Ati Tenne Afootto?

Isxifaanoosi dartu iillisi yannara wodanaaꞌma dandiinohu hiittoonniiti?

ISXIFAANOOSI kaajjadu manni beebba assiꞌrinosi. Israeelete giddo aliidi yoo mine ikkinohu Sanihediriini shongoti 71 miilla lowo silxaane noonsa mannaati. Insa shiimu agani albaanni Yesuusa shini woyite hatte shongo massaginohu Kakkalaanote Roorrichi Qeyaafa widoonni gamba yitino. (Mat. 26:57, 59; Soq. 6:8-12) Insa batinye kaphu naqaashe abbitu gedensaanni mitto dhagge ikkanno coye wodanchitino; “mannu baalu Isxifaanoosi seekke laꞌꞌanno woyite albisi sokkaasinete gede xawanni” no.—Soq. 6:13-15.

Isxifaanoosi buutote qarri giddo heeꞌre togo wodanaaꞌma dandiinohu hiittoonniiti? Isxifaanoosi Sanihediriini shongo shiqara albaanni Maganu ayyaani massagannasi soqqanshosi diinaggaawe soqqamanni keeshshino. (Soq. 6:3-7) Isira kuni fonqolu iillisi yannarano, hakku ayyaani ledosi no; kuni ayyaani shesho afiꞌrannonna qaaganno gede kaaꞌlinosi. (Yoh. 14:16) Soqqamaasinete Looso 7te aana xawinsoonni garinni Isxifaanoosi waajjikkinni gargarooshshe shiqishiꞌri woyite qullaawu ayyaani Ibiraawootu Afiite Qullaawa Borronni 20 saꞌanno hedo qaaganno gede kaaꞌlinosi. (Yoh. 14:26) Ikkollana Isxifaanoosi Yesuusi Maganu qiniiteenni uurre heeꞌreenna ajuujatenni lai yannarano ammanasi kaajjitino.—Soq. 7:54-56, 59, 60.

Ninkerano buutote fonqolinna dartu iillankera dandaanno. (Yoh. 15:20) Maganu Qaale ganyine sagaꞌlankenna diinaggaawe soqqamanke Yihowa ayyaani massagannonke gede assitanno. Qoleno giddiidi keerinke baikkinni kaajjine uurra dandiineemmo.—1 Phe. 4:12-14.