‘Anewa Amme! Ani Fooliishshiisheemmoꞌnena’

1. Maatewoosi 11:28-30 kultanno garinni Yesuusi mayi qaale eino?

YESUUSI macciishshanni noosi mannira ‘Anewa Amme! Ani Fooliishshiisheemmoꞌnena’ yee jawaachishanno qaale coyiꞌrinonsa. (Maatewoosi 11:28-30 nabbawi.) Yesuusi eino qaali shaaꞌꞌa diꞌꞌikkino. Hanni lawishshaho, isi buutote dhibbi waadannose manchora assinore hendo.

2. Yesuusi dhibbu waadannose manchora maa assino?

² Tini mancho lowo geeshsha kaaꞌlo hasidhino. Ise hurre afiꞌrate lowo akimootiwa hadhino. Qoleno 12 diro woꞌma dhibbu waadinoseha ikkirono hurre diafidhino. Muse Seeri garinni ise battaabbinote. (Lew. 15:25) Tini mancho Yesuusi dhiwantinore hursanni noota macciishshituti, isinni xaada hasidhino. Isinni xaadduti uddanosi qacce kisse bayichonko hurtu. Yesuusi ise hurse calla diagurinose; hatteentenni albi gede ayirrado mancho assinose. Lawishshaho, Yesuusi ise hasaawisi woyite shaqqillunni “beettoꞌya” yee woshshe ayirrisannoseta leellishino. Ise fooliishshonna jawaante afidhinoti dihuluullissannote!—Luq. 8:43-48.

3. Hiikkuri xaꞌmuwara dawaro afiꞌneemmo?

³ Mancho Yesuusinni xaadate iso hasidhanni hadhinota wodanche. Ise Yesuusi isewa daara agartukkinni ise umise martino. Yannankera ninkeno Yesuusiwa marate sharrama hasiissannonke. Xaa yannara Yesuusi isiwa maranno manni dhibba maalaletenni dihursanno. Ikkirono, xaano ‘Anewa Amme! Ani Fooliishshiisheemmoꞌnena’ yee koyisanni noonke. Konni birxichira aante noote onte xaꞌmuwara dawaro afiꞌneemmo: Yesuusiwa mara dandiineemmohu hiittoonniiti? Yesuusi “qambaraꞌya qotiꞌnera dukke” yaasi mayyaate? Yesuusi lawishshinni maa ronseemmo? Isi uyinonke loosi fooliishsho aannonke yineemmohu mayiraati? Yesuusi qambara duqqine fooliishsho afiꞌne heeꞌra dandiineemmohu hiittoonniiti?

“ANEWA AMME”

4-5. Yesuusiwa mara dandiineemmoti mite doogga hiikkuriiti?

⁴ Yesuusiwa mara dandiineemmoti mitte doogo, dandiinummo deerrinni isi coyiꞌrinorinna assinori daafira ronseeti. (Luq. 1:1-4) Ninke riqiwe wolu hatto assankera didandaanno; Qullaawu Maxaafi Yesuusi daafira rosiisannore xiinxalla ninke mitti mittinke qeechaati. Qoleno cuuamate murciꞌnenna Kiristoosi rosaano ikkine isiwa mara dandiineemmo.

⁵ Yesuusi “Anewa amme” yiino koyishsha adhineemmoti wole doogo, kaaꞌlo hasiissunkero songote cimeeyyewa marate. Yesuusi geꞌreewosi towaatate kuri ‘elto’ ikkitino labballo horoonsiꞌranno. (Efe. 4:7, 8, 11; Yoh. 21:16; 1 Phe. 5:1-3) Kaaꞌlo afiꞌrate cimeeyyenniwa ninke uminke mara hasiissannonke. Cimeeyye ninke hasaaphinummokki wodaninkera noore affe kaaꞌlitannonke yine agadha dihasiissannonke. Hanni Juuliyeni yinanni rodii lawishsha laꞌno; isi togo yiino: “Fayyimmate qarrinni kainohunni Beeteelete soqqanshoꞌya agure fulummo; hakkiinni jaallaꞌya giddonni mittu cimeeyye towaanyo assitaera xaꞌmiꞌrammora amaalie. Umi qara cimeeyyete towaanyo hasiissannoeha dilawinoe. Gedensoonni kayinni kaaꞌlo xaꞌmiꞌrumo; insa assitinoe towaanyo heeshshoꞌya giddo afiꞌroommote muxxe elto giddo mittete.” Juuliyeni kaaꞌlitute lamu cimeessinte gede ammanantino cimeeyye Kiristoosi “hedo” huwatate yaano isite gedee hedonna akati heeꞌrannonke gede kaaꞌlitannonke. (1 Qor. 2:16; 1 Phe. 2:21) Togoo kaaꞌlo ninkera lowo eltooti!

“QAMBARAꞌYA QOTIꞌNERA DUKKE”

6. Yesuusi “Qambaraꞌya qotiꞌnera dukke” yaasi mayyaate?

⁶ Yesuusi “Qambaraꞌya qotiꞌnera dukke” yaasi “Silxaaneꞌya ayirrisse “ yaasi ikkitara dandiitanno. Qoleno “qambara ane ledo dukkine ledoꞌya Yihowara soqqame” yaanni nooha ikkara dandaanno. Lamenti yaatto, qambara duqqa yiniti looso ikkitinota leellishshanno.

7. Maatewoosi 28:18-20 kultanno garinni hiikkonne looso uyinoonninke? Maa addaxxa dandiineemmo?

⁷ Heeshshonke Yihowara sayinse uyine cuuammeemmo woyite, Yesuusi koyishsha adhinanni heeꞌnoommo. Yesuusi baalunku manni isiwa daanno gede koyisino; isi giddonsanni Maganoho soqqama hasidhannore haaꞌranno. (Yoh. 6:37, 38) Kiristoosi harunsaano baalanti Yihowa Yesuusira uyinoha kaajja looso loosate qoosso afidhino. Konne looso loonseemmo yannara, Yesuusi duuchanka woyite ninke ledo heeꞌre kaaꞌlannonketa addaxxa dandiineemmo.—Maatewoosi 28:18-20 nabbawi.

“ANEWIINNI ROSSE”

8-9. Umo heeshshi assanno mannira Yesuusiwa daa diqarrissannonsa yineemmohu mayiraati? Ninkeneeto hiikkuri xaꞌmuwa xaꞌma hasiissannonke?

⁸ Umo heeshshi assanno mannira Yesuusiwa daa diqarrissannonsa. (Mat. 19:13, 14; Luq. 7:37, 38) Hatto yineemmohu mayiraati? Hanni Yesuusinna Farisootu mereero noo badooshshe laꞌno. Kuri ammaꞌnote murrooti kaajjaddahonna naaxxaleeyyete. (Mat. 12:9-14) Yesuusi kayinni manna baxannohonna umo heeshshi assannoho. Farisootu leellama baxxannoreetinna dagate giddo noonsa silxaanenni naaxxitannoreeti. Yesuusi hattoo hasatto giwino; isi harunsaanosi mimmitinsara woriidi soqqamaancho ikkitara rosiisino. (Mat. 23:2, 6-11) Farisootu wolootaho aanaanni higge waajjishiishshe gashsha hasidhanno. (Yoh. 9:13, 22) Yesuusi kayinni woloota baxillunninna shaqqadu qaalinni fooliishshiishino.

⁹ Yesuusi lawishshinni ma ronseemmo? Ninkeneeto togo yine xaꞌma hasiissannonke: ‘Wolootu shaqqadonna umo heeshshi asseemmoha ikkoommohu gede assite laꞌannoe? Wolootaho soqqamate yee mannu mishanno looso looseemmo? Wolootaho shaqqille leellisheemmo?’

10. Yesuusi ledosi loosanno manna ma garinni amadino?

¹⁰ Yesuusi wolootu ledosi loossu yannara salaamenna hagiirre afidhanno gede assino; hattono insa qajeelsa baxanno. (Luq. 10:1, 19-21) Isi rosaanosi xaꞌmo xaꞌmitanno gede jawaachishino; hattono hedonsa coyidhanna macciishsha baxanno. (Mat. 16:13-16) Shaqqado basera kayinsoonni muro gede rosaanosi lattino. Insa Yesuusi rosiisino roso adhitino daafira danchu loosinni guma laaltino.

11. Ninkeneeto hiikkuri xaꞌmuwa xaꞌma hasiissannonke?

¹¹ Atera silxaane noohe? Hatto ikkiro ateneeto togo yite xaꞌmi: ‘Loosu bayicho woy mini giddo woloota ma garinni amadeemmo? Keeru heeꞌranno gede asseemmo? Wolootu xaꞌmo xaꞌmitanno gede jawaachinsheemmo? Hedonsa coyidhanno woyite macciishsheemmo?’ Farisootu gedeere ikka dihasiꞌneemmo; insa xaꞌmo xaꞌmannonsa manna dibaxxanno, hattono insatenni baxxitino hedo noonsa mannira darte iillishshanno.—Maq. 3:1-6; Yoh. 9:29-34.

“FOOLIISHSHO AFIDHINANNI”

12-14. Yesuusi uyinonke looso loosa fooliishsho afiꞌneemmo gede assitannonke yineemmohu mayiraati?

¹² Yesuusi uyinonke looso loosa fooliishsho afiꞌneemmo gede assitannonke yineemmohu mayiraati? Hatto yineemmo gede assannonkehu batinyu korkaati no; hanni kuri giddo boode laꞌno.

¹³ Taalle nookki loosiisaano noonke. Qaru Loosiisaanchinke Yihowa galatiweelonna kaajjado mooticha diꞌꞌikkino. Isi loonseemmo looso naadanno. (Ibi. 6:10) Qoleno Yihowa uyinonke looso loosa dandiineemmo wolqa aannonke. (2 Qor. 4:7; Gal. 6:5) Mootenke Yesuusino dancha lawishsha ikkinonke. (Yoh. 13:15) Ninke towaatate shoomantino cimeeyyeno ‘jawu allaalaanchi’ Yesuusi lawishsha harunsate woꞌnaaltanno. (Ibi. 13:20; 1 Phe. 5:2) Insa ninke towaatate, rosiisate, massagatenna agarate dandiiture baala assitanno.

¹⁴ Ledonke loossannori baalunkunni woyyitinoreeti. Ninke loonseemmohu gedeeha hagiirsiisanno looso loosannohunna ninke gede baxxannonsa jaalla noonsahu wolu manni dino. Hanni danchu amanyooti noonsare ikkiturono, insaneeto keeraano ikkitinohu gede assite laꞌannokkiri ledo loosate afiꞌnoommo qoosso hendo. Insa lowo dandoo noonsare ikkiturono, dhukansa affinoreeti; hattono wolootu insanni roortinohu gede assite heddanno. Insa ninke ledonsa loonseemmori gede assita calla ikkikkinni jaallansa gede assite laꞌannonke. Baxxannonke daafira heeshshonsa nafa ninke daafira sayise aate badhera dihigganno.

15. Loonsanni heeꞌnoommo loosi hiittooho?

¹⁵ Taalle nookki loosi noonke. Mannaho Yihowa daafira halaale rosiinseemmo, hattono Daawuloosi kapho xawo fushshineemmo. (Yoh. 8:44) Sheexaanu mannaho duhe afannokki duha duhisiisino. Lawishshaho, isi Yihowa cubbonke gatona diyaannonke hattono baxannonkehu dino yine hendammora hasiꞌranno. Kuni, mannu hexxo mudhanno gede assannoho gawajjanno kaphooti! Kiristoosiwa marrummoro, isi cubbonke gatona yaannonke. Yihowa baalanka lowo geeshsha baxannonke. (Rom. 8:32, 38, 39) Mannu Yihowa addaxxa rosanno gede kaaꞌlanna heeshshonsa woyyaabbanna laꞌꞌa lowo atooteeti.

YESUUSI QAMBARA DUKKINE FOOLIISHSHO AFIDHINE HEEDHE

16. Yesuusi dukke yiinonke duhi wolu duqqa hasiissannonke duhinni baxxinohu hiittoonniiti?

¹⁶ Yesuusi dukke yiinonke duhi heeshshonke giddo duqqa hasiissannonkehu wolu baalunku duhinni baxxinoho. Lawishshaho, barra uminsa looso loossanni hossannori giddo batinyu hawarro daafurtanno; hattono insa loosinsanni hagiirraamma diꞌꞌikkitanno. Yihowaranna Kiristoosira soqqammummoro kayinni hagiirrenna harshammo afiꞌneemmo. Barra loosunniwa daafurre honsoommori hawarro gambooshshe haꞌneemmohu sheshifante ikkara dandaanno. Kayinni gambooshshuwiinni hingeemmo woyite fooliishshonna jawaante afiꞌneemmo. Qoleno sabbakate woꞌnaallummoronna hojju xiinxallo assiꞌnummoro, jawaantenna fooliishsho afiꞌneemmo. Hatto assate sharrammummoro lowo atoote afiꞌneemmo.

17. Maa ammane adha hasiissannonke?

¹⁷ Baalunkura noonke wolqa jilba afidhinota ammana hasiissannonke. Hakko daafira wolqankera aleenni ikkinore loosate woꞌnaalleemmokki gede qoropha hasiissannonke. Lawishshaho, maalaamittete jiro duuꞌnate sharrammanni lowo wolqa gundammora dandiineemmo. Yesuusi ‘Hegere heeshsho afiꞌrate ma asso?’ yee xaꞌminohu dureessu wedellichira yiinore wodanchino. Kuni wedellichi anjesinni kayise Muse Seera agadhannoho. Isi dancha mancho ikkikki digatino; korkaatuno Maarqoosi Wongeeli giddo Yesuusi iso ‘lae baxinosita’ borreessinoonni. Yesuusi wedellicha gashshaancho “Hadhe afiꞌroottore baala hirte woxe buxanete beehi. Hakkunni gedensaanni hoodeꞌya amo!” yee koyisinosi. Isi Yesuusa harunsa hasiꞌrinoha ikkirono, “lowo jiro noosi daafira agura dihasiꞌrino.” (Maq. 10:17-22) Hakko daafira isi Yesuusi qambarasi duhara koyisinosi koyishsha giwe ‘jirote’ borojjicho ikke heeꞌra doodhino. (Mat. 6:24) Ate ikkoottoro maa doodhatto?

18. Yannate kiiro maa layiꞌra hasiissannonke? Mayira?

¹⁸ Yannate kiiro heeshshonke giddo balaxisiinseemmo coyi maatiro layiꞌra hasiissannonke. Mayira? Korkaatuno hatto assanke wolqanke hayyotenni horoonsiꞌnanni heeꞌnoommoronna teꞌee buuxiꞌrate kaaꞌlitannonke. Hanni Maarki yinanni wedellichi yiinore laꞌno: “Lowo diro bikku heeshsho heeꞌranni noommoha lawinoe. Suwisaancho ikke soqqamanni noommoha ikkirono, duucha woyite hedeemmohu woxunna lowo geeshsha injiitino heeshsho heeꞌrate daafiraati. Konnira ‘Heeshshoꞌyara duhu batiꞌrinohu mayiraati?’ yee hedeemmo. Hakkiinni umiꞌya hasatto balaxisiisanni noommotanna Yihowara soqqamate horoonsiꞌranni noommo wolqanna yanna hakkiinni gattinota ikkitinota huwatummo.” Maarki hedosinna heeshshosi gara biddi assiꞌre Yihowara albinni roore soqqama hanafino. Isi lede togo yiino: “Xaano woxu daafira yaadeemmo woyiti nooha ikkirono, Yihowanna Yesuusi kaaꞌlonni fonqolo ikkinoere qeela dandoommo.”

19. Gara ikkitino lao heedhannonke gede assiꞌra hasiissannonkehu mayiraati?

¹⁹ Yesuusi qambara duqqine fooliishsho afiꞌne heeꞌrate sase coye assa hasiissannonke. Umihunni, gara ikkitino lao heedhannonke gede assiꞌra hasiissannonke. Loonsanni heeꞌnoommohu Yihowa looso ikkino daafira, isi hasiꞌranno garinni loosa hasiissannonke. Ninke loosaasinete, Yihowa kayinni Loosiisaanchonkeeti. (Luq. 17:10) Yihowa looso ninke hasiꞌneemmo garinni loosate woꞌnaalleemmoha ikkiro, qambaru ledo wirrijjammanni heeꞌnoommohu gedeeti. Lowo wolqa noosi handi nafa hawuuranno manchi qolanno raga haꞌra giwe wirrijjamannoha ikkiro madiraranna daafurara dandaanno. Yihowa biddishsha harunsineemmoha ikkiro, guficho ikkannore qeelle, didandiineemmo yine hendoommo looso nafa loosa dandiineemmo. Yihowa fajjosi wonshannota ayino hoolasira dandaannokkita qaango!—Rom. 8:31; 1 Yoh. 4:4.

20. Yesuusi qambara duqqa hasiissannonkehu hiittoo hedonniiti?

²⁰ Layinkihunni gara ikkitino hedonni kaꞌne loosa hasiissannonke. Mixonke baxannonke Anninke Yihowa ayirranno gede assate. Umi xibbi diro Yesuusa haafurretenninna uminsa horora yite harunsa hanaffinnorira gedensoonni hagiirrinsa baino; hattono Yesuusi qambara duqqa agurte badhera higgino. (Yoh. 6:25-27, 51, 60, 66; Fil. 3:18, 19) Wole widoonni kayinni, uminsa horo agurte Maganohonna mannaho noonsa baxillinni kaꞌe Yesuusi harunsaano ikkitinori, uullayidi heeshshonsa jeefissa geeshsha Yesuusi qambara hagiirrunni duqqite heedhino; insa iima Kiristoosi ledo soqqamate hexxo afidhino. Ninkeno insante gede gara ikkitino hedonni Yesuusi qambara duqqineemmoha ikkiro, hagiirraamma ikkine heeꞌra dandiineemmo.

21. Maatewoosi 6:31-33 kultanno garinni Yihowa ma assannonketa dihuluullammeemmo?

²¹ Sayikkihunni noore ammanne heeꞌra hasiissannonke. Uminke horo agurre heeꞌratenna diinaggaambe loosate doodhinoommo. Yesuusi dartu iillannonketa kule qorowisiisinonke. Ikkirono, Yihowa iillannonke qarra baala cincine heeꞌneemmo jawaante aannonketa addaxxa dandiineemmo. Qarra cincine saꞌnummo kiiro roore jawaante afiꞌneemmo. (Yai. 1:2-4) Qoleno, Yihowa hasiisannonkere aannonketa, Yesuusi towaatannonketanna roduuwinke jawaachishshannonketa addaxxa dandiineemmo. (Maatewoosi 6:31-33; nabbawi; Yoh. 10:14; 1 Tes. 5:11) Iillannonke fonqolo baala dandee saꞌꞌate kaaꞌlannonkehu lowo coyi noonke!

22. Hagiidhineemmo gede assannonkeri maati?

²² Yesuusi hursino mancho fooliishsho afidhinohu hurtu yannaraati. Ise hegere fooliishsho afidhannohu kayinni ammanantinota Kiristoosi rosaancho ikkituro callaati. Ise Yesuusi qambara duqqate doodhitinoha ikkiro, iima isi ledo soqqamate qoosso afidhanno! Tini mancho Kiristoosi harunsaancho ikkate yite agurtinori afidhanno atoote hendiro garire diꞌꞌikkino. Hexxonke iimira haꞌrano ikkito uullate aana hegerera heeꞌra, Yesuusi “Anewa amme” yee koyisinonke koyishsha adhankenni tashshi yaannonke!