Albillittete Yanna Daafira Kulanno Halaale
‘Albillitte mayi ikkanno?’ yite hedde egennootto? Qullaawu Maxaafi muli yannara mannu ooso baalate heeshsho ledo xaadooshshe afiꞌrinori ikkannota kulanno.
Yesuusi “Maganu gashshooti rahe noota” huluullammeemmokkihu mayiraatiro coyiꞌrino. (Luqaasi 21:31) Isi lowo oli, jajjabba baattote huxano, hude, dhibbunna wole coyibba ikkitannota masaalino; yannankera kuri coyibba woꞌmitanna laꞌnanni heeꞌnoommo.—Luqaasi 21:10-17.
Qullaawu Maxaafi ‘goofimarchu barra’ mannu akati bushe anganni fulannota kulanno. Hanni 2 Ximootewoosi 3:1-5 noo hedo laꞌno. Mannaho konni qummeeshshira kulloonni akatta noonsata laꞌꞌatto woyite, tini masaalo yannankera woꞌmitanni noota huwatattora dandaatto.
Tini masaalo woꞌmase maa leellishshanno? Maganu Mangiste uullate aana noo coye woꞌmunni woꞌma soorritanno yanna rakkinota leellishshanno. (Luqaasi 21:36) Maganu Qullaawu Maxaafi giddo, uullateno ikko mannu oosora dancha coye abbeemmo yee qaale eino. Hanni kuri giddo mito laꞌno.
DANCHA GASHSHOOTE
“Addi addi gobbara heeꞌrannohu, addi addi afiinni coyiꞌranno manni soqqamannosi gede [Yesuusira] roorre, ayirrinyunna wolqa aamantusi. Roorresino hegerete; gashshootisirano gawalo dino.”—DAANIEELI 7:14.
Hatto yaa mayyaate? Maganu alame woꞌma gashshitannota kaajja Mangiste xinte, Beettosi Moote assino; tenne Mangiste hunda hagiirru noo heeshsho heeꞌra dandaatto.
GUUTA ORDU FAYYIMMA
“‘Dhiwamoommo’ yaannoha dianfanni.”—ISAYAASI 33:24.
Hatto yaa mayyaate? Dhibbunna bisu xeꞌne noohekkiha hegerera heeꞌratto.
UULLA WOꞌMATE KEERU HEEꞌRANNO
“Baattote qacce geeshsha nooha ola uurrisanno.”—FAARSO 46:9.
Hatto yaa mayyaate? Oluno ikko olu abbanno gawajjo diheedhanno.
UULLATE AANA DANCHU MANNI WOꞌMANNO
“Bushuullu shiima yannalla keeshshitanno. . . . Shaqqaddu kayinni baatto ragidhanno.”—FAARSO 37:10, 11.
Hatto yaa mayyaate? Bushuullu diheedhanno; uullate aana Maganoho hajajamanno manni calla heeꞌranno.
UULLA GUDISANTE GANNATE IKKITANNO
“[Mannu] mine miꞌne heeꞌranno; woyineno kaasiꞌre laalose itanno.”—ISAYAASI 65:21, 22.
Hatto yaa mayyaate? Uulla woꞌma biifado ikkitanno. Maganu, fajjosi uullate aana ikkitanno gede huucciꞌneemmo huuccattora dawaro qolanno.—Maatewoosi 6:10.