Xiinxallote Birxicho 41
Bayiru Qarri Yannara Ammanantine Heedhe
“Keeraano baala Kaaliiqa baxxesi; Kaaliiqi halaalaasine agarannonsa.”—FAR. 31:23.
FAARSO 129 Kaajjine Uurrineemmo
GUULCHOa
1-2. (a) Muli barri giddo buusantino daga mayite lallabbanno? (b) Hiikkuri xaꞌmuwara dawaro afiꞌra hasiissannonke?
HANNI buusantino daga Qullaawu Maxaafi giddo kulloonni garinni “salaamenna teense heeꞌnanni yanna daggino!” yite xaalla lallabbe kaꞌinohu gede assine hendo. Insa alame teense heeꞌnannita ikkitino yite naaxxitara dandiitanno. Mangistubba alamete qarra baala tira dandiitino yine hendeemmo gede assate woꞌnaaltanno. Ikkollana insa hakkiinni aane ikkannore horonta hoola didandiitanno! Mayira? Qullaawu Maxaafi masaalo garinni “bao hedeweelcho daggannonsa; gatteno diaffanno.”—1 Tes. 5:3.
2 Hatto ikkiro, dawaro afiꞌra hasiissannonke xaꞌmuwa no: Bayiru qarri yannara mayi ikkanno? Yihowa hattee yannara maa assinammora hasiꞌranno? Bayiru qarri yannara ammanamme heeꞌrate xaanni qixxaawa dandiineemmohu hiittoonniiti?—Mat. 24:21.
BAYIRU QARRI YANNARA MAYI IKKANNO?
3. Yohaannisi Ajuuja 17:5, 15-18 kultanno garinni Maganu Bayira Baabiloone hunannohu hiittoonniiti?
3 Yohaannisi Ajuuja 17: 5, 15- 18 nabbawi. Bayira Baabiloone baꞌanno! Aleenni laꞌnummonte gede buusantino mangistubba hattee yannara ikkannore hoolte diaffanno. Mayira? Korkaatuno ‘Maganu hedosi wodaninsa giddo woranno.’ Tini hedo maati? Suꞌmu Kiristinnano ikko alame woꞌmate noota kaphu ammaꞌno baala hunate.b Maganu tenne hedosi ‘duumu moyichihu tonnu buudi’ wodanira woranno. Tonnu buudi, ‘duumo moyicho’ yaano Buusantino Mangistubba kaaꞌlannoha poletiku gashshoote baala riqiwanno. (Aju. 17:3, 11-13; 18:8) Kuni poletiku gashshooti kaphu ammaꞌno hunanno woyite, bayiru qarri hanafino yaate. Tini alame woꞌmate aana heeꞌranno mannira iillitannote masissanno ikkitooti.
4. (a) Buusantino daga kaphu ammaꞌno hunate kaꞌanno gede assannonsa korkaati maa ikkara dandaanno? (b) Alba kaphu ammaꞌno miilla ikkino manni maa assara dandaanno?
4 Buusantino daga Bayira Baabiloone hunate kaꞌanno gede assannonsa korkaati maatiro dianfoommo. Insa alamete noo ammaꞌno poletiku hajora ganyite anga wortanni salaame afiꞌnannikki gede guficho ikkitino yitara dandiitanno. Woy insa ammaꞌnote dirijjitta lowo woxenna jiro duuꞌnitino yitara dandiitanno. (Aju. 18:3, 7) Kaphu ammaꞌno dirijjitta baꞌanno woyite miillase baala baꞌanno yaa diꞌꞌikkino. Hatteentenni buusantino daga huntannohu ammaꞌnote dirijjitta ikkara dandaanno. Ammaꞌnote dirijjitta baꞌuhu gedensaanni alba ise miila ikkino manni ammaꞌnote massagaano dogginonsata huwatanno; hakko daafira hattee ammaꞌnowiinni xeertiꞌrate woꞌnaaltannoha ikkara dandaanno.
5. Yihowa bayiru qarri daafira mayi qaale eino? Mayira?
5 Qullaawu Maxaafi Bayira Baabiloone baꞌannohu mageeshshi yanna giddootiro dikulanno; ikkirono harancho yanna giddo baꞌannota anfoommo. (Aju. 18:10, 21) Yihowa ‘doodhinorinna’ addu ammaꞌno harunsitannori gattanno gede bayiru qarri barra haranseemmo yee qaale eino. (Maq. 13:19, 20) Ikkina Yihowa bayiru qarrinna Armagedooni oli mereero noo yanna giddo ninke maa assinammora hasiꞌranno?
YIHOWATA HALAALU MAGANSIꞌRA CUꞌMIDHINE HEEDHE
6. Kaphu ammaꞌno giddonni fula calla diꞌꞌikkitanno yineemmohu mayiraati?
6 Sai birxichira ronsummonte gede, Yihowa addu Kiristaani Bayira Baabiloonewiinni xeertiꞌre heeꞌrara hasiꞌranno. Hatto assate kayinni kaphu ammaꞌno giddonni fula calla diꞌꞌikkitanno. Yihowata halaalu magansiꞌra cuꞌmiꞌne heeꞌrate murciꞌra hasiissannonke. Hanni hatto assa dandiineemmota lame doogga laꞌno.
Qarru yannara nafa mitteenni gamba yaanke diagurreemmo (Gufo 7 lai)g
7. (a) Yihowaha keeraancho amanyootu biddishsha cuꞌmiꞌne heeꞌra dandiineemmohu hiittoonniiti? (b) Ibiraawoota 10:24, 25 kultanno garinni roorenkanni xaa yannara Yihowa magansiꞌrate gamba yaa hasiissannonkehu mayiraati?
7 Umihunni, Yihowaha keeraancho amanyootu biddishsha cuꞌmiꞌne heeꞌra hasiissannonke. Alamenniha maaeela amanyoote diharunsineemmo. Lawishshaho, labbaahu labbaahu ledo woy meyati meyate ledo adhama woy wolu gari foorre garaho yine diadhineemmo. (Mat. 19:4, 5; Rom. 1:26, 27) Layinkihunni ammanate roduuwinke ledo Yihowa magansiꞌra diagurreemmo. Togo assineemmohu Gambooshshu Addaraashera, injaa hooginkero kayinni roduuwu mine woy wole dahaawino bayicho ikkara dandaanno. Aye coyino iillinkero Magano magansiꞌrate gamba yaa diagurreemmo. Roorenkanni Yihowa barri gamba yaanno woyite, ‘mimmitinke ledo albinni roorsine gamba’ yaa hasiissannonke.—Ibiraawoota 10:24, 25 nabbawi.
8. Albillitte sabbankeemmo sokka soorrantara dandiitannohu hiittoonniiti?
8 Bayiru qarri yannara dudumbeemmo sokka soorrantara dandiitanno. Xaa yannara Maganu Mangisteha dancha duduwo dudumbanninna manna rosaano assate woꞌnaallanni heeꞌnoommo. Hattee yannara dudumbeemmo sokka kayinni jajjabba kaade gede kaajjado ikkitara dandiitanno. (Aju. 16:21) Hatte yannara Sheexaanu alame baꞌannota dudumbeemmoha ikkara dandaanno. Sabbankeemmo sokka maatironna ma garinni sabbankeemmoro hatte yannara anfeemmo. Lowo diro soqqammanni keeshshinoommo garinni soqqammeemmonso wolu garinni soqqammeemmo? Hattee marrayi anfeemmo. Ikkihano ikkiro, worbimmatenni Yihowata yoote sokka duduwate qoosso afiꞌneemmoha ikkara dandaanno!—Hiz. 2:3-5.
9. Sabbankeemmo sokka buusantino daga massitansara dandiitanno? Ikkirono maa dihuluullammeemmo?
9 Sabbankeemmo sokka buusantino daga hanqissannonsa daafira, horo sabbaka agurreemmo gede assate woꞌnaaltara dandiitanno. Ikkirono, xaa yannara soqqanshonkera Yihowa addaxxineemmonte gede hattee yannarano kaaꞌlankera iso addaxxa dandiineemmo. Yihowa fajjosi wonshineemmo gede wolqa aannonketa dihuluullammeemmo.—Mik. 3:8.
MAGANU MANNA SIꞌNANNI WOYITIRA QIXXAABBE
10. Luqaasi 21:25-28 masaalloonni garinni rooru manni bayiru qarri yannara ikkannore lae ma ikkara dandaanno?
10 Luqaasi 21:25-28 nabbawi. Bayiru qarri yannara mannu mittoreno diꞌꞌikkanno yee hedinori alamete aana noori baalu baꞌꞌanna laꞌꞌanno woyite lowo geeshsha masanno. Tenne mannu ooso xagge baalante giddo roore tunsichu yannara, insa heeshshonke hoongeemmo yite waajjite huxidhanno. (Sof. 1:14, 15) Hattee yannara Yihowa mannira nafa heeshsho qarraataame ikkitara dandiitanno. Hatte yannarano alamete wido ikkinummokkinni heeꞌneemmo daafira qarrammammora dandiineemmo. Heeshshote hasiisannonkere nafa hoongeemmoha ikkara dandaanno.
11. (a) Kaphu ammaꞌno baꞌuhu gedensaanni alamete massagaanonna wolu manni ninke aana illachishannohu mayiraati? (b) Bayira qarra waajja hasiissannonkekkihu mayiraati?
11 Ammaꞌnonsa baꞌino manni Yihowa Farciꞌraasine magansidhanna laꞌꞌanno woyite lowo geeshsha hanqara dandaanno. Insa dagoomittete webisayite horoonsidhe hanqonsa wolootu affanno gede assitara dandiitanno. Buusantino daganna gashshaanchinsa Sheexaanu, baꞌukkinni gattinoti ninke ammaꞌno calla ikkitino daafira gibbannonke. Insara uullate aaninni baalanta ammaꞌno hunate mixidhino mixo diwoꞌmitannonsa. Hakko daafira insa ninke aana illachishshanno. Hattee yannara buusantino daga Maagoogi Googi ikkitanno.c Insa Yihowa manna siate mitteenni gamba yitanno. (Hiz. 38:2, 14-16) Hattee yannara ikkannoha mitto mittonka coye gudinse anfoommokki daafira yaandammora dandiineemmo. Ikkirono, bayira qarra waajja dihasiissannonke. Yihowa heeshsho gatisanno biddishsha aannonke. (Far. 34:19) ‘Gatonke barri iillinota’ anfoommo daafira ‘iima hinge laꞌneemmo.’d
12. “Ammanaminohunna wodanaamu borojjichi” albillitte daannorira qixxeesssanni noonkehu hiittoonniiti?
12 “Ammanaminohunna wodanaamu borojjichi” albillitte daannorira qixxeessanni keeshshinonke. (Mat. 24:45, NW) Lawishshaho, hanni 2016-2018 assiꞌnoommohu qoqqowu gambooshshiwa ronsoommore hendo. Konni gambooshshiwa shiqqino pirogiraame daara gambise noohu Yihowa barrira kaaꞌlitannonke akatta lossiꞌneemmo gede jawaachishshinonke. Hanni tenne akatta haranchunni lende laꞌno.
ALBINNI ROORE AMMANANTINOONNIRE, CINCITINANNIRENNA WORBUULLE IKKE
Bayira qarra gate saꞌꞌate xaanni qixxaabbe (Gufo 13-16 lai)h
13. Yihowara ammaname heeꞌra dandiineemmohu hiittoonniiti? Xaa yannara hatto assa hasiissannonkehu mayiraati?
13 Ammanama: Lamu kuminna tonaa lewunniti qoqqowu gambooshshi cuꞌmo “Yihowara Ammanantine Heedhe!” yitannote. Konni gambooshshiwa Yihowa ledo dancha jaalooma kalaqiꞌnummoro, isira ammanammoommore ikkineemmota ronsoommo. Qoleno, Yihowa giddonkenni huucciꞌnenna Qaalesi diinaggaambe nabbambe isiwa shiqa dandiineemmota ronsoommo. Hatto assinummoro, buutote qarra nafa qeele saꞌꞌate jawaante afiꞌneemmo. Sheexaanu alame bao gambissanno woyite albinni roore Yihowaranna Mangistesira ammanamme heeꞌra qarra ikkitannonke gede assannonkeri tuncu yaankera dandaanno. Mannu arrassanni qarrissankera dandaanno. (2 Phe. 3:3, 4) Hatto assannonkehu roorenkanni Sheexaanu alame aye doogonnino irkinseemmokki daafira ikkara dandaanno. Xaa yannara ammanamate akata loossiꞌneemmoha ikkiro, bayiru qarri yannarano ammanamme heeꞌra dandiineemmo.
14. (a) Xaa yannara Yihowa dirijjitera albisoota ikkite soqqantanni noo roduuwira albillitte mayi soorro heedhanno? (b) Hattee yannara ammanammoommore ikka hasiissannonkehu mayiraati?
14 Bayiru qarri yannara uullate aana Yihowa dirijjitera albisoota ikkite soqqantanno roduuwi soorrantanno. Bayiru qarri yannara uullate aana gatte noori buurantino Kiristaani Armagedooni olira kaaꞌlante olantara iimira hadhanno. (Mat. 24:31 Aju. 2: 26, 27) Hatto yaa, hattee yannara Aliidi Bisi ninke ledo uullate aana diheeꞌranno yaate. Lowo daga kayinni dirijjite ikkite heedhanno. Wolu geꞌreewi wido ikkitinori giddonni ikkadda ikkitinori albisoota ikkite soqqantanno. Insa kaaꞌlinenna Maganu insa widoonni qole aannonke biddishsha harunsine ammanammoommore ikkinoommota leellisha hasiissannonke. Ganteemmohu hatto assinummoro callaati!
15. Cincate akata lossiꞌra dandiineemmohu hiittoonniiti? Xaa yannara hatto assiꞌra hasiissannonkehu mayiraati?
15 Cinca: Lamu kuminna tonaa lamalunniti qoqqowu gambooshshi pirogiraame cuꞌmo “Hexxo Mudhitooti!” yitannote. Kuni gambooshshi iillannonke fonqolo cince saꞌꞌate dandoonke kaajjishiꞌneemmo gede kaaꞌlinonke. Qoleno cincineemmohu heeshshonke gari injiino daafira calla ikkinokkita ronsoommo. Cincate dandoonke kaajjishiꞌra dandiineemmohu Yihowa addaxxinummoro callaati. (Rom. 12:12) Yesuusi ‘Goofimarchu geeshsha cince kaajjannohu gatanno’ yee eino qaale horo hamboonke. (Mat. 24:13) Isi eino qaali aye qarri iillinkerono ammanamme heeꞌra hasiissannonketa leellishanno. Xaa yannara iillannonkeha mitto mittonka qarra dandiine saꞌnummoro, bayiru qarri hanafara albaanni ammananke kaajjado ikkitanno.
16. Worbuulle ikkate maa assa hasiissannonke? Xaa yannara albinni roore worbuulle ikka dandiineemmohu hiittoonniiti?
16 Worbimma: Lamu kuminna tonaa settunnihu qoqqowu gambooshshi pirogiraame cuꞌmo “Worbuulle Ikke!” yitannote. Konni gambooshshiwa worbuulle ikkineemmohu uminke dandoonni ikkinokkita ronsoommo. Cincineemmore ikkate Yihowa addaxxineemmonte gede worbuulle ikkateno iso addaxxa hasiissannonke. Albinni roore Yihowa addaxxa dandiineemmohu hiittoonniiti? Qaalesi barru baala nabbambenna hundi waro mannasi gatisinohu hiittoonniitiro hiincineeti. (Far. 68:20; 2 Phe. 2:9) Bayiru qarri yannara buusantino daga siꞌannonke woyite worbuulle ikkanna albinni roore Yihowa addaxxa hasiissannonke. (Far. 112: 7, 8; Ibi. 13:6) Xaa yannara Yihowa addaxxinummoro Googi siannonke woyitira hasiissannonke worbimma afiꞌneemmo.e
GATOꞌNE QUQQUXANTINE AGADHE
Muli yannara Yesuusinna iimi olantosi Armagedooni olinni Maganu diinna hunate dagganno! (gufo 17 lai)
17. Armagedooni ola horo waajja hasiissannonkekkihu mayiraati? (Aaniidi qoolira noo misile lai.)
17 Sai birxichira ronsummonte gede ninke giddo rooru heeshshonke diro woꞌma heeꞌnoommohu goofimarchu barri giddooti. Qoleno, bayira qarra gate saꞌꞌate hexxo noonke. Tini alame Armagedooni olinni woꞌmunni woꞌma baꞌanno. Ikkirono horo waajja dihasiissannonke. Mayira? Korkaatuno kuni Maganu olaati. (Law. 1:33; Hiz. 38:18-20; Zak. 14:3) Yihowa hajajonni Yesuusi Kiristoosi olanto massaganno. Reyotenni kaꞌinori buurantino Kiristaaninna kiirre gundannikki sokkaasine isi ledo kaaꞌlante olantanno. Insa Sheexaanunna agaanintesi hattono uullate aani olantonsa ledo olantanno.—Dan. 12:1; Aju. 6:2; 17:14.
18. (a) Yihowa maa assara qaale eino? (b) Yohaannisi Ajuuja 7:9, 13-17 kultanno garinni bayira qarra gante saꞌneemmota ammanneemmohu mayiraati?
18 Yihowa “ate shinara seekkinanni bagadi shuffano” yee qaale eino. (Isa. 54:17) Ammanante Yihowa magansidhannoti lowo daga bayira qarra gatte saꞌanno! Hakkiinni isira soqqantanni heedhanno. (Yohaannisi Ajuuja 7:9, 13-17 nabbawi.) Qullaawu Maxaafi albillitte bayira qarra gante saꞌneemmota ammanneemmo gede assannonkeha lowo korkaata kulannonke! Yihowa “halaalaasine agarannota” anfoommo. (Far. 31:23) Yihowa baxannohunna iso guwisiꞌrannohu baalu isi qullaawa suꞌmasi ayirranno gede assanna lae hagiidhanno.—Hiz. 38:23.
19. Albillittete hiitti kaajja hexxo noonke?
19 Layinki Ximootewoosi 3: 2-5, Sheexaanu nookkitera haaro alamera heeꞌranno manni daafira kultannoha ikkoommero, insa akati daafira mayine borreessinanniro hedi. (“Hattee Yannara Mannu Akati Hiittooha Ikkanno?” yitanno saaxine lai.) Aliidi Bisi miila ikke soqqaminohu Roduu Joorji Gaangasif togo yee coyiꞌrino: “Baalunku manni Yihowa magansiꞌrannoha ikkiro alame lowo geeshsha baxissannota ikkitanno. Muli yannara haaro alame giddo heeꞌrate qoosso afidhinanni. Yihowa gede hegerera heedhinanni.” Tini kaajja hexxooti!
FAARSO 122 Kaajjitine Uurre, Shashshafantinoonte!
a Muli yanna giddo mannu ooso baalate bayiru qarri daannota anfoommo. Hattee yannara Yihowa soqqamaasinera mayi iillannonsa? Yihowa ninke hattee yannara maa assinammora hasiꞌranno? Bayiru qarri yannara ammaname heeꞌrate xaa yannara hiittee akatta lossiꞌra hasiissannonke? Konni birxichira kuri xaꞌmuwara dawaro afiꞌneemmo.
b HARANCHO XAWISHSHA: Ninke Kiristaanaho yitanni heedhe, harunsaanonsa Magano Isi hasiꞌranno garinni magansidhanno gede rosiissannokki ammaꞌno baala suꞌmu Kiristinna yinanni.
c HARANCHO XAWISHSHA: Maagoogi Googi (haransine Googino yinanni) yaanno qaali bayiru qarri yannara Yihowa magansidhannore siate buusante kaꞌanno daga riqiwanno.
d LEKKAALLIIDI QAAGIISHSHA: Armagedooni oli hanafara albaanni mayi ikkannoro ledde afate Maganu Mangiste Gashshite No! (Amaaru Afoo) yaanno maxaafira fooliishsho 21 lai. Armagedooni oli yannara Maagoogi Googi Maganu manna sianno garanna Yihowa mannisira gaaramannohu hiittoonniitiro ledde afate Maaja 1, 2015nnita Agarooshshu Shae qoola 16-21 nna Halaalu Magansiꞌra Wirro Xintantu! (Amaaru Afoo) yaanno maxaafa fooliishsho 17 nna 18 lai.
e Lamu kuminna tonaa honsunnihu qoqqowu gambooshshi pirogiraame cuꞌmo “Baxillu Geedonniho” yitannote; konni gambooshshiwa ronsoommo rosi Yihowahu baxillu agarooshshi giddo heeꞌnoommota ammanneemmo gede assinonke.—1 Qor. 13:8.
f Sadaasa 1, 1994 Agarooshshu Shaera (Amaaru Afoo) nooha “Loosisi Harunsinosi” yaanno birxicho lai.
g MISILLATE XAWISHSHA: Bayiru qarri yannara Yihowa Farciꞌraasine boode gaamo ikkite worbimmatenni dubboho songote gambooshshe assidhanni no.
h MISILLATE XAWISHSHA: Ammanante Yihowa magansidhannoti lowo daga bayira qarra gatte saꞌino daafira hagiidhite no!