Qaagatto?

Muli yannara fultinota Agarooshshu Shae metseetta seekkite nabbawootto? Hanni aante noo xaꞌmuwara dawaro qolate woꞌnaali:

Maganu mararannonketa leellishshannoti Qullaawu Maxaafi taje hiittenneeti?

Hundi Israeele Gibitsete borojje ikkite noo waro, Maganu yaaddonsa laino, hattono mararinonsa. (Ful. 3:7; Isa. 63:9) Maganu daninni kalaqammoommo daafira, ninkeno wolootaho mararro leellisha dandiineemmo. Isi dibaxannonke yine hendeemmo woyite nafa, Yihowa mararannonke.—wp18.3, qoola 8-9.

Yesuusi rosiisino rosi mannu wole mulla kae giwate hedo qeeꞌlanno gede kaaꞌlannonsahu hiittoonniiti?

Yesuusi waro batinyu Yihudu manni woloota mulla kae giwanno. Kiristoosi umonke heeshshi assa hasiissannotanna meessi sirchi wole roorinohu gede assine heda hasiissannokkita rosiisino. Isi harunsaanosi mimmito roduuwu gede assite laꞌara jawaachishino.—w18.06, qoola 9-10.

Maganu Muse Hexxote Gobba eannokki gede assino korkaatinni maa ronseemmo?

Musera Yihowa ledo lubbote jaaloomi noosi. (Mar. 34:10) Israeelete daga halallaho 40 diro jeefisate gambisse heedhe waa hoogge layinkimeeshsho gunguntino. Maganu Muse kinchoho coyiꞌranno gede kulinosi. Muse hatto assa agure kincho ganino daafira Yihowa hanqinosi. Maganu Musera hanqinohu hajajosi harunsinokki daafira woy tenne maalalera Isira ayirrinye aa hooginohura ikkara dandaanno. (Kir. 20:6-12) Tini dhagge Yihowara hajajamanna isira ayirrinye aa hasiissannota rosiissannonke.—w18.07, qoola 13-14.

Manna aana laꞌne yoo yineemmoha ikkiro soꞌnammora dandiineemmohu hiittoonniiti?

Batinyu manni woloota aana lae yoo yaanno gede assannonsahu sasu coyi no; insano: sirchoho woy gaꞌrete, jirotenna diroho. Woloota mallaadannokki Magani laꞌꞌanno garinni laꞌꞌate sharrama hasiissannonke! (Soq. 10:34, 35)—w18.08, qoola 8-12.

Jajjabbu roduuwi woloota kaaꞌla dandiitannoti mite doogga hiittenneeti?

Uyinoonnisi looso soorrinoonnisihu jawu rodii assinore Maganu dihawanno; hattono isi woloota kaaꞌlate lowore assa dandaanno. Isi Yihowa Farciꞌraasincho ikkinokki minaanna woy minaama, hattono ayyaanaamittetenni shoshshoggitinore kaaꞌla, qoleno woloota Qullaawa Maxaafa xiinxallisanna albinni roore soqqama dandaanno.—w18.09, qoola 8-11.

Rosiisate Horoonsiꞌneemmo Borruwa hiikkuriiti?

Jw.org egensiissanno kaardenna koyishshu woraqatta noonke. Danchu garinni qixxeessinoonniti sette tiraaktuwa, hattono Agarooshshu Shaenna Baqqi Yiiyye! yitanno metseettano noonke. Boode birosherubba, lame xiinxallote maxaaffa, hattono Qullaawa Maxaafa Xiinxalla Hasiissannohu Mayiraati? yitannotinna wole sase viidiyo noonke.—w18.10, qoola 16.

Lawishsha 23:23 jawaachishshanno garinni Kiristaanu ‘halaale afiꞌra’ woy hidha dandaannohu hiittoonniiti?

Halaale rosate woxe dibaanteemmo. Ikkollana halaale afiꞌrate yanna gaaꞌmanna sharrama hasiissannonke.—w18.11, qoola 4.

Hoosei galtesi Gomeerira assino coyinni maa rosa dandiineemmo?

Gomeeri duucha higge foorturono, Hoosei isera gatona yee galtesi ikkite heedhanno gede assino. Mittu Kiristaanchira minaamasi woy minaannise fooriro, baddalaminohu gatona yaara dandaanno. Baddalamino minaanni woy minaama galtese ledo wirro siimu xaadooshshe assa agura hoogguro, baddalinose galtese gatona yitinota leellishshanno. Hakkuyi gedensaanni adhamansa diiganno gede assannori diheeꞌranno.—w18.12, qoola 13.