Xiinxallitinanni Gara Woyyeessidhe!

1. Mitootaho xiinxalla qarra ikkitannonsahu mayira ikkara dandaanno?

XAA yannara batinyu manni heeshshote hasiisannonsare afiꞌrate uffi qocci yaanno. Lowo roduuwinkeno maatensara hasiisannore wonshate seeda saate loossanno. Wolootaho kayinni loosu base haꞌratenna higate lowo yanna hasiissannonsa. Hasiisannonsare afiꞌrate wolqate looso loossannorino woꞌmitino. Kuri jawaatte loossanni hossanno roduuwanke, hawarro daafursannonsati egennantinote! Konni garinni daafurte hossinorira xiinxalla gooddo ikkitansara dandiitanno.

2. Xiinxallote injiitannohe yanna hiittenneeti?

² Ikkollana ninke baalunku Maganu Qaalenna Qullaawu Maxaafi aana xintantino borro seekke xiinxallate yanna gaaꞌma hasiissannonke. Yihowa ledo danchu jaaloomi heeꞌrannonkehunna hegere heeshsho afiꞌneemmohu hatto assinummoro callaati! (1 Xim. 4:15) Mitootu soodo gutte kaꞌe qaxaqaꞌa yee heeꞌreenna hattono daafuru fulinonsa yannara xiinxallitanno. Wolootu kayinni hawarro shiima daqiiqa gaaꞌmite, hedonsa billaallitanno gede assannori nookkiwa ayyaanaamittete sagale sagaꞌlitanno, hattono hiincitanno.

3-4. Attammanninna elekitiroonikisetenni qixxeessinanni borro lainohunni maa biddi assinoonni? Mayira?

³ Xiinxallate yanna gaaꞌma hasiissannota afootto. Ikkollana, Maa xiinxalla hasiissannonke? ‘Nabbambanniri baete. Kayi baalankare nabbawe guda didandoommo’ yite hedattoha ikkara dandaanno. Mitootu shiqqannonketa ayyaanaamittete sagale baala sagaꞌla dandiitinoha ikkirono, batinyu roduuwinkera kayinni togo assitanno yanna afiꞌra qarra ikkitinonsa. Aliidi Bisino tenne afino. Konni daafira, muli diri kawa attammannitano ikko elekitiroonikisetenni qixxeessinanni borro ajinshoonni.

⁴ Lawishshaho, jw.org^® aana hattono JW Biroodikaastera batinye jawaachishshanno woꞌnaalshuwa fultanno daafira, Yihowa Farciꞌraasineha Diru Maxaafa qixxeessa agurroonni. Qoleno mannaho ellanniti Agarooshshu Shaenna Baqqi Yiiyye! yinanni metseete xa dirunni sase higge calla fultanno. Hatto assinoonnihu, magansiꞌranke ledo xaadooshshe afiꞌrinokki coye assineemmota roore yanna afiꞌnammora hende diꞌꞌikkino. Hatteentenni ‘roore hasiisanno coye’ illachinsheemmo gedeeti. (Fil. 1:10) Konninni aanchine roore hasiissanno coyibba illachishanna Qullaawu Maxaafi xiinxallonni kaaꞌlo afiꞌra dandiineemmo gara ronseemmo.

BALAXA HASIISSANNORE BALAXISIISI

5-6. Seekkine xiinxalla hasiissannonke borro hiittenneeti?

⁵ Balaxisiisa hasiissannonkeri maati? Maganu Qaale barru baala xiinxallate yanna gaaꞌma hasiissannonketi egennantinote. Lamalannite Qullaawu Maxaafi niwaawera nabbambanni fooliishshuwa ajinshoonnihu nabbamboommore hiincatenna seekke xiinxallate yanna afiꞌneemmo gedeeti. Mixonke nabbambammora kulloonninke gafa nabbawe guda calla ikkitukkinni Qullaawu Maxaafi sokka wodananke kakkayissannonna Yihowawa roore shinqeemmo gede kaaꞌlitannonke gedeeti.—Far. 19:14.

⁶ Seekkine xiinxalla hasiissannonketi wole borro hiittenneeti? Agarooshshu Shaenna Songonnite Qullaawu Maxaafi Xiinxallora, hattono Kiristaanu Heeshshonna Soqqansho Gambooshshiwa shiqqanno kifilla seekke qixxaawa hasiissannonketi egennantinote. Qoleno yannate kiiro fultannota Agarooshshu Shaenna Baqqi Yiiyye! yinanni metseetta faana ganne nabbawa hasiissannonke.

7. Webisayitenkera woy JW Biroodikaastera fulannore baala faana ganne nabbawa woy laꞌꞌa dandaa hoongummoro hexxo mudha hasiissannonkekkihu mayiraati?

⁷ Ikkollana ‘JW Biroodikaasteranna jw.org aana fulano rosino lowoho’ yite hedattoha ikkara dandaanno. Hanni mitto lawishsha laꞌno: Hoteelete addi addi sagale heedhanno. Ikkollana mannu noo sagale baala hajaccannokkiti egennantinote. Hatteentenni gama sagale calla doorre hajaccinanni. Hatteente gede, atino elekitiroonikisetenni qixxaawinore baala horoonsiꞌra dandaa hoogittoro, hexxo mudhitooti. Dandiitto geeshsha nabbawatenna laꞌꞌate woꞌnaali. Xa hanni xiinxallote yaa mayyaateronna xiinxallonkenni horo afiꞌra dandiineemmohu hiittoonniitiro laꞌno.

XIINXALLO LOOSOHO!

8. Agarooshshu Shae xiinxallora qixxaawatto woyite maa maa assa dandaatto? Hatto assa kaaꞌlitannohehu hiittoonniiti?

⁸ Xiinxallote yaa, roso afiꞌrate yine nabbambannire seekke illachishate. Qoleno xiinxallineemmo borro iimi adda calla nabbawanna xaꞌmote dawaro ikkitanno hedo xuruura calla diguddanno. Lawishshaho, Agarooshshu Shae qixxaawatto woyite balaxxe birxichu hanafora nooha rosu guulcho nabbawi. Hakkiinni birxichu cuꞌmo, cinaancho birxichuwanna xaphishshu xaꞌmuwa taxxi yite hedi. Aanchite woꞌma birxicho sununni wodanchitanni nabbawi. Gufonnita qara hedo amaddinota coyi fooliishsho illachishi; duucha woyite tini coyi fooliishsho heedhannohu gufota hanaforaati. Qara hedo amaddinoti coyi fooliishsho, hatti gufo mayi daafira xawissanni nooro afate kaaꞌlitannohe. Woꞌma birxicho nabbawatto woyite, mitte mittenti gufo cinaanchu birxichi ledo, hattono rosu cuꞌmo ledo mayi xaadooshshe afidhinoro hedi. Gari geeshsha egennoottokki qaalla hattono ledde xiinxalla hasiꞌratto hedo borreessite amaxxi.

9. (a) Agarooshshu Shae xiinxallineemmo woyite qummeeshshuwa illachisha hasiissannonkehu mayiraati? Hatto assa dandiineemmohu hiittoonniiti? (b) Iyyaasu 1:8 yitanno garinni, qummeeshshuwa nabbawano agurranna maa assa hasiissannonke?

⁹ Agarooshshu Shae metseete Qullaawa Maxaafa xiinxallate kaaꞌlitannonke. Hakko daafira, baalanta qummeeshshuwa roorenkanni “nabbawi” yitannota illachishi. Qummeeshshuwate giddo nooti qara qara qaalla woy handaarra, gufote giddo noo hedo ledo mayi xaadooshshe afidhinoro wodanchate woꞌnaali. Qoleno qummeeshshuwa hiincatenna heeshshokki giddo kuri qummeeshshuwa harunsa dandaatto gara hedate yanna gaaꞌmi.—Iyyaasu 1:8 nabbawi.

10. Ibiraawoota 5:14 yitanno garinni annuwunna amuuwu maatete magansiꞌra yannara qaaqquullinsa xiinxallitanno gara rosiisa hasiissannonsahu mayiraati?

¹⁰ Annuwunna amuuwu lamalate giddo assidhannoti Maatete Magansiꞌra oosonsa hagiirsiissannota ikkitara hasidhannoti egennantinote. Insa mitte mittente maatete magansiꞌra yannara hasaabbanno haja doortannoha ikkirono, lamalate kiiro baxxinoha hagiirsiisanno coye qixxeessa hasiissannonsa yaa diꞌꞌikkino. Annuwunna amuuwu Maatete Magansiꞌrara JW Biroodikaastera aganu kiiro fultanno pirogiraame laꞌꞌa woy babbaxxino coye assa lawishshaho Nohi markaawe akeeka seekka dandiitanno; ikkollana insa oosonsa ma garinni xiinxallitannorono rosiisa hasiissannonsa. Lawishshaho, oosonsa songote gambooshshira qixxaawa dandiitanno gara woy rosu mine tuncu yiinonsa coyira seekkite qixxaabbanno gara rosiisa hasiissannonsa. (Ibiraawoota 5:14 nabbawi.) Qaaqquullu yanna gaaꞌmite mitte Qullaawu Maxaafi hajo lainohunni xiinxalla rossuro, songote, woradunna qoqqowu gambooshshiwa shiqqanno lallawo viidiyo afidhinota ikka hoogguro nafa, seekkite harunsa shota ikkitannonsa. Mitte mittente xiinxallote pirogiraamera yanna gaammeemmo woyite qaaqquullu dironna akata heda hasiissannonketi egennantinote.

11. Qullaawu Maxaafi rosaanonke umonsa dandiite xiinxallitanno gede qajeelsa hasiissannonkehu mayiraati?

¹¹ Qullaawa Maxaafa rosiinseemmo mannino, xiinxallano gara rosa hasiissannonsa. Insa haaruuddu heedhe xiinxallote woy songote gambooshshira qixxaabbanno woyite dawaro xuruurte daggino daafira calla hagiidhineemmo. Ikkollana Qullaawu Maxaafi rosaanonke uminsanni seekkite xiinxallanna kaaꞌlanno garinni xiinxalla dandiitanno gara qajeelsa hasiissannonke. Tini, fonqolu iillannonsa woyite bayichonko roduuwa kaaꞌlo xaꞌmiꞌrantenni borronke xiinxallite dancha amaale afidhanno gede kaaꞌlitannonsa.

XIINXALLITINANNI WOYITE MIXO HEEDHOꞌNE

12. Maa mixiꞌne xiinxalla dandiineemmo?

¹² Xiinxalla baxisannohekkiha ikkiro, xiinxallokkinni hagiirre afiꞌrattoha lawa hoogahera dandaanno. Ikkollana xiinxallokkinni hagiirre afiꞌra dandaatto. Umi qara shiima yanna xiinxalli; hakkiinni sunu sununni xiinxallatto yanna leda dandaatto. Xiinxallatto woyite mixo heedhohe. Xiinxallineemmohu qaru korkaati albinni roore Yihowawa shiqateeti. Ikkollana, mittu manchi xaꞌminonke xaꞌmora dawaro qolate woy iillinonke qarrira mala afiꞌrate yineno xiinxallinammora dandiineemmo.

13. (a) Mittu wedellichi ammanannore wolootaho xawisate maa assa dandaanno? (b) Qolasiyaasi Sokka 4:6te noo amaale harunsa dandaattohu hiittoonniiti?

¹³ Lawishshaho, ati roso rossanni nootto wedellichaati? Ledokki rossanno ooso suutu soorro ammantannoha ikkara dandaanno. Qullaawu Maxaafi rosira halante coyiꞌra hasiꞌrattoha ikkirono, hatto assate dandoo noohekkiha lawahera dandaanno. Hatto ikkiro, tenne hajo daafira seekkite xiinxalla hasiissannohe! Xiinxallatto woyite mixokki lamete: (1) Maganu baalanka coye kalaqinota albinni roore buuxatenna (2) ammanattore wolootaho ammansiisanno garinni xawisate. (Rom. 1:20; 1 Phe. 3:15) Balaxxe ateneeto, ‘Ledoꞌya rossanno ooso suutu soorro ammantanno gede assinonsari maati?’ yite xaꞌmi. Hakkiinni borronke horoonsidhe seekkite xiinxalli. Ammanattore wolootaho xawisa ati hedootto geeshsha qarrissannota ikka hooggara dandiitanno. Rooru manni suutu soorro ammanannohu, ayirrisanno manchi kuni rosi halaaleho yee kulinonsa daafira callaati. Mitte woy lame ammansiissanno taje afiꞌrittoro, addanka afate hasiꞌre xaꞌmo xaꞌmanno mannira duushshitanno dawaro qola dandaatto.—Qolasiyaasi Sokka 4:6 nabbawi.

HASATTOKKI LEXXITANNO GEDE ASSIꞌRI

14-16. (a) Gari geeshsha afoottokkite Qullaawu Maxaafi maxaaffa daafira afate mayi kaaꞌlahera dandaanno? (b) Tenne gufo giddo kulloonni qummeeshshuwa horoonsidhe Amootsi maxaafi daafira roore afa dandaattohu hiittoonniiti? (“Qullaawu Maxaafi Giddo Kulloonni Manni Ledo Egennami!” yitanno saaxine lai.)

¹⁴ Lawishshaho, hanni muli yannara gambooshshunniwa shiimmaadda masaalote maxaaffab giddo mitto xiinxallinammoraati yine hendo; konne maxaafa borreessino masaalaanchi daafira garire afoottokkiha ikkara dandaanno. Hatto ikkiro, balaxxe assa hasiissannohe coyi, kuni masaalaanchi borreessinori daafira afate hasattokki lexxitanno gede assiꞌrate. Hatto assa dandaattohu hiittoonniiti?

¹⁵ Umihunni, ateneeto togo yite xaꞌmi: ‘Konni maxaafi borreessaanchi daafira maa afoommo? Isi ayeti? Mama heeꞌrino? Loosisi maati?’ Borreessaanchu daafira afakki, horoonsiꞌrino qaallanna coyiꞌrino lawishshuwa seekke huwatate kaaꞌlitannohe. Qullaawa Maxaafa nabbawatto woyite, borreessaanchu akata leellishshanno xawishshuwa huwatate woꞌnaali.

¹⁶ Hakkiinni maxaafa borreessinoonni yanna afate woꞌnaali. Qullaawa Borrote Haaro Alame Tirora qoola 1594-1595 (Amaaru Afoo) nooti “Qullaawu Maxaafi Maxaaffa Sanxarazhe” yitanno saaxine tenne afate kaaꞌlitannohe. Qoleno Maganu Qaale Xiinxalli yitanno buukileetera qoola 17-18 nooti masaalaanotenna mootoollate daafira kultanno sanxarazhe kaaꞌlitannohe.c Xiinxallitanni noottohu masaalote maxaafa ikkino daafira, konne maxaafa borreessini yannara ikkinore afate woꞌnaala hasiissannohe. Togo yite heda dandaatto: ‘Kuni masaalaanchi mannu hiikkonne busha akata woy rosicho biddi assiꞌranno gede kaaꞌlate woꞌnaalino? Isi waro heedhinori ayeooti?’ Tenne seekkite huwatate wole Qullaawu Maxaafi maxaaffa laꞌꞌa hasiissannoheha ikkara dandaanno. Lawishshaho, masaalaanchu Amootsi waro ikkinore roore huwatate, 2 Mootoollanna 2 Duduwira noota mite qummeeshshuwa laꞌꞌa kaaꞌlitahera dandiitanno; tenne afate Amootsi 1:1te noota fiixxanno hedo kultanno qummeeshshuwa laꞌꞌa dandaatto. Qoleno Amootsi waro heeꞌrinohu Hoosei borreessino maxaafa laꞌꞌa dandaatto. Tini baalanti taje Amootsi waro ikkinore roore afate kaaꞌlitannohe.—2 Mot. 14:25-28; 2 Dud. 26:1-15; Hos. 1:1-11; Amo. 1:1.

SHIIMMAADDA COYE ILLACHISHI

17-18. Gufote giddo kulloonnita woy wole umikki lawishshuwa horoonsidhe shiimmaadda coye illachisha Qullaawu Maxaafi niwaawe hagiirsiissannota assitanno gara xawisi.

¹⁷ Qullaawa Maxaafa huwatate, quqquxamme nabbawa kaaꞌlitanno. Lawishshaho, Zakkaariyaasi fooliishsho 12te noota Mesihichu reyo daafira kultanno masaalo nabbabbanni nootto yine hendo. (Zak. 12:10) Kiiro 12te aana “Naataani sirchi” Mesihichu reyonni hururame wiꞌlannota nabbawitto. Tenne hedo mulla nabbabbe saꞌꞌantenni taxxi yite aante noo xaꞌmuwa heda dandaatto: ‘Naataani sirchinna Mesihichu mereero noo fiixoomi maati? Tenne hajo daafira wole mashalaqqe afiꞌreemmo doogo no?’ Hakkiinni seekkite xiinxalla hanafatto. Konni qummeeshshira nooti fiixxanno hedo kultanno qummeeshshuwa 2 Saamueeli 5:13, 14wa massitannohe; hakkiicho Naataani, Moote Daawiti ooso giddo mitto ikkinota nabbawatto. Fiixxanno hedo kultanno qummeeshshuwa hunda noohu layinki qummeeshshi yaano Luqaasi 3:23, 31 Maariyaami sirchi kali widoonni Naataani Yesuusi akaakka giddo mitto ikkinota kultanno.d Tenne afakki roore quqquxamatto gede assitannohe! Yesuusi Daawiti sirchi kali widoonni ilamannota masaalotenni kulloonnita afootto. (Mat. 22:42) Ikkollana Daawitira 20 saꞌannoti labballi ooso noosi. Ikkina Zakkaariyaasi Naataani sircho calla bade kule insa Yesuusi reyora hururante wiꞌlitannota coyiꞌrasi dhagge diꞌꞌikkitino?

¹⁸ Hanni wole lawishsha laꞌno. Luqaasi fooliishsho 1te, sokkaasinchu Gebirieeli Maariyaamiwa mare ise iltanno qaaqqi daafira togo yee kulinose: “Isi jawa ikkanno; Woꞌmunkura Aliidi Magani Beettootino yinannisi. Mootichu Maganu, annisi Daawitiha ayirrinyu barcima aannosi. Yaiqoobi minirano hegerera moohanno.” (Luq. 1:32, 33) Konne qummeeshsha nabbambeemmo woyite, Yesuusa ‘Woꞌmunkura Aliidi Magani Beettooti yinannisi’ yitanno hedo calla illachinsheemmoha ikkara dandaanno. Ikkollana Gebirieeli Yesuusi moote ikkannotano coyiꞌrino. Tenne hedo nabbambeemmo woyite, Maariyaami tenne macciishshituti hiitto ikkitinoro heda dandiineemmo. Maariyaami Gebirieeli hatto yiiseta, Yesuusi Moote Heeroodisi woy isi gedensaanni Israeelete mookkannote wole gashshaanonni aanche moohanno yite heddino ikka? Yesuusi moote ikkiro, Maariyaami mootete ama ikkate qoosso afidhanno, hattono maatese ledo mootete mine heedhanno. Ikkollana Maariyaami Gebirieelira tenne hedo kayisse kultinota leellishshanno taje dino; qoleno lame Yesuusi rosaano xaꞌmidhino garinni, Maariyaami Yesuusi Mangistesira baxxino ayirrinye aannose gede xaꞌmidhinota kulannori dino. (Mat. 20:20-23) Tenne shiimmaadda mashalaqqe afanke, Maariyaami umose heeshshi assitannota ikkitinota albinni roore huwanteemmo gede kaaꞌlitannonke.

19-20. Yaiqoobi 1:22-25 nna 4:8 garinni xiinxallineemmohu qaru korkaati maati?

¹⁹ Maganu Qaaleno ikko Qullaawu Maxaafi aana xintantino borro xiinxallineemmohu qaru korkaati, albinni roore Yihowawa shiqate ikkinota deꞌnoonke. Qoleno Maganu albaanni ninke ‘hiittooreetiro’ layiꞌranna iso hagiirsiisate maa biddi assiꞌra hasiissannonkero afa hasiꞌneemmo. (Yaiqoobi 1:22-25 nna 4:8 nabbawi.) Konni daafira, xiinxalla hananfammora albaanni Yihowa ayyaanasi aannonke gede huuccatto assiꞌra hasiissannonke. Yihowa xiinxallineemmori kaaꞌlannonke gedenna ninkeneeto isi laꞌꞌannonke garinni laꞌꞌa dandiineemmo gede kaaꞌlankera huucciꞌra hasiissannonke.

²⁰ Faarsaasinchu ammanaminohu Maganu soqqamaasinchi daafira coyiꞌranni togo yiino: “Kaaliiqi seerinni hagiidhanno; seerasino hashshanna barra buuxanni qaaganno. . . . Assiꞌrannori baalu qinaannosi.” Ninke baalunku konni ammanaminohu Maganu soqqamaanchi gede ikkino!—Far. 1:2, 3.