Massagaanchonke Kiristoosa Addaxxe
“Massagaanchiꞌne Kiristoosiiti.”—MAT. 23:10, NW.
1, 2. Muse reyi gedensaanni Iyyaasura mayi fonqoli iillinosi?
YIHOWA Iyyaasura togo yiino: “Soqqamaanchiꞌya Muse reyino; xaate kunni kaꞌa atinna Israeelete manni baalu qixxaabbe. Ani ragisiiseemmoꞌne gobba martine eꞌinanni gede Yordaanoosi Waa fulle.” (Iya. 1:1, 2) Muse soqqamaancho ikke 40 meddi yaanno diro soqqaminohura Iyyaasura hedinokkiri iillinosi!
2 Muse Israeelete massagaancho ikke lowo diro soqqamino daafira, Iyyaasu Maganu manni iso macciishshannoronna teꞌee huluullaminoha ikkara dandaanno. (Mar. 34:8, 10-12) Mitte Qullaawu Maxaafi daafira xawissanno borro Iyyaasu 1:1, 2te noo hedo daafira kultanni togo yitanno: “Hundano ikko yannankera mittu massagaanchi silxaane woleho sayisanno woyite, dagate mereero qarru kalaqamara dandaanno.”
3, 4. Iyyaasu Magano addaxxasi kiissinosi yineemmohu mayiraati? Ninkeneeto mayine xaꞌmineemmoha ikkara dandaanno?
3 Hatte yannara Iyyaasu waajjinoti egennantinote; ikkirono isi shiimu barri giddo dhagge ikkanno coye assino. (Iya. 1:9-11) Isi Magano addaxxasi kiissinosi. Qullaawu Maxaafi xagge leellishshanno garinni, Yihowa Iyyaasuno ikko mannasi Israeele sokkaasinchu widoonni massaginonsa. Kuni sokkaasinchi Qaale yiniha Maganunniha bayira Beetto ikkikki digatino.—Ful. 23:20-23; Yoh. 1:1.
4 Yihowa kaaꞌlonni, Israeele Muse bayicho Iyyaasu massagaanchonsa ikkita isira sumuu yite hajajantino. Ninkeno heeꞌnoommohu lowo coyi soorramanni noo yannarati; konnira ‘Maganu dirijjite alba higge qaaffanno woyite, Massagaanchonke Yesuusa addaxxineemmo gede assannonkeri maati?’ yite hedattoha ikkara dandaanno. (Maatewoosi 23:10 (NW) nabbawi.a) Tenne xaꞌmora dawaro afiꞌrate, hanni hunda mitu coyi soorramanno yannara Yihowa mannasi massagano gara xiinxallino.
MAGANU MANNA KANAANI MASSAGINOHU AYETI?
5. Iyyaarkote katami mule Iyyaasura mayi tuncu yiinosi? (Hanafote noo misile lai.)
5 Israeele Yordaanoosi Laga tayisse saꞌuhunni shiima yanna gedensaanni Iyyaasura hedinokkiri iillinosi. Iyyaarkote katami mule, isi bise adhino manchinni xaadino. Iyyaasu manchu ayimma afinokki daafira, “Ati ninke manchootinso, diinnanke garooti?” yee xaꞌmino. Hakku manchi ani “Kaaliiqi olanto hajajaanchooti,” yiino; isi Maganu manna agarate qixxaawe no; tenne yannara Iyyaasu dhagge assiꞌrino. (Iyyaasu 5:13-15 nabbawi.) Qullaawu Maxaafi wole basera Iyyaasu hasaawisinohu Yihowa ikkinota kulanno; ikkirono Yihowa duucha woyite assannonte gede hatte yannarano Iyyaasu sokkaasinchu widoonni hasaawisinoti egennantinote.—Ful. 3:2-4; Iya. 4:1, 15; 5:2, 9; Soq. 7:38; Gal. 3:19.
6-8. (a) Mannu illenni laꞌniro Yihowa uyino biddishshi kaaꞌlannoha lawannokkihu mayiraati? (b) Yihowa uyino biddishshi hayyonnihonna hatte yannara hasiisannoho yineemmohu mayiraati? (Lekkaalliidi qaagiishsha lai.)
6 Sokkaasinchu Iyyaasura Iyyaarkote katama qeelate maa assa hasiissannosiro kulinosi. Sokkaasinchu assi yiinosiri giddo mitu kaaꞌlannore lawa hoogara dandaanno. Lawishshaho, olamaasine baala barcintanno gede kulinosi; hatto yaa qole insa boodu barri geeshsha ola olante umonsa gargadha didandiitanno yaate. Hatte yannara kuri olamaasine barcinshiisha garaho?—Kal. 34:24, 25; Iya. 5:2, 8.
7 Kuri olamaasine ‘Diinu gawajjankera dayiro maatenke hiitto ikkine gargadhineemmo?’ yite heddinoha ikkara dandaanno. Ikkollana Israeele mitte odoo macciishshitino; “Israeeloota waajjatenni kainohunni, Iyyaarkonnita huxxu waalchuwa” cunfoonni. (Iya. 6:1) Kuni duduwi Israeele albinni roore Yihowa biddishsha addaxxitanno gede assinonsaha dilawannohe?
8 Sokkaasinchu Iyyaasura, Isiraeele Iyyaarkote katama qassannokki gede hajajinonsa; hatteentenni barrunni mitte higge lee barranna lamalki barra qole lamala higge doyitanno gede kulinonsa. Mite olamaasine ‘Yannankenna wolqanke mulla mayira guxxinanni heeꞌnoommo!’ yite heddinoha ikkara dandaanno. Ikkollana illete leellannokki Massagaanchinsa hatto yee hajajinonsahu afaare afeeti. Isi uyino biddishshi Israeelete ammana kaajjishino; hattono Iyyaarkote olamaasine ledo olantannokki gede gatisinonsa.—Iya. 6:2-5; Ibi. 11:30.b
9. Maganu dirijjite uyitannonke biddishsha harunsa hasiissannonkehu mayiraati? Lawishsha kuli.
9 Tenne xaggenni maa ronseemmo? Mito woyite Yihowa dirijjite haaro coye assitara dandiitanno; kuni coyi kayinni ninkera woꞌmunni woꞌma leella hoogankera dandaanno. Lawishshaho, umi qara hojju xiinxallora, soqqanshotenna gambooshshunniwa elekitiroonikisete uduunnicho horoonsiꞌra gara labbinonkekkiha ikkara dandaanno. Xa kayinni dandaamannonkeha ikkiro, konne uduunne horoonsiꞌra afidhino kaaꞌlo wodanchinoommoha ikkara dandaanno. Hatto assanke dancha guma abbitinota hendeemmo woyite ammanankenna roduuwinke ledo noonke mittimma kaajjitanno.
KIRISTOOSI UMI XIBBI DIRI KIRISTAANA MASSAGINO GARA
10. Aliidi bisi barcimate daafira Yerusaalamete assiꞌrino gambooshshe massaginohu ayeti?
10 Barcintinokki gaꞌre wido ikkinohu Qornelewoosi yinanni manchi Kiristaancho ikkihunni mitu 13 diri gedensaanni nafa, Yihudu manni giddo mitu barcima hasiissannote yaa diagurino. (Soq. 15:1, 2) Antsookiyu katamira roduuwu tenne hajo kayisse heewisantuta, Yerusaalame haꞌre tenne hajo aliidi bisira hasaawanno gede Phaawuloosi sonkoonni. Ikkollana Phaawuloosi hatto assanno gede hajajinosihu ayeti? Phaawuloosi “Haꞌroommohuno Maganu leellishinoe garinniiti” yiino. Aliidi bisi kalaqamino qarra tiranno gede massaginonsahu Kiristoosa ikkinoti dihuluullissannote.—Gal. 2:1-3.
Kiristoosi umi xibbi diri songo massagino (Gufo 10, 11 lai)
11. (a) Barcima lainohunni Yihudu wido ikkino Kiristaani mereero mayi qarri kalaqamino? (b) Phaawuloosi umosi heeshshi asse Yerusaalamete heedhanno cimeeyye kaaꞌlinohu hiittoonniiti? (Lekkaalliidi qaagiishshano lai.)
11 Aliidi bisi Kiristoosi massageennansa Yihudu wido ikkinokki manni barcima hasiissannonsakkita xawisino. (Soq. 15:19, 20) Ikkollana lowo diri gedensaannino Yihudu wido ikkino Kiristaani oosonsa barcinshiisha diagurtino. Yerusaalamete heedhanno cimeeyye mannu Phaawuloosi Muse Seera diayirrisanno yee heꞌmanni noota macciishshituti iso mitto hedinokkire assi yitinosi.c (Soq. 21:20-26) Cimeeyye mannu Phaawuloosi “Seera” ayirrisannota afanno gede isi shoole manna haaꞌre qullaawu minira haꞌrara kultinosi. Phaawuloosi togo yee hedara dandaanno: ‘Cimeeyye hatto yaansa gara diꞌꞌikkitino. Qarru noohu anewa ikkikki, barcimate daafira huwatinokkihu Yihudu Kiristaaniwaati.’ Ikkollana Phaawuloosi, cimeeyye hatto assitinohu baalunku Kiristaani mitto ikkara hasidhe ikkinota afino daafira, umosi heeshshi asse uyinoonnisi biddishsha harunsino. ‘Yesuusi reyi yannara Muse Seeri shaaraminoha ikkina, isi barcimate hajo lowo diro qarra ikkitara fajjinohu mayiraati?’ yine hendeemmoha ikkara dandaanno.—Qol. 2:13, 14.
12. Kiristoosi barcimate daafira woꞌmunni woꞌma xawisikki lowo diro keeshshinohu mayira ikkara dandaanno?
12 Mitu roduuwi, mito roso taashshinanni woyite hakko roso bayichonko ammane adha qarrissansara dandiitanno. Yihudu wido ikkino Kiristaani hedonsa biddi assiꞌrate yanna hasiissinonsa. (Yoh. 16:12) Mitootaho barcima Maganu ledo muli jaalooma kalaqiꞌnoonnita leellishannoha baxxino malaate diꞌꞌikkino yinanniti dirra gibbinonsa. (Kal. 17:9-12) Wolootu qolte wolu Yihudu manniwiinni baxxitinore ikkituro dartu iillannonke yite waajjitino. (Gal. 6:12) Yannate gedensaanni kayinni Phaawuloosi qullaawu ayyaaninni borreessino sokka widoonni Kiristoosi biddishsha lede uyino.—Rom. 2:28, 29; Gal. 3:23-25.
YANNANKERANO KIRISTOOSI SONGOSI MASSAGANNI NO
13. Yannankera Kiristoosi aanno biddishsha addaxxineemmo gede mayi kaaꞌlannonke?
13 Yihowa dirijjite giddo mito coye biddi assinannihu mayiraatiro woꞌmunni woꞌma leella hoogannonke yannara, Yesuusi hunda Maganu manna massagino gara hiincino. Iyyaasu warono ikko umi xibbi diro, Kiristoosi Maganu manna agaratenna ammanansanna mittimmansa kaajjishate woꞌmante yannara hayyote biddishsha uyino.—Ibi. 13:8.
14-16. “Ammanaminohunna wodanaamu borojjichi” aannonke biddishshi Yesuusi ayyaanaamittenke daafira hedannota leellishannohu hiittoonniiti?
14 “Ammanaminohunna wodanaamu borojjichi” aannonke biddishshi Yesuusi ayyaanaamittenke kaajjitanno gede baxillunni kaaꞌlannonketa leellishanno. (Mat. 24:45, NW) Shoole ooso noosihu Maarki yinanni rodii togo yiino: “Sheexaanu maate gawajje songuwa wolqa baꞌanno gede assate woꞌnaalanni no. Konnira lamalate kiiro maatete magansiꞌra assiꞌneemmo gede jawaachinshanninke; maatete umo ikkitinore ‘Maateꞌne gawajjotenni agarre’ yinanni heeꞌnoonni!”
15 Kiristoosi massaganni noonke gara wodanchineemmo woyite, isi ammananke kaajjite heedhara hasiꞌrannota huwanteemmo. Patiriki yinannihu cimeessa ikke soqqamanno rodii togo yiino: “Umi qara mitootu Qidaamenna Sambata qanchu soqqansho gaamonsara fula qarra ikkitinonsa. Ikkollana tini qixxaawo Yesuusi gadadaammaho hedannota leellishshanno. Alba soqqansho ganyite fultannokkiri woy manna ille qase laꞌꞌa waajjitannori xa banxanninsata huwattino; tini qolte ayyaanaamittetenni lophitanno gede kaaꞌlitinonsa.”
16 Qoleno Yesuusi alamete aana loonsanniha baalanka looso roorannohu sabbakate loosi aana illachinsheemmo gede kaaꞌlannonke. (Maarqoosi 13:10 nabbawi.) Muli yannara cimeessa ikke shoomaminohu Andire yinanni rodii Maganu dirijjite fushshitanno biddishsha woꞌmante yannara seekke harunsanno. Isi togo yiino: “Mitu roduuwi sinu biironni fulte qanchoho soqqantanno gede assa, yanna goffinotanna sabbakate loosi aana illachisha hasiissannonketa leellishshannote.”
AMMANANTINE YESUUSI BIDDISHSHA HARUNSE
17, 18. Muli yannara woyyeessinoonni coyi afiꞌrino horo hiinca maaho kaaꞌlitannonke?
17 Gashshe noohu Moote Yesuusi Kiristoosi aannonke biddishshi xaano ikko albillitte kaaꞌlannonkeho. Konni daafira, muli yannara woyyeessinoonni coye hagiirrunni harunsino. Lamalate gambooshshe woy soqqansho lainohunni woyyeessinoonni coyi kaaꞌlinoꞌne gara maatete magansiꞌra yannara hasaawa dandiitinanni.
Maatekkinna wolootu Yihowa dirijjite ledo taalo qaaffanno gede kaaꞌlitanni nootto? (Gufo 17, 18 lai)
18 Yihowa dirijjite uyitannonke biddishsha harunsa kaaꞌlitannonketa qaangummoro, konne biddishsha hagiirrunni harunsa shota ikkitannonke. Attammanni borro ajisha woxe qoxxowate kaaꞌlitanno; qoleno haarote dayinoha tekinoolojete uduunnicho horoonsiꞌra alame woꞌmate Maganu Mangisteha dancha duduwo albinni roore duduwate kaaꞌlitannonke. Konnira, dandaamannoha ikkiro elekitiroonikisete fultanno borronna viidiyubba horoonsiꞌranke danchate. Hatto assineemmoha ikkiro, Maganu dirijjite woxe danchu garinni horoonsidhanno gede kaaꞌlineemmo; Kiristoosino hatto assinammora hasiꞌranno.
19. Kiristoosi biddishsha harunsa hasiissannonkehu mayiraati?
19 Kiristoosi biddishsha seekkine harunsineemmoha ikkiro, wolootu ammananna mittimmanke kaajjitanno. Andire, alame woꞌmate noote Beeteelete maatenni mitu roduuwi qanchoho soqqantanno gede assinoonnita qaage togo yino: “Kuri roduuwi biddi assinoonni coyi ledo sumuu yite heeꞌransa, songo massaganni noohu Kiristoosa ikkinota addaxxeemmo gedenna insa ayirriseemmonsa gede assitinoe. Insa uyinanninsa loosi ikkiha ikkirono hagiirrunni loosse, Yihowa saragalli ledo taalo qaafanni no.”
MASSAGAANCHONKE KIRISTOOSI ADDAXXE
20, 21. (a) Massagaanchonke Kiristoosi addaxxa dandiineemmohu mayiraati? (b) Aananno birxichira hiittenne xaꞌmo xiinxallineemmo?
20 Muli yannara Massagaanchinke Yesuusi Kiristoosi ‘qeelle adhanno,’ hattono ‘jawa looso loosanno.’ (Aju. 6:2; Far. 45:4) Hakka geeshsha kayinni isi Maganu manna haaro alamera qixxeessanni no; hatte yannara reyotenni kaꞌinore rosiinseemmo, hattono uulla gannate assate loosiꞌra kaaꞌlineemmo.
21 Baxi coyi iillinkerono Mootenkenna Massagaanchonke Kiristoosa addaxxinummo geeshsha isi haaro alame eessannonke. (Faarso 46:1-3 nabbawi.) Yannankera hendoommokki coyi tuncu yaannonke woyite, tini qarra ikkitankera dandiitanno. Ikkina, giddiidi keerinke baꞌꞌannokkinna woꞌmunni woꞌma Yihowa addaxxineemmo gede mayi kaaꞌlannonke? Aananno birxichira tenne xaꞌmora dawaro afiꞌneemmo.
a Maatewoosi 23:10: “Massagaanchiꞌne mittoho; isino Kiristoosiiti; konnira massagaancho yitine woshshantinoonte.”
b Arkiyolojete xiinxallaano diigaminohu Iyyaarkote katami giddo lowo gide affino; tini, katama horrinanni lowo yanna keeshshinoonnikkitanna katamu giddonni sagale gooffinokkita leellishshanno. Israeele Iyyaarkote kataminni miinja mulqidhannokki gede hajanjoonninsa; ikkollana hatti midote yanna ikkitinohuranna bae sagale noo daafira Iyyaarkote katama qasate injiitinote.—Iya. 5:10-12.
c “Phaawuloosi Umosi Heeshshi Asse Iillinosi Fonqolo Qeelino” yitannota Badheessa 15, 2003 Agarooshshu Shaera (Amaaru Afoo) noo saaxine lai.