Maganoho Woꞌma Giddonni Soqqantinanni Heedhinoonni?

1. Baalanti Maganu soqqamaasine maa assa hasidhanno? Mayira? (Aaniidi qoolira noo misile lai.)

YESUUSI KIRISTOOSI harunsaanosi, “Hadhine gosa baala . . . rosaanoꞌya assensa” yee hajajino. (Mat. 28:19) Ammanantinori Maganu soqqamaasine baalunku uyinoonninsaha konne looso woꞌma giddonni “wonsha” woy umo fushsha dandiitanno gara rosa hasidhanno. (2 Xim. 4:5) Korkaatuno kuni loosi, wolu baalunkunni roorinohonna lowo geeshsha hasiisannoho; hattono wiinamme loosa hasiissannoho. Ikkollana, hasiꞌnoommo geeshshi yanna soqqama qarra ikkitankera dandiitanno.

2. Soqqanshonkera guficho ikkannohu mitu coyi maati?

² Loosa hasiissannonkehu yannankenna wolqanke gudannohu wolu duuchu loosi no. Uminkeranna maatenkera hasiisannore wonshate barru giddo seeda saate loosa hasiissannonkeha ikkara dandaanno. Ninke woy maatenke miilla dhibbu waadannonsaha, yaaddo woy diru akalle amadddinonsaha ikkara dandaanno. Ikkina togoo fonqolo qeelle woꞌma giddonni soqqama dandiineemmohu hiittoonniiti?

3. Yesuusi Maatewoosi 13:23te coyiꞌrinorinni maa huwata dandiineemmo?

³ Heeshshonke gari Yihowara hasiꞌnoommo geeshsha soqqammeemmokki gede guficho ikkinkero, hexxo mudha dihasiissannonke. Yesuusi, ninke baalunku Maganu Mangiste guma taalo laala dandiineemmokkita afino. (Maatewoosi 13:23 nabbawi.) Yihowa isira soqqamate dandiinummore baala assineemmota lowo geeshsha naadanno. (Ibi. 6:10-12) Wole widoonni kayinni, albinni roore soqqama dandeemmo yine hendeemmoha ikkara dandaanno. Konni birxichira heeshshonke giddo soqqansho balaxisiisa dandiineemmo gara, heeshshonke bikkunnita assiꞌra dandiineemmo garanna sabbakatenna rosiisate dandoonke woyyeessiꞌra dandiineemmo gara ronseemmo. Balanxe kayinni, woꞌma giddonni soqqamate yaa mayyaatero laꞌneemmo.

4. Woꞌma giddonni soqqamate yaa mayyaate?

⁴ Maganoho woꞌma giddonni soqqamate yaa, sabbakatenna rosiisate looso wolqanke assitu deerrinni diinaggaambe loosate yaate. Ikkollana, hatto yaa seeda yanna soqqama calla diꞌꞌikkitino. Yihowa isira soqqammeemmo gede kakkayisannonkeri maatiro laꞌꞌanno. Yihowanna manna banxeemmo daafira, Kiristaanu soqqanshonkeb woꞌma lubbonni soqqammeemmo. (Maq. 12:30, 31; Qol. 3:23) Maganoho woꞌma lubbonni soqqamate yaa, ninkeneeto gudinse uyine soqqamate yaate, yaano dhukinke assi deerrinni wolqanke gudinse isi soqqanshora horoonsiꞌrate yaate. Uyinoonninkeha muxxe sabbakate looso naandeemmoha ikkiro, dancha duduwo dandaaminke deerrinni batinyu mannira kulate sharrammeemmo.

5-6. Mittu manchi yanna ajjusirono, sabbakate looso balaxisiisa dandaanno gara lawishshunni kuli.

⁵ Hanni rosiisa baxannoha mitto aja beetto hedi. Isi afiꞌri yanna baalantera rosiisa baxanno. Yannate gedensaanni kuni beetti gillete rosi mine Qidaamenna Sambata rosiisa hanafi. Ikkollana afiꞌranno woxi hasiisannosire wonshiꞌrate diꞌꞌikkannosi. Konni daafira, isi Sanyotenni Arbete geeshsha sagalete mine woxe amadannoha ikke loosa hanafi. Isi roore yanna sayisannohu sagalete mine ikkirono, rosiisa roorse baxanno. Rosiisate dandoosi roore woyyeessiꞌre woꞌma yanna rosiisa halchanno. Ikkirono, shiima yannano ikkituro, afiꞌri faro baala horoonsiꞌre rosiisanno.

⁶ Hatteente gede, atino sabbakate looso hasiꞌrootto geeshsha loosa dandaattokkiha ikkara dandaanno. Ikkirono konne looso baxatto. Konni daafira dandookki woyyeessidhe mannu wodana kakkayisanno garinni rosiisate sharramatto. Qoleno yannakki gudannohu lowo coyi noo daafira ‘Sabbakate looso balaxisiisa dandeemmohu hiittoonniiti?’ yite hedattoha ikkara dandaanno.

SOQQANSHO BALAXISIISA DANDAATTOHU HIITTOONNIITI?

7-8. Soqqanshote Yesuusite gedee lao heedhannonke gede assiꞌra dandiineemmohu hiittoonniiti?

⁷ Yesuusira soqqanshote noosi lao ninkera dancha lawishsha ikkitannonke. Isi heeshshosi giddo Maganu Mangistere sabbakate looso balaxisiisino. (Yoh. 4:34, 35) Yesuusi dandaamisi deerrinni batinyu mannira sabbakate yee lowo xibbe ikkitanno kiilo meetire lekkatenni haꞌrino. Isi afiꞌrino tunceenya baala horoonsiꞌre minunni mine haꞌreno ikko mannu noowa baalankawa sabbakino. Yesuusi heeshshosi woꞌmatenni soqqanshote aana illachishino.

⁸ Ninkeno Yesuusi lawishsha harunsine, aye woyiteno mannu heeꞌrannowa baalawa dancha duduwo kulleemmo faro hasiꞌneemmo. Wongeelu looso loosate yine uminke horo facci assine agurreemmo. (Maq. 6:31-34; 1 Phe. 2:21) Songote giddo mitootu baxxitino suwisaano, woꞌma yanna suwisaano, woy kaaꞌlaano suwisaano ikkite soqqantanno. Mitootu kayinni haaro qaale rossanno, hattono sabbakkannori roore hasiissannowa hadhe soqqantanno. Ikkollana roore anga wongeelu looso loossannori, songonsara heedhe wolqansa assitu geeshsha ganyite soqqamate sharrantanno halashshaanooti. Soqqammeemmo yanna ikkitu geeshshitano ikkituro, Yihowa wolqankera aleenni ikkinore asse diyaannonke. Isi ninke baalunku hagiirraamu “Maganire kulannohu ayirrado dancha duduwo” dudumbeemmo woyite soqqanshonkenni hagiirraamma ikkinammora hasiꞌranno.—1 Xim. 1:11; Mar. 30:11.

9. (a) Phaawuloosi umisi looso loosiꞌra hasiissinosiha ikkirono, sabbakate looso balaxisiisinohu hiittoonniiti? (b) Soqqamaasinete Looso 28:16, 30, 31 Phaawuloosira soqqanshote noosi lao kultannohu hiittoonniiti?

⁹ Soqqamaasinchu Phaawuloosi heeshshosi giddo soqqansho balaxisiise dancha lawishsha ikkinonke. Isi layinkimeeshsho misiyoone ikke haꞌri yannara Qorontoosi katamira heeꞌreenna hasiisannosire wonshiꞌrate woxu hasiisinosi daafira mite yanna geeshsha dunkaana gowino. Ikkollana isi dunkaana gowa qaru loosisi gede asse dilaino. Isi konne looso loosinohu hasiisannosire afiꞌre Qorontoosi heeꞌranno mannira ‘woxe baantisikkinni’ dancha duduwo duduwateeti. (2 Qor. 11:7) Phaawuloosi boode yanna umisi looso loosinoha ikkirono, isi soqqanshosi balaxisiisino, hattono Sambatu kiiro sabbakino. Yannate gedensaanni kayinni albinni roore sabbakate loosi aana illachishino. Isi “‘Yesuusi Kiristoosaati’ yaanni isire Ayihudootaho farciꞌranninna rosiisanni hosanno.” (Soq. 18:3-5; 2 Qor. 11:9) Yannate gedensaanni isi Roomaho lame diro usurame heeꞌre, laꞌꞌasira daanno mannira sabbakino, hattono babbaxxitinota borrote sokka borreessino. (Soqqamaasinete Looso 28:16, 30, 31 nabbawi.) Phaawuloosi aye coyino soqqanshosira guficho ikkara diwodhino. Isi “Tenne soqqansho afiꞌnoommo daafira . . . wolqa dibaꞌneemmo” yee borreessino. (2 Qor. 4:1) Ninke Phaawuloosinte gede, uminke looso loosiꞌra hasiissannonkeha ikkirono, heeshshonke giddo Maganu Mangiste looso balaxisiinseemmo.

10-11. Fayyimmate qarrinni kainohunni dhukinke ajirono woꞌma giddonni soqqama dandiineemmohu hiittoonniiti?

¹⁰ Diru akkallenni woy fayyimmate hoongenni kainohunni albi geeshsha minunni mine haꞌne sabbaka dandiineemmokkiha ikkiro nafa, wolu garinni soqqama dandiineemmo. Umi xibbi diro heeꞌrino Kiristaani mannu heeꞌrannowa baalawa sabbakino. Insa afidhu faro baalantera yaano minunni mine hadhe, gudumaaleho, woy sabbakate fultinokki yannara halaale rosiissino. (Soq. 17:17; 20:20) Seeda doogo haꞌne anfeemmokkiha ikkiro, gudumaaleho woy doogote ofolline saꞌꞌaahu higaahura farciꞌra dandiineemmo. Qoleno uminke dilgo assiꞌnanni heeꞌne farciꞌra, sokka borreessine woy silketenni farciꞌra dandiineemmo. Batinye dhuku anje noonsa halashshaano konni garinni farcidhe lowo hagiirre afidhino.

¹¹ Fayyimmate qarri nooheha ikkirono, woꞌma giddonni soqqama dandaatto. Xaano hanni soqqamaasinchu Phaawuloosi lawishsha laꞌno. Isi “Tini jawa wolqa Maganunnite ikkinnina ninketa [diꞌꞌikkitino]” yiino. (2 Qor. 4:7) Isi mitte hige misiyoone ikke haꞌri woyite dhiwamino daafira tini wolqa hasiissinosi. Phaawuloosi Galaatiyu Kiristaanira togo yee borreessino: “Dhiwame kiꞌnewa heeꞌraꞌya, umo Dancha Duduwo kulammoꞌnera doogo ikkitinoeta affinoonni.” (Gal. 4:13) Aterano fayyimmate qarri, akimootahonna towaatannohehu wolu mannira dancha duduwo kulatto faro fanahera dandaanno. Kuni manni roore woyite loosu basera hosanno daafira, halashshaano minunni mine hadhe soqqantanno woyite xaada hooggara dandiitanno.

BIKKU HEESHSHO HEEꞌRA DANDAATTOHU HIITTOONNIITI?

12. Illenke “xunsite laꞌannota” assiꞌrate yaa mayyaate?

¹² Yesuusi togo yiino: “Mannimmate caabbichi illete; kunnira illeꞌne keere [“xunsite laꞌannota,” NW] ikkituro, mannimmaꞌne baala xawaabba ikkitanno.” (Mat. 6:22) Yesuusi hatto yaasi mayyaate? Hatto yaa, hedonke billaallisanno coyiwiinni xeertiꞌne heeshshonke bikkunnita assiꞌra yaano mitte mixo aana illachishate yaate. Yesuusi umisi soqqanshote aana illachishe dancha lawishsha ikkinonke; rosaanosino woꞌmante yannara Yihowa soqqanshonna Mangistesi aana illachishshanno gede rosiisinonsa. Ninkeno ‘balanxe Maganu Gashshootenna keeraanchimmasi hasiꞌne’ heeshshonke giddo Kiristaanu soqqanshonke illachinsheemmoha ikkiro, Yesuusi lawishsha harunsinanni heeꞌnoommo yaate.—Mat. 6:33.

13. Soqqanshonke illachishate mayi kaaꞌlankera dandaanno?

¹³ Soqqanshonke aana illachisha dandiineemmo doogga giddo mitte, bikku heeshsho heeꞌrate; hatto assanke mannu Yihowa afannonna baxanno gede kaaꞌlineemmota lowo yanna afiꞌneemmo gede assitannonke.c Lawishshaho lamalate giddo seeda saate soqqama dandiineemmo gede, uminke looso loonseemmo yanna biddi assiꞌra dandiineemmo? Yannanke gudannoha mito boohaarsha agura dandiineemmo?

14. Mittu minaanninna minaama albinni roore soqqanshonsa aana illachishate yee maa assino?

¹⁴ Iiliyaasi yinannihu songote cimeessinna minaamasi hatto assino. Iiliyaasi togo yiino: “Hakkawoyintenni suwisaano ikka hoongummorono, albinni roore sabbaka dandiineemmo doogo noota hendummo. Konni daafira hatto assate kaaꞌlannonkeha shiima shiima coye biddi assiꞌra hananfummo. Lawishshaho, fushshineemmo woxe ajinshummo, seeda saate boohaara agurrummo, hattono loosiisaanonke loonseemmo saate ajishshannonke gede xaꞌmiꞌnummo. Konni garinni hawarro hawarro soqqama, haammata manna Qullaawa Maxaafa xiinxallisa, hattono aganu kiiro lamalate giddo Sanyotenni Arbete geeshsha noo barri giddo lame hinge soqqansho fula hananfummo. Tini hagiirraamma ikkineemmo gede assitinonke!”

SABBAKATENNA ROSIISATE DANDOOKKI WOYYEESSIꞌRA DANDAATTOHU HIITTOONNIITI?

15-16. Umi Ximootewoosi 4:13, 15 kultanno garinni, sabbakatenna rosiisate dandoonke woyyeessiꞌra dandiineemmohu hiittoonniiti? (“Woꞌma Giddonni Soqqamate Kaaꞌlitannoe Mixo” yitanno saaxine lai.)

¹⁵ Woꞌma giddonni soqqama dandiineemmoti wole doogo, sabbakate dandoonke woyyeessiꞌrate. Mite ogimma noonsa manni egennonsanna dandoonsa lexxitanno gede woꞌmanka woyite rosanna qajeela hasiissannonsa. Hatteente gede, sabbakate loosinkenni albinni roore dancha guma afiꞌra dandiineemmo gara woꞌmante yannara rosa hasiissannonke.—Law. 1:5; 1 Ximootewoosi 4:13, 15 nabbawi.

¹⁶ Ikkina sabbakatenna rosiisate dandoonke woyyeessiꞌra dandiineemmohu hiittoonniiti? Lamalate kiiro assiꞌneemmohu Kiristaanu Heeshshonna Soqqansho Gambooshshiwa uyinanninke biddishsha seekke harunsatenniiti. Konni gambooshshiwa sabbakate dandoonke dirimu dirimunni woyyeessiꞌra dandiineemmo gara qajeelleemmo. Lawishshaho, gambooshshu liqambartichi kifile shiqishshino rosaanora amaale aanno woyite ninkeno soqqanshonke woyyeessiꞌra dandiineemmo doogga ronseemmo. Aantanno yannara soqqansho fulleemmo woyite, tenne amaale harunsa dandiineemmo. Soqqanshonke gaamohu aliidi laꞌꞌaanchi kaaꞌlannonke gede xaꞌmiꞌra woy gikki yiino halashshaanchi, suwisaanchi woy woradu aliidi laꞌꞌaanchi ledo soqqamankeno kaaꞌlitannonke. Mitte mittenta Rosiisate Horoonsiꞌneemmo Borro seekkine horoonsiꞌra ronsummoro, sabbakatenna rosiisate loosi roore hagiirsiisannonke.

17. Maganoho woꞌma giddonni soqqamakki mayi atoote afiꞌratto gede assitannohe?

¹⁷ ‘Maganu ledo loosa’ lowo ayirrinyeeti! (1 Qor. 3:9) ‘Woyyanno coye woy roore hasiisanno coye badde affe’ Kiristaanu soqqanshokki aana illachishattoha ikkiro, Yihowa ‘hagiidhitanni magansiꞌra’ dandaatto. (Fil. 1:10; Far. 100:2) Aye geeshshi qarri iilliherono woy dhuku anje amadduherono, Maganu soqqamaancho ikkootto daafira, isi woꞌma giddonni soqqama dandaatto gede wolqa aannoheta huluullantooti! (2 Qor. 4:1, 7; 6:4) Nootto gari ikkihano ikkiro, woꞌma giddonni soqqamitto geeshsha ‘umikkira kuꞌlattore afiꞌratto.’ (Gal. 6:4) Woꞌma giddonni soqqamattoha ikkiro, Yihowanna manna baxattota leellishatto. “Hatto assittoro, ateneenna macciishshitannohere gatisatto.”—1 Xim. 4:16.