Qaagatto?

Tayixeta 2019nnita Agarooshshu Shae metseetta horoonsidhe aante noo xaꞌmuwara dawaro qola dandaatto?

Yihowa “Ate shinara seekkinoonni bagadi shuffanno” yee eino qaali mayi tiro afiꞌrino? (Isa. 54:17)

Mitte gimbe wolqaataame wishonni agartannonkente gede, Yihowano ‘diinu foorarinni’ agarannonke. (Isa. 25:4, 5) Diinnanke geedote gawajjo iillishshankera didandiitanno.—w19.01, qoola 6-7.

Maganu Kanaani mannanna finqila Israeelete daga qorichishino gari, taashshosi leellishannohu hiittoonniiti?

Maganu foortannorira, hattono meentonna qaaqquulle miccannorira yoo yiino. Isi, dagasi isira hajajantannohanna woloota xiibbannokkiha ikkiro maassiꞌrannonsa.—w19.02, qoola 22-23.

Yihowa Farciꞌraasincho ikkinokki manchi huuccanno woyite maa assa hasiissannonke?

Togoo yannara, ayirrinyunni sammi yaa dandiineemmo; ikkollana “hamiiꞌni” diyineemmo, hattono anga iima qolle dikayinseemmo. Ninke wodaninkenni huucciꞌra dandiineemmo.—w19.03, qoola 31.

Qaaqquulle bushiisha mageeshshi cubbooti?

Qaaqquulle bushiisha insa, songo, gashshootenna Magano baddalate. Songote cimeeyye, qaaqquulle bushiishino yinoonni mancho gashshaanote kulle yitanno higge ayirrissanno.—w19.05, qoola 9-10.

Hedonke haaroonsiꞌra woy biddi assiꞌra dandiineemmohu hiittoonniiti?

Sase coye assa hasiissannonke: Yihowa huucciꞌra, hedonke biddi assiꞌrate mixiꞌne hiinca, hattono jaalla qorophine doodha.—w19.06, qoola 11.

Dartu iillannonke woyitira xaanni qixxaawa dandiineemmohu hiittoonniiti?

Yihowa ledo noonke jaalooma kaajjishiꞌno. Isi baxannonketanna horo tuge agurannonkekkita addaxxino. Qullaawa Maxaafa barru baala nabbambo, hattono huuccatto ganyine assiꞌno. Baxissannonke qummeeshshuwanna ayyaanaamittete faarso wodanaho wodhino.—w19.07, qoola 2-4.

Maatenke miilla gattanno gede kaaꞌlate maa assa dandiineemmo?

Hedonsa huwatate woꞌnaala, amanyootinkenni dancha lawishsha ikka, hattono cincineemmorenna hayyoota ikka hasiissannonke.—w19.08, qoola 15-17.

Yesuusi Maatewoosi 11:28 coyiꞌrino garinni fooliishsho afiꞌra dandiineemmohu hiittoonniiti?

Baxillaano aliidi laꞌꞌaano noonke, ledonke loossannori baalunkunni woyyitinoreeti, qoleno taalle nookki loosi noonke.—w19.09, qoola 23.

Maganu fajjosi wonshineemmo gede wolqanna hasatto aannonkehu hiittoonniiti? (Fil. 2:13)

Maganu Qaale nabbambeemmonna hiincineemmo woyite, isi fajjosi wonshineemmo gede wolqanna hasatto oye kaaꞌlannonke. Qoleno dandoonke woyyeessiꞌneemmo gede ayyaanasi aannonke.—w19.10, qoola 21.

Mitto coye doodhinammora albaanni maa assa hasiissannonke?

Assa hasiissannonkeha onte coye: Seekkite xiinxalli, hayyo afiꞌrate huucciꞌri, hakko coye doodhatto gede assinoheri maatiro hedi, mixo fushshiꞌri, hattono quwa saꞌooti.—w19.11, qoola 27-29.

‘Lubbo direyitanno’ yaanno rosi hanafinohu Sheexaanu Heewani soꞌrisiisi yannaraatini?

Hatto dilawanno. Sheexaanu Heewanira reyitannota kulinose ikkinnina, maalise reyi gedensaanni reyitukki gattanno lubbo noota dikulinose. Kaphu roso rosiisanno manni Baote Wayinni digatino. ‘Lubbo direyitanno’ yaanno rosi hanafinohu, Maganu Baabeeli gimbe minanno manni uulla woꞌmate billaallanno gede assara albaanni ikkikki digatino.—w19.12, qoola 15.