Wodananke Agadha Dandiineemmohu Hiittoonniiti?

1-3. (a) Yihowa Selemooni baxinohu mayiraati? Selemooni mayi atoote afiꞌrino? (b) Konni birxichira hiikkuri xaꞌmuwa xiinxallineemmo?

SELEMOONI Israeelete moote ikkinohu wedellichu heeꞌreeti. Isi gashsha hanafi balla, Yihowa ajuujatenni “Maa aammohera hasiꞌratto?” yee xaꞌminosi. Selemoonino “Ani lowo geeshsha shiimaho; gashshinanni garano diegennoommo. . . . Kunnira bushanna dancha bade afe mannakki halaalunninna taalotenni gashsheemmo gede egenno [“owaata wodana,” NW] uyie” yiino. (1 Mot. 3:5-10) Selemooni Yihowa “owaata wodana” aannosi gede xaꞌmiꞌrasi dhukasi afinoha ikkinota leellishshanno. Yihowa Selemooni baxinohu iseraati. (2 Sam. 12:24) Maganu kuni wedellichu moote xaꞌmiꞌrinori hagiirsiisinosi daafira, ‘egennaamonna wodancha’ wodana uyinosi.—1 Mot. 3:12.

² Selemooni Yihowara ammanami yanna baalantera lowo atoote afiꞌrino. Isi “Israeelete Magani Kaaliiqirano suꞌmasi ayirrinsanniha qullaawa mine” minate qoosso afiꞌrino. (1 Mot. 8:20) Isi Maganu uyinosi hayyonni egennaminoha ikkino. Qoleno Qullaawu Maxaafi giddo Selemooni Maganu ayyaaninni coyiꞌrinore amaddinoti sase maxaaffa no. Kuri giddo mittu Lawishshu maxaafaati.

³ Haaro Alame Tirora wodana yaanno qaale Lawishshu maxaafi giddo calla 100 meddi yitanno basera qummi assinoonni. Lawishsha 4:23 ‘Woꞌmunkurinni roorsite wodanakki agadhi’ yitanno. Konni qummeeshshira “wodana” yaanno qaali maa leellishanno? Konni birxichira tenne xaꞌmora dawaro afiꞌneemmo. Qoleno aante noo xaꞌmuwa xiinxallineemmo: Sheexaanu wodananke daafate woꞌnaalannohu hiittoonniiti? Wodananke agadhate maa assa dandiineemmo? Maganoho ammanamme heeꞌrate, kuri xaꞌmuwara qollanni dawaro huwata hasiissannonke.

‘WODANU’ MAATI?

4-5. (a) Lawishsha 20:27 “wodana” yaanno qaale huwatate kaaꞌlitannonkehu hiittoonniiti? (b) Bisu fayyimmanke agadhatenna wodaninke fayyimma agadhate mereero mayi xaadooshshi no?

⁴ Lawishsha 4:23te kulloonnihu “wodana” yaanno qaali “giddoyidi hedo” woy ayimmanke leellishanno. (Lawishsha 20:27 nabbawi.) Wole yaattonni “wodanu” aaniidi ayimma calla ikkikkinni giddiidi ayimma, hasattonna yorto xawisanno.

⁵ Giddiidi ayimmanke daafira huwatate, hanni bisu fayyimma daafira hendo. Umihunni, giddoyidita bisinke kifilla agadhate, dancha sagale itanna ispoorte loosa hasiissannonke. Hatteente gede ayyaanaamittete fayyimmanke agadhate, dancha ayyaanaamittete sagale sagaꞌlanna Yihowara noonke ammana loosunni leellisha hasiissannonke. Yihowara noonke ammana leellisha dandiineemmo doogga giddo mite, ronsoommore loosunni leellishatenna ammananke daafira wolootaho kulate. (Rom. 10:8-10; Yai. 2:26) Layinkihunni, giddiidinke xiwaminoha ikkirono, aananke calla laꞌne fayyuulle ikkinoommohu gede assine hendeemmoha ikkara dandaanno. Hatteente gede, giddonke busha yorto lophitanni nooha ikkirono, ayyaanaamittete coye assineemmo daafira calla ammananke kaajjadote yine hendeemmoha ikkara dandaanno. (1 Qor. 10:12; Yai. 1:14, 15) Sheexaanu isi hedanno garinni hendammora hasiꞌrannota qaaga hasiissannonke. Isi hatto assate woꞌnaalannohu ma garinniiti? Ninke umonke agadha dandiineemmohu hiittoonniiti?

SHEEXAANU WODANANKE DAAFATE WOꞌNAALANNO GARA

6. Sheexaanu mixo maati? Isi tenne mixo wonshiꞌrate woꞌnaalannohu hiittoonniiti?

⁶ Sheexaanu ninkeno isi gede Yihowa biddishshira hajajama gimbe finqillammoranna uminkera roorsiꞌnammora hasiꞌranno. Sheexaanu isi hedannore hendeemmonna isi assannore assineemmo gede giddeessa didandaanno. Konnira isi mixosi wonshiꞌrate wole doogga horoonsiꞌranno. Lawishshaho Sheexaanu qooxeessinkera isi hedanno garinni hedanno manni woꞌmanno gede assino. (1 Yoh. 5:19) Isi ‘bushu jaaloomi dancha amanyoote hunannota’ anfanni heeꞌne, insawa aannammora hasiꞌranno. (1 Qor. 15:33) Sheexaanu Moote Selemooni soꞌrisiisate tenne hayyo horoonsiꞌrino. Selemooni halaalaancho Magano magansiꞌrannokkiha batinye meento adhino; kuni meenti qole isi Yihowawiinni “xeertiꞌranno gede assino.”—1 Mot. 11:3.

7. Sheexaanu hedosi halashshate wolere maa horoonsiꞌranno? Konne coye qoropha hasiissannonkehu mayiraati?

⁷ Sheexaanu hedosi halashshate filmenna televizhiine horoonsiꞌranno. Isi mannu xagge macciishsha banxeemmota afino; tini xagge qolte boohaarreemmo gede kaaꞌlitannonkeha calla ikkikkinni hedonkenna assootenke quxxara dandiitanno. Yesuusi mannaho rosiisate tenne hayyo horoonsiꞌrino. Lawishshaho, isi shaqqadu Samaarichirenna qaetenni fule haꞌre raggesi afimalsino beettire kulanno lawishsha coyiꞌrino. (Mat. 13:34; Luq. 10:29-37; 15:11-32) Ikkollana Sheexaanu hedo harunsitannori togoo xagge horoonsidhe hedonke daaffankera dandiitanno. Konnira quwa saꞌꞌa dihasiissannonke. Mite filmenna televizhiinete pirogiraame hedonke daaffukki boohaarreemmo gede woy roso afiꞌneemmo gede kaaꞌlitankera dandiitanno. Ikkollana qoropha hasiissannonke. Boohaarsha doodhineemmo woyite ninkeneeto togo yine xaꞌma hasiissannonke: ‘Tini filme woy televizhiinete pirogiraame maalu yorto harunsa qarra diafidhino yite rosiissannoe?’ (Gal. 5:19-21; Efe. 2:1-3) Mitte pirogiraame Sheexaanu hedo halashshitannota ikkitinota wodanchittoro maa assatto? Taraawanno dhibbiwiinni xeertiꞌrattonte gede togoo coyiwiinnino xeertiꞌri!

8. Annuwunna amuuwu oosonsa wodanansa agadhitanno gede kaaꞌla dandiitannohu hiittoonniiti?

⁸ Annuwanna amuuwa, Sheexaanu oosoꞌne wodana daafannokki gede agarate baxxino qeechi nooꞌne. Oosoꞌnera ordu fayyimma agarate dandaamiꞌnere baala assitinanniti egennantinote. Lawishshaho, qae fiidhinanni, oosoꞌneno ikko kiꞌne umoꞌne gawajjara dandaannore mininni fushshitine huntinanni. Hatteente gede, Sheexaanu hedo halashshitanno filme, televizhiinete pirogiraame, elekitiroonikisete godoꞌlenna webisayite oosoꞌne wodana daaffannokki gede agara hasiissannoꞌne. Yihowa oosoꞌne ayyaanaamittete gawajjonni agartinanni gede silxaane uyinoꞌne. (Law. 1:8; Efe. 6:1, 4) Konni daafira, maateꞌne harunsitannoha Qullaawu Maxaafi aana xintamino biddishsha fushsha waajjitinoonte. Qaaqquulliꞌne laꞌꞌa dandiitannorenna dandiitannokkire kullensa; hattono hakko coye hooltinoonninsahu mayiraatiro huwattanno gede kaaꞌlensa. (Mat. 5:37) Qaaqquulliꞌne lophitanni hadhanno woyite, Yihowa biddishsha harunsite danchanna busha uminsanni bada dandiitanno gede qajeelsensa. (Ibi. 5:14) Qoleno oosoꞌne coyidhinannirinni calla ikkikkinni assitinannirinnino lowore rossannota deꞌinoonte.—Mar. 6:6, 7; Rom. 2:21.

9. Sheexaanu halashshanno hedo giddo mitte hiittenneeti? Tini hedo gawajjitannote yineemmohu mayiraati?

⁹ Sheexaanu Yihowa hedo agurre mannu hayyo addaxxineemmo gede asse wodananke daafate woꞌnaalanno. (Qol. 2:8) Lawishshaho Sheexaanu halashshanno totai giddo mittu, heeshshonke giddo baalunkunni balaxa hasiissannoti jirote yaannoho. Togo yite heddannori jiro afidharano afiꞌra hooggarano dandiitanno. Ikkihano ikkiro insa qarru giddo no. Hatto yineemmohu mayiraati? Insa woxe gamba assiꞌrate aana illachishshanno daafira, ordinsa keeraanchimma, maatensanna Maganu ledo noonsa aante gawajjantara dandiitanno. (1 Xim. 6:10) Hayyicha ikkinohu iimi Anninke woxeho gara ikkitino lao heedhannonke gede kaaꞌlannonke daafira galanteemmosi.—Ros. 7:12; Luq. 12:15.

WODANANKE AGADHA DANDIINEEMMOHU HIITTOONNIITI?

10-11. (a) Ninkeneeto agadhate maa assa hasiissannonke? (b) Hundi yannara agaraasinete loosi maati? Tiiꞌꞌinke agaraasinchu gedeeti yineemmohu mayiraati?

¹⁰ Wodananke agadhate, gawajjanno coye bade afanna hakko coye ranke gargadha hasiissannonke. Lawishsha 4:23te noohu “agadhi” yaanno qaali agaraasine loossanno looso qaangeemmo gede assannonke. Moote Selemooni waro, agaraasine shaete ofolte diinu daanno woyite katamu giddo noo manna qorowisiissanno. Kuni lawishshi, Sheexaanu hedonke daafannokki gede maa assa hasiissannonkero huwatate kaaꞌlannonke.

¹¹ Hunda shaete aana heedhe agartannori xullichu agaraasine ledo buusante loossanno. (2 Sam. 18:24-26) Insa diinu gambisanno woyite, xullicho cuffe kaaꞌlante katama danotenni agartanno. (Neh. 7:1-3) Qullaawu Maxaafinni qajeelino tiiꞌꞌinkeno,b Sheexaanu wodananke yaano hedonkenna hasattonke daafate woꞌnaalanno woyite shaete aana agartanno agaraasine gede qorowisiisannonke. Tiiꞌꞌinke qorowisiisannonke woyite macciishshanna lawishshu yaattonni xullicho cufa hasiissannonke.

12-13. Maa assate fonqolammeemmoha ikkara dandaanno? Tenne yannara maa assa hasiissannonke?

¹² Hanni Sheexaanu hedo daaffannonkekki gede gargadha dandiineemmo gara leellishanno lawishsha laꞌno. Yihowa ‘foorre woy saalimale ikkito woy busha yorto duduwi nafa mereeronke horonta heeꞌrannokki’ gede rosiisinonke. (Efe. 5:3) Ikkollana loosu basera woy rosu mine darawonke maaeela coye kayisse hasaawa hanaffuro maa assineemmo? “Ammana giwanna maalu yorto” giwa hasiissannonketa anfoommo. (Tit. 2:12) Agaraanchu yaano tiiꞌꞌinke qorowisiisankera dandaanno. (Rom. 2:15) Ikkina tiiꞌꞌinke kulannonkere macciishshineemmo? Darawonke hasaabbannore macciishshate woy insa laꞌanni noo misilla laꞌꞌate fonqolammeemmoha ikkara dandaanno. Ikkollana togoo fonqoli iillannonke woyite wodaninke xullicho cufa yaano wole hasaawa kayisa woy insawiinni agure haꞌra hasiissannonke.

¹³ Darawonke gara ikkinokkire hendeemmo woy assineemmo gede xixxiibbannonketa qeelate worbimma hasiissanno. Yihowa sharrameemmo sharro laꞌꞌannotanna Sheexaanu hedo qeelate kaaꞌlitanno jawaantenna hayyo aannonketa addaxxa dandiineemmo. (2 Dud. 16:9; Isa. 40:29; Yai. 1:5) Ikkina wodananke agadhate wolere maa assa dandiineemmo?

WODANAKKI AGADHI!

14-15. (a) Wodaninke giddora mayi eanno gede assiꞌra hasiissannonke? Hatto assa dandiineemmohu hiittoonniiti? (b) Lawishsha 4:20-22 Qullaawu Maxaafi niwaawenkenni horo afiꞌrate kaaꞌlitannonkehu hiittoonniiti? (“Hiinca Dandiinanni Gara” yitanno saaxine lai.)

¹⁴ Wodananke agadhate bushu coyi eannota gargadha calla ikkikkinni danchu coyi eanno gedeno assiꞌra hasiissannonke. Hanni xaano katamu agaraasine hendo. Xullicho agartannori diinu eannokki gede xullicho cuffanno; ikkollana sagalenna wole coyibba katamu giddora eessinanni woyite xullicho fantanno. Xullicho horo fana hoongiro, katamu giddo heeꞌranno manni hudetenni goofara dandaanno. Hatteente gede, ninkeno ganyine Maganu hedo wodaninke giddora eꞌanno gede assiꞌra hasiissannonke.

¹⁵ Qullaawu Maxaafi Yihowa hedo amadino; konnira Qullaawa Maxaafa nabbambeemmo woyite Yihowa hedo, hedonkenna assootenke quxxanno gede assiꞌnanni heeꞌnoommo. Qullaawu Maxaafi niwaawenni horo afiꞌra dandiineemmohu hiittoonniiti? Huuccatto assiꞌra lowo geeshsha kaaꞌlitanno. Mitte Kiristaancho togo yitino: “Qullaawa Maxaafa nabbawammara albaanni Yihowa Qaalisi giddo nooha ‘dhagge ikkanno halaale laeemma gede’ kaaꞌlaera huucciꞌreemma.” (Far. 119:18) Qoleno nabbamboommore hiinca hasiissannonke. Huuccatto assiꞌneemmoha, nabbambeemmohanna hiincineemmoha ikkiro Maganu Qaali ‘wodaninkera’ coanno daafira Yihowa hedo baxa hananfeemmo.—Lawishsha 4:20-22; Far. 119:97.

16. JW Biroodikaaste kaaꞌlitannonkehu hiittoonniiti? Lawishsha kuli.

¹⁶ Maganu hedo wodaninke giddora eꞌanno gede assiꞌra dandiineemmoti wole doogo, JW Biroodikaastera fulanno roso macciishshate. Mittu minaanninna minaama togo yiino: “Aganu kiiro JW Biroodikaastera fulanno rosi widoonni huuccattonkera dawaro afiꞌneemmo. Dadillineemmonna callanteemmo woyite jawaantenna wolqa ikkitannonke. Qoleno minenke JW Biroodikaastera fulanno muuziiqa ganyine macciishshineemmo. Qishiꞌneemmo woyite,hayishiꞌneemmo woyite woy sagalete yannara konne muuziiqa faarsineemmo.” Tini qixxaawo wodananke agadhate kaaꞌlitannonke. Hattono Yihowa hedanno garinni hedatenna Sheexaanu hedo qeelate kaaꞌlitannonke.

17-18. (a) Umi Mootoolla 8:61te kulloonni garinni Yihowawiinni ronsoommore harunsineemmoha ikkiro mayi guma afiꞌneemmo? (b) Moote Hiziqiyaasi lawishshinni maa ronseemmo? (c) Faarso 139:23, 24te aana Daawiti huucciꞌrino garinni ninkeno maaho huucciꞌra dandiineemmo?

¹⁷ Gara ikkinore assa afidhino horo huwantanni haꞌneemmo woyite, ammananke kaajjitanno. (Yai. 1:2, 3) Hatto assinummoro, Yihowa ninke oososi gede asse laꞌꞌannonke daafira tashshi yaannonke; hattono iso hagiirsiisate noonke hasatto lexxitanno. (Law. 27:11) Iillannonkehu mittu mittunku fonqoli baxillaanchu Anninkera soqqammeemmohu woꞌmu wodaninni ikkinota leellinsheemmo faro fanannonke. (Far. 119:113) Fonqolu iillannonke yannara, woꞌmu wodaninkenni Yihowa baxate, isira hajajamatenna fajjosi wonshate muriciꞌnoommota leellinsheemmo.—1 Mootoolla 8:61 nabbawi.

¹⁸ Guuntete xeꞌne noonkere ikkinoommo daafira soꞌnammora dandiineemmo. Soꞌro loonseemmo yannara Moote Hiziqiyaasi lawishsha qaango. Isi soꞌro loosinoha ikkirono, maaro eꞌꞌe Yihowara “woꞌmu wodaninni” soqqamino. (Isa. 38:3-6; 2 Dud. 29:1, 2; 32:25, 26) Konnira Sheexaanu hedo daafannonkekki gede qorophino. Owaatu wodani heeꞌrannonke gede huuccatto assiꞌno. (1 Mot. 3:9; Faarso 139:23, 24 nabbawi.) Hatto assinummoro, Yihowara ammanamme heeꞌra dandiineemmo; baalunkunni roore kayinni wodananke agadha dandiineemmo.