Maganunna Kiristoosi Daafira Kulanno Halaale
Mannu lowo maganna magansiꞌrannoha ikkirono, halaalaanchu Magani mitto callaho. (Yohaannisi 17:3) ‘Woꞌmunkura Aliidihu,’ baalankare kalaqinohunna heeshsho baalate Buicho isooti. Magansiꞌra hasiissannonkehu iso callaati.—Daanieeli 7:18; Yohaannisi Ajuuja 4:11.
Maganu ayeti?
Maganu suꞌmi hundite Qullaawa Borro giddo 7,000 MEDDI YAANNO BAYICHO NO
YIHOWA Maganu suꞌmaati
MOOTICHA, MAGANO, ANNA—Yihowata maaragete suꞌmuwa
Maganu Ayeti? Maganu Suꞌmi Ayeti? Maganu umisi, “Ani Yihowaati; suꞌmiꞌya konneeti” yiino. (Isayaasi 42:8, NW) Maganu suꞌmi Qullaawu Maxaafi giddo, 7,000 meddi yaanno bayicho no. Ikkollana, batinye Qullaawu Maxaafi tiro giddo, Maganu suꞌma “Kaaliiqa” woy “Mooticha” yaannohu maaragete suꞌminni soorrinoonni; hatto assa gara diꞌꞌikkitino. Maganu jaalasi ikkattora hasiꞌranno daafira, ‘suꞌmasi woshshatto’ gede koyisinohe.—Faarso 105:1.
Yihowata Maaragete Suꞌmuwa. Qullaawu Maxaafi Yihowa, “Magano,” “Woꞌmanka Dandaannoha,” “Kalaqaancho,” “Anna,” “Mootichanna” “Woꞌmunkura Aliidi Mooticha” yaanno. Qullaawu Maxaafi giddo noote batinye huuccattora, mannu Yihowata maaragete suꞌmuwanna Yihowa yinanniha gillete suꞌmasi horoonsiꞌrino.—Daanieeli 9:4.
Maganu Hiittooho? Maganu illete leellannokki ayyaanaati. (Yohaannisi 4:24) Qullaawu Maxaafi, “Magano lae egennino manchi dino” yaanno. (Yohaannisi 1:18, NW) Qoleno, Yihowa dadillarano hagiidharano dandaannota kulanno.—Lawishsha 11:20; Faarso 78:40, 41.
Dhagge Ikkitannota Maganu Akatta. Maganu baalunku gari manna mitte illenni laꞌꞌanno. (Soqqamaasinete Looso 10:34, 35) Isi, ‘maarannohonna hanqoho muddamannokkiho, mararaanchoho, hattono ammanamasinna bagamannokkihu baxillisi batiꞌraho.’ (Fulo 34:6, 7) Ikkollana, roore dhagge ikkitannoti Maganu akatta shoolete.
Wolqa. Maganu ‘Woꞌmankare Dandaannoha’ ikkino daafira, coyiꞌrinore baala wonshannoti dannu nookki wolqa noosi.—Kalaqama 17:1.
Hayyo. Maganoho taalle nookki hayyo noosi. Qullaawu Maxaafi isi callu hayyicha ikkinota kulannohu iseraati.—Roomu Sokka 16:27.
Taashsho. Maganu woꞌmante yannara gara ikkinore assanno. “Loosisi guutaho,” qoleno halaale diwiranno.—Marro 32:4.
Baxille. Qullaawu Maxaafi, “Maganu baxilleho” yaanno. (1 Yohaannisi 4:8) Maganu baxille leellishannoha calla ikkikkinni, isi umisi baxilleho. Maganu baalankare assannohu taalle nookki baxillisinniiti; tini ninke duucha doogganni kaaꞌlitannonke.
Maganoho Mannu Ledo Noosi Jaalooma. Maganu iima heeꞌrannoho baxillaancho Annankeeti. (Maatewoosi 6:9) Iso addaxxineemmoha ikkiro, jaallasi ikka dandiineemmo. (Faarso 25:14) Maganu huuccattotenni isiwa shinqeemmo gede koyisinonke; isinni Qullaawu Maxaafi, “Kiꞌnere malannohu isootina, qarrisinoꞌnere baala isi aana tuqqe” yaanno.—1 Pheexiroosi 5:7; Yaiqoobi 4:8.
Maganunna Kiristoosi Badooshshi Maati?
Yesuusi Maganu Beettooti. Yesuusi baxxino kalaqamaati; korkaatuno Maganu xaaddotenni kalaqinohu iso callaati. Qullaawu Maxaafi Yesuusa Maganu Beetto yaannohu iseraati. (Yohaannisi 1:14) Yihowa bayira Beettosi Yesuusa kalaqi gedensaanni, wole kalaqama baala kalaqinohu Yesuusi widoonniiti.—Lawishsha 8:30, 31; Qolasiyaasi Sokka 1:15, 16.
Yesuusi, ‘Ani Maganu Ledo Taaloho’ Yee Horo Diegennino. Hatteentenni isi, “Ani isiwiinni dayommoho’ hattono ‘isi soyinoeho’ yiino. (Yohaannisi 7:29) Yesuusi mitte yannara rosaanchosi ledo hasaawanni, “Anniꞌyawanna Anniꞌnewa, Maganiꞌyawanna Maganiꞌnewa” yee coyiꞌrino. (Yohaannisi 20:17) Yesuusi reyita, Yihowa reyotenni kayisinosi; qoleno iima lowo silxaane uyinosi, hattono qiniitesiinni ofollanno gede assinosi.—Maatewoosi 28:18; Soqqamaasinete Looso 2:32, 33.
Yesuusi Kiristoosi Maganunniwa Shiqatto Gede Kaaꞌlannohe
Yesuusi uullara dayinohu Annisi daafira rosiisankeraati. Yihowa umisi Yesuusi daafira coyiꞌranni, “Baxeemmohu Beettiꞌya konneeti; isi yaannota macciishshe” yiino. (Maarqoosi 9:7) Yesuusi geeshsha Magano afinohu mittuno dino. Yesuusi togo yiino: “Beetto agurranna woy Beettu xawise kulinosiha agurranna Anna afannohu mittuno dino.”—Luqaasi 10:22.
Yesuusi Annisi akatta guutu garinni leellishino. Yesuusi Annisi akatta guutu garinni leellishino daafira, “Ane afinohu annaꞌyano afino” yiino. (Yohaannisi 14:9) Yesuusi coyiꞌrinorinninna assinorinni Annisi baxille leellishe, manna Maganunniwa shiqanno gede kaaꞌlino. Isi togo yiino: “Doogono, halaaluno, heeshshono aneeti. Ane widoonni ikka hoogiro, ayino Anniꞌyawa daannohu dino.” (Yohaannisi 14:6) Isi lede togo yiino: “Magano Anna ayyaanunninna halaalunni magansidhannorira yanna dagganni no; . . . Maganu Annu hasiꞌrannorino hattoonni magansidhannoreeti.” (Yohaannisi 4:23) Yihowa, isi daafira halaale afa hasiꞌrannoha ate gedee manna hasiꞌranni no!