Masaalaanote Haꞌruma Hadhe—Yoonaasi
1. Yoonaasira hiitti dancha akatta noosi?
1 Masaalaanchu Yoonaasire heddinanni wote mayi qulli yaannoꞌne? Mitu manni iso shashanna godowa kaajjado ikkinohu gede asse hedara dandaanno. Ikkollana isi shooshaqa, worbanna umisi xiqime agurannoha ikkinota leellishino. Togooti maalaꞌlissanno akatta noosihu Yoonaasi “haꞌruma haꞌra” dandiineemmohu hiittoonniiti?—Yaq. 5:10.
2. Yoonaasi lawishsha harunsine shooshaqoota ikka dandiineemmohu hiittoonniiti?
2 Shooshanqe: Yoonaasi umi qara, sonkoonnisiwa agure wolewa hige xooqino. Tini maalaꞌlissannota diꞌꞌikkitino, korkaatuno Asooru manni lowo geeshsha bushahonna kaajjaddaho, qoleno Nennewe “mundeete katama” yinanni. (Nah. 3:1-3) Ikkollana Yihowa Yoonaasi seejjinosi; Yoonaasi qole, galagalle sonkisita maahoyye yee hajajame shooshaqa ikkinota leellishino. (Law. 24:32; Yon. 3:1-3) Isi umo xooqinoha ikkirono gedensaanni Yihowa fajjo assino. (Mat. 21:28-31) Ninkeno seejjo uyininkero woy soqqanshote killilenke qarrissannota ikkituro nafa, dancha duduwo duduwate murciꞌne kaꞌnoommo?
3. Soqqanshonke yannara worbootanna uminke xiqime agurreemmore ikkinoommota leellisha dandiineemmohu hiittoonniiti?
3 Worbimmanna Meessi Xiqime Agura: Yoonaasi, gara ikkitinokki wussaane wossaꞌnasi markaawete aana noo mannira adaga abbitinota afiti, heeshshosi sayise aate maahoyye yiino. (Yon. 1:3, 4, 12) Isi uyinoonnisi sokka Nennewete mannira kulate, katamaho mereero marino; tenne assinohu Yihowa firde duduwate injaanno bayicho hasanni ikkikki digatino. Togoore assannohu shasha mancho ikkikkinni worba Maganu masaalaanchooti! (Yon. 3:3, 4) Ninkerano, taqaawwantannori noowa waajjinummokki farciꞌrate Maganu aanno jawaante hasiissannonke. (Looso 4:29, 31) Yannankenna woxenke soqqanshote horoonsiꞌrate meessi xiqime agura hasiissannonke.—Looso 20:24.
4. Yihowa masaalaanoha dancha lawishsha hiincate yanna gaaꞌma hasiissannonkehu mayiraati?
4 Yihowa masaalaanore kultanno xagge nabbabbini kiiro, insara iillinori kiꞌnera iillinohu gede assitine heddinanniha ikkiro horo afidhinanni. Kiꞌneneeto togo yitine xaꞌme: ‘Ane ikkoommoro ma asseemmokka? Isiha dancha lawishsha harunsa dandeemmohu hiittoonniiti?’ (Ibi. 6:11, 12) Albillitte Maganu Mangiste Soqqanshonkera fultanno birxichuwa, wole ammanantino masaalaano xaggenni ronseemmoha dancha roso kultannonke.