Gillete Killile Adhitanni Nootto?
1. Gillete killile maati?
1 Gillete killile maati? Gillete killile, songuwa haammata killile afidhinoha ikkiro, mittu mittunku halashshaanchira uyinannite; tini killile atera multannota ikkitara dandiitanno. Darajjaino Manna yinanni maxaafira qoola 103 aana togo yitanno assaawe no: “Mulannohewa gillete killile adha, soqqanshote gaaꞌmootto yanna seekkite horoonsiꞌratto gede kaaꞌlitannohe. Qoleno, wolu halashshaanchi ledokki killilekkira soqqamanno gede koyisa dandaatto.”
2. Gillete killile adha gaamote ledo soqqanshora lexxo ikkite kaaꞌlitannohu hiittoonniiti?
2 Gaamote Ledo Soqqanshora Lexxote: Loosu bayichira multannohe killile adhittoro, barri sagale fooliishsho yannara woyi loosuwiinni qae higatto wote, ati loosatto qachira loosanno halashshaanchi ledo soqqansho fula dandaatto. Qaekkira multanno killile adhittoro kayinni, injaannohe wote atino maatekkino hawarro hawarro soqqama dandiitinanni. Simirriitete gambooshshe haꞌra hoogittoro, sabbaka jammarattora albaanni Yihowa marraꞌꞌannohe gede huucciꞌra hasiissannohe. (Fil. 4:6) Ikkollana, umikki killilera calla soqqantanni simirriitete gambooshshe haꞌra dea dihasiissannohe. Hakko iso lowo roduuwi soqqansho fultanno barra yaano, Qidaamenna Sambata, simirriitete gaamo ledo soqqama woyyitanno.
3. Gillete killile adhiniro afiꞌnanni horo maati?
3 Afiꞌnanni Horo: Umikki killile heedhuhero, injiitannohe yanna baalate sabbaka dandaatto base afiꞌritto yaate. Qoleno simirriitete gambooshshe haꞌratto yanna gattanno daafira, lowo yanna soqqama dandaatto. Tini mitoota kaaꞌlaancho suwisaancho woyi woꞌma yanna suwisaancho ikkite soqqantanno gede kaaꞌlitinonsa. Hasatto noonsa manna hakko qachikkira afiꞌratto daafira, galagalte marte hasaawisatenna Qullaawa Maxaafa xiinxallisate injaannohe. Lowo halashshaano gillete killile afiꞌransa, hakko iso killile wolu roduuwira uyinanni gede qolta geeshsha marro marro higge hatte killilera soqqamansa, minu anni ledo albinni roore egennamatenna huluullamannonsakki gede assiꞌrate kaaꞌlitinonsa. Gillete killile adhiteenna atino maatekkino albinni roore soqqama dandiitinakka?—2 Xim. 4:5.