Maganu Yoo Yaara Albaanni Duuchanka Woyite Gari Geeshsha Qorowisiisanno?

AYYARETE gade xiinxallanno manchi raadaare yinanni massari leellishanno misilla horoonsiꞌre lowo manni heeꞌranno qooxeessa gawajjitanno hombobalatte dagganni noota laꞌꞌanno. Kuni manchi hakko mannira hedanno daafira rahe qorowisiisate dandaannore baala assanno.

Hatteente gede Yihowa xa uullate aana heeꞌranno manna ayyarete gade xiinxallanno manchi qorowisiisannotenni roore gawajjitanno “hombobalatte” dagganni noota kule qorowisiisanni no. Isi hatto assannohu hiittoonniiti? Maganu mannu qorowishsha macciishshannota gari yanna fajjannota huluullammeemmokkihu mayiraati? Kuri xaꞌmuwara dawaro afiꞌrate, hanni balanxe Yihowa hundi waro manna qorowisiisino gara laꞌno.

MAGANU BALAXE QOROWISIISINO YANNA

Yihowa hundi waro affanni heedhenni isira hajajama gibbannore qorichishate addi addi “hombobalatte” woy yoo abbannota kule qorowisiisino. (Law. 10:25; Erm. 30:23) Isi hajajama giwinosi manna woꞌmante yannara balaxe qorowisiisino, hattono doogonsa biddi assidhanno gede kulinonsa. (2 Mot. 17:12-15; Neh. 9:29, 30) Isi mannu doogonsa biddi assiꞌranno gede kaaꞌlate duucha woyite uullate aana nooti ammanantino soqqamaasinesi yoote sokkasi wiinante kultanno gede assino.—Amo. 3:7.

Yihowa yoosi mannaho kultanno gede horoonsiꞌrinori ammanantino soqqamaasinesi giddo mittu Nohiiti. Isi hakkawaro heeꞌrinohu maaeelunna finqilu mannira Baote Wayi daanni noota kule waajjikkinni lowo diro qorowisiisino. (Kal. 6:9-13, 17) Qoleno Nohi insa Baote Wayinni gatate maa assa hasiissannonsaro kulinonsa; hakko daafira iso gedensoonni ‘keeraanchimmate’ sawaakicha yinoonnisi.—2 Phe. 2:5.

Nohi diinaggaawe kulinoha ikkirono, Baote Wayi daara albaanni heeꞌrino manni Maganu sokka macciishsha giwino. Insa ammana noonsakkita leellishshino. Hakko daafira “Baote Wayi daye baalanka fee haaꞌre” haꞌreenna reyite gooffino. (Mat. 24:39; Ibi. 11:7) Insa baonsa gambissanno woyite Maganu diqorowisiisinonke yaa didandiitanno.

Yihowa yoo yaara woy “hombobalatte” abbara albaanni shiima yanna gatte heedheenna qorowisiisino woyiti no. Isi hajajama giwino manni macciishshe doogonsa biddi assiꞌranno gede gari yanna uyinonsa. Lawishshaho, isi Gibitsete gobbara Tonne Qoomama abbara albaanni qorowisiisinonsa. Yihowa lamalkihu kaadete Qoomami dirrannota kulte Feriooninna soqqamaanosi qorowisiissanno gede, Musenna Aarooni soyino. Kaade dirritannohu layinki barra ikkina, Yihowa mannu goꞌle gatannowa hasiꞌranno gede gari yanna uyinonsayyanni? Qullaawu Maxaafi togo yaanno: “Feriooni ledo gashshaano giddonni mitu mitu Kaaliiqi coyiꞌrino coye waajjitino daafira, borojjensanna saadansa minira qoꞌlitu. Kaaliiqi coyiꞌrinore lashshi assituri kayinni, soqqamaanonsanna saadansa gobba agurtu.” (Ful. 9:18-21) Rakke qorowishsha macciishshituri wolootu geeshsha gawajjantannokki gede Yihowa gari qorowishsha uyino.

Yihowa Feriooninna soqqamaasinesino tonnikki qoomami dirrara albaanni balaxe qorowisiisinonsa. Insa kayinni qorowishsha dimacciishshitino. (Ful. 4:22, 23) Hakko daafira bayira oosonsa reyitino. Tini dadillissannote! (Ful. 11:4-10; 12:29) Insara qorowishsha macciishshite doogonsa biddi assidhannoti gari yanna noonsa? Ee! Muse Israeelete dagara tonnikki qoomami daanni noota kule rahe qorowisiisino; hattono maatensa gatisiꞌra dandiitanno gara kulinonsa. (Ful. 12:21-28) Ikkina qorowishsha macciishshe hajajaminohu mageeshshi mannaati? Mitootu yitanno garinni, sase miliyoone ikkannohu Israeelete manninna Israeelete wido ikkinokkihu “wolu lowo manni” baotenni gate Gibitsete gobbanni fulino.—Ful. 12:38.

Kuri lawishshuwa leellishshannonte gede Yihowa duuchanka woyite, mannu qorowishshasi macciishshe doogonsa biddi assiꞌrara gari yanna aanno. (Mar. 32:4) Maganu konni garinni qorowisiisannohu mayiraati? Soqqamaasinchu Pheexiroosi Maganu ‘baalunku aagintaawe higara ikkinninna ayino baꞌꞌara hasiꞌrannokkita’ xawisino. (2 Phe. 3:9) Maganu mannaho hedanno. Isi yoote barri daara albaanni mannu maaro earanna amaalesi macciishshe doogonsa biddi assiꞌrara hasiꞌranno.—Isa. 48:17, 18; Rom. 2:4.

YANNANKERA MAGANU QOROWISHSHA MACCIISHSHA

Xaa yannarano baalunku manni uulla woꞌmate aana kullanni heeꞌnoonni qorowishsha macciishshe hajajama hasiissannonsa. Yesuusi uullate aana noo yannara tini alame bayiru qarri yannara baꞌannota kule qorowisiisino. (Mat. 24:21) Yesuusi harunsaanosira albillitte Maganu yaanno yoo daafira xawissanno masaalo kulinonsa; tini masaalo bao gambissanno woyite mayi ikkannoro kultanno. Xaa yannara alamete aana woꞌmitanna laꞌnanni heeꞌnoommoti qara qara ikkito Yesuusi balaxe masaalinote. —Mat. 24:3-12; Luq. 21:10-13.

Tenne masaalo garinni Yihowa xaa yannara mannu isira hajajamaranna soqqamara jawaachishanni no. Yihowa isira hajajamanno manni xaa yannara dancha heeshsho heeꞌraranna albillitte kayinni keeraanchimma heedhannote haaro alamera lowo atoote afiꞌrara hasiꞌranno. (2 Phe. 3:13) Yihowa mannu isi eino qaale ammananno gede jawaachishate heeshsho gatisannoha “Maganu Gashshootiha dancha duduwo” kullanni gede assino; Yesuusi konne duduwo “Gosa baalate naqaashshe ikkanno gede gobba baalate” kullanni yiino. (Mat. 24:14) Maganu “naqaashshe” ikkannoha konne duduwo dudubbanno gede 240 meddi yitanno gobbuwara heedhannota addu soqqamaasinesi gamba asse dirijjite assino. Yihowa lowo manni qorowishshasi macciishshe yoote ‘hombobalattenni’ gatara hasiꞌranno.—Sof. 1:14, 15; 2:2,  3.

Yihowa mannu qorowishshasi macciishshe doogonsa biddi assiꞌrara gari yanna aannoti dihuluullissannote. Taje leellishshannote gede isi duuchanka woyite hatto assanno. Hatteentenni huluullissannonketi ‘Yanna gooffukki mannu Maganu qorowishsha macciishshe hajajamanno?’ yitanno xaꞌmooti. Maganu soqqamaasine ikkinoommo daafira, tini alame baꞌanno barra lowo manni gatanno gede dandaaminke deerrinni kaaꞌla agurroonke.