Ati Tenne Afootto?

Hundi waro loosiisaanchu woy soqqamaanchu loosi maati?

HUNDA mittu soqqamaanchi woy loosiisaanchi wolu manchi qae woy jajja sooreessa ikke towaatanno. “Loosiisaancho” yine tirroonnihu Ibiraawootunna Giriikete Afii qaali aliidi laꞌꞌaancho woy qaete sooreessa kulannoho.

Yaiqoobi beetti Yooseefi Gibitsete gobbara borojjicho ikke noo yannara, mootichisi qaera loosiisaancho ikke soqqamino. Isinni Gibitsaawichu mootichisi, “noosi jajja baala [Yooseefi] anga worino.” (Kal. 39:2-6) Yannate gedensaanni Yooseefi Gibitsete gobbara wolqaataamo gashshaancho ikki yannara isino qaesira loosiisaancho shooꞌmino.—Kal. 44:4.

Yesuusi waro, baattote annuwa irshinsawiinni xeertidhe katamaho heedhanno. Hakko daafira, insa gate loosanno kiranya loosiissannore shoontanno.

Loosiisaancho ikkate ikkadda ikkannohu hiittoo mannaati? Umi xibbi diro heeꞌrinohu Kaalimeyila yinannihu Roomu borreessaanchi, loosiisaancho woy sooreessa ikke shoomamanno borojjichi “looso loonsanni gara seekke afinoha ikka hasiissannosi” yiino. Kuni loosiisaanchi “silxaanesi horoonsiꞌre woloota miicannokkiha ikkirono, loosaasine lashshi assannoha ikka dihasiissannosi.” Kuni borreessaanchi lede togo yiino: “Baalunkunni roore losiisaanchu afinokki coye afoommo yee hedannoha ikka dihasiissannosi; hattono woꞌmante yannara haaro coye rosate quqquxamannoha ikka hasiissannosi.”

Maganu Qaali Kiristaanu songo giddo loonsanniha mito looso xawisate loosiisaano woy soqqamaano yaanno qaale horoonsiꞌranno. Lawishshaho, soqqamaasinchu Pheexiroosi, Kiristaanu Maganu elto soqqamaano ikkino daafira, ‘Maganu uyinonsa elto mimmitoho soqqamate’ horoonsiꞌranno gede jawaachishino.—1 Phe. 4:10.

Yesuusino Luqaasi 16:1-8 mittu danchu loosiisaanchi lawishsha kulino. Qoleno, isi moote ikke bayicho amadanno yanna leellishanno malaate masaalotenni kuli yannara, “ammanaminohanna wodanaamo borojjicho” woy “ammanamino soqqamaancho” shoomannota kule harunsaanosira qaale eino. Konni soqqamaanchihu qaru loosi, goofimarchu yannara Kiristoosi harunsaanora ayyaanaamittete sagale ganye shiqishate. (Mat. 24:45-47, NW; Luq. 12:42) Ninkeno ammanamino borojjichi woy soqqamaanchi qixxeessannotanna alamete doyichora heeꞌranno mannira shiqishannota ammana kaajjishshanno borro afiꞌrankenni tashshi yaannonke.