqille leellisha hasiissannonkehu ayeoraati? Mayira?

¹⁶ Baxillunni aanno manchi qolle uyinannie yee dihedanno. Yesuusi tenne xawisanni togo yiino: “Jila jilatto woyite, buxane, laanshaabbinore, naafootanna illiweeloota woshshi. Hatto assittoro, insa qola dandiitannokki daafira maassamatto.” (Luq. 14:13, 14) Mittu borreessaanchi qullaawu ayyaaninni “Shooshaqu manchi maassamanno” yee borreessino. Wolu manchi qole “Gadadaammu daafira xissiisiꞌrannohu baꞌraaꞌrinoho” yee borreessino. (Law. 22:9; Far. 41:1) Ee, wolootaho aa hagiirraamma ikkineemmo gede assitannonke daafira baxillunni aa hasiissannonke!

17. Hagiirraamma ikkate mannaho maa maa aa dandiineemmo?

¹⁷ Phaawuloosi, Yesuusi coyiꞌrino hedo qummi asse, “Adhannonkunni aannohu baꞌraaꞌrinoho” yee coyiꞌrino; isi hatto yiinohu manna maalaamittetenni kaaꞌlineemmo gede calla ikkikkinni, insara hasiissannonsa jawaantenna biddishsha uyine hattono wolere assine kaaꞌlineemmonsa gedeeti. (Soq. 20:31-35) Phaawuloosi, wolootaho yannankenna woxenke uyineemmo gede hattono insara baxille leellinsheemmo gede coyiꞌrannorinnino ikko assannorinni dancha lawishsha ikkinonke.

18. Batinye xiinxallaano wolootaho shaqqille leellishate daafira mayitanno?

¹⁸ Mannu akatta daafira xiinxallitannori, wolootaho aa hagiirraamma ikkinanni gede assitannota huwattino. Mitte borro, “Mitootu wolootaho danchare assitu gedensaanni hagiirrinsa lexxinota coyidhino” yite xawissino. Xiinxallaano yitino garinni, woloota kaaꞌlineemmo woyite “heeshshonsara hasiisannonsare wonshineemmonsa daafira, tini harshammonna hagiirre uyitannonke.” Konni daafira egennaammu, mannu fayyimmansa woyyaabbannonna albinni roore hagiirraamo ikkate uminsa fajjonni wole manna kaaꞌlannore assanno gede jawaachishshanno. Kuri egennaammi coyidhinori dhagge diꞌꞌikkannonke; korkaatuno baxillaanchu Kalaqaanchinke Yihowa Qaalisi giddo wolootaho aa woꞌmante yannara hagiirraamma ikkinanni gede assitannota xawisino.—2 Xim. 3:16, 17.

SHAQQILLE LEELLISHA AGURTINOONTE

19, 20. Wolootaho shaqqille leellishatto gede assannoheri maati?

¹⁹ Heeꞌnoommohu uminsara roorsiꞌranno manni woꞌmino alamera ikkino daafira, woꞌmante yannara shaqqille leellisha shota ikka hooggankera dandiitanno. Ikkollana, Yesuusi lamenti baalanta roortanno hajajo Yihowa woꞌmu wodaninkenni, woꞌma heeshshonkenni, woꞌma surrenkenninna woꞌma wolqankenni banxeemmo gede hattono, manna uminke gede assine banxeemmo gede kultannota coyiꞌrino. (Maq. 12:28-31) Konni birxichira ronsummonte gede, Yihowa baxxannori isi lawishsha harunsitanno. Yihowanna Yesuusi wolootaho aa baxxanno. Qoleno insa wolootaho aa hagiirsiissannota affino daafira, mannaho shaqqille leellinsheemmo gede jawaachishshinonke. Maganohonna mannaho assineemmorinni shaqqille leellishate sharrammeemmoha ikkiro Yihowa ayirranno; qoleno hatto assanke ninkeneetira kaaꞌlitannonke.

²⁰ Atino wole manna roorenkanni ammanate roduuwakki kaaꞌlitanni keeshshoottoti dihuluullissannote. (Gal. 6:10) Hatto assa agura hoogittoro wolootu baxxannohe, hattono galattannohe; qoleno tini hagiirraamo ikkatto gede assitannohe. Lawishsha 11:25 “Elannohu durooꞌmanno; wole duushshannohu duuwanno” yitanno. Heeshshonkenninna soqqanshonkenni baxillunni aanna shaqqille leellisha dandiineemmoti batinye doogga no; togo assanke qolte kiissannonke. Aananno birxichira shaqqille leellisha dandiineemmota wole doogga ronseemmo.