Konne Birxicho Hiittoo Manni Baxakka?

1. Agarooshshu Shaenna Baqqi Yiiyye! yinanni metseetta nabbambeemmo wote, maa heda hasiissannonke? Mayira?

¹ Agarooshshu Shaenna Baqqi Yiiyye! yinanni metseettanke qixxeessinannihu alame woꞌmate noo daga hendeeti. Konni daafira, fultanno birxichuwa babbaxxitino hajore kultannote. Metseetta adhine nabbambeemmo wote, nabbambanni heeꞌnoommo birxichi hiittoo manna baxisara dandaannoro hedanna hattoo mannira aate malaatisiꞌra hasiissannonke.

2. Manna baxissara dandiitannoti metseettankera fultanno birxichuwa hiikkuriiti?

² Haarote fultinote Agarooshshu Shae giddo, ledokki loosanno manchi ledo hasaabbinoonni coyi ledo xaado afiꞌrinori no? Tini metseete, fiixikkira kaaꞌlara dandaannoha maatete heeshshore kulanno birxicho amaddino? Baqqi Yiiyye! yinanni metseetenkera xawinse kulloonni gobba haꞌrate hedo noosihu afootto manchi no? Metseettanke giddo killileꞌnera noota daddalu woy wole uurrinsha baxissara dandiitannoti no? Lawishshaho, rosu minire kulanno woy fayyimma agadhate ledo xaado afiꞌrino birxicho amaddino metseete rosu minnanna fayyimmate uurrinshuwa baxissara dandiitanno. Higgete looso loossanno uurrinshuwa, jaddonnire kultanno metseete baxxara dandiitanno.

3. Metseettankera fultanno birxichuwa hiittoo manna baxissara dandiitannoro hende elanke guma afidhinota leellishshanno temokkiro kuli.

³ Afiꞌnanni Guma: Wodiidi Afirikira mittu minaanninna minaama, “Ooso Sirnyaataamma Ikkitanno Gede Assine Lossiꞌnanni Gara” yitannota Birra 2011⁠nnita Baqqi Yiiyye! yinanni metseete nabbawi gedensaanni, killilensa giddo nootera 25 rosu minnara silke dowwoli. Kuri giddo 22 rosu minna metseetta adhite rosaanonsara beekkino. Hatte gobbara wolu minaanninna minaamano, killilensara noote rosu minnara tenne metseete haammachishe massino. Tenne rosu minna giddo mittowa, rosiisaano tenne metseete saammintete kiiro rosaanote nabbawatenna isenni biddishsha aate wossantino. Kuni minaanninna minaama temokkironsa woradu aliidi laꞌꞌaanchira kulino. Hakkiinnino isi woradisi giddo noo songuwa killilensara noota rosu minna marte coyishiishshanno gede jawaachishino. Songuwa tenne metseete albinni roore hajaccitino daafira, hakko nooti sinu biiro haaro ikkite attantino!

4. Metseettanke lowo mannira iillitanno gede assa hasiꞌneemmohu mayiraati?

⁴ Metseettanke, alamete aana ikkanni noori mayira ikkannoronna ninke ma assa hasiissannonkero xawissanno; hattono Qullaawu Maxaafiwanna Maganu Mangistewa alba hingeemmo gede assitannonke. Uullate aana “gato dudubbanno” metseetta tenne callaati. (Isa. 52:7) Konni daafira, wolqanke assitu geeshsha lowo mannira tuqisa hasiꞌneemmo. Nabbambeemmo wote, ‘Konne birxicho hiittoo manni baxakka?’ yine hedanke tennera kaaꞌlitannonke.