Xaꞌmote Saaxine
◼ Gambooshshunna soqqanshote yannara mobayile horoonsiꞌra lainohunni harunsa hasiissannonketi Qullaawu Maxaafiti xintu seerubba hiikkuriiti?
“Duuchunku Coyira Yanna No.” (Mek. 3:1): Mobayile mannu baxi yannara kuꞌu kuꞌuyira sokka borreessannonna hasaawanno gede kaaꞌlitanno. Ikkollana, Kiristaanu mobayilensa horoonsiꞌra hasiꞌrannokki yanna no. Lawishshaho songote gambooshshinke yanna, Yihowa magansiꞌneemmote, ayyaanaamo biddishsha afiꞌneemmotenna mimmitonke jawaachinsheemmote. (Marro 31:12; Far. 22:22; Rom. 1:11, 12) Konni daafira, gambooshshu base iillineemmo wote mobayilenke cunfe gambooshshu gedensaanni faꞌna woyyitanno. Lowo geeshsha mudditanno hajora dowwollankera dandiinanni yine hendeemmoha ikkiro, mobayilenke woloota rabbashshannokki gede assine cunfummokkinni wodha dandiineemmo.
‘Danchu Duduwira Yitine Baalankare Asse.’ (1 Qor. 9:23): Mito wote soqqanshonke yannara mobiyilenke horoonsiꞌneemmo gede assannonkehu baqete korkaati heeꞌranno. Lawishshaho, simirriitete gambooshshe marraꞌꞌanno rodii killilete giddo wole widoonni soqqantanni noo roduuwi noo gara afate dowwolara dandaanno. Mito wote halashshaano hasatto noosi mancho wirro hasaawisate woy Qullaawu Maxaafi rosaancho xiinxallisate martara albaanni, hakko iso xeertiꞌre nooha ikkiro dowwoltasira dandiitanno. Mobayile noonkeha ikkiro, manna hasaawinsanni heeꞌneenna rabbashshannonkekki gede qoropha hasiissannonke. (2 Qor. 6:3) Ledonke soqqantannori manna hasaawisse kaꞌara agarreemmo wote, wole jaallankera dowwolantenni woy mobayiletenni sokka borreessantenni, soqqanshonkerenna ledonke soqqantanni noo roduuwire assaawa hasiissannonke.
Wolu Mannira Assaabbe. (1 Qor. 10:24; Fil. 2:4): Roduuwu hiikkaanni soqqantanni nooro afate woy ledoꞌya soqqamanno manna afiꞌrate silke dowwoleemmollana yine simirriitete gambooshshe barrisiꞌre mara dihasiissannonke. Gedeꞌnine marrummoro, marraꞌꞌanno rodii haaro ikke maddawanno gede assinanni heeꞌnoommo yaate. Mito wote wolqankera aleenni ikkino coyi barrisiꞌneemmo gede assankera dandaanno. Ikkirono yannante haꞌra roso assiꞌranke, Yihowa qixxeessino qixxaawo, gambooshshe marraꞌꞌanno rodoonna woloota roduuwanke ayirrinseemmota leellishshanno.